CILONGESA 4
MWASO 18 Twakandelela ha Kutwana Ndando ya Kupatula
Bika Bitulilongesa ku Ndando ya Kupatula?
“Njambi watujombolwelele cizemo cendi mu ngila ei.”—1 IWA 4:9.
BILI MUNO MU CILONGESA
Muno mu cilongesa tulilongesa bya ndando ya kupatula muinasholwela bifwa byabibwa bya Yehova Njambi na Yesu Kristu.
1. Kuya ku cilika ca kwanuka kutsa kwa Yesu Kristu kutukwasa bati?
NDANDO ya kupatula yapwa bwana bwabubwa manene bwanatwana Yehova. (2 Kori 9:15) Twasa kulikuta busamba bwa kukanyama na Yehova Njambi mwafwa ya ndando ya kupatula. Co lalo twasa kukayoya myaka yoshe. Ngeci kunafwila kukandelela manene kuli Yehova uje watwanene ndando ya kupatula mwafwa ya kutuzema. (Loma 5:8) Yesu watushikile ngwendi tutwaleleleho kulinga cilika ca kwanuka kutsa kwendi, mangana tumwese kukandelela na kujeneka kwibala byuma byatulingilile Yehova na Yesu.—Luka 22:19, 20.
2. Bika bitusimutwiya muno mu cilongesa?
2 Uno mwaka cilika ca kwanuka kutsa kwa Yesu, cikalako Lyasapalalo April 12, 2025. Tubaboshe twashungwiya kukala oku ku cilika. Kusinganyekesesa ha byuma byatulingilile Yehova na munendi Yesu mu byalumingo byakukokela ku Canukiso na munima kutukwasa manene. Muno mu cilongesa tusimutwiya biitulongesa ndando ya kupatula hali Yehova na Munendi Yesu. Mu cilongesa cinatako, tukasimutwiya muitukwasela ndando ya kupatula na byuma bitunapande kulinga mangana tumwese kukandelela ku byuma byatulingilile Yehova na Yesu.
NDANDO YA KUPATULA ITULONGESA BIKA HALI YEHOVA?
3. Kutsa kwa munu umo kwasa kupatula bati banu babangi ku bubi na ku kutsa? (Taleni na cikupulo.)
3 Ndando ya kupatula itulongesa ngwayo Yehova wapwa muka-kwakula mu kusungama. (Kwitu 32:4) Mwafwa bika? Mwafwa Adama mwatengulukilile Njambi wapwile muka-bubi, co watsile. Ngeci netu twapwa tu baka-bubi, co tukatsi mwafwa tu bana bendi. (Loma 5:12, 5:12) Yehova wabwahesele ndando ya kupatula mangana atupatule ku bubi na ku kutsa. Oloni mulambu wa munu umo wa kulumbunuka wasa kupatula bati banu babangi ku bubi na ku kutsa? Kapositolo Paulu wendekele ngwendi: “Ngwe omwo kujeneka kwononoka kwa munu umolika kunalingisa banu babangi bapwe baka-bubi, na kwononoka kwa munu umolika lalo kulingisa banu babangi babapwise baka-kusungama.” (Loma 5:19, 5:19; 1 Timo 2:6, 2:6) Kapositolo Paulu walumbunwine ngwendi banu boshe bapwa baka-bubi, co bakatsi mwafwa ya munu umo wa kulumbunuka uje kwononokele Njambi. Ngeci, kwatondekele munu wa kulumbunuka uje ononoka Njambi mangana apatule banu ku bubi na ku kutsa.
Mwafwa ya munu umo lika Adama tubaboshe tunalingi bubi, co tukatsi. Co lalo mwafwa ya munu umo lika Yesu tubaboshe banatupatula ku bubi na ku kutsa (Taleni paragirafu 3)
4. Mwafwa bika Yehova katabesele bana ba Adama baje bamwononokele batwaleleleho kuyoya myaka yoshe?
4 Kuma Yesu wapandele kutsa mangana atupatule ku bubi na ku kutsa ndi? Mwafwa bika Yehova katabesele bana ba Adama baje bamwononokele batwaleleleho kuyoya myaka yoshe? Tunasa kusinganyeka ngwetu kulinga ngoco inesi kupwa ngila yaibwa ya mwakumanesela bukalu. Oloni oku kunesi kumwesa ngwabo Yehova kapwile lyaako wamubwa na kumwesa ngwe Adama kalingile bubi bwakama, co bana bendi nabo kubapwile baka-bubi.
