CILONGESA 8
MWASO 130 Konekeleni Bakweni
Mwasa Kutembwinina Bati Kukonekela kwa Yehova?
“Ngecilika mwanamikonekela Yehova kutundilila kwisi ya mbunge, neni nawa munapande kulinga ngoco.”—KOLO 3:13.
BILI MUNO MU CILONGESA
Muno mu cilongesa tusimutwiya bitunapande kulinga mangana tukonekele baje banatulingi mwamubi.
1-2. (a) Byuma muka binasa kutulingisa kutupwile kwakulu kukonekela mukwetu? (b) Denise wamwesele bati ngwendi wapwa muka kukonekela?
KUMA kukamikaluwila kukonekela bakweni ndi? Bwingi bwetu kukatukaluwila kulinga ngoco, maneneni nga mukwetu nendeka nambe nalinga byuma bije binatuzibisa manene kubabala ku mbunge. Nameme ngoco, kuli byuma bitunapande kulinga mangana keti tulubale manene na kwasa kukonekela bakwetu. Cakumwenako, tusimutwiyeniko byuma byaliwanene nabyo ndokazi Denise, a uje wakonekelele mu busunga. Mu 2017, Denise na naanga yendi baile ku Cikota caciha ca Bakaleho ba Yehova. Mubakele na kwiluka ku njibo, baliwanene mu monde. Munalume umo uje wakele na kwendesa mota wakundyangele mu mota yabo. Denise walezumukile. Mwendukile, wamwene bana bendi banabulumuka manene, co munalume wendi watsile. Kutundaho wanangukile ngwendi uje munalume wabandyangele ikeye kabulumukile, ngeci walombele Yehova mangana akale mu kwoloka na uje munalume. Denise mwakasinganyeka byaligiwile lije litangwa, akalizibi kubabala ku mbunge na kuliziba busiwa.
2 Uje munalume bamukwatele mwafwa ya kutsiya munalume wa Denise. Ngeci nkuta yapandele kusompa uje munalume na kumona indi walingilile shakelo mangana b bamwake mu kamenga. Nkuta yalekele Denise ngwayo byuma byakendeka mu nkuta bikebyo bilingisa nkuta yake uje munalume mu kamenga nambe kujeneka kumwakamo. Denise wendekele ngwendi: “Njalizibile ngwe munu ibanatalukuna ha mbandu na kwitilaho mongwa wawingi, mwafwa njapandele kwendeka byuma bije byalingiwile lije litangwa. Mu kwita kwa byalumingo byabindondo lika, Denise waile mu nkuta mangana akendeke byuma byalingile uje munalume bije byanenele bukalu mu naanga yendi. Byuma muka byendekele Denise? Walombele lyaako mangana azibile ngozi uje munalume. Denise mwamanesele kwendeka, uje lyaako wandwekesele misozi. Co wendekele ngwendi: “Njinapu lyaako ha myaka 25, oloni kanda njimoneho laja munu alinga byuma bya cifweci. Kanda lalo njizibeho munu ibanabiisila alomba ngwendi njizibile ngozi munu uje namubiisila. Co lalo, kanda njimoneho munu uje akonekela mukwabo uje namubiisila manene na kumumwesa cizemo.”
3. Bika byakwasele Denise mangana ase kukonekela?
3 Bika byakwasele Denise mangana ase kukonekela? Wasinganyekesesele mwakakonekela Yehova. (Mika 7:18) Nga tukandelela kuli Yehova mwafwa ya kutukonekela, co kutupwila kwakwasi kukonekela bakwetu.
4. Yehova ashaka ngwendi tulinge bika? (Efeso 4:32)
4 Yehova ashaka ngwendi tukonekele bakwetu ngwe mwakatukoneka ikeye. (Tandeni Efeso 4:32.) Ashaka lalo ngwendi tulibwahesele kukonekela baje batulinga mwamubi. (Samu 86:5; Luka 17:4) Muno mu cilongesa tusimutwiya byuma bitatu bije bitukwasa mangana tukonekele bakwetu.
