CILONGESA 27
Libwaheseleni Byakulinga Simbu Kanda Bamiyandese
‘Boshe baje bashaka kuyoya buyoye bwa bunjambi mu kulikwatasana na Kilistu Yesu bakamona mapakeso.’—2 TIMA 3:12.
MWASO 129 Lukazwelapili Kuitiisa
BILI MUNO MU CILONGESA *
1. Mwafwa bika tunapande kulibwahesela kutuyandesa?
MWENE YESU wendekele ngwendi bandongesi bendi bakabazinda. Ngeci, ha butsiki bwa kwinduka litangwa libamutsiile, wabalekele ngwendi banu bakabazinda. (Yowa 17:14) Kutunda habatsiililile Yesu kwa kweta na lelo, bangamba ba Yehova ba kulongwa banabayandesa mwafwa ya likulahelo lyabo. (2 Tima 3:12) Omwo tuli na kushwenya ku kukotoka kwa kano kaye, tuzibuka ngwetu bitozi betu batuyandesa manene.—Mateo 24:9.
2-3. (a) Bika byasa kutundamo nga tukala na lyoba? (b) Bika bitusimutwiya muno mu cilongesa?
2 Twasa kulibwahesela bati mangana tukakolese omwo bakatuyandesa kulutwe? Kutwapandele kusinganyeka manene mubakatuyandesela. Nga tulinga ngoco, co tulishoshomwena na kukala na lyoba. Co lalo twasa kulikela kupangela Yehova simbu kanda tuliwane na ceseko cakama. (Visi 12:25; 17:22) ‘Citozi cetu Liyabolo’ ali na kutujujwisa mangana atutundise kuli Yehova. (1 Petu 5:8, 9) Bika bitunapande kulinga ha simbu ino mangana tukakolese omwo bakatuyandesa?
3 Muno mu cilongesa, tusimutwiya mutwasa kukanyamesela busamba bwetu na Yehova nebi bitushakela kubukanyamesa ha simbu ino. Tusimutwiya lalo bitunapande kulinga mangana tupwe ba kusimpa. Co lalo tusimutwiya bitunapande kulinga nga banu batuzinda.
BIKA BIMUNAPANDE KULINGA MANGANA MULIKUTE BUSAMBA NA YEHOVA?
4. Bika biunendeka mukanda wa Vahevelu 13:5, 6? Co bika bitunapande kukulahelela awa majwi?
4 Zibukeni ngweni Yehova wamizema, co kasa kumiseza embwe. (Tandeni Vahevelu 13:5, 6.) Kaposhi ka Kukengela kamo kendekele ngwako: “Munu uje azibuka Njambi mwamubwa akakulahela manene Njambi ha simbu ibamuyandesa.” Awa majwi anapu a busunga. Nga tushaka kukolesa mu tuyando, tunapande kuzema Yehova na kumukulahela manene. Co tunapande kukulahela ngwetu nendi watuzema.—Mateo 22:36-38; Yako 5:11.
5. Bika byasa kumikwasa mumone ngweni Yehova wamizema?
5 Tandeni Mbimbiliya ha litangwa na litangwa mangana mulikute busamba na Yehova. (Yako 4:8) Omwo mutanda Mbimbiliya, nangukeni bifwa bya Yehova. Nangukeni lalo bilinga byendi bije bimwesa ngwabyo wamizema. (Kutu 34:6) Bamo kwasa kubakaluwila kukulahela ngwabo Njambi wabazema. Mwafwa bika? Hamo kubabamwesele cizemo kushwa ku bwanike bwabo. Nga mukemwo mumukalizibila, co ha litangwa na litangwa sonekeni byuma byabibwa byanamilingila Yehova. (Myaso 78:38, 39; Loma 8:32) Nga musinganyekesesa ha byuma bimunaliwana nabyo nebi bimunatanda mu Mbimbiliya, co muwana byuma bimunapande kusoneka bije byanamilingila Yehova. Nga mukandelela ku byuma byoshe byanamilingila Yehova, co busamba bweni bukanyama.—Myaso 116:1, 2.
6. Kwesekesa na Myaso 94:17-19, kuleka Yehova byuma byoshe bili ku mbunge yetu kutukwasa bati?
6 Lombeleni simbu yoshe. Lingeni ngwe muli na kumona mwanike uje ibanabumbatela kuli baishe. Ou mwanike nashubuluka kuleka baishe byuma byabibwa nebi byabibi byanaliwana nabyo ha litangwa olyo. Neni nga muleka Yehova byuma byoshe bili ku mbunge yeni, co muliziba ngwe uje mwanike. (Tandeni Myaso 94:17-19.) Omwo mulombela, lekeni Yehova byuma byoshe bili ku mbunge yeni. Mulekeni byuma byoshe bije bili na kumilingisa muzibe lyoba na kukala na bishoti. (Mbimbi 2:19) Bukwasi muka bumuwana nga mulinga ngoco? Mukala mu “kwoloka kwa Njambi, kuje munu naumo wahi asa kuzibisisa.” (Fili 4:6, 7) Nga mulomba manene kuli Yehova, co mulikuta nendi busamba.—Loma 8:38, 39.
