1-2. (a) Mwafwa bika Yesu watumwesele ngila yayasi ya kulingilamo cilika ca kwanuka kutsa kwendi? (b) Bifwa muka bya Yesu bitusimutwiya?

BYUMA muka bikalingiwa ha cilika ca Kwanuka kutsa kwa Kilisitu cije citukalingi ha mwaka na mwaka? Tubaboshe tuzibuka bikalingiwa ha cilika ca Kulya kwa Mwene kwa Mangwezi. Mwafwa bika? Mwafwa tukacilingi mu ngila yayasi. Oloni capwa cilika ca seo manene. Co tunasa kulihula ngwetu: ‘Bika tukalingila eci cilika mu ngila yayasi?’

² Yesu mwakele na kwambulula muzimbu, wakele na kulongesa banu busunga mu ngila yayasi kuzibisisa. (Mateo 7:28, 29) Mu ngila imo lika watumwesele ngila yayasi ya kulingilamo cilika ca kwanuka * kutsa kwendi. Tusimutwiyeni hali eci cilika na ha byuma byalingile Yesu na bije byendekele. Omwo tusimutwiya, tuzibisisa mwamubwa ngwetu Yesu wapwa wa kulikehesa, kusimpa, co wakala na cizemo. Co lalo tulilongesa mutwasela kumutembwinina.

3. Kwesekesa na mukanda wa Mateo 26:26-28, bika twendekela ngwetu Yesu walingile cije cilika mu ngila yayasi? Co byuma bibali bibapangesele haje ha cilika bimanena bika?

³ Yesu wamwesele tupositolo bendi ba kulongwa ba kupwa 11 mwakulingila cilika ca kwanuka kutsa kwendi. Wapangesele byuma bije byasalele ku cilika ca Paseka mukubamwesa  mwa kulingila cilika ca kwanuka kutsa kwendi mu ngila yayasi. (Tandeni Mateo 26:26-28.) Wapangesele likende lya kujeneka musima na binyu. Yesu walekele tupositolo bendi ngwendi bije byuma bibali byemanenene mubila na maninga endi, bije byanene mangana obole banu. Hamo tupositolo kubalikomokelele omwo Yesu walingile eci cilika ca seo mu ngila yayasi. Mwafwa bika?

4. Mwafwa bika cinangulo ca Yesu kuli Mata citukwasa kuzibisisa byalingisile Yesu alinge cije cilika mu ngila yayasi?

⁴ Acisinganyekeni byalingiwile mu mwaka wa mu citatu wa cipangi ca Yesu ca kwambulula omwo waile kuli babusamba bendi ba ha mbunge ba Lazalu, Mata na Maliya. Yesu mwamwene ngwendi kubazezamene manene, washangumukile kubalongesa. Oloni Mata wonowele kutolilila mwamubwa mwafwa wazezamene manene mu kubwaesela Yesu byakulya byabingi. Yesu mwamwene byakele na kulinga Mata, wamunangwile ngwendi abwaese lika byakulya bya kupwamo. (Luka 10:40-42) Tai ali muyei na kwana mwonyo wendi kupwa ñombelo, Yesu wapangesele byanangwile Mata. Walingile cije cilika ca kumwanukilaho mu ngila yayasi. Kulinga cilika mu ngila eyi kutulongesa bika hali Yesu?

5. Kulinga cilika mu ngila yayasi kutulongesa bika hali Yesu? Oku kunalitombola bati na majwi ali ku Filipu 2:5-8?

⁵ Bilinga na endekesi ya Yesu byamwesele ngwabyo wapwile wa kulikehesa. Mukemwo kutukomoka, omwo Yesu walikehesele manene ha butsiki bwamamaneselelo bwa kuyoya kwendi hano hasi. (Mateo 11:29) Wazibukile ngwendi wakele a muyei na kwana ñombelo ya kulitila ku banu boshe. Nameme wazibukile ngwendi Yehova akamusangula na kumupwisa mwene mwilu, Yesu kashakele ngwendi banu bamusingimike manene ha kulinga cilika ca kwanuka kutsa kwendi mu ngila ya kukomokesa. Oloni walekele bandongesi bendi ngwendi banapande kwanuka kutsa kwendi ha kulinga cilika mu ngila yayasi lumo mu mwaka. (Yowa 13:15; 1 Koli 11:23-25) Omwo Yesu wabwaesele cije cilika ca seo mu ngila yayasi wamwesele ngwendi kapwile wa kulyalesa. Twabwaelela ha kuzibuka ngwetu Mwene yetu Yesu wapwa wa kulikehesa.—Tandeni Filipu 2:5-8.

