1-2. Majwi a Yehova ali ku Isaya 65:16, 17 atukwasa bati tutwaleleleho kukolesa?

CIWANO ca mutambela ca 2017 cakele na mutwe wa “Keti Muzeye.” Eci ciwano catukwasele kuzibuka bitunapande kulinga omwo tuliwana na bukalu. Kuneti oni myaka iwana kutunda hatwalingilile eci ciwano, oloni tucili na kukolesa mu bukalu butuli na kuliwana nabwo.

² Bukalu muka bumunaliwana nabwo mu myaka inahu? Kuma munatsisa kabusamba nambe kabushoko keni ndi? Muli na kubinja mushongo wakama ndi? Kuli na kumikaluwila kulinga byuma bimo mwafwa ya bukulukazi ndi? Kuma munaliwana na bukalu bwa kulizila ndi? Kuma mu citingitingi ceni muli bukenya ndi? Kuma bali na kumipakesa ndi? Indi hamo muli na kuyanda mwafwa ya mushongo wa COVID-19? Twashungwiya manene kumona litangwa libukahwa obu bukalu bwoshe. Mubukahwa, kutukabwanuka, co kubukakalako lalo.—Tandeni Isaya 65:16, 17.

3. Bika bitunapande kulinga, co mwafwa bika?

³ Buyoye bunakaluwa manene ano matangwa, co hamo kulutwe bukakaluwa manene. (Mateo 24:21) Ngeci, tunapande kutwalelelaho kukolesa. Mwafwa bika? Mwafwa Yesu wendekele ngwendi: “Koleseni, co mukamena myonyo yeni.” (Luka 21:19) Kuzibuka ngwetu bakwetu baje bali na kuliwana na bukalu bwa kulifwa nobu butuli na kuliwana nabwo bali na kutwalelelaho kukolesa, kutukwasa tutwaleleleho kukolesa.

4. Mwafwa bika twasa kwendeka ngwetu Yehova natumwesa mwanja waubwa wa kukolesa?

⁴ Iya natumwesa mwanja waubwa manene wa kukolesa? Yehova Njambi. Kuma eci cikumbululo cimikomokesa ndi? Hamo cinasa kumikomokesa. Oloni nga musinganyekesesaho, co kumukomoka.  Liyabolo ikeye ali na kuyula kano kaye mukemwo banu bali na kuliwana na bukalu bwabwingi. Yehova asa kumanesa obu bukalu bwoshe hano bene, oloni ali na kubandamena simbu yanangula. (Loma 9:22) Ngeci, Njambi atwalelelaho kukolesa mu bukalu bwa kuliseza-seza kweta na ha simbu yakanyongesa kano kaye. Tusimutwiyeniko ha bukalu bwa kupwa 9.

5. Lizina lya Njambi banalishaula bati, co kuzibuka ngoco kumilingisa mulizibe bati?

⁵ Lizina lyendi bali na kulishaula. Yehova wazema lizina lyendi, co washaka ngwendi banu boshe balisingimike. (Isaya 42:8) Oloni banu babangi banatwalelelaho kushaula lizina lya Yehova ha myaka ya kutubakana 6,000. (Myaso 74:10, 18, 23) Lizina lyendi bashangumukile kulishaula mu lihya lya Edeni omwo Liyabolo (kulumbununa “Muka-kubangeya”) wabangeyeye Njambi ngwendi wominine Adamaa na Eva byuma bije byapandele kubalingisa bapwe ba kubwahelela. (Kusha 3:1-5) Kushwa bene haje, Satana natwalelelaho kubangeya Yehova ngwendi ali na kumina banu byuma bibatonda. Yesu kabwahelelele omwo banu bakele na kushaula lizina lya Ishe. Mukemwo walongesele bandongesi bendi kulombela ngwabo: ‘Tate yetu uli mwilu, bajelese lizina lyobe.’—Mateo 6:9.

