CILONGESA 30
Twaleleniho kwenda mu Busunga
‘Kukwesi cuma cinjinenela kubwahelela kutubakana kuziba ngwabo bana bange bali na kwenda mu busunga.’—3 YOWA 4.
MWASO 54 “Nzila ki Yona Ye”
BILI MUNO MU CILONGESA *
1. Kwesekesa na mukanda wa 3 Yowano 3, 4, bika bikatulingisa tubwahelele?
KAPOSITOLO YOWANO wabwahelelele manene mwazibile ngwendi banu balongesele busunga bakele na kupangela Yehova mu kulongwa. Bakele na kuliwana na bukalu bwabwingi, co Yowano walingile mwoshe mwaselele kukanyamesa likulahelo lyabo, mwafwa bapwile ngwe bana bendi. Ngwe mwa Yowano, netu tukabwahelela nga bana betu nambe banu batukalilongesa nabo Mbimbiliya balikundika kuli Yehova na kutwalelelaho kumupangela.—Tandeni 3 Yowano 3, 4.
2. Yowano wasonekelele bika mikanda itatu?
2 Mu 98 C.E., hamo Yowano wakele na kuyoya mu Efeso nambe kuyehi neyi nganda. Hamo waileko mubamutundisile mu kamenga ha likanda lya Patimose. Ha simbu ije bene, sipilitu ya Yehova yamukwasele asoneke mikanda itatu. Waisonekele mangana ashongangeye baka-Kilistu ba kulongwa batwaleleleho kukulahela Yesu na kutwalelelaho kwenda mu busunga.
3. Bihula muka bitukumbulula muno mu cilongesa?
3 Yowano ikeye lika kapolofweto wakele na kuyoya ha simbu ije, co walishoshomwenene ngwendi balongesi ba makuli basa kungumuna banu mu bikungulukilo. * (1 Yowa 2:18, 19, 26) Aba balongesi ba makuli balishashele ngwabo bazibukile Njambi, oloni kubononokele mashiko a Yehova. Muno mu cilongesa, tusimutwiya ha cinangulo casonekele Yowano. Co tukumbulula bihula bitatu: Kwenda mu busunga kulumbununa bika? Bika byasa kutwonowesa kwenda mu busunga? Co twasa kulikwasa bati mangana tubaboshe tutwaleleleho kwenda mu busunga?
KWENDA MU BUSUNGA KULUMBUNUNA BIKA?
4. Kwesekesa na 1 Yowa 2:3-6 na 2 Yowa 4, 6, bika bitunapande kulinga mangana twende mu busunga?
4 Tunapande kuzibuka busunga bwa mu Lijwi lya Njambi, asina twasa kwenda mu busunga. Co lalo, tunapande ‘kwononoka mashiko a Yehova.’ (Tandeni 1 Yowano 2:3-6; 2 Yowano 4, 6.) Yesu wononokele Yehova, co watumwesele mwanja waubwa utunapande kukabangeya. Ngeci nga tukabangeya mwanja wa Yesu, co twononoka Yehova.—Yowa 8:29; 1 Petu 2:21.
5. Tunapande kukulahela bika?
5 Tunapande kukulahela ngwetu Yehova wapwa Njambi wa busunga, co byoshe byanatuleke mu Lijwi lyendi binapu bya busunga. Tunapande kukulahela lalo ngwetu Yesu ikeye Mesiya. Banu babangi kubesi kutaba ngwabo Yesu banamubwabesa kupwa Mwene wa Bumwene bwa Njambi. Yowano wendekele ngwendi “baka-kukwisa babangi” bakaija, co bakakwisa banu baje kubakulahelele busunga hali Yehova na Yesu. (2 Yowa 7-11) Wasonekele ngwendi: “Iyajo muka-makuli? Baje bendeka ngwabo Yesu keti ikeye [Kilistu].” (1 Yowa 2:22) Kulilongesa Lijwi lya Njambi kutunyungilila ku makuli a banu na kutukwasa tuzibuke mwamubwa Yehova na Yesu. (Yowa 17:3) Co lalo kutulingisa tukulahele ngwetu tunawana busunga.
BIKA BYASA KUTWONOWESA KWENDA MU BUSUNGA?