KETI MWOMBWANESE MUMULIZIBILA
5. Kwesekesa na Provebia 12:18, tunasa kuliziba bati nga munu natubiisila?
5 Tunasa kuliziba kubabala ku mbunge mwafwa ya byuma bibasa kwendeka nambe kulinga bakwetu, maneneni nga obo banu bapwa babusamba nambe babushoko bwetu. (Samu 55:12-14) Simbu imo tunasa kulubala manene mwafwa ya kutulinga mwamubi, co tunasa kuliziba ngwe munu uje ibanatubu moko. (Tandeni Provebia 12:18.) Tunasa kutundisa mbunge ku byuma binatuzisa kubabala. Oloni kulinga ngoco kunapu lika ngwe munu ibanatubu moko na kuiseza ngoco kwa kujeneka kuishomona. Mu ngila imolika, kutwasa kuliziba bwino nga tulitangesa mutuli na kulizibila.
6. Twasa kulinga bati nga munu umo natubiisila?
6 Kakangi tukalubala nga munu natubiisila. Mbimbiliya nayo imwesa ngwayo twasa kulubala. Oloni inatunangula ngwayo kutwapandele kulubala simbu yailaha. (Samu 4:4; Efeso 4:26) Mwafwa bika? Mwafwa bisimbu bimo tukalingi byuma kwesekesa nomu mutuli na kulizibila. Co kakangi, nga twalubala tukalingi byuma byabibi. (Jems 1:20) Tunasa bene kulubala nga munu natubiisila, oloni kutwapandele kutokesa litangwa oku tunalubala.
Tunasa bene kulubala nga munu natubiisila, oloni kutwapandele kutokesa litangwa oku tunalubala
7. Twasa kuliziba bati nga mukwetu natuzibisa kubabala ku mbunge?
7 Nga banatulingi mwamubi tunasa kuliziba kubabala manene ku mbunge. Cakumwenako ndokazi Ann wendekele ngwendi: “Munjapwile nji mwanike, batate basezele banana na kwambata munakazi weka. Njalizibile ngwe bananjiyengula. Mubakitile bana nou munakazi, njalizibile ngwe nji wangoco.” Ndokazi Georgette, wendekele mwalizibililile omwo munalume wendi walingile bupangala. Wendekele ngwendi: “Twapwile babusamba kutunda ku bwanike. Twakele na kupangela hamo bupainiya. Njalizibile manene kubihya mwanjisezele.” Ndokazi Naomi wendekele ngwendi: “Kunjasinganyekele ngwange munalume wange anjilinga mwamubi ngacije. Ngeci mwanjilekele ngwendi wakele na kukenga bikupilo bya mushelengwa na kunjishwekela byakele na kulinga, njalizibile manene kubabala ku mbunge.”
8. (a) Mwafwa bika tunapande kukonekela bakwetu? (b) Bubwa muka butundamo nga tukonekela bakwetu? (Taleni cipalo ca “ Tunapande Kulinga Bati Nga Munu Natulubalesa?”)
8 Banu basa kwendeka nambe kulinga byuma bije bituzibisa kubalala ku mbunge. Oloni tunapande kubakonekela. Mwafwa bika? Mwafwa twazema Yehova, co atonda ngwendi tukonekele bakwetu. Nga tulubala ha simbu yailaha na kujeneka kukonekela, co twasa kulinga byuma bije kubyesi bwino na kulibabalesa mbunge yetu babenya. (Prov 14:17, 29, 30) Tucisimutwiyeni ha cakumwenako ca ndokazi Christine. Wendekele ngwendi: “Munjikalubala kunjesi kumwesula. Kunjesi kwangula byakulya byabibwa. Kunjesi kuwana simbu yaingi ya kulala, co kukanjikaluwila kulinga mwamubwa byuma. Co oku kukanjilingisa njijeneke kuyoya mwamubwa na munalume wange na bakwetu.”
9. Mwafwa bika kutwapandele kukala na nkulundundu?
9 Nameme nga munu uje natubiisila kalombo likonekelo, twasa kutepulula ku bukalu bwanatunenela. Mu ngila muka? Georgette itunabanga kwendeka, wendekele ngwendi: “Njalubalelele munalume wange ha simbu yailaha. Oloni kukapwa muje njecelele kumulubalela. Co oku kwanjilingisile njilizibe kukala mu kwoloka.” Nga kutukala na nkulundundu, co tupwa ba kulikangula na kuyoya mwamubwa na bakwetu. Co lalo kutukwasa tujeneke kwaka mbunge ku byuma binalingiwa na kupwa ba kubwahelela. (Prov 11:17) Oloni munapande kulinga bika nga kumwalibwaheselele kukonekela?
