1. Uje Kasamaliya ibakangwile kuli Yesu wamwesele bati kukandelela?

KWAKELE banalume 10 baje bakele mu bukalu bwakama. Bapwile baka-mbumba, co kubazibukile ngwabo tangwa bakakanguka. Bazibile ngwabo Yesu wakele na kukangwisa banu ku mishongo yabo yoshe, co bakulaelele ngwabo nabo asa kubakangula. Litangwa limo bamwene Yesu ali na kwita. Ngeci, batambekele ngwabo: “Yesu. Shukulu. Tuzibileko mema ku mbunge.” Baje banalume 10 boshe bakangukile. Boshe babwaelele omwo Yesu wabamwesele ngozi. Oloni umo lika ikeye wamwesele kukandelela * kuli Yesu. Uje munalume wapwile Kasamaliya. Co “washangazalele Njambi “na lijwi lyakama.”—Luka 17:12-19.

2-3. (a) Bika byasa kutwonowesa kumwesa kukandelela? (b) Bika bitusimutwiya muno cilongesa?

² Netu tushaka kumwesa kukandelela ngwe uje Kasamaliya. Oloni simbu imo twasa kwibala kukandelela ku byuma bibanatulingila.

³ Muno mu cilongesa tusimutwiya bikwapwila kwa seo kumwesa kukandelela mu bilinga na mu majwi. Tusimutwiya lalo ha banu ba mu Mbimbiliya baje bamwesele kukandelela na baje kubamwesele kukandelela. Co tusimutwiya lalo ha bingila bimo bitwasa kumweselamo kukandelela.

4-5. Bika bitunapande kumwesela kukandelela?

⁴ Yehova natumwesa mwanja waubwa mu kumwesa kukandelela. Ngila imo yanamweselamo kukandelela inapu kwana cikandelela kuli baje bamuzibisa kubwaha. (2 Samwe 22:21; Mateo 10:40, 41) Co Bisoneka bili na kutushongangeya ngwabyo ‘tutembwinine Njambi ha kupwa bana bendi bamuya ku mbunge.’ (Efeso 5:1) Twashaka kukandelela mwafwa tukatembwinina Yehova.

⁵ Tusimutwiyeni ha byuma bikwabo bitulingisa tumwese kukandelela ku bakwetu. Kukandelela kwapwa kwakubwa ngwe mukwafwa kulila hamo bya kulya na bakwetu. Tubwaelela nga bakwetu bakandelela ha byuma bitunalingi. Mu cifwa cimo lika, nga netu tukandelela bakwetu, co babwaelela. Nga tukandelela kuli uje natwana cuma, co abwaelela na kumona ngwendi cuma canatwana cinatukwasa. Co busamba bwetu nendi bukanyama.

6. Majwi a kukandelela na maepo a ngolinde analifu bati?

⁶ Kukandelela kwapwa kwa seo. Mbimbiliya ngwayo: “Lijwi lyalibwa libendeka ha simbu yaibwa, linapu ngwe maepo a ngolinde abanaka mu lilonga lya siliva.” (Visi 25:11, NWT) Maepo a ngolinde abanaka mu lilonga lya siliva apwa amabwa. Co lalo apwa a seo manene. Muliziba bati nga munu amyana bwana bwa cifwa eci? Majwi eni a kukandelela anapu a seo manene. Co maepo a ngolinde akakala myaka yaingi kwa kujeneka kubiya. Mu ngila imo lika, munu imunakandelela asa kwanuka majwi eni mu buyoye bwendi bwoshe.

