Munjashangumukile bupainiya, buyoye bwange bwatengulukile mu ngila ije kunjasinganyekele. (Efeso 3:20) Oloni mwasa kwihula ngweni bwatengulukile bati? Bandameneni njimileke.

Muyashangumukile nzita ya Kaye ya mu Cibali mu 1939, kwetile lika bingonde bya kutanda, co njasemukile mu Berlin ku Germany. Mu 1945, nzita muyakele na kuhwa, maswalale bakele na kwashanga bimbomba mu Berlin. Bashele mbomba mu citingitingi cetu. Co twatewelele kumo kubakele na kulishweka banu. Mu kwita kwa simbu, twatewelele ku Erfurt kwimbo lya banana.

Banana bashakele kulilongesa busunga. Ngeci, batandele mabulu a baka-kulilongesa mana a bunu, co bakobelele maceci a kulisezaseza. Oloni kubawanene busunga. Mu 1948, Bakaleho ba Yehova babali bezile ha njubo yetu. Banana babatambwile mwamubwa, co babehozwele bihula. Mukwetile lika ola imo, banana balekele yange na shongo yange ngwabo banawana busunga. Mu simbu yaindondo lika, yange na banana na shongo yange twashangumukile kukunguluka ku Erfurt.

Mu 1950, twelukile ku Berlin, co twakele mu cikungulukilo ca Berlin-Kreuzberg. Mu kwita kwa simbu, twajalukile. Co twakakele mu cikungulukilo ca Berlin-Tempelhof. Oku kukekwo kubakambwitikilile banana, oloni yange njamwene ngwange kunjalibwaheselele. Bika byanjilingisile ngoco?

Njakele manene na shwamwa, ngeci kunjakolele bwasi ku sipilitu. Njakele na kuya mu lihya ha myaka ibali, oloni kunjakele na kwambulwila banu. Co njawanene bukwasi munjalizibukile na bandolome na bandokazi ba kusimpa baje bazema Yehova. Bamo babakele mu bilombo bya bafunge bya baka-Nazi na mu tumenga twa ku East German. Bakwabo bakele buyoye bwabo mu bushonde ha kutwala mabulu mu bushweke ku East Germany. Kukolesa kwabo kwanjitakamesele. Njamwene  ngwange nga banaka buyoye bwabo mu bushonde mwafwa ya Yehova na bandolome babo, co nange njinapande kumanesa shwamwa yange.

Shwamwa yange yahwile ha simbu ya kampeni ya kulitila ije yakeleko mu 1955. Mu mukanda uje wakele mu Informant, * Ndolome Nathan Knorr wendekele ngwendi eyi kampeni ya kwambulula ya kulitila ikeyo yakama ku makampeni oshe ainabwahesa munga yetu. Wendekele lalo ngwendi nga baka-kwambulula boshe bambulula, co “ino ngonde tulimwena byuma byabibwa manene.” Aje majwi apwile a busunga. Mu simbu yaindondo lika njalikundikile kuli Yehova. Co mu 1956, yange na batate na shongo yange batumbwitikile. Nameme ngoco, kuli byuma bya seho lalo binjapandele kulinga.

Ha myaka yoshe eyi, njamwene ngwange bupainiya bwapwa bwabubwa, oloni njakele na kwendeka ngwange njikabulinga bwino kulutwe. Njashakele tahi kuwana cipangi asina njilinga bupainiya. Ngeci, njalilongesele cipangi ca kulanda na kulandulula byuma mu mafuti eka. Njashakele lalo kupanga eci cipangi ha simbu yailaha mangana njicizibuke mwamubwa. Co mu 1961, njawanene cipangi mu Hamburg nganda yakama ya ku Germany. Njazemene manene cije cipangi mukemwo njonowele kulinga bwasi bupainiya. Bika binjapandele kulinga?

Njabwahelela mwafwa Yehova napangesa bandolome baje bananjikwasa njitwameke byuma bya ku sipilitu. Babusamba bange babangi, banjakelele mwanja waubwa, mwafwa bashangumukile kulinga bupainiya. Kutundaho lalo, Ndolome Erich Mundt, uje ibakutile mu cilombo ca bafunge wanjishongangeyeye njikulahele manene Yehova. Co wanjilekele ngwendi mubakele mu cilombo ca bafunge bandolome baje balikulahelele bakebo babenya bazeyele. Oloni baje bakulahelele Yehova bapwile bingunzi mu cikungulukilo.