6. Twasa kupwa bati ba kulikehesa ngwe Yesu omwo tuliwana na byeseko?

⁶ Twasa kupwa bati ba kulikehesa ngwe Yesu? Twasa  kulinga ngoco nga simbu yoshe tulinga bije bizibisa bakwetu kubwaha. (Fili 2:3, 4) Acisinganyekeni byalingile Yesu ha butsiki bwa mamaneselelo bwa kuyoya kwendi hano hasi. Nameme Yesu wazibukile ngwendi akayanda manene na kutsa, oloni washotele mbunge hali tupositolo bendi mwafwa wazibukile ngwendi basala mu busiwa. Mukemwo ha butsiki buje, wabalongesele, kubashongangeya na kubatakamesa. (Yowa 14:25-31) Yesu wapwile wa kulikehesa, mukemwo wakele manene mbunge ku bukalu bwa bakwabo kutubakana kusinganyeka lika ha bukalu bwendi. Watwakelele mwanja waubwa utunapande kutembwinina.

7. Yesu wamwesele bati kusimpa munima ya cilika ca Kulya kwa Mwene kwa Mangwezi?

⁷ Munima ya cilika ca Kulya kwa Mwene kwa Mangwezi, Yesu wamwesele kusimpa. Mu ngila muka? Walyanene kulinga cizango ca Ishe nameme wazibukile ngwendi nga alinga ngoco, co bamubangeya biñanda bya makuli na kumutsiya. (Mateo 26:65, 66; Luka 22:41, 42) Yesu watwaleleleho kupwa wa kulongwa mangana ashangazale lizina lya Yehova, kukundwiya ciyulo ca Njambi na kwasiwisa banu baje becela bubi mangana bakayoye myaka yoshe. Co lalo Yesu wakwasele baka-kumukabangeya balibwaesele byeseko bibaliwanene nabyo.

8. (a) Yesu walekele bika tupositolo bendi ba kulongwa? (b) Munima ya kutsa kwa Yesu, bandongesi bendi bamutembwininine bati mu kupwa ba kusimpa?

⁸ Yesu wamwesele lalo kusimpa ha kwaka bukalu bwendi ku mukulo na kwaka manene mbunge ku kukwasa tupositolo bendi ba kulongwa. Cilika calingile Yesu munima ya kusheka Yundasa, wacilingile mangana cikanukise boshe baje kapwa bakubwabesa bakazibuke ngwabo maninga a Yesu anababezikisa, co lalo akewo  analingisa mangana bakale mu cikumiyo caciha. (1 Koli 10:16, 17) Yesu walekele baka-kumukabangeya byuma bibapandele kulinga mangana batwaleleleho kupwa ba kulongwa na kukayula nendi mwilu. (Yowa 15:12-15) Yesu walekele lalo tupositolo byeseko bibakaliwana nabyo kulutwe. Wabashongangeyeye ngwendi bapwe ba ‘kusimpa’ ngwe mwasimpile ikeye. (Yowa 16:1-4a, 33) Munima ya myaka yaingi, bandongesi ba Yesu batwaleleleleho kumutembwinina ha kukala na sipilitu ya kulyana na kupwa ba kusimpa. Balikwasele umo na mukwabo mu byeseko bibaliwanene nabyo nameme kulinga ngoco kwasele kubakobelesa mu bukalu.—Heve 10:33, 34.

