CILONGESA 5
MWASO 108 Cizemo ca Njambi Cije Kucesi Kutenguluka
Cizemo ca Yehova Citukwasa Bati?
“Kristu wezile mu kaye na kwobola baka-bubi.”—1 TIMO 1:15.
BILI MUNO MU CILONGESA
Muno mu cilongesa tusimutwiya muitukwasela ndando ya kupatula nomwo mutwasa kukandelela kuli Yehova ha kutwanayo.
1. Bika bitwasa kulinga mangana tuzibise Yehova kubwaha ku mbunge?
ACISINGANYEKEKENI ngweni munana munu bwana bwakulitila buje bumukwasa. Muliziba bati nga uje munu atulika buje bwana na kujeneka kubupangesa? Twakulahela ngwetu muziba kubihya ku mbunge. Oloni mubwahelela nga mumumona apangesa buje bwana na kumwesa kukandelela ha kumwanabwo. Bika bitulilongesa kuli eci cakumwenako? Yehova watwanene munendi mangana akututsile. Ngeci, Yehova abwahelela manene nga tumwesa kukandelela ku bwana bwakulitila bwanatwana na ku cizemo cendi, cije camushongayeye atwane ndando ya kupatula.—Iwano 3:16; Loma 5:7, 8.
2. Bika bitusimutwiya muno mu cilongesa?
2 Mu kwita kwa simbu tunasa kulikela kumona ndando ya kupatula kupwa bwana bwa seho manene. Kunapu lika ngwe tunatulika bwana bwanatwana Yehova na kujeneka kubupangesa. Nga kutushaka kulinga ngoco, co tunapande kutwalelelaho kumwesa kukandelela ku byuma byanatulingila Yehova na Kristu. Muno mu cilongesa tulilongesa mutwasa kulingila ngoco. Tulilongesa muitukwasela ndando ya kupatula ha simbu ino na bibezikiso bitukatambula mwafwa ya ndando ya kupatula. Tusimutwiya lalo mutwasa kumwesela kukandelela ku cizemo canatumwesa Yehova maneneni mu byalumingo bya kukokela ku canukiso na munima.
MUITUKWASELA NDANDO YA KUPATULA HA SIMBU INO
3. Ndando ya kupatula ili na kutukwasa bati ha simbu ino?
3 Ndando ya kupatula ili na kutukwasa manene. Cakumwenako, Yehova akatukonekela bubi bwetu mwafwa ya ndando ya kupatula. Co akalingi ngoco, mwafwa watuzema. Muka-kwimba umo wamwesele kukandelela kuli Yehova uje wapwa muka-kukonekela. Wendekele ngwendi: “Obe Yehova uwamubwa, co walibwahesela kukonekela.”—Samu 86:5; 103:3, 10-13.
4. Yehova wanene ndando ya kupatula mangana ikwase beya? (Luka 5:32; 1 Timothi 1:15)
4 Banu bamo bakalizibi ngwabo kubafwila kubakonekela kuli Yehova. Mwa busunga bene tubaboshe kutwafwililile kutukonekela. Kapositolo Paulu wendekele ngwendi: “Kunjafwililile kunjisana kapositolo.” Nameme ngoco, watwaleleleho kwendeka lalo ngwendi: “Mu ngozi yakama ya Njambi, njinapu muno munjinapu” (1 Kori 15:9, 10) Nga tutenguluka ku bubi bwetu, co Yehova atukonekela. Mwafwa bika? Mwafwa watuzema. Nga muliziba kukala manene na mulonga mwafwa ya kusinganyeka ngweni Yehova kasa kumikonekela, co anukeni ngweni Yehova wanene ndando ya kupatula mangana ikwase banu bakujeneka kulumbunuka baje bashaka kutenguluka.—Tandeni Luka 5:32; 1 Timothi 1:15.