Ndolome Martin Poetzinger, uje wakukele mu Cibunga ca Kutwamenena, watakamesele bandolome. Wendekele ngwendi: “Kusimpa kukekwo kwa seho manene kuli yeni.” Munjasinganyekesesele ha majwi endi, njalikelele cije cipangi, co njashagumukile bupainiya mu June 1963. Njalingile cuma cacibwa. Munima ya bingonde bibali kutunda hanjashangumukilile bupainiya, njashakezekele cipangi ceka. Oloni simbu kanda njiciwane banjangwile kupwa painiya wa kulitila. Mwetile lika myaka yaindondo Yehova wanjibezikisile mu ngila ije kunjasinganyekele. Mu kwita kwa simbu, banjilanyele ku Sikola ya Ngilyande mu kilasi ya bu 44.

Bilongesa binjikanuka manene binapu bya Ndolome Nathan Knorr na Lyman Swingle. Batulongesele ngwabo “keti museze cipangi ceni.” Batushongangeyeye ngwabo tutwaleleleho mu cipangi cetu nameme tuliwana na byeseko. Ndolome Knorr wendekele ngwendi: “Bika bimwaka manene mbunge? Kuma mwaka manene mbunge ku buhutu, ku mazilo na ku tulongolo twa kushuma ndi?” Indi mwaka mbunge ku miti, ku bintemo na ku banu ba kubwahelela? Munapande kuzema banu.” Litangwa limo, Ndolome Swingle mwakele na kulumbununa byalingisile bandolome bamo balikele kupangela Yehova, walinyengele manene, co wakele na kuyengela misozi ha mesho. Kasele na kwendeka ñanda yendi kubanga mwatutumwisile. Nange njazibile manene busiwa. Ngeci, njalyangwilile kujeneka kuzibisa shwamwa Kilistu na bishongo bendi.—Mateo 25:40.

Mutwakele hayehi na kuya kubatutumine, ba mu naanga ya Mbetele bamo bakele na kutwihula kutukapangela. Co bakele na kwendeka majwi a kututakamesa. Oloni munjabalekele ngwange: “Njikapangela ku Congo (Kinshasa)” bolokele kulu, co bendekele lika ngwabo: “Nana, ku Congo. Yehova akale nobe.” Ha simbu ije, mu Congo mwakele manene nzita, co banu bakele na kulitsiyanga manene. Oloni njatwaleleleleho kwanuka binjalilongesele ku Ngilyande. Mutwamanesele sikola ya Ngilyande mu September 1967, Yange, Heinrich  Dehnbostel, na Claude Lindsay, twaile ku Kinshasa ije yapwa mbaka ya mu Congo.

Mutwetele mu Kinshasa, twalilongesele Cifulenci ha bingonde bitatu. Co twaile na fulai ku Lubumbashi, mbaka ibasanene ngwabo Elisabethville. Mbaka ya Lubumbashi yakala kuyehi na nginga ya Zambia. Twakakele mu njubo ya bamishinali ije yakele mu mbaka.

Twabwahelele manene, mwafwa yetu ba kulibanga kwambulula muzimbu waubwa mu Lubumbashi. Banu babangi bashakele kulilongesa, co kutwasele kuwana simbu ya kubalongesa boshe. Twambulwilile tupokola na beka baka-kupanga mu fulumende. Bwingi bwabo basingimikile Lijwi lya Njambi na muzimbu utwambulwile. Co lalo banu babangi bendekele manene Ciswahili. Ngeci, yange na Claude Lindsay twalilongesele Ciswahili. Mu kwita kwa simbu, batutumine kukapangela mu cikungulukilo ca Ciswahili.

Twalikuwile byuma byabibwa, oloni twaliwanene na bukalu. Ha bisimbu byabingi, maswalale ba kupenda na tupokola bakele na kutukutiiya biñanda bya makuli. Litangwa limo tupokola bezile na mata te tuli mu cikungulukilo cije cakele ha njubo ya bamishinali. Batutwalele ku polisi, co batutumbikile hasi kuketa na 22:00 asina batwecele.

