Batate, ba John Mills babambwitikile mu 1913 mu nganda ya New York, te bali na myaka 25. Ndolome Russell ikeye wendekele ñanda ya cimbwitiko. Kutundaho, batate bajalukilile ku Trinidad, co bakambatele Constance Farmer uje wapwile muka-kulilongesa Mbimbiliya wa ntwima. Batate bakele na kukwasa kabusamba kabo William R. Brown, mu kumwesa “Photo-Drama of Creation.” Batwaleleleleo kupangela hamo kweta noho ha batuminine Brown na naanga yendi ku West Africa mu 1923. Batate na banana baje bakale na lilabelelelo lya kukayoya mwilu, bakebo basalele mu Trinidad.

Mwimo lyetu twapwa tuba 9, co ntwatwa bamwindwile Rutherford uje wapwile pulezidenti wa Watch Tower Bible and Tract Society ha simbu ije. Yange njasemukile ha 30 December, 1922. Co banjindwile Clayton J. Woodworth uje wakele na kutala bya The Golden Age (ibatumbula lelo ngwabo Toneni!). Bisemi betu batukobelesele sikola, oloni batukwasele tulyakele bilengo bya ku sipilitu. Banana bakele na cashu ca kulumbununa bisoneka na kutushongangeya tukulaele Njambi. Batateco bazemene mizimbu ya mu Mbimbiliya. Nga bendeka bakele na kupangesa na mubila wabo woshe mangana tulinge ngwe tumona bibatuleka.

Kulifwita kwabo kwatukwasele. Ha bana babanalume batanu, tu batatu twaile ku Sikola ya Ngilyande. Co bandokazi betu batatu balingile bupainiya ha myaka yaingi mu Trinidad na Tobago. Bisemi betu batulongesele mwamubwa na kutumwesa mwanja waubwa, co ‘batukunine mu Njubo ya Shukulu Kalunga Njambi.’ Majwi abo akutakamesa atukwasele kutwaleleleo ‘kukola mwamubwa mu Njubo ya Shukulu Kalunga.’—Myaso 92:13.

Ha njubo yetu hakeho habakele na kuliwanena banu mangana baye mu lihya. Co bapainiya bakele na kusimutwiya bya ndolome George Young, ka mishinali wa ku Canada uje wakupangelele mu Trinidad. Bisemi bangeco bakele na kwendeka bya nanga ya Brown, nomwo mubakele na kupangela  hamo. Ha simbu eyi Brown na naanga yendi bakele ku West Africa. Bibakele na kusimutwiya byanjilingisile njishangumuke kwambulula tai njili na myaka 10.

Ha simbu ije mu magazini etu bakele na kusonekamo biñanda bije byakele na kufwefulula bulombelo bwa makuli, baka-mingoso ya linyanyamena na baka-bupolitiki. Mutwetele mu 1936, bakulunu ba mu bulombelo bwa makuli bashongangeyeye ngubulu wa fulumende ngwabo ashoke mabulu etu oshe. Twashwekele mabulu etu oshe, oloni twatwaleleo ku ana banu kweta noho hawahwililile. Twakele na kwenda mu bitapalo oku twalipakata mapapelo, co lalo twakele na kwambulula na bikinga kupangesa mapapelo na makadi. Co lalo twakele na kupangesa munyau wakukutiiya masipika. Kupangesa ou munyau kwatukwasele twambulwile mu mbonge ya Tunapuna na mu makolokolo a Trinidad. Oku kwatuzibisile manene kubwaha. Kukala mukati ka banu bakuhya ku sipilitu kwanjishongangeyeye njilikundike kuli Yehova na kunjimbwitika te njili na myaka 16.

Bukwasi bwa kutunda ku naanga yange na byuma binjaliwanene nabyo, byanjishongangeyeye njishake kukapwa kamishinali. Nameme munjaile ku Aruba na kupanga na ndolome Edmund W. Cummings mu 1944, anga bene njacishakele kupwa kamishinali. Ku canukiso ca mu 1945, twalanyele banu ba kupwa 10. Mwaka wateleko, mu Aruba bashimbikile cikungulukilo ca kulibanga.