5. Mwafwa bika twakulahela ngwetu simbu yoshe Yehova akalingi byuma mu kusungama?
5 Batico ngwe Yehova kabwahesele ndando ya kupatula na kutabesa bana ba Adama bayoye myaka yoshe oku kubalumbunukile? Ngwe walingile ngoco, ngwe wombwanesele mashiko endi kutalesa ku byuma byabibwa nebi byabibi. Oku kunesi kulingisa banu basinganyeke ngwabo, hamo Yehova akombwanesa mashiko endi lalo na kujeneka kushulisilila byuma bya natukulahesa kulutwe. Cakumwenako, bamo banesi kulihula ngwabo, ‘Kuma Yehova akashulisilila byuma byoshe bya natukulahesa kulutwe ndi?’ Oloni kutwapandele kulishoshomwena mwafwa byuma bya cifweci kubyasa kulingiwa. Mwafwa bika? Mwafwa Yehova walingile cuma cacikalu mu kumwesa ngwendi wapwa muka-kwakula mu kusungama. Watwanene Munendi umo lika mangana akututsile. Ngeci twakulahela ngwetu simbu yoshe akalingi byuma mu kusungama.
6. Cuma muka cikwabo cashongangeyeye Yehova atume Munendi kwija na kututsila? (1 Iwano 4:9, 10)
6 Kuli cuma cikwabo cashongangeyeye Yehova atume Munendi mangana aije nakututsila. Cizemo cikeco camushongangeyeye alinge ngoco. (Iwano 3:16; tandeni 1 Iwano 4:9, 10.) Yehova watumine Munendi akututsile mwafwa atonda ngwendi tukayoye myaka yoshe na kukakala mu naanga yendi. Adama mwalingile bubi, watundile mu naanga ya Yehova. Ngeci tubaboshe tunasemuka oku kutwesi mu naanga ya Njambi. Oloni mwafwa ya ndando ya kupatula banu boshe baje bakulahela Yehova na kumwononoka bakakala mu naanga yendi. Yehova asa kutukonekela ku bubi bwetu ha simbu ino na kutulingisa tulikute nendi busamba bwa kukanyama hamolika na bandolome na bandokazi. Mwa busunga bene, Yehova watuzema manene.—Loma 5:10, 11.
7. Kuyanda kwa Yesu kutukwasa bati tuzibisisise mwatuzemena Yehova?
7 Twasa kuzibisisa mwamubwa mwatuzemena Yehova nga tusinganyekesesa mwalizibilile mwamwene Munendi ayanda. Satana akendeka ngwendi, bangamba ba Njambi kubasa kutwalelelaho kupwa ba kulongwa kuli Ikeye nga bali na kuyanda. Mukushaka kumwesa ngwendi Satana wapwa muka-makuli Yehova wecelele Yesu ayande simbu kanda atse. (Yombi 2:1-5;1 Pita 2:21) Yehova wamwene banu mubakele na kushendumuna Yesu na kumona maswalale mubamupupa na kumushukika ha citi cakuyandesela. Kutundaho, Yehova wamwene Munendi bamutsiya mu ngila yaibi. (Mate 27:28-31, 39) Yehova wakele na nzili ya kwecelesa byuma bya cifweci mangana keti bilingiwe. Cakumwenako, baka-kulwisa Yesu mubendekele ngwabo: “Njambi amwobole nga amutonda,” Yehova ngwe wamobwele. (Mate 27:42, 43) Oloni ngwe Njambi walingile ngoco, ngwe Yesu kanene mwonyo wendi kupwa mulambu, co ngwe kutwesi na lilabelelo. Ngeci Yehova wecelele Munendi ayande kweta na ku kutsa kwendi.
8. Kuma Yehova walizibile kubabala ku mbunge mwamwene Munendi ayanda ndi? Lumbununeni. (Taleni na cikupulo.)
8 Nameme Yehova kobwele Munendi mwakele na kuyanda, oku kukulumbununa ngwabo Yehova kakele na kuziba kubabala ku mbunge. Mbimbiliya ngwayo Njambi watutangele mu cifwa cendi. Banu bakazibi kubabala ku mbunge mu bakamono bakwabo bayanda. Ngeci Yehova nendi akazibi kubabala ku mbunge. Mbimbiliya yalumbununa ngwayo Yehova akalizibi “kubabala ku mbunge,” co ‘akalubala’. (Samu 78:40, 41) Tusimutwiyeni ha muzimbu wa Abrahamu na Isaki. Yehova walekele Abrahamu ane munendi kupwa mulambu. (Gene 22:9-12; Hebe 11:17-19) Abrahamu wazibile kubabala ku mbunge mwakele na kulibwahesela kukatsiya munendi na kumwana kupwa mulambu. Yehova nendi wazibile manene kubabala ku mbunge mwamwene banu bapakesa Munendi na kumutsiya.—Kengeni vidio ya mutwe wa Tembwinineni Likulahelo Lyabo—Abrahamu, Mutamba 2 ha jw.org.
