KUMA munananguka ngweni banu babangi ano matangwa bakalizibi ngwabo banapande kubalinga mwamubwa kutubakana bakwabo ndi? Nameme babalinge bati mwamubwa kubesi kujauka na byuma bibanabalingila. Banu baje bakalingi ngoco bapwa baka-kulizema manene bakebo babenya, co kubesi kumwesa kukandelela ku byuma bibalinabyo. Ebi bikebyo biinendeka Mbimbiliya kutalesa ku cifwa ca banu ba mu matangwa a Mamaneselelo.—2 Timo 3:2.

Kushwa lika kunima, banu banatwalelelaho kulizema bakebo babenya. Cakumwenako, Adama na Eva batondele kukala na lisesa lya kulyangwila byakulinga kutalesa ku byuma bwabibwa nebi byabibi, co byuma bibangwile byatunenela tuyando. Cakumwenako cikwabo cinapu ca Mwene Uziya wa Juda. Ou Mwene wasinganyekele ngwendi wakele na lisesa lya kwenyeka insense ku tempele. Oloni kapandele kulinga ngoco. (2 Kolo 26:18, 19) Mu ngila imo lika, Bafalisi na Basaduki bakulahelele ngwabo Njambi napande kubalinga mwamubwa kutubakana bakwabo, mwafwa bapwile batekulwila ba Abrahamu.—Mate 3:9.

Tuli na kuyoya na banu baje balizema manene bakebo babenya, co lalo bapwa baka-kulijundula. Ngeci bifwa bya cifweci byasa kutungumuna. (Gala 5:26) Tunasa kushangumuka kuliziba ngwetu tunapande kutambula cipangi cakulitila nambe kuliziba ngwetu banapande kutulinga mwamubwa manene kutubakana bakwetu. Twasa kujenguka bati bisinganyeka bya cifweci? Tunapande kumona byuma ngwe mwakabimwena Yehova. Kuli binangulo byamu Mbimbiliya bije bitukwasa.

 Yehova Ikeye azibuka byuma binatupande. Tusimutwiyeni ha byakumwenako binatako:

• Yehova atonda ngwendi banakazi basingimike banalume babo, co banalume bazeme banakazi babo. (Efeso 5:33) Co lalo atonda ngwendi baje bali mu bulo balimwese cizemo cije cinapande lika baka-kulyambata. (1 Kori 7:3) Yehova atonda lalo ngwendi bana basingimike bisemi babo, co bisemi nabo bazeme bana babo na kubanyungilila.—2 Kori 12:14; Efeso 6:2.

• Yehova atonda ngwendi tusingimike bakulunu mu cikungulukilo mwafwa ya bipangi byakama bibakalingi. (1 Tesa 5:12) Oloni kubesi na lisesesa lya kulyatelela bandolome na bandokazi babo.—1 Pita 5:2, 3.

• Njambi natabesa biyulo bitambule mitelo na kasingimiko kanabipande ku banu.—Loma 13:1, 6, 7.

Yehova akatwana na byuma bije kubyatupandele. Ha kuwana ngwe tu baka-bubi tunapande kutsa. (Loma 6:23) Oloni Yehova natwana bibezikiso byabingi mwafwa watuzema. (Samu 103:10, 11) Yehova kesi kutwana bibezikiso na kutumwesa ngozi mwafwa napande kulinga ngoco, embwe. Oloni akalingi ngoco mwafwa watuzema.—Loma 12:6-8; Efeso 2:8.

Nyanyameni na biyongola bya baka-kaye. Nga kutunyanyama, tunasa kushangumuka kusinganyeka ngwetu tu ba seho manene kutubakana bakwetu. Yesu wendekele cakumwenako cije cimwesa ngwabo twasa kushangumuka kukala na biyongola bya cifweci. Wendekele bya baka-kupanga baje balizibasanene na babenya cipangi ngwabo babafweta dinari imo nga bapanga litangwa lyoshe lya mutunu. Mu kwita kwa simbu babenya lihya wakumwine baka-kupanga bakwabo. Co mangwezi wafwetele baka-kupanga boshe bimbongo bya kupwa hamo. Oloni baje bashangumukile kupanga mutondo basinganyekele ngwabo batambula bimbongo byabingi kutubakana bakwabo, mwafwa bakebo bapangele litangwa lyoshe lya mutunu mu litanya. (Mate 20:1-16) Yesu wapangesele eci cakumwenako mangana akwase baka-kumukabangeya bajauke na byuma byanabana Njambi.

Pweni baka-kukandelela na kujauka na byuma bimuli nabyo. (1 Tesa 5:18) Tembunwineni mwanja wa kapositolo Paulu uje kalombele bukwasi bwa ku mubila  kuli bandolome bendi mu Korinte nameme wakele na lisesa lyakulinga ngoco. (1 Kori 9:11-14) Tunapande kukandelela ku byuma bibatwana banu na kujauka na byuma bituli nabyo.

Pweni ba kulikehesa. Nga munu apwa muka-kulijundula, co aliziba ngwe napande kutambula byuma byabingi kutubakana byali nabyo. Tunapande kupwa baka-kulikehesa mangana tuhyane byiyongola byabibi bya cifweci.

Kapolofweto Daniele natumwesa mwanja waubwa wa kupwa ba kulikehesa. Daniele watundile ku nanga yaibwa, wapwile wamubwa, wakele na mana, co lalo wakele na cashu ca kulinga byuma byabingi. Ebi byuma byasele kumulingisa alizibe ngwendi wapandele kutambula byuma byabibwa kutubakana bakwabo. (Danie 1:3, 4, 19, 20) Oloni Daniele watwaleleleho kupwa wakulikehesa, co oku kwamulingisile apwe wa seho manene kuli Yehova.—Danie 2:30; 10:11, 12.

Tubyaneneni sipilitu ya kulizema manene yetu babenya na kulijundula ije ibali na kukundwiya manene baka kaye ano matangwa. Oloni tutwaleleleniho kupwa bakubwahelela mwafwa ya bibezikiso byali na kutwana Yehova mu ngozi yendi yakama.