Litangwa limo njambulwilile Oris Williams mu kutulukwa. Oris walingile bimata na kwamena bilongesa bya ku bulombelo bwabo. Oloni kwitila mu cilongesa ca Mbimbiliya, Oris walilongesele na kuzibisisa biyendeka Mbimbiliya, co bamumbwitikile ha 5 January, mu 1947. Mu kwita kwa simbu, twashangumukile kulizema, co twalyambata. Oris washangumukile kulinga bupainiya mu November 1950. Yange na Oris twalikuwile manene buyoye.

Mu 1955, batulanyele ku Sikola ya Ngilyande. Mutwakele na kulibwaesela bya kuya ku sikola, yange na Oris twalikelele bipangi, twalandesele njubo yetu na bikwata byetu, co twatundile mu Aruba. Lya 29 July,1956 twamanesele sikola ya Ngilyande ya bu 27, co batutumine ku Nigeria.

Oris mwanukile byuma bitwaliwanene nabyo wendekele ngwendi: “Sipilitu ya Yehova yasa kukwasa munu nameme aliwana na bukalu bwa kulisezaseza omwo alinga cipangi ca bumishinali. Munalume wange watondele kupwa kamishinali, oloni yange kunjashakele kupwa kamishinali. Njashakele kukala na njubo yange na kukala na bana. Oloni munjanangukile ngwange cipangi ca kwambulula cinapu ca bwasi bwasi, njatengulwile biyongola byange. Ha simbu itwamanesele sikola ya Ngilyande, njalibwaeselele kupwa kamishinali. Oloni mutwalondele mu mbapolo ibatumbwile ngwabo Queen Mary, ndolome Worth Thornton, uje wakele na kupangela mu ofisi imo na ndolome Knorr wakutusalesele. Co wakutulekele ngwendi tukapangela ha Mbetele. Njakomokele ngwange: ‘Naana kupangela ha Mbetele.’ Oloni njatengulwile bisinganyeka byange, co njashangukile kuzema kupangela ha Mbetele. Munjakele ha Mbetele njakele na kupanga bipangi bya kulisezaseza. Cipangi cinjazemene manene capwile ca kutambula bangenzi. Njazema banu, co kupanga eci cipangi kwanjilingisile njilikwatasane na bandolome babangi ba mu Nigeria. Bwingi bwa bangenzi bakele na kweta ha Mbetele oku banatokoloka, banajuka, banatsi njala na lihwila. Njakele na kuziba kubwaha kubamwesa ha kutumama na kubana bya kulya. Yehova wamwene eci cipangi kupwa ca kujela ngwe mwa bipangi byoshe bya ha Mbetele, co oku kwanjilingisile njipwe wa kubwaelela.” Bipangi byetu byoshe byatukwasele tupangele Yehova mu kubwaelela.

Litangwa limo mu 1961, twakele na kacilika mu Trinidad, co ndolome Brown watulekele byuma byabibwa byaliwanene nabyo mu Africa. Yangeco njendekele mucakele na kukolela cipangi cetu mu Nigeria. Ndolome Brown wezile na kunjibumbateya na kuleka batate ngwendi: “Johnny, kanda uyeho ku Africa, oloni Woodworth naketako.” Batate bakumbulwile ngwabo: “Worth twalelelao munange.” Awa majwi a kutunda kuli banalume ba kukanyama ku sipilitu anjikanyamesele na kunjishongangeya njishulisilile cipangi cange ca kwambulula.

 Mu 1962, banjilanyele lalo kuya ku sikola ya Ngilyande ya bu 37, co twakakeleko bingonde 10. Ndolome Wilfred Gooch, uje wapwile ntwama wa munango mu Nigeria, nendi bamulanyele ku sikola ya Ngilyande ya bu 38, co bamutumine kukapangela ku England. Ngeci, yange njapwile ntwama wa munango mu Nigeria. Njatembwininine mwanja wa ndolome Brown, co njakele na kwenda mangenzi amangi a kuya na kumona bandolome ba mu Nigeria. Aba bandolome kubakele na byuma byabingi bije bibakele nabyo banu ba mu mafuti a kufuka. Oloni babwaelelele, co bashubulukile na byuma bibakele nabyo. Oku kwamwesele ngwabo kupwa wa kubwaelela kukwemanene ha kukala na bufuko nambe bimbongo byabingi. Aba bandolome bakele mu bujene, oloni twabwaelele kubamona banajele na kuzala mwamubwa ku biwano. Bwingi bwabo bakele na kwija ku biwano byakama mu matilaki na mu ma bolekajas * (awa mambasi apwile akuhwalala mu mikulo, co bakele na kuwapanga mu Nigeria). Aha ha mambasi bakele na kusonekao majwi. Imo yayo baisonekele ngwabo: “Mambase a mema akewo akashulisa kalunga ndonga.”

