1-2. (a) Yehova akamono bika nga banu babangi bakunguluka ku cilika ca Kulya kwa Mwene kwa Mangwezi? (Taleni cikupulo cili ha liputa lya helu) (b) Tusimutwiya bika muno mu cilongesa?

YEHOVA akamono bika mwakakenge banu babangi mu kaye koshe balikungulwila ku cilika ca Kulya kwa Mwene kwa Mangwezi? Kesi kumona lika mbunga ya banu bakunguluka, oloni akakenge hali munu na munu uje nakunguluka. Azibuka baje bakai ku Canukiso mwaka na mwaka. Nameme bamo bali na kuliwana na mapakeso, oloni bakaija na kukunguluka. Bakwabo kubesi kukala ku biwano bitukakala nabyo simbu yoshe, oloni bamona ngwabo kukunguluka ku Canukiso kwapwa kwa seo manene. Yehova akamono lalo baje bakaija ku Canukiso lwa kulibanga hamo bashaka lika kuzibuka byuma bikalingiwa.

² Yehova akabwaelela mwakamono banu babangi bakunguluka ku Canukiso. (Luka 22:19) Yehova kesi kwaka manene mbunge ku nambala ya banu bakunguluka embwe. Oloni byuma bikalingisa baje banu bakunguluke, bikebyo byapwa bya seo manene kuli Yehova. Muno mu cilongesa tusimutwiya ha bihula bya seo manene. Bika bitukaila ku Canukiso cije citukalingi lumo ha mwaka? Co bika bitukaila ku biwano bya calumingo na calumingo byanatubwaesela Yehova?

3-4. (a) Bika tukaila ku biwano? (b) Nga tuya na kukunguluka tumwesa ngwetu twapwa banu ba kufwa bati? (c) Kwesekesa na 1 Kolinte 11:23-26, bika kutwapandelele kulikela kuya ku Canukiso?

³ Tukakunguluka mwafwa kulinga ngoco kwapwa kulemesa Njambi. Tukai lalo na kukunguluka mwafwa Yehova akatulongesa ku biwano. Banu ba kulyalesa kubashakele kubalongesa.  (3 Yowa 9) Oloni yetu twashaka kulilongesa kuli Yehova na ku munga yendi yali na kupangesa.—Isaya 30:20; Yowa 6:45.

⁴ Nga tuya na kukunguluka tumwesa ngwetu tuba kulikehesa, co twashaka kulilongesa. Tukai ku cilika ca kwanuka kutsa kwa Yesu, kesi lika mwafwa ya kuliziba ngwetu tunapande kulinga ngoco, oloni tukaiko mwafwa twashaka kwononoka lishiko lya Yesu, ujewashikile ngwendi: “Lingeni eci mukunjanuka.” (Tandeni 1 Kolinte 11:23-26.) Eci cilika cikatakamesa lilabelelo lyetu ha byuma bya kulutwe na kutwanukisa mwatuzemena Yehova. Oloni Yehova azibuka ngwendi tubaboshe twatonda kutushongangeya na kututakamesa simbu yoshe. Mukemwo natubwaesela biwano bya calumingo na calumingo, co watushika ngwendi simbu yoshe tukale oku ku biwano. Kulikehesa kukatulingisa twononoke eli lishiko. Tukakala na simbu ya kulibwaesela ebi biwano calumingo na calumingo na kuya na kukunguluka.

5. Banu ba kulikehesa bakatabela bika nga Yehova abalanya?

⁵ Mwaka na mwaka Yehova akalanya banu mangana abalongese, co banu babangi ba kulikehesa bakatambula eci cilanyo. (Isaya 50:4) Bakalizibi mwamubwa mubakakunguluka ku Canukiso, mukemwo bakashangumuka kukunguluka na ku biwano bikwabo. (Zaka 8:20-23) Tubaboshe twashaka kutulongesa na kututwamenena kuli Yehova, uje wapwa mukwasi wetu na “muyoyesi” wetu. (Myaso 40:17) Kwapwa kwa seo manene kutolilila ku byuma byatulongesa Yehova na Munendi Yesu, uje yazema manene.—Mateo 17:5; 18:20; 28:20.

6. Kulikehesa kwalingisile bati munalume umo aye ku Canukiso?

⁶ Mwaka na mwaka tukeseka mutwasela mwoshe kulanya banu babangi ku cilika ca kwanuka kutsa kwa Yesu. Banu babangi baje batukalanya banawana bibezikiso byabingi ha kwija ku Canukiso. Tusimutwiyeni hali eci cakumwenako. Myaka ya kunima, munalume umo watambwile lipapelo lya kumulanya ku Canukiso, co walekele ndolome uje wamwanene lipapelo ngwendi kai ku cilika. Oloni ha litangwa lya Canukiso, uje ndolome wakomokele mwamwene uje munalume akobela mu Njubo ya Bumwene. Uje munalume wabwaelelele omwo bamutambwile mwamubwa, co washangumukile kukunguluka ku biwano byetu bya calumingo na calumingo. Ha mwaka wa mutunu kutunda haje ha cilika, walojele lika biwano bitatu. Bika byamulingisile alyangwile kukunguluka ku biwano byoshe? Walikehesele na kutengulula bisinganyeka byendi. Ndolome uje wamulanyele wendekele ngwendi: “Wapwa munalume wa kulikehesa.” Yehova wakokele uje munalume mangana akumulemese, co ha simbu ino napu ndolome wa kumbwitika.—2 Samwe 22:28; Yowa 6:44.

