Bihula bya Baka-kutanda
Kuma Bakaleho ba Yehova banapande kupangesa mawebusaiti ha kulitondela mangana bawane munu wa kulyambata nendi ndi?
Yehova washaka ngwendi banu babali baje balyambata batwaleleleho kupwa ba kubwahelela na kulikuwa kupangela hamo. (Mateo 19:4-6) Nga mushaka kwambata nambe kushomboka, mwasa kuwana bati munu wamubwa wa kulyambata nendi? Yehova ikeye Ishamatanga yetu, co azibuka mwamubwa bitunapande kulinga mangana tupwe ba kubwahelela mu bulo bwetu. Ngeci, nga mupangesa binangulo byanatwana, co mupwa ba kubwahelela mu bulo bweni. Tusimutwiyeniko ha binangulo bimo.
Ca kulibanga, tunapande kuzibuka ngwetu: “Mbunge ya munu yapwa ya makuli kutubakana byuma byoshe, yapwa yaibi manene.” (Njele 17:9) Nga banu babali balitonda na kushangumuka kulizilila banasa kulizema manene, co kulinga ngoco kunasa kubonowesa kwangula mwamubwa bya kulinga. Nga banu balyambata mwafwa ya kuliziba lika ngwabo balizema, mu kwita kwa simbu banasa kulibeya. (Visi 28:26) Ngeci, baje bacili na kulitonda kubapandele kulileka byuma bije bibalingisa balizeme manene nambe kulikulahesa ngwabo balyambata oku kanda balizibuke mwamubwa.
Mukanda wa Visimo 22:3 ngwawo: ‘Baka-mana omwo bamona bukalu bwija, balishweka. Oloni muka-kujeneka mana ayako, co akalikobelesa mu bukalu.’ Bukalu muka butundamo nga tupangesa mawebusaiti ha kulitondela? Calubinda, banu bamo bakalitondela ha mawebusaiti, oloni mu kwita kwa simbu bakananguka ngwabo munu ibakele na kulitonda nendi wabakwisile. Co lalo, banu bamo bakamungu maakaunti a makuli mangana bebile bakwabo bimbongo. Bisimbu bimo aba banu bakalikwisi ngwabo bapwa Bakaleho.
Tusimutwiyeniko bukalu bukwabo. Mawebusaiti amo ha kulitondela, akapangesa mapulogilamu a ha kompyuta mu kwangila banu munu wa kulyambata nendi. Oloni kukwesi bukaleho bumwesa ngwabwo banu bakawana munu wamubwa wa kulyambata nendi kupangesa eyi ngila. Kutwapandele kukulahela ngwetu pulogilamu ya ha kompyuta yasa kutwangwila munu wamubwa wa kulyambata nendi. Mapulogilamu a ha kompyuta kuwasa kutukwasa ngwe mubikatukwasela binangulo bya mu Mbimbiliya.—Visi 1:7; 3:5-7.
Mukanda wa Visimo 14:15 ngwawo: “Cilema akataba cuma coshe-coshe cije aziba, baka-mana bakebo bazibuka kuje kubaya.” Simbu kanda muyongole kulyambata na munu umo, munapande tahi kumuzibuka mwamubwa. Oloni kumwasa kuzibuka mwamubwa munu nga mwaliwanena lika ha wabusaiti ya kulitondela. Nameme umo na umo asa kumona mizimbu ya mukwabo, co lalo mwasa kusimutwiya kupangesa makina, kuma mwasa kulizibuka mwamubwa bene ndi? Banu bamo baje basinganyekele ngwabo banawana munu wamubwa wa kulyambata nendi ha makina bakomokele manene omwo baliwanene nendi.
Ndabiti wasonekele ngwendi: “Kunjesi kukala hamo na banu baka-makuli, nambe kusimutwiya na baka-cibembulu.” (Myaso 26:4) Banu babangi bakaka mizimbu ya makuli ha maakaunti abo abakapangesa ha mawebusaiti ha kulitondela mangana basholoke ngwe bapwa banu bababwa. Co lalo, banasa kushweka bifwa byabo byabibi omwo basimutwiya na bakwabo nambe kulitumina tumizimbu ha makina. Nambe hamo kunasa kumipwila kwakukalu kunanguka bifwa byabo byabibi. Kunapu kwa seho kusinganyekesesa ha bihula binatako. Nameme banu bamo banasa kwendeka ngwabo bapwa Bakaleho ba Yehova kuma bapwa baka-Kilistu ba kumbwitika ndi? Kuma banakolo ku sipilitu ndi? Kuma busamba bwabo na Yehova bwapwa bwa kukanyama ndi? Kuma bandolome na bandokazi mu cikungulukilo babazibuka ngwabo bakala na bilinga byabibwa ndi? Indi hamo bakala na bilinga byabibi, co banasa kupwa ‘bailanyo bababi’? (1 Koli 15:33; 2 Tima 2:20, 21) Kuma kuli byuma bimo byasa kubonowesa kukobela mu bulo ndi? Munapande kuzibuka eyi mizimbu yoshe mu kushula, oloni kumwasa kuizibuka nga kumwihula bandolome na bandokazi baje batanekeya mwamubwa owo munu. (Visi 15:22) Co lalo, ngamba ya Yehova wa kulongwa kapandele kulikutiiya “mukambo umo lika” na muka-kujeneka kukulahela.—2 Koli 6:14; 1 Koli 7:39.
Twalimwena ngwetu kutonda munu wa kulyambata nendi ha mawebusaiti kunasa kutukobelesa mu bukalu. Nameme ngoco, kuli bingila byabibwa bimwasa kupangesa mangana muwane munu wa kulyambata nendi na kulizibuka nendi mwamubwa. Mwasa kuwana bati munu wa kulyambata nendi? Ha simbu itukalikungulwila ku mitambela ya kulemesela, tukalizibuka mwamubwa na bakwetu. Tukalingi ngoco, mutukaliwana ku biwano bya cikungulukilo, bya citingitingi, bya mutambela na biwano byeka.
Nga muwana simbu yaingi ya kusimutwiya, co muzibuka indi mwakala na bilengo bya kulifwa, co lalo mwashaka byuma bya kulifwa
Oloni nga kutwasa kulikungulwila ku mitambela ya kulemesela ngwe ha simbu ya mushongo wa COVID-19, tukalingila biwano ha makina. Eyi ikeyo simbu yaibwa ya kulizibuka na bandolome na bandokazi ba bazike mwafwa tubaziba na kubamona omwo bendeka biñanda kukumbulula. (1 Tima 6:11, 12) Co lalo, mwasa kusimutwiya nabo mu breakout room munima ya biwano. Kutundaho mwasa kuzibuka bifwa bya munu imushaka kulyambata nendi omwo muliwana ku bilika bya ha makina bya Bakaleho ba Yehova. (1 Petu 3:4) Mu kwita kwa simbu mwasa kuzibuka indi muli na bilengo bya kulifwa, mwashaka byuma bya kulifwa, co lalo mukalitombola.
Nga bandolome na bandokazi ba bazike bakabangeya binangulo bya mu Mbimbiliya omwo bashakezeka munu wa kulyambata nendi, co basa kupwa ba kubwahelela mu bulo bwabo. Co lalo, banasa kulimwena busunga bwa majwi a kwendeka ngwawo: “Uje awana munakazi [nambe munalume wamubwa] awana cuma cacibwa, co awana kutetela kuli Shukulu Kalunga.”—Visi 18:22.