Majwi abasonekele haje ha mbasi apwile a busunga. Bipangi bya munu na munu byapwa bya seo. Mu 1974, ku mafuti oshe aje kuwakele mu America, Nigeria likelyo lifuti lya kulibanga kukala na baka-kwambulula ba kutubakana 100,000. Banu bakele na kulibwezelela.

Nzita ya mu Nigeria yashangumukile mu 1967, co yahwile mu 1970. Bandolome betu baje bakele mu Biafra musinya lya ndonga ya Niger babashokelele, co kubasele kwija ku munango ha bingonde byabingi. Ngeci, twapandele kubatwalela bya kulya bya ku sipilitu. Ngwe mutunendeka kumaputukilo, kulombela na kukulaela Yehova kwatukwasele tujabuke ije ndonga ha bisimbu byabingi.

Njicanuka bukalu butwakele na kuliwana nabwo mutwakele na kujabuka ndonga ya Niger. Maswalale basele kututsiya, twasele kutambula mishongo, na bushonde bwa kulisezaseza. Kwita mukati ka maswalale kwatewesele. Co lalo kwakele mutambela umo wa ku Biafra ubabindikile kwita. Butsiki bumo njajabukile ndonga ya Niger na bwato njatundile ku Asaba kuya ku Onitsha, co njaketele na ku Enugu kukakanyamesa bakulunu. Ha bungenzi bukwabo njakatakamesele bakulunu ba ku Aba. Twakele na ciwano mu Port Harcourt, co twazibile ngwabo maswalale ba federal banakobela, co baneti ha maswalale ba Biafra baje bakele hanja ya nganda. Bwasi bwasi twashokele ciwano cetu na lilombelo.

Ebi biwano byapwile bya seo mwafwa byakwasele bandolome betu bamone ngwabo Yehova wabaka mbunge. Co byabakwasele lalo batwaleleleo kulikwatasana na kujeneka kulikobelesa mu biñanda bya kaye. Bandolome betu ba ku Nigeria bakolesele kweta noho hayahwilililile nzita. Bandolome ba miyati ya kulisezaseza balikwatasanene na kumwesa cizemo ca busunga kuli umo na mukwabo. Njabwaelelele manene kukwasa aba bandolome ha simbu ije ibakele mu bukalu.

Mu 1969, ndolome Milton G. Henschel ikeye wapwile muka-citwamo wa Ciwano ca Mafuti ca “Peace on Earth” cije cakele ku Yankee Stadium mu New York. Yange njapwile mukwasi wendi, co njalilongesele byabingi kuli ikeye. Binjalilongesele byanjikwasele, mwafwa netu mu 1970 twakele na Ciwano ca Mafuti ca “Men of Goodwill” ku Lagos mu Nigeria. Yehova ikeye lika walingisile cije Ciwano ca Mafuti cende mwamubwa mwafwa calingiwile munima ya nzita. Oku ku ciwano kwakele miyati ya kupwa 17, co kwakungulukile banu ba kupwa 121,128. Ndolome Knorr na ndolome Henschel hamo lika na bandolome na bandokazi baje batundile ku America na ku England bezile ku ciwano, co bakukomokele manene kumona banu ba kupwa 3,775 babambwitika. Kutunda ha Pentekosita ya 33 C E kukwakele lalo nambala yakama ngwe eyi. Njazezamene manene mu kukwasa bya kubwaesa eci ciwano. Baka-kwambulula balibwezelelele manene.

Ha myaka 30 injakele mu Nigeria, njapwile ntwama wa kuzenguluka na ntwama wa kwendela minango mu West Africa. Bamishinali bakele na kubwaelela nga tubendela, tubatakamesa na kubatolilila mwamubwa. Njakele na kuliziba kubwaha kubatakamesa na kubaleka ngwange bapwa ba seo. Eci cipangi canjilongesele njimone ngwange kwaka mbunge munu na munu kwapwa kwa seo.  Co kukakwasa munu atwaleleleo kupangela Yehova mu kubwaelela, co lalo kulingisa munga ya Yehova ipwe ya kulikwatasana.