7. Ngwe mubanamwesa ku Myaso 27:4, Ndabiti na batekulwila ba Asafe bamwesele bati kukandelela?

⁷ Bwingi bwa bangamba ba Njambi ba  kusañulu bamwesele kukandelela. Umo wabo wapwile Ndabiti. (Tandeni Myaso 27:4.) Ndabiti wamwesele kukandelela ku bulombelo bwa busunga mu bilinga byendi na majwi endi. Walambwile byuma byabingi mubakele na kutunga tembele. Co batekulwila ba Asafe bamwesele kukandelela ha kusoneka nambe kwimba myaso ya kushangazala. Mu mwaso umo ubembile, bamwesele kukandelela kwabo ha kwendeka bilinga bya Yehova bya “kukomokesa.” (Myaso 75:1) Ndabiti na batekulwila ba Asafe bamwesele kukandelela kuli Yehova mwafwa wababezikisile. Twasa kubatembwinina bati?

8-9. Kapositolo Paulu wamwesele bati kukandelela kuli bandolome na bandokazi bendi? Co bika byatundilemo?

⁸ Majwi a kapositolo Paulu amwesele ngwawo wakandelelele kuli bandolome na bandokazi bendi. Mu malombelo endi wakele na kukandelela kuli Njambi ha byuma bibamulingililile. Mu mikanda yendi wamwesele ngwendi bapwile ba seo kuli ikeye. Ku Loma 16:1-15, Paulu natumbula mazina 27 a bakwabo baka-Kilisitu. Watumbwile Pilisila na Akwila ngwendi ‘becele myonyo yabo’ hali ikeye. Wendekele lalo hali Fwibi ngwendi wakwasele banu babangi kwambateselela na ikeye Paulu. Washangazalele baje bandolome na bandokazi.—Loma 16:1-15.

⁹ Paulu wazibukile ngwendi bandolome na bandokazi bendi kubalumbunukile. Oloni kumamaneselo a mukanda wasonekelele baka-Loma, watumbwile bilinga byabo byabibwa. Baje bandolome na bandokazi bazibile kubwaha mubakele na kutanda mazina abo mu cikungulukilo. Ngeci, busamba bwabo na Paulu bwakanyamene. Mukamwesa kukandelela nga bakweni mu cikungulukilo bendeka nambe balinga byuma byabibwa ndi?

10. Ngila yamweselelemo Yesu kukandelela kuli baka-kumukabangeya itulongesa bika?

¹⁰ Yesu wamwesele kukandelela ku cipangi cibalingile baka-kumukabangeya baje bakele mu bikungulukilo bimo bya mu Asia Minor. Cakumwenako, Yesu walekele cikungulukilo ca Tiyatila ngwendi: “Njinazibuka bije biukalingi. Njinazibuka cizemo cobe na kulongwa kwobe na bipangi byobe na likakateya lyobe. Njazibuka ololo ngeci uli na kulinga mwamubwa manene kutubakana muwalingile ha kulibanga.” (Kujo 2:19) Yesu kendekele lika ha cipangi cibakele na kulinga, oloni wendekele na ha bifwa byabo bije byabalingisile balinge byabibwa. Yesu wanangwile baka-Kilisitu bamo ba ku Tiyatila, oloni washangumukile na kubashangazala, co wamanesele lalo na kubashangazala. (Kujo 2:25-28) Yesu wakala na nzili, co ikeye mutwe wa cikungulukilo. Kapandele kutukandelela ha bipangi bitukamulingila. Nameme ngoco akamwesa kukandelela. Yesu namwesa bakulunu mwanja waubwa.

11. Kwesekesa na Vahevelu 12:16, Isau wamwene bati byuma bya ku sipilitu?

¹¹ Calubinda, banu bamo ba mu Mbimbiliya kubamwesele kukandelela. Cakumwenako, nameme bisemi ba Isau bapwile baka-kulombela Yehova, oloni kamwesele kukandelela ku byuma bya ku sipilitu. (Tandeni Vahevelu 12:16.) Wamwesele bati ngwendi kakele na mbunge ya kukandelela? Isau walandesele buswana bwendi bwa kupwa ntwatwa kuli shongo yendi Yakomba na tubyakulya twatundondo. (Kusha 25:30-34) Mu kwita kwa simbu, Isau walibeyele ha  byuma byalingile. Oloni kapandele kulibeya mwafwa ikeye babenya kamwesele kukandelela ha buswana bwendi bwa kupwa ntwatwa.

