MU MBIMBILIYA muli majwi amangi abendekele banu baje bakele na kuliziba ngwe mutukalizibila. (Yako 5:17) Cakumwenako, omwo tutanda majwi ali ku Loma 7:21-24, tuzibisisa mwalizibilile Paulu. Wendekele ngwendi: ‘Omwo njishaka kulinga byuma byabibwa, co bubi bukebwo busholoka. Nji munu wa kubindama.’ Awa majwi endekele Paulu atutakamesa, mwafwa netu tuli na kulifwita na bunu bwetu bwa kujeneka kulumbunuka.

Kuli majwi akwabo nawa endekele Paulu. Ali ku Ngalatiya 2:20. Paulu wendekele hali Yesu ngwendi: “Wanjizemene, co walyanene ikeye babenya omwo yange.” Neni mukalizibi ngoco ndi? Hamo kumwesi kuliziba ngoco simbu yoshe.

Nga tukalizibi kubihya mwafwa ya bubi butwalingile kunima, co twasa kusinganyeka ngwetu Yehova katuzemene, co lalo katusambesele. Twasa lalo kumona ngwetu ñombelo ya Yesu kuipanga kuli yetu. Kuma Yesu ashaka ngwendi tumone ngwetu ñombelo yendi ipanga kuli yetu ndi? Nga mukemwo, co bika bitukwasa tuimone ngwetu ipanga kuli yetu? Tusimutwiyeni ebi bihula bibali.

Yesu ashaka ngwendi tumone ñombelo yendi kupwa bwana bwanatwana ha kapandi. Bika bitwendekela ngoco? Acisinganyekeni ha ñanda ili ku Luka 23:39-43. Munalume umo banamushukika ha citi ca kuyandesela kuyehi na Yesu. Co ali na kuliziba mulonga mwafwa ya bubi bwalingile. Hamo bubi bwalingile bwapwile bwakama manene mukemwo bamwanene kashitiko kaje kabakele na kwana bikenya. Ou munalume nalishoshomwena manene, ngeci alomba Yesu ngwendi: “Njanuke, omwo ukaija mu bumwene bwobe.”

Bika byalingile Yesu? Lingeni ngwe mumona Yesu atengulula mutwe oku aziba kubabala mangana atale uje munalume. Yesu ali na kuziba kubabala, oloni amweswila uje munalume na kumuleka ngwendi: ‘Mwa busunga lelo bene njikuleka ngwange, ukakala nange mu Paladaisi.’ Ngwe Yesu washakele, ngwe walekele uje munalume ngwendi, ‘Muna Munu wezile mu kwana mwonyo wendi ngeci apatule banu babangi.’ (Mateo 20:28) Oloni endekesi ya Yesu kuli uje munalume imwesa ngwayo wamukwasele amone ngwendi ñombelo yendi imukwasa ha kapandi. Kamulekele ngwendi mukakala nange. Oloni ngwendi, ‘ukakala nange.’ Yesu wakulahesele uje munalume ngwendi akayoya hano hasi mu Paladaisi.

Yesu washakele kukwasa uje munalume amone ngwendi ñombelo yendi imukwasa. Uje cikenya kapangelele Njambi, oloni Yesu wamuzibilile ngozi. Ngeci, twakulahela ngwetu Yesu azibila ngozi muka-Kilistu uje ali na kupangela Njambi. Bika bitukwasa tukulahele ngwetu ñombelo ya Yesu itukwasa ha kapandi nameme twalingile bubi kunima?

Cipangi ca kwambulula cakwasele Paulu amone ngwendi Yesu watsililile ikeye. Mu ngila muka? Paulu wendekele ngwendi: ‘Njikandelela kuli Kilistu Yesu Mwene yetu, uje nanjitakamesa mu bipangi byange. Njimukandelela mwafwa nanjimono ngwendi njinapande kumupangela, nambe ha kulibanga njendekele byuma byabibi hali ikeye na kumupakesa na kumushaula.’ (1 Tima 1:12-14) Netu Yesu natwana cipangi ca kwambulula. (Mateo 28:19, 20) Kuma cipangi ca kwambulula casa kutulingisa tumone ngwetu Yesu watutsililile ha kapandi ndi?

Albert watundile mu cikungulukilo ha myaka 34. Co neluka ololo mu cikungulukilo. Wendekele ngwendi: “Bubi bwange buli ku mesho ange simbu yoshe. Oloni nga njili mu lihya njikalizibi ngwe mwalizibilile Paulu. Njikalizibi ngwange Yesu nanjana cipangi ca kwambulula. Munjikambulula njikakolesa, njikabwahelela, co lalo njikakala na lilabelelo.”—Myaso 51:3.

Allan wapwile cikenya simbu kanda alilongese busunga. Allan wendekele ngwendi: “Njicikanuka byuma byabibi byoshe binjalingile ku banu. Oku kukanjizeyesa ha bisimbu bimo. Oloni njikandelela kuli Yehova mwafwa napangesa yange muka-bubi mu kwambulula muzimbu waubwa ku bakwetu. Munjikamono banu batenguluka mwafwa ya kubambulwila, njikanuka bubwa bwa Yehova na cizemo cendi. Njikalizibi ngwange Yehova ali na kunjipangesa njikwase baje balingile byuma byabibi ngeci mwange.”

Kwambulula kutukwasa tulinge byuma byabibwa na kukala na bisinganyeka byabibwa. Kutukwasa lalo tumone ngwetu Yesu watuzema na kututetela, co lalo natukulahela.

Simbu tubandamena kunyonga kwa kaye ka Satana, mbunge yetu inasa kutwalelelaho kutwana mulonga ha byuma byabibi bitwalingile kunima. Bika bitukwasa tulwise ebi bisinganyeka?

Jean mwapwile mwanike wapangelele Njambi oku alinga byuma byabibi. Co akalizibi kukala na mulonga ha byuma byabibi byalingile kunima. Oloni wendekele ngwendi: “Njabwahelela mwafwa Njambi wapwa wakama kutubakana bimbunge byetu.” (1 Yowa 3:19, 20) Netu nga tuzibuka ngwetu Yehova na Yesu bazibuka ngwabo tu baka-bubi, co kutuzeye. Anukeni ngweni ndando ya kupatula bayanene kuli baka-bubi, keti ku banu ba kulumbunuka embwe.—1 Tima 1:15.

Nga tusinganyekesesa Yesu mwayoyelelemo na banu ba kujeneka kulumbunuka na kumona cipangi cetu ca kwambulula kupwa ca seho, co tulimwena ngwetu ndando ya kupatula itukwasa ha kapandi. Nga tulinga ngoco, co twendeka ngwe mwendekele Paulu uje wendekele ngwendi: “Wanjizemene, co walyanene ikeye babenya omwo yange.”