1-2. (a) Majwi ali ku Isaya 41:10, akwasele bati ndokazi Yoshiko? (b) Co awa majwi asonekele Isaya akwasa beya?

NDOTOLO walekele ndokazi Yoshiko, ngwendi ayoya lika bingonde byabindondo. Mwazibile ngoco walingile bati? Yoshiko wanukile mukanda wa Isaya 41:10. (Tandeni.) Walekele ndotolo mu kusimpa ngwendi kalishoshomwenene mwafwa Yehova wakele nendi. * Ou mukanda wakwasele uje ndokazi yetu akulaele manene Yehova. Co netu utukwasa nga tuliwana mu byeseko byakama. Tusimutwiyeni ha byuma byalingisile Njambi aleke Isaya asoneke ou mukanda.

² Yehova walekele Isaya asoneke awa majwi mangana akatakamese Bayunda, mwafwa wazibukile ngwendi bakaya mu bunzinda mu Mbambilone. Yehova wazibukile ngwendi awa majwi kuwakakwasa lika Bayunda baje bakaya mu bunzinda, oloni akakwasa bangamba bendi boshe kweta na lelo lino. (Isaya 40:8; Loma 15:4) Majwi ali ku Isaya atutakamesa manene mwafwa ‘tuli na kuyoya mu simbu yaikalu.’—2 Timateo 3:1.

3. (a) Bikulaeso muka bili ku Isaya 41:10, haje hanemana cisoneka ca mwaka wa 2019? (b) Bika ebi bikulaeso binapwila byabibwa?

³ Muno mu cilongesa tusimutwiya ha bikulaeso bitatu byanatukulaesa Yehova, bije bili ku Isaya 41:10. Ebi bikulaeso bitukwasa tukanyamese likulaelo lyetu mu bingila bitatu: (1) Yehova ali netu, (2) Ikeye Njambi yetu, co  (3) Ikeye akatukwasa. Netu awa majwi atutakamesa * mwafwa tuli na kuliwana na byeseko mu kuyoya kwetu ngwe Yoshiko. Tuli na kuliwana na bukalu bwabungi, mwafwa tuli na kuyoya mu kaye kakabi. Yetu bamo tuli na kulifwita na mapakeso a kutunda ku fulumende. Tusimutwiyeni ha cikulaeso cimo na cimo.

4. (a) Cikulaeso muka ca kulibanga cakulaesele Njambi? (Taleni majwi a kwinikila.) (b) Majwi muka amwesa ngwawo Yehova watwaka mbunge? (c) Majwi a Njambi atukwasa bati?

⁴ Yehova nabanga kutukulaesa ngwendi: “Kesi muzibe lyoba, yange njili hamo neni.” * Yehova namwesa ngwendi ali netu ha kutwaka mbunge na kutuzema. Majwi anatako amwesa ngoco. Njambi ngwendi, “Njakumwene kupwa uwa seo mu mesho ange, co njakusingimikile na kukuzema.” (Isa 43:4, NWT) Nacimo cai casa kwonowesa Yehova kuzema bangamba bendi, co lalo cizemo cendi kucikahu. (Isa 54:10) Cizemo cendi cikatusimpisa. Atunyungilila ngwe mwanyungililile kabusamba kendi Abilama (Abilahama). Yehova wamulekele ngwendi: “Kesi uzibe lyoba Abilama. Yange nji ntelo yobe.”—Kusha 15:1.

5-6. (a) Tuzibuka bati ngwetu Yehova ashaka kutukwasa mu byeseko bituliwana nabyo? (b) Bika bitulilongesa kuli Yoshiko?

⁵ Tuzibuka ngwetu Yehova washaka kutukwasa mu bukalu bwetu bwoshe, mwafwa nendeka ngwendi: ‘Omwo ukaita mu ndonga ya kuloba njikakala nobe, mema kuwakakuzubika embwe. Omwo ukaita mukati ka tuhya kuukenye embwe, byeseko byakama bije baikaija hali yobe kubikakubulumuna.’ (Isaya 43:2) Awa majwi alumbununa bika?

⁶ Yehova kakulaesele ngwendi atundisa bukalu butuliwana nabwo mu kuyoya kwetu embwe. Oloni katwecelela tuliwane mu byeseko nambe mu bukalu buje butwonowesa kumupangela. Natukulaesa ngwendi akala netu na kutukwasa mu bukalu  bwetu bwoshe. Yehova atukwasa bati? Atukwasa tusimpe na kutwalelelaho kupwa ba kulongwa nameme tuliwana na bukalu buje butwala ku kutsa. (Isaya 41:13) Yoshiko itunabanga kwendeka walimwenenene busunga bwa majwi awa. Muna Yoshiko ngwendi: “Twabwaelelele ha kumona kusimpa kwa banana. Twamwene ngwetu Yehova nabakwasa. Banana bakele na kwambulwila baka-kusaka na babezi biñanda bya Yehova na bikulaeso byendi kweta na ha kutsa kwabo.” Bika bitulilongesa kuli Yoshiko? Nga tukulaela majwi a Njambi akwendeka ngwawo: “Njili hamo neni,” co tupwa ba kusimpa na kukolesa nga tuli mu byeseko.