Yehova walizibile manene kubabala ku mbunge mwamwene Munendi ayanda (Taleni paragirafu 8)
9. Mukanda wa Loma 8:32, 38, 39 utulongesa bika ha cizemo ca Yehova?
9 Ndando ya kupatula itulongesa ngwayo Yehova watuzema manene kutubakana nomu mubatuzemena babushoko nambe babusamba betu. (Tandeni Loma 8:32, 38, 39.) Twakulahela ngwetu Yehova watuzema kutubakana nomu mutwalizemena yetu babenya. Yehova atonda manene kumikonekela na kumikwasa mukayoye myaka yoshe kutubakana nomu mumutondela yeni. Byuma byatonda kuli yetu binapu kumwesa kukandelela ku ndando ya kupatula na kumukulahela na kumwononoka. Ndando ya kupatula yapwa bwana bwakulitila buje bumwesa cizemo ca Njambi. Mu kaye kakaha tukalilongesa manene bya cizemo ca Yehova.—Ekele 3:11.
NDANDO YA KUPATULA ITULONGESA BIKA HALI YESU
10. (a) Mwafwa bika Yesu washotele manene mbunge ha ngila ibamutsiililemo? (b) Yesu wemanenene bati lizina lya Yehova? (Taleni lalo cipalo ca “ Kulongwa kwa Yesu Kunajelesa Lizina lya Yehova.”)
10 Yesu ashaka ngwendi banu basingimike lizina lya Ishe. (Iwano 14:31) Yesu washakele kujelesa lizina lya Ishe. Ngeci washotele manene mbunge mwafwa wazibukile ngwendi bamutsiya mu ngila yaibi ije imwesa ngwabo wapwile cikenya, co lalo washawile Njambi. Mukemwo walombele ngwendi: “Tate, nga citaba ei nganja itile kulako nange.” (Mate 26:39) Yesu wamwesele ngwendi Satana wapwa muka-makuli mwatwaleleleho kupwa wa kulongwa kuli Ishe kweta na ku kutsa kwendi.
11. Yesu wamwesele bati ngwendi wazema banu? (Iwano 13:1)
11 Ndando ya kupatula itulongesa lalo ngwayo, Yesu waka mbunge banu maneneni bandongesi bendi. (Prov 8:31; tandeni Iwano 13:1.) Cakumwenako, Yesu wazibukile ngwendi mweja hano hasi akulinga bipangi byabikalu. Wazibukile ngwendi bamutsiya mu ngila yaibi. Nameme ngoco, Yesu walingile ebi byuma byoshe mwafwa washakele kukabangeya byamulekele Ishe na kumwesa ngwendi wazema banu. Yesu wamwesele ngwendi wazema banu mwakele na kubambulwila na kubalongesa na kubakwasa. Nameme ha litangwa libamutsile, Yesu wajwelesele tupositolo bendi ku mendi, kubalongesa, kubashongangeya na kubazembeleka. (Iwano 13:12-15) Kutundaho, Yesu mwakele ha citi ca kuyandesela wawanene simbu ya kusimutwiya na cikenya uje ibashukikile kumukulo wendi na kumukwasa akale na lilabelo, co lalo washikile Iwano anyunge mwamubwa baina. (Luka 23:42, 43; Iwano 19:26, 27) Yesu wamwesele ngwendi watuzema mwezile na kututsila, co wamwesele lalo ngoco mwakele na kuyoyela na banu.
12. Yesu ali na kutukwasa bati ha simbu ino?
12 Nameme Yesu watsile “lumolika,” acili na kulinga byuma byabingi mu kutukwasa. (Loma 6:10) Byuma muka byali na kutulingila Yesu? Ali na kutwalelelaho kupanga mangana atwane byuma byabibwa bije bili na kwasiwa mwafwa ya ndando ya kupatula. Tucisimutwiyeni ha byuma byali na kulinga. Yesu napu Mwene na Kapilistu Wahakamwa na mutwe wa cikungulukilo. (1 Kori 15:25; Efeso 5:23; Hebe 2:17) Yesu ali na kutwamenena cipangi ca kukungulula bakubwabesa na mbunga yakama, cije cikahwa simbu kanda kayando kakama kahwe. a (Mate 25:32; Maki 13:27) Yesu ali na kupangesa ndungo wa kulongwa na kunyanyama mu kutwana byuma bitutonda bije bitukwasa tupwe ba kulongwa kuli Yehova muno mu matangwa a mamaneselelo. (Mate 24:45) Co lalo Yesu akatwalelelaho kutukwasa ha myaka 1,000 yakayula. Yehova watwanene Munendi mangana akututsile na kutulingila byuma byabingi byabibwa.
