1. Banu ano matangwa bakaka mbunge ku byuma muka?

 KUMA munananguka ngweni banu babangi ano matangwa bakaka mbunge ku byuma bibatonda lika bakebo ndi? Cakumwenako, bamo bakapangesa intaneti mu kushaka kulimwesa. Ngeci, banu babandondo lika ano matangwa bakana Yehova Njambi bumpau. Muno mu cilongesa, tusimutwiya bikulumbununa kwana Njambi bumpau na byuma binapande kutushongangeya tulinge ngoco. Tulilongesa lalo mutwasa kwanena Njambi bumpau buje bunamupande, nomwo mwakajelesela lizina lyendi kulutwe.

KWANA YEHOVA BUMPAU KULUMBUNUNA BIKA?

2. Yehova wamwesele bati bumpau bwendi ha Mukinda wa Sinai? (Taleni lalo cikupulo cili ha Liputa lya kulibanga.)

² Mbimbiliya imwesa ngwayo Yehova wapwa Njambi wa hakamwa. Munima ya kutundisa baIsalele mu bundungo mu Ijipiti, Yehova wabamwesele bumpau bwendi. Acilingeni ngwe muli na kumona baIsalele babangi banalikungulwila ku Mukinda wa Sinai mangana baliwane na Njambi yabo. Co mumona lishelwa lya kuzibala lifwika ha Mukinda wa Sinai. Oho bene kukala lindunduma lyakama lije liningangesa libu ha banemana baIsalele, co mumona mihyato na kuziba cilumo cakama ca lupembo, cije cizika matwi. (Ekizo 19:16-18; 24:17; Samu 68:8) Acisinganyekeni mubalizibililile baIsalele mubamwene Yehova amwesa nzili na bumpau bwendi.

3. Kwana Yehova bumpau kulumbununa bika?

³ Kuma banu basa kwana Yehova bumpau ndi? Eyo basa kulinga ngoco. Ngila imo itwasa kwanena Yehova bumpau inapu kuleka bakwetu bifwa byakala nabyo na nzili yendi. Twasa kwana lalo Njambi bumpau nga tumushangazala mwafwa ya byuma bitunalingi mu nzili yendi. (Isaya 26:12) Mwene Devidi wanene Yehova bumpau, co napu mwanja waubwa kuli yetu. Mwalombelele hakati ka mbunga ya BaIsalele, Devidi wendekele kuli  Njambi ngwendi: ‘Yobe wapwa uwakama, wa nzili, na bumpau, na bubwa, co bumwene bwobe bwapwa bwakama. Byuma byoshe bya mwilu nebi bya hasi byapwa byobe.’ Mwene Devidi mwamanesele kulombela, ‘mbunga yoshe yashangazalele Yehova.’—Mizi 29:11, 20.

4. Yesu wanene bati Yehova bumpau?

⁴ Yesu mwakele hano hasi, wanene Ishe bumpau mwalekele banu ngwendi Yehova ikeye wakele na kumwana nzili ya kulinga bikomokeso. (Maki 5:18-20) Yesu wanene lalo Yehova bumpau mwendekele mwamubwa bya Ishe na kulinga mwamubwa banu. Simbu imo Yesu mwakele na kulongesa mu sinagogi, kwakele munakazi ibayandesele ku badimona ha myaka ya kupwa 18. Baje badimona balingisile uje munakazi alyeteke manene, co kasele kwanduka nameme kamandondo. Uje munakazi wakele mu bukalu bwakama. Yesu wazibilile uje munakazi ngozi, co wamushwenene na kwendeka nendi mu cizemo ngwendi: “Obe munakazi, unapatuka ku mushongo wobe.” Co Yesu wamukambekele maboko endi, haje bene uje munakazi wolokele na “kushangumuka kushangazala Njambi.” Wakandelele manene kuli Yehova mwafwa ya kumukangwisa. (Luka 13:10-13) Uje munakazi wanene Yehova bumpau mwafwa ya byuma byamulingilile. Netu tunapande kulinga ngoco.

BIKA BIKATULINGISA TWANE YEHOVA BUMPAU?