Yehova ikeye watukwasele tukolese nameme kwakele nzita, co lalo twalifwitile na mishongo. Twalimwenenene ngwetu Yehova wakele na kutubezikisa. Oris wendekele ngwendi:

“Ha bisimbu byabingi twakele na kubinja malaliya. Litangwa limo Worth wabinjile manene, co kasele na kwendeka. Co bamukwatele mu cipatela ku Lagos. Banjilekele ngwabo kayoyo. Oloni wayoyele. Mwashangumukile kwendeka, wambulwile bya Bumwene bwa Njambi kuli nesi, uje wakele na kumunyunga. Mu kwita kwa simbu, twelukilile kuli Nwambiwe nesi uje wanyungile Worth. Twakamushongangeyeye alilongese Mbimbiliya. Watambwile busunga, co wakupwile mukulunu wa cikungulukilo mu Aba. Nange njakwasele banu babangi kwija mu busunga. Njakwasele lalo Bamuzilemu bapwe bangamba ba Yehova. Twabwaelelele manene kulizibuka mwamubwa na bandolome na bandokazi ba mu Nigeria na kuzema cisemwa cabo na muyati wabo.”

Cuma cikwabo citwalilongesele lalo eci: Nga tushaka ngwetu tupange mwamubwa cipangi cetu mu lifuti lyeka, tunapande kuzema bandolome na bandokazi betu nameme cisemwa cabo cinaliseze neci cetu.

Munima ya kupangela ha Mbetele ya Nigeria, mu 1987 twatambwile mukanda wa kukapwa bamishinali ha liñanda lya St. Lucia mu Caribbean. Capwile cipangi cacibwa, oloni twakaliwanene na bukalu. Banu baco kubapwile ngwe ba mu Africa, bakebo kubakele na kwambata banakazi babangi, oloni munalume na munakazi bakele na kuyoya hamo nameme kubalyambatele mwaya mashiko. Oloni Mbimbiliya yakwasele batwakele na kulilongesa nabo batengulule futisi yabo.

Mutwakele na kukola, Cibunga ca Kutwamenena catujalwisilile ku Brooklyn, New York, mu America, mu 2005. Ha litangwa na litangwa njikakandelela kuli Yehova ha kunjana Oris. Oris watokele mu 2015, co njikalizibi manene kubabala ku mbunge. Wapwile kabusamba wa cizemo na munakazi wamubwa manene. Co njamuzemene manene ha myaka 68 itwakele hamo. Twanangukile ngwetu nga tushaka kupwa ba kubwaelela mu bulo na mu cikungulukilo, tunapande kukala na kasingimiko, kukonekela bakwetu, kupwa ba kulikehesa na kumwesa bifwa bikwabo bya bushuka bwa sipilitu.

Mutwazeyele na kuliwana na bukalu, twakele na kulomba Yehova atukwase tutwalelelao kupanga cipangi cetu. Byuma mubyatwaleleleleo kutenguluka mu munga ya Njambi, twalimwenenene ngwetu byuma byakele na kubwaelako lika. Co tunabandamena byuma byabibwa manene kulutwe.—Isaya 60:17; 2 Koli 13:11.

Mu Trinidad na mu Tobago, Yehova wabezikisile cipangi ca bisemi bange na bakwabo. Ngeci, ha simbu ino mu Trinidad banu bakweta ku 9,892 banaija mu bulombelo bwa busunga. Mu Aruba banu babangi balifwitile kukanyamesa cikungulukilo ca kulibanga. Co haje ha liñanda hali oni bikungulukilo bya kupwa 14. Mu Nigeria baka-kwambulula banalibwezelela manene kweta ku 381,398. Co ha liñanda lya St. Lucia, bakaleo ba kupwa 783 bali na kukundwiya Bumwene bwa Yehova.

Hano njili na myaka ya kweta ku ma 90. Ku Myaso 92:14 banendeka ha banu babanakunu mu njubo ya Yehova ngwabo: “Bakatwalelelao kwima bushuka nameme banakulubala; Bakatwalelelao kupwa ba kukanyama na kukala na nzili.” Njinabwaelela manene mwafwa njinapangela Yehova ha myaka yaingi. Byuma bibanjilongesele, byanjishongangeyeye njipangele Yehova simbu yoshe. Yehova nanjimwesa cizemo cije kucesi kutenguluka, co njinalifu na “miti ya kukuna mu Njubo ya Njambi.”—Myaso 92:13.