7-8. (a) Cikulaeso muka ca mu cibali cakulaesele Njambi, co cilumbununa bika? (b) Yehova walekelele bika Bayunda baje bakele mu bunzinda mu Mbambilone ngwendi ‘keti bajaje’? (c) Majwi muka ali ku Isaya 46:3, 4 aje asimpisile bangamba ba Njambi?

⁷ Isaya wasonekele cikulaeso ca Njambi ca mu cibali. Wasonekele ngwendi: ‘Keti mujaje, yange Njambi yeni.’ Lijwi lya kujaja lilumbununa bika? Mu Cihebelu, lijwi lya ‘kujaja’ lilumbununa munu uje nashoto mbunge ha cuma cimo, co akengakenga kunima mwafwa ya kuziba lyoba.

⁸ Yehova walekelele bika Bayunda baje bakaya mu bunzinda mu Mbambilone ngwendi ‘keti bajaje’? Mwafwa wazibukile ngwendi banu ba muje mu nganda bakaziba lyoba. Bika bikabazibisa lyoba? Kumamaneselelo a myaka 70 ibakakala Bayunda mu bunzinda, maswalale ba Bamende na Bapelesha bakalwisa Mbambilone. Yehova akapangesa baje maswalale mu kupatula Baisalele mu bunzinda. (Isaya 41:2-4) Bambambilone na baka-mafuti eka mubazibile ngwabo Bamende na Bapelesha bali na kwija, balisimpisile umo na mukwabo. Ngeci, bamungile tumponya na kululaela ngwabo baje tumponya basa kubanyungilila. (Isaya 41:5-7) Yehova wasimpisile banu bendi ngwendi: ‘Oloni yobe Isalele ngamba yange, . . . keti ujaje, yange Njambi yobe.’ (Isaya 41:8-10) Anukeni ngweni Yehova wendekele ngwendi: ‘Yange Njambi yobe.’ Yehova wendekele awa majwi mangana atakamese bangamba bendi ba kulongwa. Wabamwesele ngwendi kabombilile kuti, anga wacipwile Njambi yabo, co nabo lalo bapwile banu bendi. Wabalekele ngwendi: “Njikamilela . . . na kumyamena.” Awa majwi atakamesele na kuzembeleka Bayunda baje bakele mu bunzinda.—Tandeni Isaya 46:3, 4.

9-10. Mwafwa bika kutwapandele kulishoshomwena? Endekeni cakumwenako.

⁹ Banu ano matangwa banalishoshomwena mwafwa byuma bili na kubihya manene muno mu kaye. Netu tuli na kuliwana na bukalu bwa cifwa eci. Oloni kutwapandele kuziba lyoba. Yehova natuleke ngwendi: “Yange Njambi yeni.” Awa majwi atukwasa bati tujeneke kuziba lyoba?

¹⁰ Cakumwenako, Jim na Ben bali mu bwato bwakama buje buli na kwenda ha Ndonga. Co kwakatuka lihunzi lyakama manene lije lili na kunakula bwato. Omwo bwato bushaka kubombela, muka-kujabula atambakana ngwendi: “Likwateleleni manene. Ololo tweta ha muuta haje hali na kulwa manene mema.” Jim washotele manene mbunge. Oloni muka-kujabula wendekele ngwendi: “Keti mushote mbunge, njikulaeleni.” Nameme ngoco,  Jim walipikile ku mutwe, co wendekele ngwendi, “Lelo tutsa kutuyoyo. Mwakengele Ben wamwene ngwendi ikeye nambe kulishoshomwena bene kwai. Co Jim wamwihwile ngwendi, “Yobe bika kuulishoshomwena?” Ben wamweswile lika, co wamukumbulwile ngwendi: Mwafwa aba bali na kujabula njibazibuka mwamubwa. Bapwa batate. Tai njikuleke mubafwa batate. Njakulaela ngwange nga ubazibuka mwamubwa na kuzibuka butongwe bwabo bwa kujabula, co nobe usimpa.”

11. Cakumwenako ca banu babali baje balondele mu bwato citulongesa bika?

¹¹ Eci cakumwenako citulongesa bika? Ngwe mwa Ben, kutwesi kulishoshomwena mwafwa tuzibuka mwamubwa Tate yetu wa mwilu, Yehova. Tuzibuka ngwetu nameme bukalu bwame bati muno mu matangwa a kukotoka, Njambi atukwasa. (Isa 35:4) Nameme banu mu kaye bali na lyoba, oloni yetu tunasimpi mwafwa tunakulaela Yehova. (Isa 30:15) Ngwe mwa Ben, tulekeniko bakwetu byuma binatulingisa tukulaele manene Njambi. Nga tulinga ngoco, co basimpa na kukulaela ngwabo Yehova abakwasa nameme baliwana na bukalu bwakama.

12. (a) Cikulaeso muka ca mu citatu cakulaesele Njambi? (b) Majwi a kwendeka ngwawo ‘kuyula na nzili’ atwanukisa bika?