6. Bika byasa kwonowesa bandolome na bandokazi ba banike kwenda mu busunga?
6 Baka-Kilistu boshe banapande kutona mangana bilongesa bya banu keti bibongumune. (1 Yowa 2:26) Bandolome na bandokazi ba banike, banapande kunyanyama mangana bilongesa bya banu keti bibongumune. Ndokazi Alexia * wa ku France uje ali na myaka 25, wendekele ngwendi: “Munjapwile ku sikola njalilongesele ngwange byuma byalizilile bibenya, co oku kwanjilingisile njishangumuke kuhuhwasana. Bisimbu bimo njakulahelele ebi bilongesa. Co njamwene ngwange kunjapandele kutolilila lika bibanjileka balongesi bange na kwombwanesa biilongesa Mbimbiliya.” Alexia walilongesele libulu lya Life—How Did It Get Here? By Evolution or by Creation? Mu byalumingo byabindondo lika wazibisisile biyendeka Mbimbiliya. Alexia ngwendi: “Njamwene ngwange Mbimbiliya yendeka busunga. Co njanangukile ngwange kukabangeya biyendeka Mbimbiliya kunjikwasa njipwe wa kubwahelela na kuyoya mu kwoloka.”
7. Kutwapandele kulinga bika, co mwafwa bika?
7 Baka-Kilistu boshe kubapandele kupangela Njambi oku balinga byuma byabibi. Yowano watunangwile ngwendi kutwasa kwenda mu busunga oku tulinga byuma byabibi. (1 Yowa 1:6) Nga tushaka kuzibisa Njambi kubwaha, tunapande kwanuka ngwetu Njambi akamono byuma byoshe bitukalingi. Nameme banu kubamono byuma bitulinga ku bushweke, oloni Yehova akamono byoshe bitukalingi.—Heve 4:13.
8. Kutwapandele kulinga bika?
8 Kutwapandele kumona bubi ngwe mubakabumwena baka-kaye. Kapositolo Yowano wasonekele ngwendi: “Nga twendeka ngwetu kutwesi na bubi, tuli na kulikwisa yetu babenya.” (1 Yowa 1:8) Mu simbu ya Yowano baka-kutengulukila bakulahelele ngwabo munu asa kupwa kabusamba ka Njambi oku alinga byabibi. Na matangwa ano banu bali na biyongola bya kulifwa. Babangi bakulahela muli Njambi, oloni kubesi kwononoka binangulo byendi bije byendeka ha kulinga bubi, maneneni bije byendeka ha bupangala. Bakamono ngwabo kulinga bupangala kukwabihile.
Banike koleseni mangana mwase kwangula kulinga byuma byabibwa na kunyungilila likulahelo lyeni (Taleni palagilafu 9) *
9. Kwononoka mashiko a mu Mbimbiliya kukwasa bati banike?
9 Kunasa kupwa kwakukalu ku bandolome na bandokazi ba banike kubyana kulinga bupangala nga bakwabo ku sikola nambe ku bipangi bakalingi bupangala. Bikebyo byaliwanene nabyo Aleksandar. Wendekele ngwendi: “Munjakele ku sikola bambanda bamo bakele na kunjisindiya ngwabo njililale nabo, oloni yange njakele na kubyana. Co bakele na kwendeka ngwabo,njapwile muka-bundei mukemwo kunjakele na lipangala.” Nga muliwana na bukalu bwa cifwa eci, co ononokeni mashiko a mu Mbimbiliya. Nga mulinga ngoco, co mupwa ba kubwahelela, mulinyungilila ku mubila, co lalo mukanyamesa busamba bweni na Yehova. Nga muhyana byeseko, co kumipwila kwakwasi kulinga byuma byabibwa. Anukeni ngweni Satana ikeye akalingisa banu bamone ngwabo bupangala kubwabihile. Ngeci nga mubyana kulinga bupangala, co ‘muhyana Liyabolo.’—1 Yowa 2:14.