12-13. Baisalele bamwesele bati ngwabo kubakele na mbunge ya kukandelela, co bika byatundilemo?

¹² Baisalele bakele na byuma byabingi bibapandele kukandelela. Yehova wabasokwele mu bundungo munima ya kunena bikomokeso 10 hali baka-Ingito. Kutundaho, Njambi wabobwele omwo wanyongesele maswalale boshe baba Ingito ha Kalunga-ndonga wa Kubenga. Baisalele bakandelele manene, ngeci bembile mwaso wa kushangazala Yehova. Kuma batwaleleleo kumukandelela ndi?

¹³ Mubaliwanene na byeseko, bebalele byuma byabibwa byoshe byabalingilile Yehova. Kubamwesele kukandelela. (Myaso 106:7) Balingile bati ngoco? Baisalele bayayabalele kuli Mosesa. Basinganyekele ngwabo bali na kuyayabala kuli Mosesa, kuma bakele na kubayayabala kuli Yehova. (Kutu 16:2, 8) Yehova walinyengele manene omwo banu bendi kubamwesele kukandelela. Ngeci, wendekele ngwendi baje Baisalele boshe bakanyongela mu mambo, akasezako lika Yoshwa na Kalembi. (Kula 14:22-24; 26:65) Tusimutwiyeni mutwasa kutembwinina baje bakandelelele na baje kubakandelelele.

14-15. (a) Baka-kulyambata basa kumwesa bati kukandelela kuli umo na mukwabo? (b) Bisemi basa kulongesa bati bana babo bamwese mbunge ya kukandelela?

¹⁴ Mu naanga. Nga boshe mu naanga bamwesa kukandelela, co naanga ipwa ya kubwaelela. Baka-kulyambata baje bamwesa kukandelela kuli umo na mukwabo, balizema manene. Co kubapwila kwakwasi kulikonekela. Munalume kapandele lika kumona ngwendi munakazi wendi ali na kulinga byuma byabibwa, oloni napande ‘kumushangazala.’ (Visi 31:10, 28) Munakazi wa mana akaleke munalume wendi byuma byakakandelela kuli ikeye.

¹⁵ Bisemi mwasa kukwasa bati bana beni bakale na mbunge ya kukandelela? Zibukeni ngweni bana beni batembwinina bimulinga nebi bimwendeka. Nga banamilingilako byuma bimo balekeni ngweni mwakandelelako mangana mubamwese mwanja waubwa. Balekeni ngweni banapande kukandelela nga munu abalingilako byuma bimo. Balongeseni mangana kukandelela kwabo kutundilile  kwisi ya mbunge. Nga balinga ngoco, co mutunda byabibwa. Cakumwenako, mumbanda walizina lya Clary wendekele ngwendi: “Batate babakutile omwo banana bakele na myaka 32. Banana balelele bana batatu likalyabo. Munjakele na myaka 32 njazibisisile mubakele na kulizibila banana. Ngeci, njabakandelele ha byuma byoshe bibatulingilile ha kutulela tubaboshe. Banana banjilekele ngwabo majwi anjabalekele abakwatele ku mbunge, co akabazibisa kubwaha mubakawanuka.”

16. Endekeni cakumwenako cije cimwesa omwo kukandelela kukanyameselamo bakwetu?

¹⁶ Mu cikungulukilo. Nga tumwesa kukandelela kuli bandolome na bandokazi betu, co tubakanyamesa. Cakumwenako, Jorge mukulunu mu cikungulukilo uje ali myaka 28 wabinjile manene. Ngonde ya mutunu kaile ku biwano. Nameme mwashangumukile kuya ku biwano kasele kwendeka biñanda mu cikungulukilo. Wendekele ngwendi: “Njalizibile kuzeya mwafwa kubinja kwanjonowesele kupanga bipangi bya mu cikungulukilo. Oloni litangwa limo munima ya biwano, ndolome umo wanjilekele ngwendi: ‘Njinakandelela manene mwafwa unamwesa naanga yange mwanja waubwa. Tunakele na kulikuwa biñanda byobe ha myaka ya kunima. Binatukwasa tukole ku sipilitu.’ Awa majwi anjikwatele ku mbunge, ngeci njalilile. Majwi endi apwile amabwa manene.”