5. Bika bikatulingisa tusingimike Yehova?

⁵ Tukana Yehova bumpau mwafwa twamusingimika manene. Kuli byuma byabingi bikatulingisa tumusingimike. Cakumwenako, tukamusingimika mwafwa wakala na nzili ya kulinga byoshe byashaka, co lalo kesi kujuka. (Samu 96:4-7) Tukalimwena mana endi mu byuma byanatanga. Ikeye natwana mwonyo na byuma bitukwasa tutwaleleleho kuyoya. (Kujo 4:11) Wapwa wa kulongwa. (Kujo 15:4) Byoshe byakalingi byapwa byabibwa, co lalo akashulisilila bikulaheso byendi. (Yoshwa 23:14) Mukemwo kapolofweto Jelemiya wendekele kutalesa kuli Yehova ngwendi: “Hakati ka baka-mana boshe ba baka-mafuti na mu bumwene bwabo bwoshe, naumo wahi napu ngwe yobe nameme kamandondo.” (Jele 10:6, 7) Kuli byuma byabingi bitulingisa tusingimike Tate yetu wa mwilu. tukasingimika Yehova, co lalo twamuzema.

6. Mwafwa bika twazema Yehova?

⁶ Tukana Yehova bumpau mwafwa twamuzema manene. Tucisimutwiyeni bifwa bimo byakala nabyo Yehova bije bikatulingisa tumuzeme. Yehova wapwa muka-kutetela, co lalo wakala na mema ku mbunge. (Samu 103:13; Isaya 49:15) Yehova akalizibi kubabala ku mbunge mwakatumono tuyanda. (Zaka 2:8) Akatukwasa tumuzibuke na kulikuta nendi busamba. (Samu 25:14; Bili 17:27) Yehova wapwa wa kulikehesa, “akakulama na kutala lilu na lifuti-libu, mangana atundise munu wa kwisi mu likungu.” (Samu 113:6, 7) Ebi bifwa bitunasimutwiya bikebyo bikatulingisa twane Njambi bumpau.—Samu 86:12.

7. Twabezika kulinga byuma muka?

⁷ Tukana Yehova bumpau mwafwa tushaka ngwetu na bakwetu bamuzibuke. Banu babangi kubazibuka Yehova. Mwafwa bika? Mwafwa Satana najwalesa lizina lya Yehova mwanendeka biñanda bya makuli hali Ikeye. Co banu babangi banakulahela makuli a Satana. (2 Kori 4:4) Satana nalingisa banu bakulahele ngwabo, Yehova wapwa wamubi, katwakele mbunge, co lalo ikeye ali na kunena tuyando mu kaye. Oloni yetu tumuzibuka mwamubwa Njambi. Twabezika kuleka bakwetu bya Njambi na kubakwasa bamushangazale. (Isaya 43:10) Mukanda wa Samu 96 unendeka manene bya  kwana Yehova bumpau. Mutusimutwiya ha majwi ali ku mukanda wa Samu, nangukeni bingila mutwasa kwanena Yehova bumpau buje bunamupande.

TWASA KWANA BATI YEHOVA BUMPAU BUJE BUNAMUPANDE?

8. Twasa kwana bati Yehova bumpau? (Samu 96:1-3)

⁸ Tandeni Samu 96:1-3. Twasa kwana Yehova bumpau kwitila mu byuma bitwendeka hali Ikeye. Ku mukanda wa Samu 96:1-3, banatuleke ngwabo, “imbileni Yehova,” co “shangazaleni lizina lyendi . . . ambululeni muzimbu waubwa wa kwobola kwendi,” co lalo “ambululeni bumpau bwendi mukati ka baka-mafuti.” Ebi binapu bingila mutwasa kwanena Tate yetu wa mwilu bumpau. BaJuda ba kulongwa na baka-Kristu bakulibanga, kubakwata-kwatele ku masinde kuleka bakwabo byuma byabibwa byabalingilile Yehova na kwimanena lizina lyendi. (Danie 3:16-18; Bili 4:29) Twasa kubatembwinina bati?

9-10. Bika bitulilongesa ku byuma byaliwanene nabyo ndokazi Angelena? (Taleni na cikupulo.)

⁹ Tucisimutwiyeni byuma byaliwanene nabyo ndokazi Angelena a wa ku United States. Ndokazi Angelena wemanenene lizina lya Yehova mu kusimpa ku kampani kwakapanga. Wapwile wamuha oku ku kampani. Ngeci bamulanyele ku ciwano ca kuzimbula babaha baje bakobelele bipangi oku ku kampani. Ha simbu ya ciwano umo na umo wabo walizimbwile ikeye babenya. Ndokazi Angelena wabwaheseleko bikupulo mangana amwese kubwahelela kwali nakwo ha kupwa Mukaleho wa Yehova. Oloni simbu kanda ndokazi Angelena alizimbule, munalume umo yakapanga nendi walizimbwile na kwendeka ngwendi, nakolela mu naanga ya Bakaleho ba Yehova. Washangumukile kwendeka byuma byabibi ha Bakaleho ba Yehova na byuma bibakulahela. Ndokazi Angelena wendekele ngwendi: “Njalishoshomwenene manene. Oloni njazibukile ngwange byakele na kwendeka uje munalume hali Yehova byapwile bya makuli. Njalyendekesele mu mbunge ngwange: ‘Kunjasa kwoloka lika, njinapande kuleka aba bakwetu bya Yehova.’”

