CILONGESA 6
MWASO 18 Twakandelela ha Kutwana Ndando ya Kupatula
Twakandelela Manene Kuli Yehova ha Kukonekela Bubi Bwetu
“Njambi wazemene manene kaye mukemwo wanene Munendi umolika.”—IWANO 3:16.
BILI MUNO MU CILONGESA
Tushaka kumwesa manene kukandelela kuli Yehova ha kutukonekela bubi bwetu. Ngeci tusimutwiya ha byuma byanalingi mangana atukonekele bubi bwetu.
1-2. Buyoye bwetu bunalifu bati na bwa uje mukwenje itunendeka mu paragirafu 1?
LINGENI ngwe mumona mukwenje uje ali na bisemi ba kufuka. Litangwa limo, kulingiwa byuma bije kasinganyekele ngwendi bilingiwa. Bisemi bendi bakobela mu monde, co calubinda batsa. Ngeci ou mukwenje ali mu busiwa bwakama. Oloni simbu acilila bisemi bendi, ananguka ngwendi bisemi bendi bapangesele bimbongo byabo byoshe, co bali na mikuli yaingi. Ngeci, kutubakana kuswana bufuko bwa bisemi bendi, ou mukwenje napande kutonda bimbongo mangana ase kufweta mikuli ibanaseze. Co lalo babenya bimbongo batonda bimbongo byabo oho bene. Mikuli yaco yaingi manene, co kasa kuifweta.
2 Buyoye bwetu bunalifu na bwa uje mukwenje. Bisemi betu bakulibanga ba Adama na Eva bakele na mibila ya kulumbunuka, co lalo bakele mu paradaisi. (Gene 1:27; 2:7-9) Basele kuyoya myaka yoshe. Calubinda, Adama na Eva balingile bubi. Ngeci Yehova wabatundisile mu lihya lya Edeni, co lalo kubasele kuyoya myaka yoshe. Ngeci cuma muka cibasezelele bana babo kupwa buswana? Mbimbiliya ngwayo: “Bubi bwakobelele mu kaye kwitila muli munu umolika, co bubi bwanenele kutsa. Mukemwo kutsa kunajalakana ku banu boshe, mwafwa boshe balingile bubi.” (Loma 5:12) Twatambwile bubi kuli bisemi betu bakulibanga, bukebwo bunapu ngwe buswana bwetu. Co obu bubi bunanene kutsa. Bunapu ngwe mukuli wakama uje naumo wahi hakati ketu asa kuufweta.—Samu 49:8.
3. Mwafwa bika bubi bwetu banabwesekesa ku mukuli?
3 Mu Mbimbiliya, bubi banabwesekesa ku mukuli. (Mate 18:32-35) Nga twalingi bubi kunapu lika ngwe tuli na mukuli kuli Yehova. Co kutsa ikeyo lika ngila ya kufwetelamo ou mukuli. Nga Yehova kabwahesele ngila ya kutukonekela bubi bwetu, ngwe tutwalelelaho kutsa mangana tufwete ou mukuli. Co lalo ngwe kutwesi na lilabelelo lya kukayoya myaka yoshe.—Loma 6:7, 23.
4. (a) Bika binesi kulingiwa kuli yetu tubaboshe kwa kujeneka bukwasi bwa Yehova? (Samu 49:7-9) (b) Lijwi lya “bubi” linatalesa ku bika mu Mbimbiliya? (Taleni cipalo ca “ Bubi.”)
4 Kuma twasa kwilwisa byoshe bibazimbalesele ba Adama na Eva mu nzili yetu lika ndi? (Tandeni Samu 49:7-9.) Ngwe Yehova katukwasele, ngwe kutwesi na lilabelelo lya kukayoya myaka yoshe nambe kukulahela ngwetu tukasanguka nga tunatsi. Netu ngwe tukatsi ngeci mwa tusitu.—Kwambu 3:19; 2 Pita 2:12.