5. Kuma tunapande kusinganyeka ngwetu Yehova napande bene kutukonekela ndi? Lumbununeni.
5 Naumo wahi napande kuliziba ngwendi Yehova amukonekela mwafwa namupangela ha myaka yaingi. Mwa busunga bene, Yehova akanuka bipangi bitukamupangela. (Hebe 6:10) Oloni Yehova natwana ndando ya kupatula kupwa bwana, co kuyapwile fweto ya byuma bitunamupangela. Kutwapandele kusinganyeka ngwetu Yehova napande bene kutukonekela mwafwa twamulingila byuma byabingi byabibwa. Nga tusinganyeka ngoco, co tumwesa ngwetu na ndando ya kupatula kuyesi na seho kuli yetu.—Esekeseni Galatiya 2:21.
6. Mwafwa bika Paulu wapangele na nzili cipangi ca Yehova?
6 Paulu wazibukile ngwendi Yehova kasa kumukonekela nameme amupangele bipangi bya kufwa bati. Co bika byamulingisile apange na nzili cipangi ca Yehova? Paulu wapangele na nzili mangana amwese kukandelela ku ngozi ya Yehova na kutetela kwendi. (Efeso 3:7) Ngwe mwa Paulu, kutwesi kupanga na nzili mukushaka ngwetu Yehova atutetele, oloni tukapanga na nzili mu kumwesa kukandelela ku kutetela kwendi.
7. Ndando ya kupatula itukwasa bati laloha simbu ino? (Loma 5:1; Yakomba 2:23)
7 Ndando ya kupatula ili na kutukwasa lalo tulikute busamba bwa kukanyama na Yehova. a Ngwe mutunasimutwiiye mu cilongesa cinahu, mutwasemukile kutwakele na busamba na Njambi. Oloni mwafwa ya ndando ya kupatula twasa kulikuwa kukala mu “kwoloka na Njambi” na kushwena kuyehi nendi.—Tandeni Loma 5:1; Yakomba 2:23.
8. Mwafwa bika tunapande kukandelela kuli Yehova ha kututabesa kulombela kuli ikeye?
8 Kulombela kuli Yehova cinapu cuma ca kulitila citwasa kulinga mwafwa ya busamba bwetu nendi. Yehova akatolilila ku malombelo atukalombela ku biwano na malombelo a umo na umo wetu atukalombela kwalikalyetu. Mutukalombela, tukatepulula ku bishoti. Oloni kulombela kukatukwasa lalo mu bingila bikwabo. Kulombela kukatukwasa tukanyamese busamba bwetu na Njambi. (Samu 65:2; Yako 4:8; 1 Iwa 5:14) Yesu mwakele hano hasi wakele na kulombela kushwa kumo mwafwa wazibukile ngwendi Yehova wakele na kumutolilila. Co lalo wazibukile ngwendi lilombelo limukwasa akanyamese busamba bwendi na Ishe. (Luka 5:16) Twakandelela manene ku ndando ya kupatula ya Yesu mwafwa twasa kupwa babusamba ba Yehova na kusimutwiya nendi mu lilombelo.
MUIKATUKWASELA NDANDO YA KUPATULA KULUTWE
9. Ndando ya kupatula ikakwasa bati bangamba ba Yehova kulutwe?
9 Ndando ya kupatula ikakwasa bati bangamba ba Yehova kulutwe? Yehova akabana kuyoya kwa myaka yoshe. Banu babangi bakasinganyeka ngwabo yetu banu kutwasa kuyoya myaka yoshe, mwafwa kushwa lika kunima banu babangi banatwalelelaho kutsa. Oloni Yehova wayongwele ngwendi banu bayoye myaka yoshe. Ngwe Adama kalingile bubi ngwe banu kubesi kusinganyeka ngwabo kubasa kukayoya myaka yoshe. Nameme kutwasa kuyoya myaka yoshe ha simbu ino, twasa kukulahela ngwetu kulutwe tukayoya myaka yoshe. Mwafwa Yehova watumine munendi umolika yazema mukushaka lika ngwendi tukayoye myaka yoshe.—Loma 8:32.