¹⁰ Uje munalume mwamanesele kwendeka, Ndokazi Angelena walombele lilombelo lyalihi mu mbunge yendi. Co wakumbulwile uje munalume mu kasingimiko ngwendi: “Nange njinakolela mu naanga ya Bakaleho ba Yehova, co nji umo wabo.” Nameme ndokazi Angelena walishoshomwenene, wawile mbunge na kubamwesa  bikupulo bije byamwesele ikeye na babusamba bendi bali na kulikuwa kupangela Yehova. Ndokazi Angelena wendekele bya likulahelo lyendi mu kasingimiko. (1 Pita 3:15) Bika byatundilemo? Angelena mwamanesele kwendeka, uje munalume wawile mbunge. Co wendekele na byuma byabibwa byaliwanene nabyo mwapwile mwanike ha simbu yakele na kulikwatasana na Bakaleho ba Yehova. Ndokazi Angelena wendekele ngwendi: “Tunapande kwimanena Yehova. Twabezika kwendeka busunga hali Ikeye.” Netu tunabezika kulemesa Yehova na kumwana bumpau nameme banu bamo bakamushaula.

11. Kushwa lika kunima bangamba ba Yehova banakabangeya bati cinangulo cili ku mukanda wa Samu 96:8?

¹¹ Tandeni Samu 96:8. Twasa kwana Yehova bumpau ha kumwana byuma byetu bya seho. Kushwa lika kunima bangamba ba Yehova banamwana bumpau kwitila mu byuma bibalinabyo. (Prov 3:9) Cakumwenako, baIsalele banene bimbongo na byuma bibakelenabyo mangana bikwase mu kutunga tempele na kuinyunga. (2 Bimye 12:4, 5; 1 Mizi 29:3-9) Bandongesi bamo ba Yesu banene “byuma byabo” mangana bakwase Yesu na tupositolo bendi. (Luka 8:1-3) Co Mbimbiliya inendeka ngwayo baka-Kristu mubakele mu njala yakama, bandolome na bandokazi babo babatuminine bimbongo. (Bili 11:27-29) Netu twasa kwana Yehova bumpau kwitila mu kwana milambu.

12. Milambu yetu yasa kwana bati Yehova bumpau? (Taleni na cikupulo.)

¹² Tucisimutwiyeni byakuliwana nabyo bimo bije bimwesa milambu yetu muikanena Yehova bumpau. Mu Zimbabwe mwakele lilanga lyakama lije lyakeleko ha simbu yailaha mu 2020. Banu babangi hamolika na ndokazi Prisca, batondele kutsa mwafwa ya kukeha kwa byakulya. Byuma byakaluwile. Oloni ndokazi Prisca watwaleleleho kwambulula lyamucitatu na lyamucitanu, co walingile ngoco na ha simbu ya kulima. Banu batunga nabo mubakele na kumumona aya na kwambulula ha simbu ya kulima, bakele na kumujola na kwendeka ngwabo: “Uno mwaka ulanduka yobe.” Oloni ndokazi Prisca wakele na kubakumbulula mu kusimpa ngwendi: “Yehova kesi kumbila kuti bangamba bendi.” Kukwetile simbu yailaha kutunda habwamwendekelele ngoco, ndokazi Prisca watambwile byakulya bya kukwasa baje banaliwana na bukalu kutundilila mu munga ya Yehova. Ndokazi Prisca watambwile ebi byakulya na  byuma bikwabo mwafwa ya milambu itukana. Banu batunga nabo balikomokelele, co bendekele ngwabo: “Twalimwena ngwetu Njambi ali na kukukwasa, ngeci netu tushaka kulilongesa byendi.” Ku banu batunga nabo, bakupwa 7 bashangumukile kuya ku biwano bya cikungulukilo.

