CILONGESA 7
MWASO 15 Shangazaleni Muna Yehova wa Ntwatwa!
Yehova Akakonekela mu Ngila ya Kulitila
“Yobe ukakonekela mu busunga.”—SAMU 130:4.
BILI MUNO MU CILONGESA
Tusimutwiya ha byakumwenako bimo bya mu Mbimbiliya bije bimwesa mwakakonekela Yehova. Cino cilongesa citukwasa tukandelele kuli Yehova mwafwa akatukonekela bubi bwetu mu ngila ya kulitila.
1. Mwafwa bika kunapu kwakukalu kuzibuka byalumbununa munu nga endeka ngwendi “njakukonekela”?
“NJAKUKONEKELA.” Eli lijwi likatwete manene ku mbunge, maneneni nga tuzibuka ngwetu tunalingi nambe kwendeka byuma bimo bije binazibisa mukwetu kubabala ku mbunge. Oloni kakangi kukwapwile kwakwasi kuzibuka byalumbununa munu nga atuleka ngwendi “njakukonekela.” Hamo alumbununa ngwendi mwasa kutwalelelaho busamba bweni. Indi hamo alumbununa ngwendi namikonekela, oloni busamba bweni kubupu lalo ngwe mubwapwile hakulibanga. Banu bakalumbununa byuma bya kuliseza-seza nga bendeka ngwabo, “njakukonekela.”
2. Bisoneka binamwesa ngwabyo Yehova akakonekela mu ngila ya kufwa bati? (Taleni na futunoti.)
2 Mwakakonekela Yehova kwaliseze nomu mubakakonekela banu. Yehova akakonekela mu ngila ya kulitila. Muka-kwimba wendekele hali Yehova ngwendi: “Yobe ukakonekela mu busunga, mangana bakuzibile lyoba.” a (Samu 130:4) Yehova ikeye lika ‘akakonekela mu busunga.’ Natumwesa ngila yaibwa ya kukonekela. Mu mavesi amo a Bisoneka bya ciHebelu, lijwi lya kukonekela libanapangesa mu Bimbimbiliya bimo, lyasa lika kupanga ku ngila yakakonekela Yehova, oloni kulyasa kupanga ku banu.
3. Mwakakonekela Yehova kwaliseze bati nomu mubakalingila banu? (Isaya 55:6, 7)
3 Nga Yehova akonekela munu, akazimangana na bubi bwendi. Uje munu asa kupwa lalo kabusamba kendi. Tunapande kukandelela kuli Yehova mwafwa asa kutukonekela kushwa kumo.—Tandeni Isaya 55:6, 7.
4. Yehova akatukwasa bati tuzibisise mukwafwa kukonekela kwendi kwa busunga?
4 Nga ngila yakakonekela Yehova yaliseze nomu mubakakonekela banu, twasa kuzibisisa bati kukonekela kwendi? Yehova napangesa byakumwenako bimo mangana atukwase kuzibisisa mwakakonekela. Muno mu cilongesa tusimutwiyako bimo. Ebi byakumwenako bitukwasa tumone ngwetu nga twatenguluka mu busunga, Yehova azimangana bubi bwetu na kututabesa lalo kupwa babusamba bendi. Byakumwenako bitusimutwiya bitukwasa tukandelele kuli Yehova uje wakala na cizemo na ngozi, uje lalo akatukonekela mu bingila bya kuliseza-seza.
YEHOVA AKAMBATA BUBI BWETU
5. Bika byakalingi Yehova ku bubi bwetu?
5 Mu Mbimbiliya bubi banabwesekesa ku bitele bya kulema. Mwene Devidi wendekele ha bubi bwendi ngwendi: “Bubi bwange buli na kulizenga helu lya mutwe wange. Bunanjilemena manene ngwe citele ca kulema.” (Samu 38:4) Oloni Yehova akakonekala bubi bwa baje batenguluka. (Samu 25:18; 32:5) Lijwi lya ciHebelu libananungulula ngwabo ‘kukonekela,’ lilumbununa ‘kujundula’ nambe ‘kwambata.’ Yehova napu ngwe munalume wa nzili uje ambata citele ca kulema. Ngeci Yehova akambata citele ca bubi bwetu ha bitsili byendi.