7. Bitukalilongesa ku biwano nebi bitukatanda mu Mbimbiliya bitukwasa bati tupwe ba kulikehesa?

⁷ Bitukalilongesa ku biwano nebi bitukatanda mu Mbimbiliya byasa kutukwasa tupwe ba kulikehesa. Biñanda bitukasimutwiya ku biwano mu byalumingo bya kukokela ku Canukiso bikasimutwiya manene ha mwanja watwakelele Yesu ha kupwa wa kulikehesa na kwana mwonyo wendi kupwa ndando ya kupatula. Nga tuli kuyei na Canukiso, tunapande kutanda biñanda bije byendeka ha byuma byalingiwile kuli Yesu te ali kuyei na kutsa, nebi byalingiwile mwasangukile. Bitukalilongesa ku biwano muje mu byalumingo na biñanda bitutanda mu Mbimbiliya ha simbu ije bikatulingisa tukandelele manene kuli Yesu uje watutsililile. Kukatushongangeya lalo tutembwinine kulikehesa kwendi na  kulinga cizango ca Yehova nameme kulinga ngoco kwakukalu.—Luka 22:41, 42.

8. Yesu wamwesele bati kusimpa?

⁸ Tukatembwinina lalo Yesu ha kupwa ba kusimpa. Acanukeni mwasimpililemo ha litangwa libamutsiile. Wazibukile ngwendi bitozi bendi bamushaula, kumupupanga, na kumutsiya. (Mateo 20:17-19) Nameme ngoco, walyanene kututsila. Muyetele simbu walekele tupositolo bendi ba kulongwa bakele nabo mu Ngetesemani ngwendi: “Indukeni, tuyeni. Kengeni, munalume ou ali na kunjenda bungungu ali kuno.” (Mateo 26:36, 46) Mbunga muyezile na kukwata Yesu, yambatele bitwa. Oloni Yesu walisholwele ikeye babenya, na kuleka maswalale ngwendi becele tupositolo baye. (Yowa 18:3-8) Yesu wapwile wa kusimpa. Ano matangwa, ba kubwabesa na bimanga beka bakeseka mubasela mwoshe kutembwinina kusimpa kwa Yesu. Mu ngila muka?

9. (a) Kusimpa kutukwasa bati tukunguluke simbu yoshe? (b) Mwanja wetu wasa kukwasa bati bandolome betu bali mu kamenga?

⁹ Nga kutupu ba kusimpa, co byuma bimo byasa kutwonowesa kukunguluka simbu yoshe. Bandolome na bandokazi betu bamo bakakunguluka nameme bali mu busiwa, banazeye, nambe nga babinja. Bakwabo bakakunguluka nameme baka-nanga yabo na baka-mashiko babalwisa. Anukeni ngweni mwanja wetu wasa kukwasa bandolome baje babanakutila likulaelo lyabo. (Heve 13:3) Mubaziba ngwabo tuli na kutwalelelao kupangela Yehova nameme tuliwana na byeseko, co likulaelo lyabo likanyama na kupwa ba kusimpa na kutwalelelao kupwa ba kulongwa. Kapositolo Paulu mukemwo mwalingile. Mwakele mu kamenga ku Loma, wakele na kubwaelela ha kuziba ngwendi bandolome bendi bakele na kupangela Njambi mu kulongwa. (Fili 1:3-5, 12-14) Mwapatukile mu kamenga, wasonekelele Bahebelu mukanda. Muje mu mukanda washongangeyeye baka-Kilisitu ba Bahebelu ngwendi ‘bakakateye mu kulizema umo na mukwabo’ na kukunguluka simbu yoshe.—Heve 10:24, 25; 13:1.

10-11. (a) Beya batunapande kulanya ku Canukiso? (b) Kwesekesa na Efeso 1:7, bika tunapande kubalanyela?

¹⁰ Tumwesa ngwetu tuba kusimpa nga tulanya babushoko, batukapanga nabo na baje batwatunga nabo ku Canukiso. Tukabalanyela bika? Mwafwa twamona ngwetu byuma byanatulingila Yehova na Yesu byapwa bya seo manene. Tushaka ngwetu bazibuke mukubakwasela “kutetela” kwa Yehova kuje kwanamwesa kwitila mu ndando ya kupatula.—Tandeni Efeso 1:7; Kujo 22:17.