13. Twasa kwana bati Yehova bumpau kwitila mu bilinga byetu? (Samu 96:9)

¹³ Tandeni Samu 96:9. Twasa kwana Yehova bumpau kwitila mu bilinga byetu. Tupilistu baje bapangelele ku tempele ya Yehova, bapandele kupwa ba kujela ku mubila. (Ekizo 40:30-32) Netu tunapande kupwa ba kujela ku mubila na kujenjuka kulinga byuma bije byazinda Yehova. (Samu 24:3, 4; 1 Pita 1:15, 16) Mbimbiliya inendeka ngwayo tunapande kushulula “bunu bwa laja” na kuzala “bunu bwabuha.” Oku kulumbununa ngwabo kutwapandele kusinganyeka na kulinga byuma bije bizibisa Yehova kubabala ku mbunge. Oloni tunapande kusinganyeka na kulinga byuma byabibwa bije bimwesa ngwabyo tulinakutembwinina Yehova na bifwa byendi. (Kolo 3:9, 10) Yehova asa kukwasa munu atenguluke na kuzala bunu bwabuha nameme nalingi byuma byabibi manene.

14. Bika bimulilongesa ku byuma byaliwanene nabyo Jack? (Taleni na cikupulo.)

¹⁴ Tusimutwiyeni ha byuma byaliwanene nabyo Jack uje wapwile cikenya na munu wa kutewesa manene ibalukile ngwabo Dimona. Mwafwa ya kutuma kwa milonga yendi, Jack bamusompelelele kutsa. Ha simbu yakele nakubandamena kukamutsiya, Jack washangumukile kulilongesa Mbimbiliya na ndolome uje wendelele kamenga kubamukutilile. Nameme Jack walingile byuma byabibi manene, watengulukile na kuzala bunu bwabuha, co bamumbwitikile. Jack watengulukile mu busunga. Nameme litangwa lya kumutsiya mulyetele, baka-kunyunga kamenga bamo balilile manene mubakele na kulisalesa nendi. Mukulunu wa tupokola umo uje wakele na kupangela omu mu kamenga wendekele ngwendi: “Jack wapwile lipanditi wamubi manene kutubakana bakwabo. Hanwoni napu umo wa banu bababwa muno mu kamenga.” Calumingo cateleko kutunda habatsiilile Jack, bandolome baje baile na kwendesa biwano bya mukati ka calumingo mu kamenga, baliwanene na lipanditi uje wakungulukile lwakulibanga ku biwano. Bika byamulingisile akunguluke? Wazibile manene kubwaha mwamwene  Jack atengulula futisi yendi. Ngeci watondele kuzibuka byanapande kulinga mangana alemese Yehova. Mwabusunga bene, bilinga byetu byabibwa byasa kwana Tate yetu wa mwilu bumpau.—1 Pita 2:12.

YEHOVA AKAJELESA BATI LIZINA LYENDI KULUTWE?

15. Yehova akajelesa bati lizina lyendi kulutwe? (Samu 96:10-13)

¹⁵ Tandeni Samu 96:10-13. Mavesi amamaneselelo ali ku mukanda wa Samu 96 analumbununa mwamubwa ngwawo, Yehova wapwa Mwene na muka-kwakula wamubwa. Yehova akajelesa bati lizina lyendi kulutwe? Akalinga ngoco mwakakula mu kusungama. Ololo anyongesa Babiloni Wakama mwafwa ya kujwalesa lizina lyendi lya kujela. (Kujo 17:5, 16; 19:1, 2) Baje bakamona kunyonga kwa Babiloni Wakama hamo bakatenguluka na kulikwatasana netu mu kulemesa Yehova Njambi mu busunga. Kutundaho, ha nzita ya Amagidoni Yehova akanyongesa Satana na bipangi byendi na banu boshe baje banatengulukila Yehova na kujwalesa lizina lyendi. Oloni akobola baje bamuzema na kumwononoka na kumwana bumpau buje bunamupande. (Maki 8:38; 2 Tesa 1:6-10) Munima ya ceseko ca mamaneselelo cije cikakalako Kristu mwakamanesa kuyula ha myaka 1,000. Yehova akamanesa kujelesa lizina lyendi. (Kujo 20:7-10) Ha simbu oyo, ‘kaye kakashula na mana a bumpau bwa Yehova ngwe mema a kalunga-ndonga mwakajalela.’—Haba 2:14.

16. Mwalyangwila kulinga bika? (Taleni na cikupulo.)

¹⁶ Acisinganyekeni lika kubwahelela kutukakala nakwo omwo banu boshe bakana Yehova bumpau buje bunamupande. Oloni omwo tucibandamena ei simbu, tulingeni mwoshe mutwasela kwana Njambi bumpau kwitila mu byuma bitulinga na kwendeka. Mukushaka kumwesa seho yei ñanda, Cibunga ca Kutwamenena cinangula mukanda wa Samu 96:8, kupwa cisoneka ca mwaka wa 2025: “Aneni Yehova bumpau bunapande lizina lyendi.”