10. Mukanda wa 1 Yowano 1:9, utukwasa bati tupangele Yehova na citakutaku ca kujela?
10 Tuzibuka ngwetu Yehova ali na lisesa lya kutuleka bitunapande kulinga nebi kutwapandele kulinga. Co tulinga mwamubwa nga kutulingi byuma byabibi. Oloni nga tunalingi bubi, co tunapande kulomba Yehova atukonekele. (Tandeni 1 Yowano 1:9.) Nga tunalingi bubi bwakama, co tunapande kulomba bukwasi ku bakulunu mwafwa Yehova ikeye nabangula batutwamenene. (Yako 5:14-16) Oloni kutwapandele kuliziba kukala na mulonga mwafwa ya bubi butwalingile kunima. Mwafwa bika? Mwafwa Tate yetu wa cizemo watwanene munendi kupwa ñombelo mangana batukonekele ku bubi bwetu. Nga Yehova natukonekela, co natukonekela bene. Co tunapande kupangela Yehova na citakutaku ca kujela.—1 Yowa 2:1, 2, 12; 3:19, 20.
11. Twasa kulinyungilila bati ku bilongesa bije byasa kuzeyesa likulahelo lyetu?
11 Tunapande kubyana bilongesa bya baka-kutengulukila. Kushwa lika hacashangumukilile cikungulukilo ca baka-Kilistu, Liyabolo napangesa baka-makuli mangana bongumune bangamba ba Njambi ba kulongwa. Ngeci tunapande kuzibuka kuliseza kuli mukati ka biñanda bya makuli na biñanda bya busunga. * Bitozi betu basa kwaka biñanda bya makuli ha Intaneti mangana batwonowese kukulahela Yehova na kuzema bandolome betu. Keti mutolilile ku biñanda bya cifwa oco, mwafwa bili na kutunda kuli Satana.—1 Yowa 4:1, 6; Kujo 12:9.
12. Mwafwa bika tunapande kukanyamesa likulahelo lyetu?
12 Nga tushaka ngwetu Satana keti atuzeyese, co tunapande kukulahela Yesu na kukulahela ngwetu Yehova ikeye ali na kumupangesa mu kushulisilila cizango cendi. Tunapande lalo kukulahela banu banangula Yehova kutwamenena munga yendi. (Mateo 24:45-47) Twasa kukanyamesa likulahelo lyetu nga tulilongesa Lijwi lya Njambi simbu yoshe. Co likulahelo lyetu likanyama ngwe muti uje unashalabela mizi yawo mu libu. Paulu wendekele byuma bya kulifwa mwasonekelele cikungulukilo ca Kolose. Wendekele ngwendi: “Ngwe omwo munatambula Kilistu Yesu kupwa Mwene, co yoyeni muli ikeye. Mizi yeni ishalabe manene muli ikeye.” (Kolo 2:6, 7) Nga tukanyamesa likulahelo lyetu, co Satana na banu bendi kubatungumuna.—2 Yowa 8, 9.
13. Bika bitunapande kubandamena, co mwafwa bika?
13 Tunapande kubandamena ngwetu baka-kaye batuzinda. (1 Yowa 3:13) Yowano wendekele ngwendi ‘kaye koshe kali mu nzili ya Liyabolo.’ (1 Yowa 5:19) Satana nalubala manene mwafwa kano kaye kali na kukotoka. (Kujo 12:12) Ali na kupangesa myeto yaingi ya kufwa ngwe bupangala na makuli a bakendeka baka-kutengulukila. Co lalo asa kushongangeya banu batuyandese. Satana azibuka ngwendi kwalitulu simbu yaindondo, co ashaka ngwendi azeyese likulahelo lyetu nambe kutwecelesa kwambulula. Ngeci, kutwapandele kukomoka nga tuziba ngwetu mu mafuti amo banashoko cipangi cetu nambe kutubindika kulinga bipangi bimo. Nameme ngoco, bandolome na bandokazi betu mu mafuti awa bali na kukolesa. Bali na kumwesa ngwabo twasa kutwalelelaho kupwa ba kulongwa nameme Satana atweseka.
TULIKWASENI MANGANA TUBABOSHE TUTWALELELEHO KWENDA MU BUSUNGA
14. Twasa kukwasa bati bandolome na bandokazi betu bakale mu busunga?
14 Tunapande kukala na mema ku mbunge, asina twasa kukwasa bandolome na bandokazi betu kukala mu busunga. (1 Yowa 3:10, 11, 16-18) Tunapande kuzema bandolome betu simbu yoshe, nameme ha simbu ya bukalu. Cakumwenako, hamo ndolome nambe ndokazi yetu natsisa munu yazema, co atonda kumuzembeleka nambe bukwasi bweka. Indi hamo, bakwetu baka-Kilistu banaliwana na bukalu bwa kulizila, co batonda kubabwahesela binjubo bya Bumwene nambe binjubo byabo. Twasa kumwesa ngwetu twazema bandolome na bandokazi betu mu byuma bitwendeka nebi bitulinga.