“Wanjikonekelele” (Samu 32:5)
6. Yehova akaka kuli bubi bwetu?
6 Mbimbiliya inapangesa cakumwenako cikwabo cije cimwesa Yehova mwakakela bubi bwetu kulako. Mukanda wa Samu 103:12 wendeka ngwawo: “Ngwe butuhukilo bwa litangwa mubwakela kulako na bulahukilo bwa litangwa, na milonga yetu mukemwo mwayakela kulako netu.” Butuhukilo bwa litangwa bwakala kulako manene na bulahukilo. Ei mitambela ibali kuyesi kuliwana. Oku kulumbununa ngwabo Yehova akambata bubi bwetu na kubutwala kulako manene kutubakana nomu mutusinganyekela. Eci cakumwenako cimwesa ngwaco Yehova akatukonekela mu kushula.
“Ngwe butuhukilo bwa litangwa mubwakela kulako na bulahukilo bwa litangwa” (Samu 103:12)
7. Mbimbiliya inalumbununa bati byakalingi Yehova ku bubi bwetu? (Mika 7:18, 19)
7 Nameme Yehova akambata bubi bwetu na kubutwala kulako, kuma akatwalelelaho kubwanuka ndi? Embwe. Mwene Hezekiya wendekele hali Yehova ngwendi: “Unombila bubi bwange bwoshe kunima yobe.” (Isaya 38:9, 17) Oku kulumbununa ngwabo Yehova akambata bubi bwa baje banatenguluka mu busunga na kubutwala kulako, co kesi kubwanuka lalo. Ngeci, tunasa kwendeka lalo ngwetu: ‘Unanjikonekela ku bubi bwange bwoshe, co kuli yobe bunafu lika ngwe kubwakeleko.’ Mbimbiliya inapangesa lalo cakumwenako cikwabo ku mukanda wa Mika 7:18, 19. (Tandeni.) Ou mukanda umwesa ngwawo Yehova akombila bubi bwetu mu kalunga-ndonga. Kunima kukwapwile kwakwasi kujabulula cuma cibanombila mu kalunga-ndonga.
‘Unombila bubi bwange bwoshe kunima yobe’ (Isaya 38:17)
‘Ukombila bubi bwabo bwoshe kwisi ya kalunga-ndonga’ (Mika 7:19)
8. Byuma muka bitunalilongesa?
8 Ebi byakumwenako binatumwesa ngwabyo nga Yehova atukonekela, akambata citele ca bubi bwetu. Cili bene, ngecilika mwendekelele Devidi, “banabwahelela baje babanakonekela bilinga byabo bya kupokola mashiko na baje babanafwikila bubi bwabo. Nabwahelela munu uje Yehova kakanuka bubi bwendi.” (Loma 4:7, 8) Oku kukekwo kukonekela kwa busunga.
YEHOVA AKAZIMANGANA BUBI BWETU
9. Mbimbiliya itukwasa bati kuzibuka mwakatukonekela Yehova?
9 Yehova napangesa byakumwenako bikwabo mangana atukwase tuzibisise mwakazimanganena bubi bwa baje banatenguluka mu busunga kupangesa ndando ya kupatula. Mbimbiliya imwesa ngwayo Yehova akakushu na kukushungula bubi bwetu. Ngeci oku kukalingisa uje muka-bubi apwe wa kujela. (Samu 51:7; Isaya 4:4; Njele 33:8) Yehova nalumbununa mwakajelesela baka-bubi ngwendi: “Nameme bubi bweni bubenge ngengu, bupwa bwa kutoka ngwe mema a kukonda. Nameme bubenge manene ngwe nanga ya kubenga, bupwa ngwe bwanda bwa kutoka.” (Isaya 1:18) Kukwapwile kwakwasi kutundisa citoma ca kubenga ha cizalo. Yehova napangesa eci cakumwenako mu kutukwasa tukulahele ngwetu nameme bubi bwetu bwame bati, asa kubuzimangana.
‘Nameme bubi bweni bupwe bwa kubenga manene ngwe nanga ya kubenga, bupwa ngwe bwanda bwa kutoka’ (Isaya 1:18)
10. Mbimbiliya inalumbununa bati ngila yaibwa yakapangesa Yehova mu kutukonekela?
10 Ngwe mutunasimutwiiye mu cilongesa cinahu, mu Mbimbiliya bubi banabwesekesa ku mukuli. (Mate 18:32-35) Ngeci mukuli wetu ukatwalelelaho kwama nga tubiisila Yehova kushwa kumo. Oloni Yehova mwakatukonekela kunafu lika ngwe nafwete mukuli wetu. Kesi kutusompa ha bubi buje bwanatukonekela. Ngwe mwakalizibila munu ibanafwetela mukuli, netu tukalizibi bwino Yehova mwakatukonekela bubi bwetu.
