1-2. (a) Kwesekesa na lishiko lya Yesu lili ku Mateo 28:18-20, cipangi muka cakama cibali naco baka-Kilistu? (b) Bihula muka bitukumbulula muno mu cilongesa?

OMWO Yesu wasangukile, washikile ngwendi tupositolo bendi baye ku munkinda umo mangana akaliwane nabo. Tupositolo babwahelelele manene mubalikungulwilile haje ha munkinda. (Mateo 28:16) Casholoka ngwe kuje ku munkinda kukekwo kwalisholwelele Yesu kuli bandolome ba kutubakana 500. (1 Koli 15:6) Yesu walekelele bika bandongesi bendi ngwendi baye kuje ku munkinda? Washakele kukabana lishiko lya seho. Wabashikile ngwendi: “Yeni oni ku miyati yoshe ya banu na kubapwisa bandongesi.”—Tandeni Mateo 28:18-20.

² Baje bandongesi bazibile aje majwi a Yesu bakebo bapwile cikungulukilo ca kulibanga ca baka-Kilistu. Wabanene cipangi cakama ca kupwisa banu bandongesi ba Kilistu. * Ano matangwa bikungulukilo bya baka-Kilistu ba busunga binatumu mu kaye koshe. Aba baka-Kilistu ba busunga bali na cipangi cakama ca kupwisa banu bandongesi. Muno mu cilongesa tukumbulula ebi bihula biwana: Bika kwapwila kwa seho kupwisa banu bandongesi? Bika byalibungilamo?  Kuma baka-Kilistu boshe bali na cipangi ca kupwisa banu bandongesi ndi? Co bika bitunapande kukela na mbunge ya kubandamena?

3. Kwesekesa na Yowano 14:6 na 17:3, bika bitunapande kupwisila banu bandongesi?

³ Bika kwapwila kwa seho kupwisa banu bandongesi? Mwafwa bandongesi ba Kilistu bakebo lika basa kupwa babusamba ba Njambi. Kutundaho lalo, baje bakabangeya Kilistu bakala na buyoye bwabubwa ha simbu ino, co kulutwe bakayoya myaka yoshe. (Tandeni Yowano 14:6; 17:3.) Yesu natwana cipangi ca seho, oloni kutwasa kucipanga likalyetu. Kapositolo Paulu wasonekele ngwendi: ‘Tuli na kupangela hamo na Njambi.’ (1 Koli 3:9) Twabezika manene omwo Yehova na Yesu banatwana eci cipangi.

4. Bika bitulilongesa kuli Ivan na Matilde?

⁴ Kupwisa banu bandongesi kutulingisa tupwe ba kubwahelela. Tusimutwiyeni hali Ivan na munakazi wendi Matilde baje bakala mu Colombia. Bambulwilile mukwenje wa lizina lya Davier. Davier wabalekele ngwendi: “Njishaka kutengulula buyoye bwange, oloni njili na kwonwa.” Davier walisonekesele mu bweho bwa kulwa na biñome. Wakele na kupangesa bumbanda bwa kupendesa na kunwa manene bwala, co lalo wakele na kuyoya na lipangala lyendi Erika. Ivan wendekele ngwendi: “Twashamungukile kulilongesa na Davier. Oloni wakele kulako, ngeci twakele na kwenda bungenzi bwa bulaha na bikinga. Ngila yaco yakele na mandoba. Erika mwamwene ngwendi Davier ali na kutenguluka, nendi washangumukile kulilongesa.” Mu kwita kwa simbu, Davier walikelele kupangesa bumbanda bwa kupendesa, kunwa bwala na kulwa. Co lalo balyambatele na Erika. Matilde wendekele ngwendi: “Mubambwitikile Davier na Erika mu 2016, twanukile majwi akele na kwendeka Davier ngwendi: ‘Njishaka kutengulula buyoye bwange, oloni njili na kwonowa.’ Twabwahelelele manene, co twalilile.” Tukabwahelela manene mutukakwasa banu bapwe bandongesi ba Kilistu.

5. Cuma muka ca kulibanga citunapande kulinga mangana tupwise banu bandongesi?

⁵ Cuma ca kulibanga citunapande kulinga cinapu kushakezeka baje bashaka kulilongesa bya Yehova. (Mateo 10:11) Tumwesa ngwetu tu Bakaleho ba Yehova nga twambulwila banu boshe batuwana. Nga twononoka lishiko lya Kilistu lya kwambulula muzimbu waubwa, co tumwesa ngwetu tu baka-Kilistu ba busunga.

6. Bika bitunapande kulinga mangana banu batutolilile?

⁶ Banu bamo bashaka kulilongesa busunga, oloni babangi kubesi kubwahelela nga tusimutwiya nabo lwa kulibanga. Ngeci, tunapande kwindula lishungu lyabo lya kulilongesa. Nga tushaka kupanga mwamubwa cipangi cetu, co tunapande kulibwahesela mwamubwa. Anguleni biñanda bije bizibisa kubwaha baje bamusimutwiya nabo. Co libwaheseleni mumukashangumukila kusimutwiya.