15. Mukanda wa 1 Yowano 4:7, 8, umwesa ngwawo tunapande kulinga bika?
15 Nga tulizema umo na mukwabo, co tutembwinina Tate yetu wa mwilu. (Tandeni 1 Yowano 4:7, 8.) Tumwesa ngwetu twalizema nga tulikonekela umo na mukwabo. Cakumwenako, mukwetu asa kutulubalesa, oloni alomba likonekelo. Tumwesa ngwetu twamuzema, nga tumukonekela na kwibala bubi bwendi. (Kolose 3:13) Ndolome Aldo walubalele omwo wazibile ndolome umo endeka byabibi ha cisemwa cendi. Wendekele ngwendi: “Njalombelele kuli Yehova mangana keti njikale na biyongola byabibi hali ou ndolome.” Aldo walingileko lalo cuma cikwabo. Walanyene uje ndolome apange nendi mu lihya. Omwo bakele mu lihya, walekele uje ndolome mwalizibilile ha byuma byendekele. Aldo ngwendi: “Munjamulekele munjakele na kulizibila, uje ndolome walombele likonekelo. Endekesi yendi yanjikwasele njimone ngwange walizibile kubihya. Twamanesele buje bukalu, co twelukile ku binjubo oku tunabwahelela.”
16-17. Bika bitunapande kulinga?
16 Kapositolo Yowano wazemene manene bandolome bendi, co washakele ngwendi batwaleleleho kupangela Yehova. Mikanda yendi itatu imwesa mwalizibilile. Yowano wazemene bandolome bendi. Kuzibuka ngwetu bandolome na bandokazi baje babanangula kukayula hamo na Kilistu nabo batuzema, kutuzembeleka.—1 Yowa 2:27.
17 Tupangeseni byuma bitunalilongesa. Tutwaleleleniho kwenda mu busunga na kusingimika Yehova mu kuyoya kwetu kwoshe. Lilongeseni Mbimbiliya na kukulahela biyendeka. Kulaheleni manene Yesu. Byaneni bilongesa bya banu na bilongesa bya baka-kutengulukila. Keti mupangele Njambi oku mulinga byuma byabibi. Ononokeni mashiko a Njambi. Tutwaleleniho kukonekela bandolome betu na kukwasa baje bali mu bujene. Nga tulinga ngoco, co tubaboshe tutwalelelaho kwenda mu busunga nameme tuliwana na byeseko.
MWASO 49 Kutabisa Pilu ya Jehova
^ par. 5 Satana uje wapwa ishe ya makuli ikeye ali na kuyula kano kaye mu tuli na kuyoya. Co, kwasa kutukaluwila kutwalelelaho kwenda mu busunga. Baka-Kilistu ba mu simbu ya tupositolo nabo bakele mu bukalu bwa kulifwa. Ngeci, Yehova wahwiminine kapositolo Yowano asoneke mikanda itatu mangana ibakwase, co netu yasa kutukwasa. Eyi mikanda itukwasa tuzibuke byuma byasa kutwonowesa kutwalelelaho kwenda mu busunga nebi bitwasa kulinga mangana tutwaleleleho kwenda mu busunga.
^ par. 3 Taleni cipalo ca “ Bika byalingisile Yowano asoneke mikanda yendi?”
^ par. 6 Mazina amo banawatengulula.
^ par. 11 Taleni cilongesa ca “Muli na Bukaleho bwa Kushula Ndi?” mu Kaposhi ka Kukengela ka August 2018.
^ par. 59 KULUMBUNUNA CIKUPULO: Ndokazi wa mwanike ali ku sikola, co aziba na kumona byuma bije bimwesa ngwe kulinga bundei kukwabihile. (Mu bisemwa bimo mibala ya nkongolo ikemanena bundei.) Mu kwita kwa simbu atondesesa mu Mbimbiliya mangana akanyamese likulahelo lyendi. Oku kumukwasa ase kwangula mwamubwa bya kulinga.