“Tukonekele bubi” (Mate 6:12)
11. Bika bilumbununa Mbimbiliya muinendeka ngwayo bubi bwetu ‘bakabuzimangana’? (Bilinga 3:19)
11 Yehova akatukonekela na kuzimangana bubi bwetu. (Tandeni Bilinga 3:19.) Kukansula mukuli kunafu lika ngwe munu uje asoneka mufunda wa kutundisa mukuli ha lipapelo. Oloni bisona bibanasoneka haje ha lipapelo bicisholoka. Oku kunaliseze na kuzimangana. Cakumwenako, inki ibakele na kupangesa kunima yapwile yayasi kuikusha. Munu wasele kwambata cimponji ca kujula na kutundisa bisona. Ngeci, mukuli ubakele na kuzimangana kuwakele na kusholoka lalo. Banu kubasele kumona byuma bibasonekele nga banabizimangana. Kwapwile lika ngwe ou mukuli kuwakeleko. Kuzibuka ngwetu Yehova akatukonekela na kuzimangana bubi bwetu kutuzembeleka manene.—Samu 51:9.
“Mangana bubi bweni babuzimangane” (Bili 3:19)
12. Bika bitulilongesa ku cakumwenako ca lishelwa lya kuhima?
12 Kuli ngila ikwabo yakapangesa Yehova mu kuzimangana bubi bwetu. Nendeka ngwendi: ‘Njikazimangana bubi bwobe na kubufwika na lishelwa lya kuhima.’ (Isaya 44:22) Yehova mwakatukonekela, kunapu lika ngwe, ali na kupangesa lishelwa lya kuhima mu kufwika bubi bwetu mangana keti abumone.
‘Njikazimangana bubi bwobe na kubufwika na lishelwa lya kuhima’ (Isaya 44:22)
13. Mwafwa bika kutwapandele kuliziba kubihya nga Yehova natukonekela bubi bwetu?
13 Ebi byakumwenako bitulongesa bika? Nga Yehova nakonekela bubi bwetu, kutwapandele kuliziba kubihya ngwetu hamo akanuka lalo bubi butwalingile. Ndando ya kupatula ya Yesu inazimangana bubi bwetu. Nga Yehova nakonekela bubi bwetu, kesi kubwanuka nambe kamandondo. Ei ikeyo ngila yakatukonekelela Yehova nga twatenguluka mu busunga.
YEHOVA AKATUTAMBULA KUPWA BABUSAMBA BENDI LALO
Kukonekela kwa Tate yetu wa mwilu kutulingisa tulikute nendi busamba (Taleni paragirafu 14)
14. Mwafwa bika tunapande kukulahela ngwetu Yehova atukonekela mu kushula? (Taleni lalo bikupulo.)
14 Nga Yehova natukonekela tukakulahela ngwetu apwa kabusamba ketu. Kuzibuka ngoco kukatulingisa tujeneke kuliziba kukala na mulonga. Kutwapandele kuliziba ngwetu hamo Yehova anga natulubalela, co ali na kutonda ngila ya kutwanenamo kashitiko. Yehova kasa kulinga ngoco. Nga nendeka ngwendi natukonekela, co tunapande kumukulahela. Yehova walekele kapolofweto Jelemiya ngwendi: ‘Njikabakonekela kusebuka kwabo, co kunjikanuka lalo bubi bwabo.’ (Njele 31:34) Kapositolo Paulu nendi wendekele ngwendi: “Kunjikanuka lalo bubi bwabo.” (Hebe 8:12) Oloni oku kulumbununa bika?