7. Bika kwapwila kwa seho kutolilila banu na kubasingimika?

⁷ Cakumwenako, mwasa kusimutwiya na babenya njubo ngweni: “Ano matangwa banu bali na kuliwana na bukalu bwabwingi mu kaye koshe. Mumona bati, bifulumende bya muno mu kaye byasa kubumanesa ndi?”  Co mwasa kusimutwiya nabo mukanda wa Ndanyele 2:44. Mwasa lalo kwihula munu ngweni: “Ngila muka yaibwa ya kulelelamo bana mangana bakale na futisi yaibwa? Njilekeniko biyongola byeni.” Co simutwiyeni nabo mukanda wa Kwituluka mu Mashiko 6:6, 7. Nga mushaka kusimutwiyako ñanda imo, co singanyekeni muikwaselamo baje baitolilila. Singanyekeni lalo bubwa butundamo omwo balilongesa Mbimbiliya. Omwo musimutwiya nabo, batolilileni na kusingimika biyongola byabo. Nga mulinga ngoco, co muzibisisa cifwa cabo. Oku kubalingisa nabo bamitolilile.

8. Bika bitukalingila mangenzi akwilukila simbu yoshe?

⁸ Simbu kanda banu batabe kulilongesa Mbimbiliya, tukabanga tahi kulinga mangenzi akwilukila. Mwafwa bika? Mwafwa bisimbu bimo kutwesi kubawana ha njubo. Co lalo tukelukila-ilukilako mangana tulizilile nabo. Oku kubalingisa batabe kulilongesa Mbimbiliya. Cakumwenako, ntemo ikakolo nga baitilila mema simbu yoshe. Mu ngila imo lika, nga tulongesa munu Mbimbiliya simbu yoshe, co azema manene Yehova na Yesu.

9-10. Bika bitwendekela ngwetu muka-Kilistu woshe uje ambulula ali na kukwasa mu cipangi ca kuwana banu ba bimbunge byabibwa?

⁹ Muka-Kilistu woshe ali na cipangi ca kushakezeka banu ba bimbunge byabibwa. Twasa kwesekesa eci cipangi ku cipangi ca kutonda mwanike uje nazimbala. Twasa kucesekesa bati? Tusimutwiyeni hali mwanike wa myaka itatu uje wazimbalele. Banu ba kweta ku 500 baile na kumutonda. Munima ya kumutonda ha maola 20, munu umo wamuwanenene mu lihya lya mundele. Munu  uje wamuwanene wabyanene kumushangazala. Wendekele ngwendi: “Ou mwanike tunamuwana mwafwa banu babangi banaile na kumutonda.”

¹⁰ Banu babangi banapu ngwe uje mwanike wa kuzimbala. Aba banu banazimbala mwafwa kubesi na lilabelelo. Ngeci, batonda kubakwasa. (Efeso 2:12) Bakaleho ba kutubakana 8 miliyoni banakwata cipangi ca kutonda banu ba bimbunge byabibwa. Hamo kumuwana munu uje ashaka kulilongesa Mbimbiliya. Oloni bakweni bamukambulula nabo basa kumuwana. Nga ndolome nambe ndokazi nakwasa munu kupwa ndongesi ya Kilistu, co boshe baje bali na kushakezeka banu ba bimbunge byabibwa babwahelela.

11. Mwasa kukwasa bati mu cipangi ca kupwisa banu bandongesi nameme kumwesi na cilongesa ca Mbimbiliya ha simbu ino?

¹¹ Nameme kumwesi na cilongesa ca Mbimbiliya ha simbu ino, mwasa kukwasa mu cipangi ca kupwisa banu bandongesi. Cakumwenako, mwasa kutambula mwamubwa bangenzi baje baija ku Njubo ya Bumwene na kulikuta nabo busamba. Nga mulinga ngoco, co mubakwasa bamone ngwabo tu baka-Kilistu ba busunga. (Yowa 13:34, 35) Bikumbululo byeni byabihi bikwasa baje bacililongesa bazibuke mwakukumbulwila mwamubwa na mu kasingimiko. Kutundaho lalo, mwasa kupanga na muka-kwambulula wamuha mangana mumukwase apangese bisoneka omwo alongesa banu. Nga mulinga ngoco, co mumukwasa atembwinine Kilistu.—Luka 10:25-28.

12. Kuma tunapande kupwa ba kulilongesa manene asina tukwasa banu bapwe bandongesi ba Yesu ndi? Lumbununeni.

¹² Keti tusinganyeke ngwetu tunapande kupwa ba kulilongesa manene asina tukwasa banu bapwe bandongesi ba Yesu embwe. Mwafwa bika? Tusimutwiyeni hali Faustina uje wakala ku Bolivia. Faustina kazibukile kutanda mwaliwanene na Bakaleho ba Yehova. Ha simbu ino, nalilongesako kutanda kamandondo. Banamumbwitika, co wazema kulongesa bakwabo. Ha calumingo na calumingo, Faustina akatwamenena bilongesa 5. Banu bakalongesa Faustina bazibuka kutanda kutubakana ikeye. Co lalo nakwasa banu ba kupwa 6 babambwitike.—Luka 10:21.