Tupwa ba kusimpa nga tukulahela Yehova na Bumwene bwendi
Stanley Jones wakulahelele ngwendi byanakulahesa Njambi bikalishulisilila, ngeci likulahelo lyendi lyakanyamene (Taleni palagilafu 7)
7. Bika bimunapande kukulahelela ngweni bikulaheso bya Njambi bikalishulisilila?
7 Kulaheleni ngweni bikulaheso bya Njambi bikalishulisilila. (Kula 23:19) Nga kutukulahela ngwetu bikulaheso bya Njambi bikalishulisilila, co Satana na banu bendi batujujwisa. (Visi 24:10; Heve 2:15) Bika bimikwasa mukulahele manene byuma byanamikulahesa Njambi? Waneni simbu ya kubitanda. Co tondeni bukaleho buje bumilingisa mukulahele ngweni bikalishulisilila. Kulinga ngoco kumikwasa bati? Tusimutwiyeni hali Stanley Jones uje ibakutile ha myaka 7. Stanley bamukutile mwafwa ya likulahelo lyendi. * Bika byamukwasele akolese? Wendekele ngwendi: “Kuzibuka Bumwene bwa Njambi nebi bibukalinga kwanjitakamesele. Ngeci, wahi wasele kunjitundisa kuli Yehova.” Nga munakulahela manene byuma byanakulahesa Njambi, co lyoba kulimyonowesa kumupangela.—Visi 3:25, 26.
8. Mutuli na kukungulukilamo ino simbu kumwesa bika? Lumbununeni.
8 Kungulukeni simbu yoshe. Biwano bikatukwasa tulikute busamba na Yehova. Nga tukai ku biwano simbu yoshe, co kulutwe tukakolesa mubakatuyandesa. Oloni nga kutwesi kuya kushwa kumo, co kutukasa kukolesa. (Heve 10:24, 25) Bika bitwendekela ngoco? Kulutwe kutunatala kubanga munu akake buyoye bwendi mu bushonde asina akaya na kukunguluka. Lihuleni ngweni: ‘Nga byuma byabindondo bili na kunjonowesa kuya ku biwano, co mubakatushokela kukunguluka njikasa kwaka buyoye bwange mu bushonde mangana njikakunguluke ndi?’ Nga tuzema manene biwano byetu, co kutukalikele kukunguluka omwo bitozi betu bakatubindika kukunguluka. Ino ikeyo simbu itunapande kuzema manene biwano byetu. Nga tuzema manene kukunguluka, co kututabesa banu nambe baka-fulumende batwonowese kwononoka Njambi.—Vili 5:29.
Nga mukwata Bisoneka na Myaso ya Bumwene mu mutwe, co kulutwe mukayanuka, co lalo ikamitakamesa (Taleni palagilafu 9) *
9. Bika bikwapwila kwakubwa kukwata mikanda mu mutwe simbu kanda batuyandese?
9 Kwateni mikanda imwashaka mu mutwe. (Mateo 13:52) Bisimbu bimo tukebala mikanda itwashaka, oloni Yehova atwana sipilitu yendi ya kujela mangana itwanukise. (Yowa 14:26) Ndolome umo wa ku East Germany bamwakele mu kamenga likalyendi. Ou ndolome wendekele ngwendi: “Njabwahelelele manene mwafwa njakwatele bisoneka bya kutubakana 100 mu mutwe. Nameme njakele likalyange, njakele na kusinganyekesesa ha byuma bya mu Mbimbiliya simbu yoshe.” Ije mikanda yakwasele ndolome yetu akolese na kukanyamesa busamba bwendi na Yehova.
(Taleni palagilafu 10) *
10. Bika bitunapande kukwatela myaso mu mutwe?
10 Imbeni myaso ije izumbangeya Yehova, co ikwateni mu mutwe. Paulu na Silasi mubakele mu kamenga mu Filipu, bashangazalele Njambi ha kumwimbila myaso ije ibakwatele mu mitwe. (Vili 16:25) Bandolome ba ku Soviet Union (Russia) mubakele mu bunzinda ku Siberia, balitakamesele bati umo na mukwabo? Ndokazi Mariya Fedun, wendekele ngwendi: “Twakele na kwimba myaso ya mu libulu lyetu lya myaso ije itwakwatele mu mitwe.” Wendekele lalo ngwendi ije myaso yabatakamesele, co yabalingisile bakanyamese busamba bwabo na Yehova. Mukalizibi kukanyama nga mwimba myaso ya bumwene ije imwashaka ndi? Nga mukemwo, co ikwateni mu mutwe hano bene.—Taleni cipalo ca “ Njikwase Njipwe wa Kusimpa.”