9. Twasa kutembwinina bati Yesu mu kupwa ba kusimpa?

⁹ Netu tutembwinineni Yesu ha kupwa ba kusimpa. Cakumwenako, tunapande kupwa ba kusimpa mangana tukwase bandolome betu baje ba bali na kuyandesela likulaelo lyabo. Simbu imo bandolome betu bakabaka mu tumenga kwa kujeneka mulonga. Nga bandolome betu baliwana mu bukalu bwa cifwa eci tunapande kweseka mutwasela mwoshe kubakwasa nameme kubendekelako. (Fili 1:14; Heve 13:19) Ngila ikwabo itumweselamo kusimpa inapu kutwalelelaho kwambulula mu “kusimpa.” (Vili 14:3) Tukatembwinina Yesu mu kutwalelelaho kwambulula muzimbu wa Bumwene nameme banu batulwisa nambe kutupakesa. Nga simbu imo tuziba lyoba twasa kulinga bati?

10. Bika bitunapande kulinga nga tuli kuyei na Canukiso, co mwafwa bika?

¹⁰ Tupwa ba kusimpa nga tusinganyekesesa ha lilabelelo lituli nalyo mwafwa ya ñombelo ya Kilisitu. (Yowa 3:16; Efeso 1:7) Nga tuli kuyei na Canukiso, co tunapande kulingako byuma bimo bije bitukwasa tumone seo ya ndando ya kupatula. Ha simbu eyi, tunapande kutanda Bisoneka bya Canukiso na kusinganyekesesa ha byuma byalingiwile simbu kanda batsiye Yesu. Co omwo tuya ku cilika ca Kulya kwa Mwene kwa Mangwezi tukazibisisa mwamubwa bulumbunwisi bwa likende na binyu bya ha Canukiso na kumona seo yabyo. Nga tuzibisisa byuma byanatulingila Yesu na Yehova na  kumona mubili na kutukwaselamo na kukwasa bakwetu, lilabelelo lyetu lya byuma bya kulutwe likanyama, co litushongangeya tusimpe na kulikolesa kweta na kushongo.—Heve 12:3.

11-12. Twalilongesa bika ha byuma bitunasimutwiya?

¹¹ Twalilongesa ngwetu cilika ca Kulya kwa Mwene kwa Mangwezi citwanukisa ndando ya kupatula yafwetele Yesu. Citwanukisa lalo kulikehesa na kusimpa kwendi. Twakandelela manene ha kuzibuka ngwetu Yesu uje wapwa Kapilisitu wetu Wakama wa mwilu, wakala nebi bifwa. (Heve 7:24, 25) Tumwesa kukandelela ku byuma byanatulingila Yesu nga tulinga cilika ca kwanuka kutsa kwendi mu ngila ije yatumwesele. (Luka 22:19, 20) Tukalingi eci cilika ha litangwa lije lilitombola na lya Nisane 14 lije lyapwa lya seo manene mu mwaka.

¹² Kulinga cilika ca Kulya kwa Mwene kwa Mangwezi mu ngila yayasi kutulongesa cifwa cikwabo cije calingisile Yesu atutsile. Mwakele hano hatsi, Yesu wamwesele eci cifwa. Cifwa muka camwesele?

13. Mukanda wa Yowano 15:9 na 1 Yowano 4:8-10, unamwesa bati cizemo camwesele Yehova na Yesu? Co cikwasa beya?

¹³ Mu byuma byoshe byalingile, Yesu watembwininine cizemo cakala naco Yehova hali yetu. (Tandeni Yowa 15:9; 1 Yowa 4:8-10.) Yesu walyanene ikeye babenya ha kututsila, kumwesa ngwendi watuzema manene. Cizemo catumwesele Yehova na Yesu ha kutwana ñombelo, cikwasa bakubwabesa na “bimanga beka.” (Yowa 10:16; 1 Yowa 2:2) Binyu na makende bitukapangesa ha Canukiso, bimwesa ngwabyo Yesu wakala na cizemo co waka manene mbunge bandongesi bendi. Mu ngila muka?

14. Yesu wamwesele bati cizemo kuli bandongesi bendi?

¹⁴ Yesu wamwesele cizemo kuli baka-kumukabangeya ba kubwabesa ha kubamwesa ngila yayasi ya kulingilamo cilika ca kumwanuka. Mu kwita kwa simbu, baje bandongesi ba kubwabesa bapandele kulinga cilika ca Canukiso ha mwaka na mwaka. Bapandele kulinga eci cilika kwoshe kwoshe kubali nameme mu kamenga. (Kujo 2:10) Kuma basele kulinga ngoco ndi? Eyo.