10. Byuma muka bibakalikuwa bakubwabesa na bimanga beka?
10 Yehova atonda ngwendi tusinganyekesese ha kuyoya kwa mwaka yoshe. Bakubwabesa bakalikuwa kuyoya myaka yoshe mwilu muje mubakayula kaye na Kristu. (Kujo 20:6) Bimanga beka bakebo bakalikuwa kuyoya mu paradaisi hano hasi, haje kuhakakala kulila nambe kuziba kubabala. (Kujo 21:3, 4) Kuma neni mu umo wa bimanga beka baje bali na lilabelelo lya kukayoya myaka yoshe hano hasi ndi? Eli lilabelelo lya kukayoya hasi nalyo lyapwa lyakulitila manene. Yehova watangele banu mangana bayoye hano hasi, ngeci kuyoya myaka yoshe hano hasi kukatulingisa tupwe ba kubwahelela.
11-12. Bibezikiso muka bitunabandamena kukalikuwa mu paradaisi? (Taleni na bikupulo.)
11 Acisinganyekeni mubukafwila buyoye bweni mu paradaisi hano hasi. Kumukalishoshomwena lalo bya kubinja nambe kutsa. (Isaya 25:8; 33:24) Yehova akamyana byuma byoshe byabibwa bimutonda. Byuma muka bimushaka kukalilongesa? Kuma mushaka kukalilongesa bya tusitu, kwimba nambe kusona ndi? Kukakala bamanjinela na baka-kutunga na bandimi. Co lalo kukakala banu baje bakakuna na kubwahesa byakulya na kupanga bikwata byakupangesa na kulima bitungu na kubinyunga. (Isaya 35:1; 65:21) Mumukayoya myaka yoshe mukawana simbu yaingi ya kulinga byuma byoshe bimutonda.
12 Tukabwahelela manene mutukatambula baje banatsi mu bakasanguka. (Bili 24:15) Acisinganyekeni kubwahelela kumukala nakwo mu mukalilongesa bya Yehova kwitila mu byuma byabingi byanatanga. (Samu 104:24; Isaya 11:9) Mumukayoya myaka yoshe kumukalingi lalo bubi. Ngeci, mukapangela Yehova kwa kujeneka kulomba kumikonekela. Kuma munapande kubyana buyoye bwabubwa bwa cifweci na kulyangwila “kulikuwa senga ya bubi ha simbu yaindondo” ndi? (Hebe 11:25) Embwe. Bibezikiso bitukalikuwa mu kaye kakaha binapu byabibwa kutubakana byuma byoshe-byoshe bitwasa kutambula ha simbu ino. Anukeni ngweni kaye kakaha kakaija, co kali muyehi. Co byoshe ebi bikalingiwa mwafwa Yehova watuzema manene mukemwo watumine munendi mangana akututsile.
Bibezikiso muka bimunabandamena kukalikuwa mu paradaisi? (Taleni palagilafu 11-12)
KANDELELENI KU CIZEMO CA YEHOVA
13. Twasa kukandelela bati Yehova ha cizemo ca natumwesa? (2 Korinte 6:1)
13 Twasa kukandelela bati kuli Yehova ha kutwana ndando ya kupatula? Twasa kulinga ngoco nga tumona cipangi cendi kupwa ca seho manene mu kuyoya kwetu. (Mate 6:33) Yesu watsile “mangana baje bayoya keti baliyoyele lalo bakebo babenya, oloni bayoyele uje wabatsililile, co bamusangwile.” (2 Kori 5:15) Yehova natumwesa ngozi na kutukonekela. Twasa kumwesa ngwetu twazibisisa bukama bwa byuma byanatulingila, co lalo twakandelela ku byuma byanatulingila nga tulinga mwoshe mutwasela kumupangela.—Tandeni 2 Korinte 6:1.
14. Twasa kumwesa bati ngwetu twakulahela Yehova na binangulo byendi?
14 Twasa kumwesa lalo kukandelela ku cizemo ca Yehova nga tumukulahela na kukabangeya binangulo byendi. Mu ngila muka? Twasa kulinga ngoco nga twangula mwamubwa byakulinga kutalesa ku sikola ya helu, nambe cipangi citunapande kutambula, co lalo tunapande kusinganyekesesa ha byuma byatonda Yehova ngwendi tulinge. (1 Kor 10:31; 2 Kor 5:7) Nga tumwesa likulahelo mu bilinga, co likulahelo lyetu na busamba bwetu na Yehova bukanyama. Co lalo tukanyamesa lilabelelo lyetu.—Loma 5:3-5; Yako 2:21, 22.