¹¹ Nga tusimpa na kuya na kukunguluka, tumwesa cifwa cikwabo lalo. Njambi na Munendi bakamwesa eci cifwa mu ngila ya kulitila.

12. (a) Biwano bikatushongangeya bati tuzeme manene Yehova na Yesu? (b) Mukanda wa 2 Kolinte 5:14, 15 utushongangeya kulinga bika mu kutembwinina Yesu?

¹² Kuzema Yehova na Yesu kukatulingisa  tuye na kukunguluka. Co lalo byuma bitukalilongesa ku biwano bikatulingisa tuzeme manene Yehova na Munendi. Ku biwano bakatwanukisa byuma bibanatulingila. (Loma 5:8) Mutukakala ku Canukiso bakatuleke ngwabo Yehova na Yesu batuzema manene, co bazema na banu baje kubesi kumwesa kukandelela ku ndando ya kupatula. Cizemo cinapande kutushongangeya tutembwinine Yesu mu kuyoya kwetu kwa litangwa na litangwa. (Tandeni 2 Kolinte 5:14, 15.) Co lalo bimbunge byetu bikatushongangeya tushangazale Yehova ha kutwana ndando ya kupatula. Ngila imo itwasa kushangazala Njambi inapu kukumbulula kutundilila kwisi ya mbunge yetu nga tuli ku biwano.

13. Twasa kumwesa bati ngwetu twazema manene Yehova na Munendi? Lumbununeni.

¹³ Tumwesa lalo ngwetu twazema Yehova na Munendi nga tulyana kubalingilako byuma bimo. Kakangi tukalyana kulinga byuma bimo mangana tuye ku biwano. Mu bikungulukilo byabingi bakalingi biwano mukati ka calumingo ku simbu ya mangwezi, co hamo tukai ku biwano oku twajuka. Co biwano bimo bakabilingi ku mamaneselelo a calumingo, co babangi bakai ku biwano nameme ikeyo simbu ibanapande kuhwima. Yehova akatumono mutukai na kukunguluka nameme twajuka ndi? Eyo akatumono. Yehova akamono ngwendi twamuzema nga tulifwita kuya na kukunguluka nameme byuma binakaluwa.—Mako 12:41-44.

14. Yesu watwakelele bati mwanja mu kumwesa cizemo ca busunga?

¹⁴ Yesu watumwesele mutunapande kumwesela cizemo ca busunga. Kalingile byuma byashakele lika ikeye, oloni wakele mbunge ku byuma bibashakele bandongesi bendi, co lalo wabatsililile. Cakumwenako, wakele na kusimutwiya na baka-kumukabangeya nameme wajukile na kuliziba kuzeya. (Luka 22:39-46) Wapwile muka-kwana, keti muka-kutambula lika embwe. (Mateo 20:28) Nga tuzema manene Yehova na bandolome betu, co tweseka mutwasela mwoshe kuya ku cilika ca Kulya kwa Mwene kwa Mangwezi na ku biwano byoshe bya cikungulukilo.

15. Twashaka kukwasa beya?

¹⁵ Tuli mu nanga ya baka-Kilisitu ba mu kaye koshe, co tukai na kulanya bakwetu baije omu mu nanga. Oloni tukaka manene mbunge ku  kukwasa baje “banakundama ku nanga yetu mu kukulaela,” baje banecela kukunguluka na kwambulula. (Ngala 6:10) Tumwesa ngwetu twabazema nga tubashongangeya kuya na kukunguluka, maneneni kukala ku Canukiso. Ngwe mwa Yehova na Yesu, tubwaelela manene nga bandolome na bandokazi baje banelukilile munima baija kuli Yehova, uje wapwa Tate yetu na Kanyungi ketu wa cizemo.—Mateo 18:14.

16. (a) Twasa kulishongangeya bati umo na mukwabo, co biwano bikatukwasa bati? (b) Ino simbu ya Canukiso inapwila bika yaibwa kwanuka majwi endekele Yesu ku Yowano 3:16?

¹⁶ Mu byalumingo bija kulutwe twesekeni mutwasela mwoshe kulanya banu babangi baije na kukunguluka ku Canukiso cije cikalako lya mu Citanu mwangwezi ha 19 April, 2019. (Taleni cipalo ca “ Balanyeni”) Tukungulukeni simbu yoshe ku biwano byanatubwaesela Yehova, mangana tushongangeye bakwetu. Omwo mamaneselelo a kano kaye ali muyei, tunapande kukunguluka simbu yoshe mangana tupwe ba kulikehesa, kusimpa, na kukala na cizemo. (1 Tesa 5:8-11) Tukandeleleni na mbunge yetu yoshe ku cizemo cakama canatumwesa Yehova na Munendi.—Tandeni Yowano 3:16.