13. Nameme tunazezama, bubwa muka butuwana nga tupanga cipangi ca kupwisa banu bandongesi?

¹³ Baka-Kilistu babangi banazezama manene, mwafwa bali na bipangi bya seho bibakalingi. Oloni bali na kuwana simbu ya kutwamenena bilongesa, co banapu ba kubwahelela. Tusimutwiyeni hali Melanie uje wakele ku Alaska. Melanie wapwile muzike,  co wakele na mwana wa myaka 8. Wakele na kupanga, co lalo wanyungile cisemi cendi uje wabinjile kansa. Melanie ikeye lika wapwile Mukaleho mu mbongi mwakele. Mbongi yaco yapwa ya kutonola manene. Ngeci, wakele na kulombela simbu yoshe mangana ase kwambulula. Washakele kuwana munu yalilongesa nendi Mbimbiliya. Mu kwita kwa simbu, wawanene Sara uje wabwahelele manene mwazibukile lizina lya Njambi. Sara watabele kulilongesa Mbimbiliya. Melanie wendekele ngwendi: “Njakele na kujuka manene lya mu Citanu mangwezi, oloni yange na munange twakele na kuya na kulilongesa na Sara. Co twabwahelelele manene. Twakele na kutondesesa bihula byakele na kwihula Sara. Twabwahelelele manene kumumona apangesa byakele na kulilongesa.” Sara wakolesele mubamulwisile, wasezele ceci yendi, co hanima bamumbwitikile.

14. (a) Cipangi ca kupwisa banu bandongesi cinalifu bati neci ca kutsiya bisi? (b) Majwi a Paulu ali ku 2 Timateo 4:1, 2 amilongesa bika?

¹⁴ Twaleleleniho kushakezeka baje banapande nameme kanda muwane munu uje ashaka kulilongesa. Yesu wesekesele cipangi ca kukwasa banu bapwe bandongesi ku cipangi ca kutsiya bisi. Baka-kutsiya bisi bakapanga simbu yailaha. Bisimbu byabingi bakapanga butsiki nambe mutondotondo, co lalo bakai kulako. (Luka 5:5) Mu ngila imo lika, baka-kukwasa banu bapwe bandongesi bakapanga maola amangi kuya na kushakezeka  banu ku myela ya kulisezaseza. Mwafwa bika? Mangana bawane banu babangi. Baje bali na kupanga na nzili omu mu cipangi banawana bibezikiso, mwafwa bali na kuwana banu ba bimbunge byabibwa. Ngeci, anguleni matangwa na simbu imuwana banu, co lalo yeni kuje kumwasa kubawana.—Tandeni 2 Timateo 4:1, 2.

15. Bika bikwapwila kwa seho kukala na mbunge ya kubandamena omwo mutwamenena cilongesa?

¹⁵ Bika bitunapande kukela na mbunge ya kubandamena omwo tutwamenena bilongesa bya Mbimbiliya? Tushaka ngwetu munu itulongesa azibuke bilongesa bya mu Mbimbiliya na kubizema. Co lalo azeme Yehova, babenya Mbimbiliya. Kutundaho lalo, omwo tulongesa munu byuma byalongesele Yesu, tumukwaseni azibuke mwakubipangesela mu buyoye bwendi. Tunapande kusimpa mwafwa acililongesa mwakubipangesela. Bamo bakatengulula buyoye bwabo mu bingonde lika. Bakwabo bakambata simbu.

16. Bika bimunalilongesa kuli Raúl?

¹⁶ Kamishinali wa ku Peru walimwenenene bubwa bwatundile mu kukala na mbunge ya kubandamena. Wendekele ngwendi: “Njalilongesele na Raúl mabulu abali. Oloni anga wacikele na bukalu. Kakele na kuyoya bwino na munakazi wendi. Co wakele na kulisinga simbu yoshe. Co lalo bana bendi kubamusingimikile mwafwa ya bilinga byendi. Oloni wakele na kukunguluka simbu yoshe. Ngeci, njatwaleleleho kumukwasa hamo lika na naanga yendi. Munima ya myaka itatu, Raul bamumbwitikile.”

17. Bika bitusimutwiya mu cilongesa cinatako?

¹⁷ Yesu watushikile ngwendi: “Yeni oni ku miyati yoshe ya banu na kubapwisa bandongesi.” Ngeci, tunapande kusimutwiya na banu byuma bitwakulahela. Bamo kubesi kuya ku bulombelo bwoshe bwoshe, bakwaboco kubakulahelele ngwabo Njambi kwali. Mu cilongesa cinatako tusimutwiya mutwasa kwambulwila muzimbu waubwa kuli aba banu.