Mu 1969, banjangwile kupwa ntwama wa kuzenguluka. Cipangi ca kuzenguluka mu Africa kucapwile cacasi, mwafwa njakele na kubatula bishwata. Bingila byaco byakele na mwila waulaha, co lalo mwakele mandoba. Njanuka ha limbo limo, kasumbi na bana bendi balalele  mwisi ya mwela wange butsiki. Kunjikebala mwakele na kunjinyangumuna ha tulo mukati ka butsiki mwafwa ya kalwa kakele na kulinga. Njikabwahelela manene munjikanuka simbu itwakele na kwota tuhya mangwezi na bandolome oku tusimutwiya byuma bya ku sipilitu.

Bukalu bwakama butwaliwanene nabwo bwatundile ku banu baje balikwisile kupwa Bakaleho kumani bali na kulikwatasana na cibunga ca Kitawala. * Bamo babo babambwitikile na kupwa bakulunu mu bikungulukilo. Bwingi bwabo bapwile ngwe mamanya a kulishweka, oloni kubasele kungumuna bandolome na bandokazi ba kulongwa. (Yunda 12) Mu kwita kwa simbu, Yehova wabashekele mu cikungulukilo. Co banu babangi bezile mu busunga.

Mu 1971, banjitumine kukapangela ha ofisi ya munango ya mu Kinshasa. Co njakapangele bipangi byabingi. Njatalele bya kusoneka mikanda na kuitambula, bya kulomba mabulu na bya dipatimenti ya bipangi. Munjakele ha Mbetele njalilongesele mwakubwahesela bwino cipangi cetu mu lifuti muje mwakele buhutu. Bisimbu bimo mikanda itwakele na kutuma na fulai yakele na kwambata bingonde asina yete ku bikungulukilo. Eyi mikanda bakele na kuitundisa mu fulai na kuyaka mu mato. Co awa mato akele na kusakamena ha mwila wa mu ndonga ubasana ngwabo hyacinths. Awa mato akele na kwambata byalumingo asina atundeho. Nameme kwakele bukalu, oloni cipangi cakele na kwenda.

Njakasamene munjamwene bandolome babwahesa biwano bya mutambela na bimbongo byabindondo lika. Butenda babutungile na libu lya makenyi, co baputikisile mwila wa mangongela, co lalo bazengele mwila wa mangongela kupwisa bitwamo. Bisini byapwile bya mabamboo, co helu bakele na kwakaho mabinda. Awa mabinda akewo lalo abapangele bimesa. Kubakele na bimbambo, ngeci bakele na kukutisa twonzi. Njalikomokelele kumona nzili na mana a bandolome na bandokazi. Njabazemene manene. Nameme mubanjitumine kukapangela kweka njazeyele munjabasezele.

Mu 1974, njakapangelele ha ofisi ya munango ya ku Nairobi, mu Kenya. Twakele na bipangi byabingi, mwafwa munango wa Kenya watalele cipangi ca kwambulula ca mu mafuti a kupwa 10. Co mu mafuti amo cipangi cetu bacishokele. Banjitumine kwendela awa mafuti ha bisimbu byabingi, maneneni Ethiopia. Bandolome betu bakele na kubayandesa, co bakolesele mu byeseko byakama. Babangi bakele na kubabulumuna na kubaka mu tumenga, bamoco babatsiile. Oloni bakolesele mwafwa bazemene manene Yehova na bandolome babo.

Mu 1980, njabwahelelele manene mwafwa njambatele Gail Matheson. Gail watunda ku Canada, co twakele mu kilasi imo ku sikola ya Ngilyande. Simbu kanda tulyambate twakele na kulisonekela mikanda. Gail wapwile kamishinali mu Bolivia. Munima ya myaka 12, twakaliwanene lalo ku New York. Kutunda ha twakaliwanenene mwetile lika simbu yaindondo, co twalyambatelele mu Kenya. Njakandelela manene kuli Gail, mwafwa akamono byuma ngwe mwabimwena Yehova, co lalo akajauka na byuma byali nabyo. Simbu yoshe napu mukwasi wange na kabusamba kange wamubwa.

Mu 1986, yange na Gail batutumine mu cipangi ca kuzenguluka, oku njili mu Komiti ya Munango. Twakele na kuzengulukila na mafuti amangi aje akele mwisi ya munango wa Kenya.