5. Bika byanalingi Yehova mangana atukwase kufweta mukuli wetu, kulumbununa bubi butunatambula kuli bisemi betu? (Taleni cikupulo cili ha )
5 Acisinganyekeni hali uje mukwenje itunabanga kusimutwiya ku mashangumukilo a cino cilongesa. Musinganyeka ngweni aliziba bati nga munu wa kufuka alyana kufweta mikuli yoshe ibasezele bisemi bendi? Uje mukwenje abwahelela manene na kutambula bukwasi bwamwana uje munalume. Mu ngila imolika, Tate yetu Yehova uje wakala na cizemo natwana bwana bwabubwa manene mangana afwete bubi butunatambula kuli Adama. Yesu walumbunwine bwino mwendekele ngwendi: “Njambi wazemene manene kaye mukemwo wanene Munendi umolika mangana woshe amukulahela keti anyonge, oloni awane kuyoya kwa myaka yoshe.” (Iwano 3:16) Kutundaho, obu bwana butukwasa mangana tulikute busamba bwa kukanyama na Yehova.
Yesu wambulwile muzimbu waubwa wa kukonekela kwa Yehova kuje kunemana ha ndando ya kupatula. (Iwano 3:16) Kutundaho, wanene kuyoya kwendi kupwa ndando ya kupatula (Taleni paragirafu 5)
6. Bika bitusimutwiya muno mu cilongesa, co mwafwa bika?
6 Bwana bwanatwana Yehova butukwasa bati mangana Yehova atukonekele bubi bwetu? Tuwana cikumbululo omwo tusimutwiya ha majwi amo a mu Mbimbiliya, nebi biwalumbununa. Kusinganyekesesa ha byuma byanalingi Yehova mangana atukonekele, kutulingisa tukandelele manene kuli ikeye.
YEHOVA ATONDA TUPWE BABUSAMBA BENDI
7. (a) Byuma muka bikwabo bibazimbalesele ba Adama na Eva? (b) Ha kupwa bana babo byuma muka bitutonda manene? (Loma 5:10, 11)
7 Adama na Eva mubatengulukilile Yehova, kubasele lalo kuyoya myaka yoshe. Co lalo, batengulukile kupwa bitozi ba Yehova. Hakulibanga, Adama na Eva nabo bakele mu naanga ya Yehova. (Luka 3:38) Oloni mubatengulukilile Yehova, babashekele omu mu naanga simbu kanda bacikale na bana. (Gene 3:23, 24; 4:1) Ku bana ba Adama boshe kukwakele nameme umo uje wasele kwiluka mu naanga ya Yehova, kwambateselela hamo netu. Ngeci kwatondekele bukwasi mangana twase kupwa lalo babusamba ba Yehova. (Tandeni Loma 5:10, 11.) Twapandele kupwa babusamba ba Yehova mangana keti tupwe bitozi bendi. Kunapu kubezika mwafwa Yehova natukwasa tupwe lalo babusamba bendi. Mu ngila muka?
YEHOVA NATUKWASA TULIKUTE NENDI BUSAMBA
8. Yehova wabwahesele ngila muka?
8 Yehova nabwahesa ngila mangana banu balikute nendi busamba bwa kukanyama. Wanene Yesu uje wapwile wa kulumbunuka, mangana elwise byuma byazimbalesele Adama. Bisoneka bya ciGriki bya Baka-Kristu nabyo binendeka ha ngila yapangesele Yehova mangana banu bakale nendi mu kwoloka.—Loma 3:25.
9. Ngila muka yabwahesele Yehova mangana akonekele baIsalele?
9 Yehova wabwahesele ngila ya kukonekela baIsalele na kubakwasa balikute nendi busamba bwa kukanyama. BaIsalele bapandele kulinga cilika lumo mu mwaka. Eci cilika bakele na kucitumbula ngwabo, Litangwa lya Kukonekela Bubi. Ha litangwa lije, kapilistu wahakamwa wakele na kwenyekela banu milambu. Oloni milambu ya tusitu kuyasele kufwika bubi bwoshe bwa baIsalele, mwafwa tusitu bapwa ba kwisi manene nga tubesekesa ku banu. Nameme ngoco, Yehova wakele na kukonekela baIsalele nga batenguluka mu busunga na kwana milambu inapande. (Hebe 10:1-4) Milambu ibakele na kwana ha Litangwa lya Kukonekela Bubi na ha bisimbu bikwabo, yakwasele baIsalele banuke ngwabo bapwile baka-bubi. Co lalo kwatondekele cuma ca seho manene cije casa kufwika bubi bwabo mu kushula.