TWASA KUMANESA BATI NKULUNDUNDU?
10. Mwafwa bika tunapande kwitisamo simbu na kwecela kusinganyeka ha byuma binalingiwa? (Taleni na bikupulo.)
10 Mwasa kumanesa bati nkulundundu? Ngila imo inapu kwitisamo simbu na kwecela kusinganyeka ha byuma binalingiwa. Cakumwenako, mubakasaka munu uje nabulumuka bakamwana simbu mangana akale mwamubwa. Mu ngila imolika, netu kunasa kwita simbu mangana tukonekele uje natubisiila.—Kwambu 3:3; 1 Pita 1:22.
Nga twabulumuka, kukambata simbu mangana twole, mu ngila imolika nga mukwetu natubiisila, kunapande kwita simbu mangana tutundiseko mbunge (Taleni paragirafu 10)
11. Lilombelo limikwasa bati mupwe baka-kukonekela?
11 Lombeni Yehova amikwase kukonekela bakweni. c Ann itunabanaga kwendeka wendekele mulyamukwaselele lilombelo. Wendekele ngwendi: “Njalombele Yehova akonekele umo na umo wetu mu naanga, mwafwa ya byuma bije kutwalingile mwamubwa. Kutundaho, njasonekelele batate na munakazi ibambatele na kubaleka ngwange njabakonekela.” Ann wamwene ngwendi kulinga ngoco kukwapwile kwakwasi. Oloni wendekele ngwendi: “Njakulahela ngwange nga njilifwita kutembwinina Yehova uje wapwa muka-kukonekela, co batate na munakazi wabo nabo basa kushangumuka kulilongesa bya Yehova.”
12. Mwafwa bika tunapande kukulahela Yehova kutubakana kulikulahela yetu babenya? (Provebia 3:5, 6)
12 Kulaheleni Yehova. Keti mulinge byuma kwesekesa nomu mumuli na kulizibila. (Tandeni Provebia 3:5, 6.) Yehova azibuka bitwashaka simbu yoshe. (Isaya 55:8, 9) Co kasa kutuleka tulinge byuma bije bitukobelesa mu bukalu. Ngeci, nga atushongangeya ngwendi tukonekele bakwetu, tunapande kumukulahela mwafwa kulinga ngoco kutukwasa. (Samu 40:4; Isaya 48:17, 18) Nga tulikulahela yetu babenya, kutupwila kwakukalu kukonekela bakwetu. (Prov 14:12; Njele 17:9) Naomi itunabanga kusimutwiya, wendekele ngwendi: “Njalizibile ngwe kunjasa kukonekela munalulme wange mwafwa ya kukenga bikupulo bya mushelengwa. Njalishoshomwenene ngwange nga njimukonekela, asa kwilukila kulinga lalo buje bubi na kunjizibisa kubabala ku mbunge. Njanangukile ngwange Yehova ali na kuzibisisa munjili na kulizibila. Oloni oku kukulumbununa ngwabo Yehova nataba biyongola byange embwe. Azibuka ngwendi kukambata simbu asina munu alikele kulubala. Yehova ashaka ngwendi njipwe muka-kukonekela.” d
MUTWASA KUKELA NA BIYONGOLA BYABIBWA
13. Kwesekesa na Loma 12:18-21, bika bitunapande kulinga?
13 Omwo tukonekela munu uje natubiisila, tunapande kulingako bimo keti kwecela lika kusimutwiya ha byuma binalingiwa. Nga munu natubiisila wapwa ndolome nambe ndokazi yetu, tunapande kuwana ngila itwasa kukela mu kwoloka nendi. (Mate 5:23, 24) Kutubakana kulubala, tunapande kumukonekela na kumumwesa ngozi. (Tandeni Loma 12:18-21; 1 Pita 3:9) Bika bitukwasa tulinge ngoco?