¹² Tusimutwiyeni ha cikulaeso ca mu citatu casonekele Isaya. Wasonekele ngwendi: “Njikamitakamesa na kumikwasa.” Isaya wendekele ngwendi Yehova akatakamesa banu bendi mwasonekele ngwendi: ‘Kengeni, Yehova wa hakamwa ya byoshe akayula na nzili.’ (Isa 40:10) Awa majwi amwesa ngwawo Yehova wapwa Mwene wa  nzili. Yehova wapangesele nzili yendi mwatakamesele na kukwasa bangamba bendi ba kusañulu. Co na ano matangwa acili na kupangesa nzili yendi mu kukwasa na kutakamesa bangamba bendi.—Kwitu 1:30, 31; Isaya 43:10.

13. (a) Simbu muka yakashulisilila Yehova cikulaeso cendi ca kwendeka ngwaco, “njikamitakamesa”? (b) Cikulaeso muka cikatusimpisa na kututakamesa?

¹³ Nga bitozi batupakesa, Yehova akashulisilila cikulaeso cendi ca kwendeka ngwaco: “Njikamitakamesa.” Mu mafuti amo, bitozi betu bali na kweseka kutwecelesa cipangi cetu ca kwambulula nambe kushoka munga yetu. Nameme ngoco, kutwesi kulishoshomwena manene nga batulwisa. Yehova natukulaesa ngwendi atukwasa, co oku kukatusimpisa na kututakamesa. Yehova Ngwendi, “kukwesi citwa cikasa kumibulumuna.” (Isaya 54:17) Awa majwi atwanukisa bisimpi bino bitatu.

14. Bika kutwapandele kulikomokela nga bitozi betu batuyandesa?

¹⁴ Simpi ya kulibanga, banu batuzinda mwafwa tuli na kukabangeya Kilisitu. (Mateo 10:22) Yesu wendekele ngwendi bandongesi bendi bakabapakesa mu matangwa a kukotoka. (Mateo 24:9; Yowa 15:20) Simpi ya mu cibali, bupolofweto bwa Isaya bwamwesele ngwabwo bitozi betu kubakatuzindi lika, oloni bakatupangela bitwa bya kulisezaseza na kutulwisa. Ebi bitwa binapu, kutukutiiya biñanda bya makuli na kutuyandesa manene. (Mateo 5:11) Yehova kesi kubindika bitozi betu kupangesa ebi bitwa mu kutulwisa. (Efeso 6:12; Kujo 12:17) Oloni kutwapandele kuziba lyoba. Mwafwa bika?

15-16. (a) Simpi muka ya mu citatu itunapande kwanuka? Indi mukanda wa Isaya 25:4, 5 unamwesa bati ngoco? (b) Kwesekesa na Isaya 41:11, 12, bika byakalinga Yehova kuli baje bali na kutulwisa?

¹⁵ Tusimutwiyeni ha simpi ya mu citatu.  Yehova ngwendi, “Kukwesi citwa cikasa kukubulumuna.” Cakumwenako, ciluli cikatunyungilila ku nyonzi yakama, Yehova nendi akatunyungilila kuli “baka-muka.” (Tandeni Isaya 25:4, 5.) Bitozi betu kubasa kutwonowesa kupangela Yehova.—Isaya 65:17.

¹⁶ Yehova ali na kututakamesa ha kutuleka byuma bikalingiwa kuli ‘baje banatulubalela.’ (Tandeni Isaya 41:11, 12.) Nameme bitozi batulwisa manene, oloni tuzibuka ngwetu boshe “bakanyonga.”

17-18. (a) Kutanda Mbimbiliya kutukwasa bati tukulaele manene Njambi? Endekeni cakumwenako. (b) Kusinganyekesesa ha cisoneka ca mwaka wa 2019 kutukwasa bati?

¹⁷ Tukanyamesa likulaelo lyetu nga tuzibuka mwamubwa Yehova. Ngila itwasa kuzibukilamo mwamubwa Njambi inapu kutanda Mbimbiliya na kusinganyekesesa ha byuma bitunatanda. Mu Mbimbiliya muli biñanda bije bimwesa mwanyungililemo Yehova banu bendi ba kusañulu. Ebi biñanda bitumwesa ngwabyo netu atunyungilila.

¹⁸ Tusimutwiyeni ha cakumwenako capangesele Isaya cije cimwesa mwakatunyungilila Yehova. Wesekesele Yehova ku kanyungi, co bangamba bendi ku bimanga. Isaya wendekele hali Yehova ngwendi: “Akakungulwila hamo lika bana ba bimanga, na kubambata mu maboko endi.” (Isaya 40:11) Nga tuliziba ngwetu Yehova natwaka mu maboko endi a nzili, co kutulishoshomwena. Ndungo wa kulongwa na kunyanyama nagula cisoneka ca Isaya 41:10, kupwa cisoneka ca mwaka wa 2019. Eci cisoneka ngwaco: “Keti mujaje, yange Njambi yeni.” Co banacangula mangana citukwase tupwe ba kusimpa nameme tuliwana na bukalu. Kusinganyekesesa ha majwi awa kumikanyamesa omwo muliwana na byeseko bili na kwija kulutwe.