10. Yehova walingile byuma muka mangana akonekele banu?
10 Byuma muka byalingile Yehova mangana akonekele banu? Wabwahesele ngwendi munendi yazema ‘bamwane lumolika kunahu mangana ambate bubi bwa banu babangi.’ (Hebe 9:28) Yesu wezile hano hasi na “kwana kuyoya kwendi kupwa ndando ya kupatula mangana apatule babangi.” (Mate 20:28) Ndando ya kupatula yapwa cuma muka?
NDANDO YA KUPATULA YA YESU
11. (a) Kwesekesa na Mbimbiliya, ndando ya kupatula yapwa bika? (b) Iya wapandele kupwa ndando ya kupatula?
11 Mbimbiliya imwesa ngwayo, Yehova wayongwele ngwendi kukale ndando ya kupatula mangana batukonekele bubi bwetu na kwasa kulikuta nendi busamba bwa kukanyama. Ndando muka ya kupatula yapandele kwana Yehova mangana banu bawane lalo byuma byazimbalesele Adama? Anukeni ngweni Adama na Eva bazimbalesele kuyoya kwa kulumbunuka, co kubasele lalo kuyoya myaka yoshe. Ngeci ndando ya kupatula ikeyo yapwile mulambu unapande wa kwilwisa byuma bibazimbalesele. (1 Timo 2:6) Ngeci ou mulambu wapandele kupwa munu (1) wa kulumbunuka, (2) uje asa kuyoya myaka yoshe hano hasi na (3) uje asa kulyana mangana akututsile. Kuyoya kwendi kukekwo kwasele kwilwisa byoshe bibazimbalesele ba Adama na Eva.
12. Mwafwa bika Yesu wafwililile kupwa ndando ya kupatula?
12 Tucisimutwiyeni ha byuma bitatu byalingisile Yesu afwile kupwa munu uje wapandele kwana ei ndando ya kupatula. (1) Yesu wapwile wa kulumbunuka, “kalingile bubi.” (1 Pita 2:22) (2) Wasele kuyoya myaka yoshe hano hasi, mwafwa wapwile wa kulumbunuka. (3) Walyanene kututsila. (Hebe 10:9, 10) Yesu wapwile wa kulumbunuka ngwe mwafwile Adama simbu kanda alinge bubi. (1 Kori 15:45) Yesu mwakututsililile, welwisile byuma byazimbalesele Adama. (Loma 5:19) Ngeci, Yesu wakupwile “Adama wa mamaneselelo.” Kukutondeka munu weka lalo wa kulumbunuka afwete byuma byazimbalesele Adama. Yesu watsile “lumolika kunahu.”—Hebe 7:27; 10:12.
13. Kuliseza muka kuli mukati ka kukonekela bubi na ndando ya kupatula?
13 Kuliseza muka kuli ha kukonekela bubi na ndando ya kupatula? Kukonekela bubi yapwa ngila yakapangesa Njambi mu kwilwisa banu kuli ikeye. Co ndando ya kupatula yapwa mulambu uje ulingisa Yehova akonekele bubi bwa banu. Ou mulambu wimanena maninga a Yesu aje atikile mwafwa yetu.—Efeso 1:7; Hebe 9:14.
YEHOVA NATUPATULA KU BUBI NA KUTSA NA KUTUTUMBULA NGWENDI TU BA KULONGWA
14. Bika bitusimutwiya, co mwafwa bika?
14 Ngila yanabwahesa Yehova ya kutukonekela bubi itukwasa bati? Tukumbululeni eci cihula ha kusimutwiya biwalumbununa majwi ainapangesa Mbimbiliya aje atukwasa kuzibisisa mukutukwasela kukonekela kwa Yehova.
15-16. (a) Kwesekesa na Mbimbiliya, kupatuka kulumbununa bika? (b) Kupatuka ku bubi na ku kutsa kutulingisa tulizibe bati?