TWALELELENIHO KULILONGESA
13. Kusinganyekesesa kutukwasa bati tutwaleleleho kulilongesa mwatuzemena Njambi na Kristu?
13 Mwasa kutwalelelaho kulilongesa bya cizemo ca Yehova Njambi na Yesu Kristu nga musinganyekesesa ha byuma byabibwa bibanatulingila. Mu byalumingo bya kukokela ku Canukiso na munima, mwasa kwangula kutanda mukanda umo nambe ibali ya Bisoneka bya Biñanda Byabibwa. Keti mutande byuma byabingi ha simbu imolika. Oloni tandeni biñanda bya kupwamo na kusinganyekesesa ha byuma bimilingisa muzeme Yehova na Yesu. Co lalo lekeniko bakweni bimunawana mumunakala na kutanda.
14. Kwesekesa na mukanda wa Samu 119:97 na futunoti, kutondesa kumikwasa bati mutwaleleho kulilongesa bya ndando ya kupatula na biñanda bikwabo? (Taleni na cikupulo.)
14 Nga munakala mu busunga ha myaka yaingi, munasa kuliziba ngweni munazibuka byabingi ku ngila yakakwilamo Yehova na cizemo cendi na ndando ya kupatula. Oloni zibukeni ngweni kucili byuma byabingi bitwasa kulilongesa ku ngila yakakwilamo Yehova na cizemo cendi na ndando ya kupatula na biñanda bikwabo. Ngeci bika bimunapande kulinga? Tandeni na kulilongesa biñanda byabingi bije bili mu mabulu etu bije binemana ha Mbimbiliya. Nga munawana biñanda bije kumuzibisisa mwamubwa, co tondeseseni. Ha litangwa lyoshe lyamutunu singanyekeseseni ha byuma bimunawana na kulilongesa bya Yehova na munendi na cizemo cabo kuli yeni.—Tandeni Samu 119:97 na futunoti.
Nameme tunakala mu busunga ha myaka yaingi, twasa kulilongesa byuma byabingi ha ndando ya kupatula bije bitulingisa tumwese kukandelela kuli Yehova na Yesu ha byuma bibanatulingila (Taleni paragirafu 14)
15. Mwafwa bika kwapwa kwa seho kutwalelelaho kutondesesa bisimpi bya seho bya mu Mbimbiliya?
15 Keti muzeye nga kumuwana biñanda byabiha nambe byabibwa bije bimyeta ku mbunge ha simbu imutanda Mbimbiliya nambe imutondesesa. Munalifu na munu uje ali na kutonda goldi. Muka-kutonda goldi akaitondo ha simbu yailaha mangana aiwane. Oloni kesi kuzeya, mwafwa azibuka ngwendi nameme kambazubwila kakandondo ka goldi kapwa ka seho manene. Byuma bitukalilongesa mu Mbimbiliya byapwa bya seho manene ngecilika mwa goldi. (Samu 119:127; Prov 8:10) Ngeci kaleni na mbunge ya kubandamena na kutwalelelaho kutanda Mbimbiliya.—Samu 1:2.
16. Twasa kutembwinina bati Yehova na Yesu?
16 Omwo mulilongesa, tondeni bingila mumwasa kupangesela bimuli na kulilongesa. Cakumwenako, tembwinineni Yehova uje wapwa muka-kwakula mu kusungama ha kujeneka kumwesa kangu ku bakweni. Tembwinineni cizemo ca Yesu hali Ishe na banu, ha kulyana kwimanena lizina lya Yehova na kukwasa bandolome na bandokazi beni nameme kulinga ngoco simbu imo kwakukalu. Co lalo tembunwineni Yesu mu kwambulwila bakweni mangana nabo bazibuke byuma byabingi byabibwa byanatulingila na kubakwasa bakulahele ndando ya kupatula.
17. Bika bitusimutwiya mu cilongesa cinatako?
17 Nga tutwalelelaho kulilongesa bya ndando ya kupatula, co tuzema manene Yehova na Yesu. Co oku kubalingisa batuzeme manene. (Iwano 14:21; Jems 4:8) Ngeci tutwaleleniho kupangesa byuma byoshe byanatwana Yehova mu kulilongesa bya ndando ya kupatula. Mu cilongesa cinatako, tusimutwiya ha bibezikiso bituli na kulikuwa mwafwa ya ndando ya kupatula na byuma bitunapande kulinga mangana tumwese kukandelela ku ndando ya kupatula.
MWASO 107 Tembwinineni Njambi mu Kumwesa Cizemo
a Kukungulula “byuma bya mwilu” kwanendeka Paulu ku mukanda wa Efeso 1:10, kunaliseze na kukungulula “baje babanangula” kwanendeka Yesu ku mukanda wa Mateu 24:31 na Maki 13:27. Paulu nendeka ha simbu yakangula Yehova baje bakayula na Yesu ha kubabwabesa na sipilitu ya kujela. Oloni Yesu nendeka ha simbu ibakakungulwila bakubwabesa baje bakasala hano hasi na kubatwala mwilu ha simbu ya kayando kakama.
