Mary na munalume wendi John a bakala mu lifuti muje mubakaija na kupangela banu babangi bakutunda mu Philippines. Co bakabwahelela manene kubambulwila. Ha simbu ya mushongo wa COVID-19, Mary washangumukile bilongesa bya Mbimbiliya mu lifuti lyendi na mu mitambela ikwabo ya kaye. Walingile bati ngoco?

Mary wakele na kwihula banu bakele na kulilongesa nabo Mbimbiliya ngwendi: “Kuma kuli umo imuzibuka uje ashaka kulilongesa Mbimbiliya ndi?” Mubakumbululwile ngwabo eyo, co wakele na kubalomba bamukwase kukasimutwiya nabo. Kwihula eci cihula cacasi kukakwasa manene. Mwafwa bika? Mwafwa banu baje bazema byuma bibakalilongesa mu Mbimbiliya bakashaka kukwasako babushoko na babusamba babo mangana nabo balilongesebyo. Bika byatundilemo Mary mwehwile eci cihula?

Jasmin cilongesa ca Mary wamuzimbwile ku banu bawana baje bashakele kulilongesa Mbimbiliya. Umo wabo wa lizina lya Kristine washakele manene byuma byakele na kulilongesa. Ngeci walombele Mary mangana alilongese nendi lubali mu calumingo. Mary mwehwile Kristine indi kuli bamo bashaka kulilongesa Mbimbiliya, wakumbulwile ngwendi: “Eyo, njikaleka babusamba bange.” Mu byalumingo byakupwamo lika, Kristine wazimbwile Mary ku babusamba bendi bawana baje bashakele kulilongesa Mbimbiliya. Kutundaho, Kristine wazimbwile lalo Mary kuli babusamba bendi bakwabo baje lalo bazimbwile babusamba babo kuli Mary.

Kristine watondele ngwendi baka-naanga yendi mu Philippines balilongese Mbimbiliya. Ngeci wasimutwiiye na munendi wa munakazi Andrea. Hakulibanga, Andrea wasinganyekele ngwendi Bakaleho ba Yehova bapwa cibunga cimo ca bulombelo buje kubwakulahelele Yesu, co lalo bakapangesa Mbimbiliya ya Testamenti ya Laja. Munima ya kulilongesa na Bakaleho ba Yehova lwakulibanga, bisinganyeka byendi byatengulukile. Co simbu yoshe mwakele na kulilongesa byuma byabiha mu Mbimbiliya, wakele na kwendeka ngwendi: “Ebi binapu bya busunga mwafwa bitunda mu Mbimbiliya.”

Mu kwita kwa simbu, Andrea wazimbwile babusamba bendi babali na munakazi umo yakapanga nendi kuli Mary mangana alilongese nabo Mbimbiliya. Andrea wakele na teñazi yendi wa lizina lya Angela uje wapwile kapuputwa. Simbu yoshe wakele na kubatolilila mubakele na kulilongesa, oloni Mary kazibukile ngoco. Litangwa limo, Angela walombele Andrea amuzimbule kuli Mary na kumulomba alilongese nendi Mbimbiliya. Angela wazemene manene byuma byakele na kulilongesa. Mu ngonde imolika wakwatele bisoneka byabingi mu mutwe, co washakele kulilongesa luwana mu calumingo. Andrea wakwasele Angela ashangumuke kutolilila ku biwano kushwa kumo kupangesa makina.

 Mary mwanangukile ngwendi Joshua munalume wa Kristine wakele na kukala muyehi ha simbu ibakele na kulilongesa Mbimbiliya, wamwihwile indi ashaka kulilongesa Mbimbiliya. Joshua wamukumbulwile ngwendi: “Njitolilila lika oloni nga munjihula bihula, co njitundaho.” Munima ya minutu itanu Joshua washangumukile kwihula bihula byabingi kutubakana na bihula byakele na kwihula Kristine, co nendi watondele kulilongesa Mbimbiliya.

Cihula cacasi cehwile Mary camulingisile akale na bilongesa bya Mbimbiliya byabingi. Ha kuwana ngwe wakele na bilongesa bya Mbimbiliya byabingi, Mary wabwahesele ngwendi bamo babo balilongese na baka-kwambulula bakwabo. Mwafwa ya kwihula cihula cacasi, Mary wakwasele banu bakupwa 28 mu mafuti awana bashangumuke kulilongesa Mbimbiliya.

Jasmin uje wapwile cilongesa cakulibanga itunabanga kwendeka muno mu muzimbu bamumbwitikile mu April 2021. Kristine bamumbwitikile mu May 2022, co hano neluka kuli baka-naanga yendi mu Philippines. Banakazi babali baje baazimbwile Kristine kuli Mary, nabo babambwitikile. Munima ya bingonde byabindondo kutunda habambwitikilile Kristine, Angela nendi bamumbwitikile, co hano napu painiya wa simbu yoshe. Joshua munalume wa Kristine na munabo wa munakazi Andrea na bilongesa bikwabo bali na kulinga mwamubwa ku sipilitu.

Mu simbu ya Yesu na tupositolo bendi, banu babangi bakele na kulekako baka-naanga yabo na babusamba babo byuma bibakele na kulilongesa kuli Yesu. (Iwano 1:41, 42a; Bili 10:24, 27, 48; 16:25-33) Mwasa kwihula banu bamukalilongesa nabo Mbimbiliya na baje bamwesa kubwahelela ngweni: “Kuma kuli umo imuzibuka uje ashaka kulilongesa Mbimbiliya ndi?” Nga mwihula eci cihula cacasi, mwasa kuwana banu babangi baje bashaka kulilongesa Mbimbiliya.