‘Kunjikanuka lalo bubi bwabo’ (Njele 31:34)
15. Yehova nalumbununa bika mwanendeka ngwendi kakanuka bubi bwetu?
15 Mu Mbimbiliya lijwi lya kwanuka kakangi kulyesi kulumbununa kusinganyeka ha byuma byalingiwile kunima. Oloni likalumbununa kulingako bimo. Cakumwenako, cikenya ibashukikile kuyehi na Yesu wendekele ngwendi: “Yesu, ukanjanuke muukakobela mu Bumwene bwobe.” (Luka 23:42, 43) Ou munalume walombele Yesu mangana akalingeko byuma bimo ha simbu oyo. Ngeci, Yesu walekele ou munalume ngwendi akamusangula. Mu ngila imolika, nga Yehova endeka ngwendi kanuka bubi bwetu, co oku kulumbununa ngwabo kakatwana kashitiko mwafwa ya bubi butwalingile kunima.
16. Mbimbiliya inatwesekesa ku byuma muka?
16 Nga Yehova natukonekela, tukalizibi kuzituka. Mbimbiliya inapangesa cakumwenako cikwabo mu kutukwasa tuzibisise ei simpi. Inendeka ngwayo mwafwa ya kujeneka kulumbunuka twapwa tu “bindungo ba bubi.” Oloni nga Yehova natukonekela, kunapu lika ngwe bindungo “babanapatula ku bubi.” (Loma 6:17, 18; Kujo 1:5) Kuzibuka ngwetu Yehova nakonekela bubi bwetu, kutulingisa tupwe ba kubwahelela ngwe mwa ndungo uje ibanapatula.
‘Bamipatwile ku bubi’ (Loma 6:18)
17. Kutukonekela kukatukangwisa bati? (Isaya 53:5)
17 Tandeni Isaya 53:5. Mbimbiliya ngwayo mwafwa ya kupwa baka-bubi, tunafu lika ngwe banu baje bali na mushongo wakama. Mwafwa ya ndando ya kupatula, Yehova natukangwisa ku mushongo wa bubi. (1 Pita 2:24) Mutukalingi bubi, busamba bwetu na Yehova bukatsi, oloni mwafwa ya ndando ya kupatula, akatukonekela na kulikuta lalo busamba bwa kukanyama netu. Munu uje ibanakangwisa ku mushongo waubi akabwahelela manene. Ngeci netu tukabwahelela manene Yehova mwakatukonekela na kulikuta lalo busamba bwa kukanyama netu.
‘Batukangwisile mwafwa ya bimbandu byendi’ (Isaya 53:5)
KUKONEKELA KWA YEHOVA KUKATUKWASA BATI?
18. Byakumwenako bimwesa mwakakonekela Yehova byatulongesa bika? (Taleni lalo cipalo ca “Mwakatukonekela Yehova.”)
18 Bika bitunalilongesa ku byakumwenako bya mu Mbimbiliya ha kukonekela kwa Yehova? Twalilongesa ngwetu nga Yehova natukonekela, akalingi ngoco mu kushula, co kasa kutwana mulonga mwafwa ya bubi bwanatukonekela. Oku kukatulingisa tulikute busamba bwabubwa na Tate yetu wa mwilu. Tuzibuka ngwetu Yehova akatukonekela, co obu bunapu bwana bwa kutunda kuli ikeye. Akatukonekela mwafwa watuzema, keti mwafwa napande kulinga ngoco.—Loma 3:24.
19. (a) Mwafwa bika tunapande kukandelela kuli Yehova? (Loma 4:8) (b) Bika bitulilongesa mu cilongesa cinatako?
19 Tandeni Loma 4:8. Tubaboshe tunapande kukandelela kuli Yehova mwafwa ‘akakonekela mu busunga.’ (Samu 130:4) Oloni kuli cuma ca seho citunapande kulinga mangana Yehova atukonekele. Yesu wendekele ngwendi: “Nga mukonekela bakweni byuma bibanabulumuna, co Ishweni wa mwilu nendi amikonekela.” (Mate 6:14, 15) Ngeci, tunapande kutembwinina Yehova na kukonekela bakwetu. Twasa kulinga bati ngoco? Cilongesa cinatako cimwesa mutwasa kulingila ngoco.
MWASO 46 Yehova, Tukukandelela
a Mu Cihebelu banapangesa lijwi lya “kukonekela” lije lilumbununa kukonekela kwa busunga nameme kwakala kukonekela kukwabo. Mu Bimbimbiliya byabingi eli lijwi banalinungulula mu bingila byeka. Oloni mu Mbimbiliya ya Bisoneka bya Kaye Kakaha kubalingile ngoco. Bananungulula mukanda wa Samu 130:4 mu ngila ya kulitila.