BIKA BIMUNAPANDE KULINGA MANGANA MUSIMPE?
11-12. (a) Kwesekesa na 1 Samwele 17:37, 45-47, bika byalingisile Ndabiti mangana asimpe? (b) Bika bitulilongesa kuli Ndabiti?
11 Nga bamiyandesa munapande kusimpa asina mukolesa. Bika bimunapande kulinga nga kumwapwile ba kusimpa? Zibukeni ngweni kusimpa kukwemanene ha citalamo ca munu, nzili yendi nambe cashu cendi. Tusimutwiyeni hali Ndabiti. Ndabiti wapwile mwanike omwo walwile na Ngolyata. Ngolyata wapwile wa kutunuka, co lalo wazibukile kulwa. Oloni Ndabiti kazibukile kulwa. Ndabiti kakele na mukwale. Oloni wasimpile. Ndabiti washatukilile kuli Ngolyata uje wapwile munalume wa kulyalesa mangana akalwe nendi.
12 Bika byakwasele Ndabiti apwe wa kusimpa? Wazibukile ngwendi Yehova wakele nendi. (Tandeni 1 Samwele 17:37, 45-47.) Ndabiti kazibile lyoba ha kutunuka kwa Ngolyata. Oloni wamwene ngwendi Ngolyata wamundondo manene kuli Yehova. Eyi ñanda itulongesa bika? Nga tukulahela ngwetu Yehova ali netu na kumona ngwetu bitozi betu banapu babandondo manene kuli Njambi Muka-nzili Yoshe, co tupwa ba kusimpa. (2 Mizi 20:15; Myaso 16:8) Bika bitunapande kulinga mangana tupwe ba kusimpa simbu kanda tuliwane na tuyando?
13. Twasa kupwa bati ba kusimpa? Lumbununeni.
13 Nga twambulula muzimbu waubwa ku banu, co tupwa ba kusimpa. Mwafwa bika? Mwafwa kwambulula kutukwasa tukulahele manene Yehova na kujeneka kutewa banu. (Visi 29:25) Cakumwenako, bweho bukakanyamesa mubila. Mu ngila imo lika, netu tukanyama na kupwa ba kusimpa nga twambulwila ku njubo na njubo, ku mbunga, mu kutulukwa na mu mitambela ya mingoso. Nga tupwa ba kusimpa ha simbu ino, co tutwalelelaho kwambulula nameme baka-fulumende bashoka cipangi cetu.—1 Tesa 2:1, 2.
Nancy Yuen katabele kumubindika kwambulula muzimbu waubwa (Taleni palagilafu 14)
14-15. Bika bitulilongesa kuli Nancy Yuen na Valentina Garnovskaya?
14 Tusimutwiyeni hali bandokazi babali baje bapwile ba kusimpa mangana tumone bitulilongesa kuli bakebo. Nancy Yuen wapwile wamwihi, wapwile lika mamita 1.5. Nameme ngoco, katewele banu. * Watwaleleleleho kwambulula muzimbu waubwa wa Bumwene bwa Njambi nameme babashokelele cipangi ca kwambulula. Tupokola mubakele na kumwihozola bihula bendekele ngwabo ikeye “munu wamukalu manene” mu lifuti lyabo.
Valentina Garnovskaya wakulahelele ngwendi Yehova wakele hamo nendi (Taleni palagilafu 15)
15 Valentina Garnovskaya bamukutile lutatu mu myaka 21 * ku Soviet Union (Russia). Bika bibamukutililile? Mwafwa kalikelele kwambulula. Co tupokola bamumwene ngwabo wapwile “cikenya wakama manene.” Bika byakwasele baje bandokazi bapwe ba kusimpa? Bakulahelele ngwabo Yehova ali hamo nabo.
16. Bika bitukwasa tupwe ba kusimpa?
16 Tunasimutwiya ngwetu nga tushaka kupwa ba kusimpa, kutwapandele kulikulahela yetu babenya. Oloni tunapande kukulahela Yehova uje ali na kutulwila. (Kwitu 1:29, 30; Zaka 4:6) Nga tulinga ngoco, co tusimpa.
BIKA BIMUNAPANDE KULINGA NGA BANU BAMIZINDA?