15-16. Bandolome na bandokazi bamo balingile bati cilika ca Kulya kwa Mwene kwa Mangwezi mubakele mu cilombo ca bafunge?

¹⁵ Kushwa mu cita ca myaka ca kulibanga kwakweta na lelo, baka-Kilisitu ba busunga bali na kutwalelelaho kulinga cilika ca kwanuka kutsa kwa Yesu. Bakalingi eci cilika ca Kulya kwa Mwene kwa Mangwezi mubasela mwoshe nameme byuma binakaluwa. Cakumwenako, Ndolome Harold King mwakele likalyendi mu mulili wa mu kamenga ku China, walingile cilika ca Canukiso. Wambatele byuma byakele nabyo, co wapangele likende na binyu. Co lalo wazibukile litangwa lya kulinga Canukiso. Simbu ya Canukiso muyetele, wembile, kulombela, na kwendeka ñanda ya Mbimbiliya lika lyendi muje mu mulili wa mu kamenga.

¹⁶ Kuli cakumwenako cikwabo. Bandokazi bamo baje bakele mu cilombo ca bafunge ha Nzita ya Kaye ya mu Cibali, bakele buyoye bwabo mu bushonde ha kulinga cilika ca Kulya kwa Mwene kwa Mangwezi. Balingile cilika ca Canukiso mu bushweke mwafwa binyu na likende bitukapangesa ha Canukiso byapwa byabyasi ku bipanga. Bendekele ngwabo: “Twazengelekele ka mesa kaje katwafwikile nanga ya kutoka, co helu twakeleho binyu na likende. Twapangesele kendulu kutetekesa mu mulili mutwakele, mwafwa  twatewele ngwetu nga tupangesa malaiti hamo bamona bitulinga. . . . Twalombelele manene kuli Tate yetu mangana atwane nzili ya kushangazala lizina lyendi lya kujela.” Aba bandokazi bakele na likulaelo lya kukanyama. Yesu wamwesele ngwendi watuzema manene ha kutumwesa ngila yayasi ya kulingilamo cilika ca kwanuka kutsa kwendi nameme tuli mu bukalu.

17. Bihula muka bitunasa kulihula?

¹⁷ Omwo simbu ya Canukiso ili na kushwenya muyehi, tunapande kulihula ebi bihula: “Njasa kutembwinina bati Yesu mu kumwesa cizemo? Njikasinganyeka lika manene bya bujene bwange indi njikakwasa bakwetu baka-Kilisitu? Njikatondo ngwange bandolome na bandokazi banjane byuma byabingi indi njikanuka ngwange na bakebo kuli bimo kubasa kulinga? Twesekeni mutwasela mwoshe kutembwinina Yesu mu kulizema umo na mukwabo.—1 Petu 3:8.

18-19. (a) Cilika ca Kwanuka kutsa kwa Kilisitu cikakalako myaka yoshe ndi? (b) Mwalyangwila kulinga bika?

¹⁸ Mwaka umo tukalinga Cilika ca Kwanuka kutsa kwa Kilisitu lwa mamaneselelo. Omwo Yesu “akaija” ha simbu ya ñababa yakama, ‘banu bendi baje baangwile’ baje banasala hano hasi akabakungulula na kuya nabo mwilu, co kutukalingi lalo cilika ca Canukiso.—1 Koli 11:26; Mateo 24:31.

¹⁹ Nameme ha simbu itukalikela kulinga cilika ca Canukiso, banu ba Yehova bakatwalelelaho kwanuka ngwabo binyu na likende bibakele na kupangesa ha cilika byamwesele kulikehesa na kusimpa, na cizemo cakama manene camwesele Yesu. Ha simbu oyo, baje bakele na kulinga eci cilika ca kulitila bakaleka bakwabo byeci cilika. Oloni nga tushaka ngwetu eci cilika citukwase ha simbu ino, tunapande kutembwinina Yesu uje wapwa wa kulikehesa, kusimpa, na cizemo. Nga tulinga ngoco, Yehova akatwana cikandelela.—2 Petu 1:10, 11.