14. Bika bitunapande kulinga, co mwafwa bika?
14 Yehova akatala ha bubwa bwa munu. Ngeci tunapande kumutembwinina na kumona banu baje banatubiisila ngwe mwakabamwena Yehova. (2 Mizi 16:9; Samu 130:3) Nga tusinganyeka ha tupenga twa bakwetu, tunasa kubazinda na kujeneka kulikwatasana nabo. Oloni tunapande kusinganyeka ha bubwa bwa bakwetu mangana tulikwatasane nabo. Co kulinga ngoco, kutupwila kwakwasi kubakonekela. Cakumwenako ndolome Jarrod wendekele ngwendi: “Kukanjipwila kwakwasi kukonekela ndolome yange nga njisinganyekesesa ha byuma byabibwa byakalingi kutubakana kusinganyeka ha tupenga twendi.”
15. Mwafwa bika kwapwa kwa seho kuleka mukwetu ngwetu tunamukonekela?
15 Kunapu kwa seho kuleka munu uje natubiisila ngwetu tunamukonekela. Mwafwa bika? Naomi itunabanga kwendeka wendekele ngwendi: “Munalume wange wanjihwile ngwendi, ‘unanjikonekela ndi?’ Munjashakele kwendeka ngwange ‘njinakukonekela,’ njasamwene na kujeneka kwendeka. Njanangukile ngwange kunjamukonekelele. Mu kwita kwa simbu, njamulekele ngwange, ‘njinakukonekela.’ Munjamulekele ngoco, wandwekesele misozi, co twashubulukile na kukala hamo mu kwoloka. Ngeci njashangumukile kumukulahela, co busamba bwetu bwakanyamene lalo.”
16. Bika bitunalilongesa ha kukonekela bakwetu?
16 Yehova ashaka ngwendi tulikonekele umo na mukwabo. (Kolo 3:13) Nameme ngoco, kunasa kutupwila kwakukalu kukonekela bakwetu. Oloni nga kutulitangesa mutuli na kulizibila na kuwana bingila bya mwakumanesela bukalu, co twasa kubakonekela. Kulinga ngoco kutulingisa tukale na biyongola byabibwa.—Taleni cipalo ca “ Byuma Bitatu Bitunapande Kulinga Mangana Tukonekele Bakwetu.”
SINGANYEKESESENI HA BUBWA BWA KUKONEKELA BAKWENI
17. Bubwa muka butunda mu kukonekela bakwetu?
17 Kuli byuma byabingi bitulingisa tukonekele bakwetu. Tusimutwiyeniko bimo. Cakulibanga, tushaka kutembwinina Tate yetu wa ngozi Yehova na kumuzibisa kubwaha. (Luka 6:36) Camucibali, tushaka kumwesa kukandelela kuli Yehova mwafwa ya kukonekela kwendi. (Mate 6:12) Camucitatu, tushaka kukonekela bakwetu mwafwa kutulingisa tukale na bukangule bwabubwa na kutwalelelaho kukanyamesa busamba bwetu na bakwetu.
18-19. Bika Bitundamo nga tukonekela bakwetu?
18 Yehova atubezikisa nga tukonekela bakwetu. Cakumwenako, nangukeni byalingiwile kuli Denise itunabanga kusimutwiya. Denise kazibukile ngwendi uje munalume wanenele ije monde wayongwele kukalitsiya munima ya kumusompa. Oloni mwafwa ya ngozi yamumwesele Denise ha kumukonekela, uje munalume washangumukile kulilogesa Mbimbiliya na Bakaleho ba Yehova.
19 Tunasa kuliziba ngwe kukonekela mukwetu kwapwa kwakukalu. Oloni kukonekela kwapwa kwakubwa manene. (Mate 5:7) Ngeci tulingeni mutwasela mwoshe kutembwinina kukonekela kwa Yehova.
MWASO 125 ‘Banabwahelela Baje Batetela Bakwabo!’
a Mazina amo banawatengulula.
b Muka-Kristu woshe napande kulyangwila byakulinga nga naliwana na bukalu bwa cifweci.
c Kengeni ma video a myaso ya kulitila ya Muswalele,” “Luutwane Hape,” na “Muno Swalelana.”
d Kukenga bikupulo bya mushelengwa kwapwa bubi. Oloni nga muka-Kristu uje ali mu bulo nakenge bikupulo bya mushelengwa, yanalyambata nendi kapandele kumanesa bulo.