17-18. Kwesekesa na Yowano 15:18-21, bika byatulekele Yesu? Lumbununeni.
17 Tukazibi kubwaha nga banu batusingimika, oloni kutwapandele kuliziba ngwetu tubangoco nga banu batuzinda. Yesu wendekele ngwendi: “Mwabezika omwo banu bamizinda na kumibyana na kumishaula na kumitumbula ngwabo mubababi, omwo lizina lya Muna Njambi.” (Luka 6:22) Yesu walumbunwine bika?
18 Majwi endekele Yesu kuwalumbununa ngwawo baka-Kilistu bashaka kubazinda embwe. Oloni amwesa byuma bibaliwana nabyo. Ha kupwa baka-Kilistu kutwapwile tu baka-kaye, co tukapangesa byuma byalongesele Yesu na kwambulula muzimbu waubwa. Ngeci, baka-kaye banatuzindi. (Tandeni Yowano 15:18-21.) Tushaka kuzibisa Yehova kubwaha. Co kutwapandele kuzeya nga banu batuzinda mwafwa ya kuzema Yehova.
19. Twasa kutembwinina bati tupositolo ba Yesu?
19 Banu bali na kutwendeka mwamubi na kutulinga mwamubi. Nameme ngoco, keti tuzibe shwamwa kulitumbula ngwetu tu Bakaleho ba Yehova. (Mika 4:5) Byuma bibalingile tupositolo ba Yesu mu Yelusalema munima ya kutsa kwendi bitukwasa tupwe ba kusimpa. Bazibukile ngwabo bantwama ba bulombelo bwa Bayunda babazindile manene. (Vili 5:17, 18, 27, 28) Oloni ha litangwa na litangwa bakele na kuya ku tembele. Co lalo balitumbwile ngwabo bapwile bandongesi ba Yesu. (Vili 5:42) Lyoba kulyabonowese kwambulula. Netu twasa kuhyana lyoba nga simbu yoshe tulitumbula ngwetu tu Bakaleho ba Yehova, ipwe ku bipangi, ku sikola nambe mu citingitingi cetu.—Vili 4:29; Loma 1:16.
20. Bika byalingisile tupositolo bapwe ba kubwahelela nameme babazindile?
20 Bika byalingisile tupositolo ba Yesu bapwe ba kubwahelela? Bazibukile ngwabo babazindilile kulinga cizango ca Yehova, co bamwene ngwabo oku kwapwile kubezika kwakama. (Luka 6:23; Vili 5:41) Kapositolo Petulu wendekele ngwendi: “Nga muyanda mu kulinga bije bya busunga, co bwaheleleni.” (1 Petu 2:19-21; 3:14) Nga tuzibuka ngwetu banatuzindila kulinga byuma bya busunga, co kutulikele kupangela Yehova.
BUBWA BUTUWANA NGA TULIBWAHESELA
21-22. (a) Mwalyangwila kulinga bika mangana mulibwahesele simbu kanda bamiyandese? (b) Bika bitusimutwiya mu cilongesa cinatako?
21 Kutuzibuka litangwa libakashangumuka kutuyandesa bitozi betu nambe libakashoka cipangi cetu ca kwambulula kuli baka-fulumende. Nameme ngoco, tunapande kulibwahesela mangana tukanyamese busamba bwetu na Yehova. Tunapande lalo kupwa ba kusimpa na kuzibuka bitunapande kulinga nga banu batuzinda. Byuma bitulinga ino simbu bikatukwasa tukatwaleleleho kupangela Yehova.
22 Batico nga bashoka bulombelo bwetu? Mu cilongesa cinatako, twakulilongesa binangulo bya mu Mbimbiliya bije bitukwasa tutwaleleleho kupangela Yehova nameme bashoka bulombelo bwetu.
MWASO 118 “Luekeleze Kwa Tumelo”
^ par. 5 Naumo wahi washaka kumuzinda. Oloni tubaboshe tuzibuka ngwetu litangwa limo bakatuyandesa. Cino cilongesa citukwasa tupwe ba kusimpa na kulibwahesela kutuyandesa.
^ par. 7 Taleni Kaposhi ka Kukengela ka Ingilishi ka December 15, 1965, lipu 756-767.
^ par. 14 Taleni Kaposhi ka Kukengela ka Ingilishi ka July 15, 1979, lipu 4-7. Taleni lalo vidio ya Jehovah’s Name Will Be Made Known ha JW Broadcasting®. Nyatekeni ha INTERVIEWS AND EXPERIENCES.
^ par. 15 Taleni Yearbook of Jehovah’s Witnesses ya 2008, lipu 191-192.