15 Mbimbiliya ngwayo mwafwa ya ndando ya kupatula, tunapatuka ku bubi. Kapositolo Pita wendekele ngwendi: “Muzibuka ngweni mubamipatwile ku kuyoya kweni kwangoco kuje kubamisezelele bakukulwila beni, kubamipatwile na byuma bije bibola bya kufwa ngwe siuva nambe goldi. Oloni bamipatwile na maninga a seho a Kristu ngwe a muna manga wa kujeneka kapenga na citoma.”—1 Pita 1:18, 19.
16 Twasa kupatuka ku bubi na ku kutsa mwafwa ya ndando ya kupatula. (Loma 5:21) Twakandelela manene kuli Yehova na Yesu, mwafwa banatupatula kwitila mu maninga a seho a Yesu.—1 Kori 15:22.
17-18. (a) Kututumbula ngwabo tu ba kulongwa kulumbununa bika? (b) Kubezika muka kutuwana nga Yehova atutumbula ngwendi tu ba kulongwa?
17 Mu Mbimbiliya, Njambi natumbula bangamba bendi ngwendi ba kulongwa. Oku kulumbununa ngwabo Yehova katondo ngwendi tulifwetele milambu ya bubi bwetu. Yehova akalingi byuma mu ngila yaibwa. Kesi kututumbula ngwendi tu ba kulongwa mwafwa ya bilinga byetu byabibwa. Co lalo katondo ngwendi tulinge bubi. Oloni mwafwa ya kukulahela ndando ya kupatula ije yabwahesele Yehova na Munendi, Yehova asa kutukonekela bubi bwetu.—Loma 3:24; Gala 2:16.
18 Bibezikiso muka bituwana nga Yehova atutumbula ngwendi tu ba kulongwa? Banu bamo babanatumbula kupwa ba kulongwa, banabangula kukayula na Kristu mwilu, co banapu bana ba Njambi. (Tito 3:7; 1 Iwa 3:1) Banabakonekela bubi bwabo. Co kunapu lika ngwe kubalingile bubi. Ngeci basa kukala mu Bumwene bwa Njambi. (Loma 8:1, 2, 30) Bakwaboco bakayoya myaka yoshe hano hasi. Yehova nabakonekela, co banapu babusamba bendi. (Jems 2:21-23) Ei mbunga yakama ya banu baje bakoboka ha nzita ya Amagidoni, kubakatsi lalo. (Iwano 11:26) “Baka-kusungama” na “baka-kujeneka kusungama” baje banatsi bakasanguka. (Bili 24:15; Iwano 5:28, 29) Kutundaho, bangamba ba Njambi ba kulongwa hano hasi ‘bakabana bumpau bwa kupatuka kwa bana ba Njambi.’ (Loma 8:21) Twabandamena manene ei simbu itukapwa lalo bana ba Yehova ba kulumbunuka.
19. Buyoye bwetu bunatenguluka bati kupwa bwabubwa? (Taleni lalo cipalo ca “ Kukonekela kwa Yehova.”)
19 Cilibene, buyoye bwetu bwapwile ngwe bwa uje mukwenje ibasezelele mikuli yaingi kuli bisemi bendi ije kasele kufweta. Oloni Yehova natukwasa. Buyoye bwetu bunatenguluka mwafwa Yehova nabwahesa ngila ya kutukonekela bubi bwetu, co Yesu nafwete ndando ya kupatula. Kukulahela Yesu Kristu kutukwasa mangana tupatuke ku bubi na ku kutsa. Nga Yehova natukonekela bubi bwetu, kunapu lika ngwe kutwalingile bubi. Co lalo twasa kulikuta busamba bwakukanyama na tate yetu wa mwilu Yehova.
20. Bika bitusimutwiya mu cilongesa cinatako?
20 Kusinganyekesesa ha byuma byanatulingila Yehova na Yesu, kutulingisa tubakandelele. (2 Kori 5:15) Ngwe Yehova na Yesu kwahi, ngwe kutwesi na lilabelelo. Mu cilongesa cinatako, tusimutwiya ha byakumwenako bya mu Mbimbiliya bije bitukwasa tuzibisise muitukwasela ndando ya kupatula.
MWASO 10 Shangazaleni Yehova Njambi Yetu!