15. Twasa kumwesa bati kukandelela ku cizemo canatumwesa Yehova mu byalumingo bya kukokela ku Canukiso na munima?
15 Twasa kumwesa lalo ngwetu twakandelela kuli Yehova ha kutumwesa cizemo, nga tulinga byuma bije bimwesa ngwabyo twakandelela ku ndando ya kupatula mu byalumingo bya kukokela ku Canukiso na munima. Omwo tulibwahesela kukala ku Canukiso, twasa kulanyako bakwetu mangana nabo bakawaniweko. (1 Timo 2:4) Lekeni banu bamunalanya byuma bikalingiwa ku Canukiso. Mwasa kubamwesa vidio ya Bika Byatsililile Yesu? Na ya Anukeni Kutsa Kwa Yesu ha jw.org. Bakulunu mu cikungulukilo nabo banapande kulanya baje banelukila munima. Acisinganyekeni kubwahelela kukala mwilu na hasi nga umo wa bimanga ba Yehova eluka ku butanga. (Luka 15:4-7) Mumuya ku Canukiso, keti mumeneke lika baje bamuzibuka. Menekeni na baje banaija lwakulibanga ku Canukiso na baje kubakele na kwija ku Canukiso ha myaka yaingi. Cilengo cetu cinapu ca kubakwasa balizibe kushubuluka.—Loma 12:13.
16. Mwafwa bika tunapande kubwezelela ku cipangi cetu ca kwambulula mu byalumingo bya kukokela ku Canukiso na munima?
16 Kuma mwasa kubwezelela ku cipangi ceni ca kwambulula, mu byalumingo bya kukokela ku Canukiso na munima ndi? Nga mulinga ngoco, co mumwesa ngweni mwakandelela ku byuma byoshe byanamilingila Njambi na Kristu. Nga twambulula simbu yoshe tulimwena mwatukwasela Yehova, co likulahelo lyetu kuli ikeye likanyama. (1 Kori 3:9) Co lalo, lingeni mwoshe mumwasela kwilula bisoneka bya Canukiso bije bili mu libulu lya Kwilula Bisoneka kwa ha Litangwa na Litangwa na cipalo cikawaniwa mu libulu lya Buyoye Bwetu Baka-Kristu na Cipangi Cetu. Co lalo mwasa kwangula kutanda bisoneka bya Canukiso ha cilongesa ca munu endi lika.
17. Bika bikazibisa Yehova kubwaha? (Taleni lalo cipalo ca “ Mumwasa Kumwesela Ngweni Mwakandelela ku Cizemo ca Yehova.”)
17 Byuma bimuli na kuliwana nabyo binasa kumyonowesa kulinga byabingi mu cipangi ca Yehova. Anukeni ngweni Yehova kesi kwesekesa bipangi byetu ku bipangi bibakalingi bakwetu, oloni akamono bili mu mbunge ya umo na umo wetu. Akabwahelela mumukamwesa kukandelela ku ndando ya kupatula ije yapwa bwana bwakulitila.—1 Samwe 16:7; Maki 12:41-44.
18. Mwafwa bika tukakandelela manene kuli Yehova Njambi na Yesu Kristu?
18 Ndando ya kupatula inalingisa bubi bwetu babukonekele, twase kulikuta busamba na Yehova na kukala na lilabelelo lya kukayoya myaka yoshe. Tutwaleleleniho kumwesa kukandelela ku cizemo ca Yehova cije camushongangeyeye atulingile byuma byabibwa. (1 Iwa 4:19) Co lalo tutwaleleleniho kumwesa kukandelela kuli Yesu uje wezile na kututsila mwafwa watuzema.—Iwano 15:13.
MWASO 154 Cizemo Kucesi Kuhwa