Njikabwahelela munjikanuka mwaka wa 1992 mutwaile ku ciwano ca mutambela ca mu Asmara (ku Eritrea). Ha simbu ije cipangi cetu bacitabesele. Calubinda twakawanene lika njubo ya kutulikila bimbuto nambe byakulya bya tusitu. Yakele na mazilo amangi, maneneni mukati. Oloni ha litangwa lya ciwano njabwahelele manene kumona mubaibwaheselelemo bandolome. Yafwililile kulemeselamo Yehova. Babangi banenele binanga, co  bafwikile mu butongwe hoshe haje kuhasholokele mwamubwa. Twalikuwile ciwano, oku ku ciwano kwakungulukile banu ba kupwa 1,279.

Mu cipangi ca kuzenguluka twakele na kulala mu binjubo bya kulisezaseza. Litangwa limo twalalele mu njubo yaibwa ije yakele ku kalunga ndonga. Simbu ikwabo twakalalele mu kanjubo kakutungisa mazenke kwilu na kwisi. Co kutunda ha kanjubo kuya hacakele cimbushu hapwile mamita 100. Nameme ngoco, kwoshe kutwapangelele twalikuwile manene kwambulula hamo na bapainiya na baka-kwambulula. Mubatwanene cipangi ceka, twazibile buli mwafwa twasezele babusamba batwazemene manene.

Mu 1987 kutwala mu 1992, mu mafuti amangi aje akele mwisi ya munango wa Kenya cipangi cetu bacitabesele. Ngeci, aje mafuti alimanenene mwafwa bashokolwele minango na maofisi a lifuti. Mu 1993, twakapangelele ha ofisi ya Addis Ababa, mu Ethiopia. Ha myaka yaingi bandolome bakele na kupanga cipangi cetu mu bushweke mwafwa bacishokele. Oloni munjaileko njakawanene banacitabesa.

Yehova nabezikisa bandolome mu Ethiopia. Bandolome na bandokazi babangi balingile bupainiya. Kushwa lika mu 2012, baka-kwambulula ba kutubakana 20 pesenti balingile bupainiya bwa simbu yoshe. Kutundaho lalo, masikola a baka-Kilistu analongesa bandolome na bandokazi, co lalo Binjubo bya Bumwene bya kutubakana 120 binatungiwa. Mu 2004, baka-naanga ya Mbetele bajalukilile mu mutungo wauha. Co haje habajalukilile batungilileho lalo na Njubo ya Biwano.

Yange na Gail twabwahelela manene kulikuta busamba na bandolome na bandokazi ba mu Ethiopia ha myaka yaingi. Twabazema manene mwafwa bakala na cizemo na ngozi. Ha simbu ino, banatunungulwila ku munango wa ku Central Europe mwafwa ya kubinja. Kuno kutuli bali na kutunyunga mwamubwa, oloni tucikanuka manene bandolome ba ku Ethiopia.

Twalimwena Yehova mwanakolesa eci cipangi. (1 Koli 3:6, 9) Njanuka munjakele na kwambulwila baka-Rwanda baje bakele na kupangela mu mikoti ya ku Congo. Ha simbu ije, mu Rwanda kumwakele baka-kwambulula baje bakele na kutuma malipoti. Ha simbu ino, muli baka-kwambulula ba kutubakana 30,000. Mu 1967, mu Congo (Kinshasa) mwakele baka-kwambulula ba kweta ku 6,000. Hano muli ba baka-kwambulula ba kweta ku 230,000, co banu ba kutubakana 1 milyoni baile ku Canukiso mu 2018. Mu mafuti oshe aje akele mwisi ya munango wa Kenya muli baka-kwambulula ba kutubakana 100,000.

Kuneti myaka ya kutubakana 50 kutunda hanjikwaselele Yehova kwitila mu bandolome ba kulisezeseza baje banjikwasele njishangumuke cipangi ca simbu yoshe. Nameme njicili na shwamwa, oloni njakulahela manene Yehova. Byuma binjinaliwana nabyo mu Africa byanjikwasa njisimpe na kujauka na byuma binjili nabyo. Yange na Gail tukakandelela manene kuli bandolome na bandokazi baje batutambwile mwamubwa. Aba bandolome bakolesele mu bukalu bwakama, co lalo bakulahelele manene Yehova. Njikakandelela manene kuli Yehova ku cizemo cendi cakama canatumwesa. Cili bene Yehova nanjibezikisa mu ngila ije kunjasinganyekele.—Myaso 37:4.