BAMBANDA babali bakele na kwita mu mutambela wa mingoso mu nganda ya Baguio ku Philippines. Bamwene katambo ka mabulu, oloni kubaileko. Ndokazi Helen uje wemanene kuyehi na katambo ka mabulu wabamweswilile. Baje bambanda batwaleleho na bungenzi bwabo, oloni ndokazi Helen wabazibisile kubwaha mwabamweswilile.

Baje bambanda mubakele na kwiluka ku binjubo byabo na munyau, bamwene Njubo ya Bumwene haje habasonekele jw.org mu masona akama. Banukile ngwabo aje masona akewo masona a kulifwa abamwene ha katambo ka mabulu. Bashulukile mu munyau na kuya ha Njubo ya Bumwene, co mubaketele ha cikolo bawanene cinoneko cije cimwesa bisimbu bya kukunguluka.

Calumingo cateleko bezile ku biwano. Co mubakobelele mu Njubo ya Bumwene, bamwene ndokazi Helen. Mubamumwene lika, banukile ngwabo ikeye uje munu wabamweswilile. Ndokazi Helen wendekele ngwendi: “Mubakele na kwija kuli yange Njalishoshomwenene. Njasinganyekele ngwange hamo kuli byuma byabibi binjinalingi.” Oloni baje bambanda balekele ndokazi Helen ngwabo bamumwene mwanakele ha katambo ka mabulu.

Baje bambanda balikuwile biwano, co bazitukile mubakele na bandolome na bandokazi mu Njubo ya Bumwene. Mubamwene bandolome na bandokazi bali na kujelesa mu Njubo ya Bumwene munima ya biwano, babalekele ngwabo nabo bashaka kujelesa. Umo wa baje bambanda natundu mu Philippines oloni mukwabo washangumukile kukunguluka na kulilongesa Mbimbiliya. Cili bene kumwesula kunanene byuma byabibwa.