17. Kwesekesa na Kolose 3:15, twasa kumwesa bati kukandelela kuli Yehova ha byuma byanatulingila?

¹⁷ Kuli Njambi uje wapwa muka-kwana. Yehova natwana byakulya byabingi bya ku sipilitu. Cakumwenako, biwano, mabulu na mawebusaiti etu bikatukwasa manene. Hamo twatolililao laja ku ñanda, nambe kutanda libulu, nambe kutala vidiyo ije yatukwatele ku mbunge. Twasa kumwesa bati kukandelela kuli Yehova? (Tandeni Kolose 3:15) Twasa kulinga ngoco nga mu malombelo etu tukandelela ha byuma byabibwa byanatulingila Yehova.—Yako 1:17.

18. Tutumwesa bati ngwetu twakandelela ku Njubo yetu ya Bumwene?

¹⁸ Tumwesa lalo kukandelela kuli Yehova nga tujelesa myela yetu ya kulemesela. Simbu yoshe tunapande kujelesa na kunyungilila Binjubo byetu bya Bumwene. Co baje bakapangesa makina a cilumo ca cikungulukilo banapande kuwanyunga mwamubwa. Nga tunyunga mwamubwa Binjubo byetu  bya Bumwene, bishwala, co kutubiisa manene bimbongo ha kubitungulula. Ngeci, ebi bimbongo tubipangesa ku kutungisa na kubwaesesa Binjubo bya Bumwene byeka bya mu kaye koshe.

19. Bika bimulilongesa ha byuma byaliwanene nabyo ntwama wa kuzenguluka na munakazi wendi?

¹⁹ Kuli baje bali na kupanga na nzili mukati ketu. Nga tukandelela bandolome na bandokazi baje bali na kuliwana na bukalu mu kupangela Yehova, co tubatakamesa batwaleleleo kupangela Yehova. Tusimutwiyeni ha byuma byaliwanene nabyo ntwama wa kuzenguluka umo na munakazi wendi. Litangwa limo mubatundile mu lihya, bakwetele ha njubo oku banajuka. Co kwakele manene lisika, ngeci munakazi wendi walalele na cikobelo ca lisika. Lya mukwabo mutondo, munakazi wendi wamulekele ngwendi ashaka kulikela cipangi ca kuzenguluka. Lije bene litangwa, batambwile mukanda wa kutunda ku munango, uje mukanda bausonekelele munakazi wendi. Bamushangazalele ha cipangi ca kwambulula na kukolesa kwendi. Bendekele ngwabo kujalozoka calumingo na calumingo kwapwa kwakukalu. Munalume wendi wendekele ngwendi: “Awa majwi amuzibisile kubwaha, co kendekeleho lalo bya kushaka kulikela cipangi ca kuzenguluka. Bisimbu byabingi munakazi wange wakele na kunjitakamesa munjakele na kushaka kulikela cipangi ca kuzenguluka.” Ngeci bakele mu cipangi ca kuzenguluka ha myaka ya kweta ku 40.

20. Bika bitunapande kulinga ha litangwa na litangwa, co mwafwa bika?

²⁰ Ha litangwa na litangwa tumweseni kukandelela mu majwi etu na mu bilinga byetu. Nga tumwesa kukandelela ku bakwetu mu majwi etu na bilinga byetu, co tubakwasa bakanyame nameme bali mu kaye ka banu ba kujeneka kukandelela. Nga tulinga ngoco, co busamba bwetu na bakwetu bukanyama. Co lalo tutembwinina Tate yetu Yehova uje wapwa muka-kwana na muka-kukandelela.