6. Mwafwa bika Yehova necelela banu baliyule ha simbu yailaha?

⁶ Ciyulo cendi bali na kucilwisa. Yehova ikeye napande kuyula lilu na kaye, co ciyulo cendi cikeco cacibwa manene. (Kujo 4:11) Oloni Liyabolo natwalelelaho kulingisa tungelo na banu basinganyeke ngwabo Njambi keti ikeye napande kubayula. Kwatondekele kwita simbu mangana tungelo na banu bakulahele ngwabo Yehova ikeye napande kubayula, co lalo wapwa muka-kuyula wamubwa manene. Mukemwo Njambi nana banu simbu yaingi ya kuliyula mangana balimwene ngwabo kubasa kuliyula bakebo babenya. (Njele 10:23) Ngeci kulutwe, banu boshe bakalimwena ngwabo Njambi ikeye napande kubayula. Bakazibuka ngwabo ciyulo cendi cikeco cacibwa menene, co Bumwene bwendi bukebwo lika bwasa kunena kwoloka mu kaye.

7. Beya banatengulukila Yehova, co akabalinga bati?

⁷ Banu na tungelo bamo banamutengulukila. Yehova watangele tungelo na banu ba kulumbunuka. Oloni Satana (kulumbununa “Muka-kulwisa”) walingisile Adama na Eva baje bapwile ba kulumbunuka batengulukile Yehova. Co banu na tungelo bamo nabo batengulukilile Njambi. (Yunda 6) Mu kwita kwa simbu, Baisalele bamo batengulukile Njambi uje wabangwile na kushangumuka kulemesa binjambi ba makuli. (Isaya 63:8, 10) Yehova walizibile kubihya ku mbunge. Nameme ngoco, wakwatele mbunge, co atwalelelaho kukolesa kweta noho hakanyongesela baka-kumulwisa boshe. Ha simbu oyo, Yehova na bangamba bendi ba kulongwa bakabwahelela mwafwa kubakaliwana nawa na bukalu.

8-9. Biñanda muka bibali na kubangeya Yehova, co yetu tukalingi bika?

⁸ Makuli a Liyabolo. Satana wabangeyeye Yombi uje wapwile ngamba ya Yehova wa kulongwa ngwendi wakele na kupangela Njambi mwafwa washakele kuwanako byuma bimo. Co omwo wendekele ngoco, Satana wamwesele ngwendi bangamba ba Yehova boshe bakamupangela mangana bawaneko byuma bimo. (Yombi 1:8-11; 2:3-5) Liyabolo natwalelelaho kubangeya bangamba ba Yehova. (Kujo 12:10) Nga tutwalelelaho kukolesa mu byeseko na kutwalelelaho kupwa ba kulongwa kuli Yehova, co tumwesa ngwetu twamuzema. Co lalo, tumwesa ngwetu Satana wapwa muka-makuli.  Nga tukolesa ngwe mwalingile Yombi, co Yehova atubezikisa.—Yako 5:11.

⁹ Satana ali na kushongangeya bantwama ba bulombelo balongese banu ngwabo Yehova wapwa cikenya, co ikeye akalingisa banu bayande. Bamoco bakendeka ngwabo nga mwanike natsi, Njambi ikeye namwambata mwafwa atonda tungelo babangi mwilu. Oku kunapu kushaula Njambi. Oloni yetu tuzibuka ngwetu Yehova wapwa Tate wa cizemo. Mukemwo kutwesi kumwana mulonga nga tubinja mushongo wakama nambe kutsisa kabusamba nambe kabushoko ketu. Oloni tuzibuka ngwetu Njambi akamanesa mishongo yoshe na kusangula batsi. Co tukalekeko bakwetu ngwetu Yehova wapwa Njambi wa cizemo. Ngeci, tukalingisa Yehova akumbulule muka-kumupaya.—Visi 27:11.

10. Mukanda wa Myaso 22:23, 24 wendeka bika hali Yehova?

¹⁰ Bangamba bendi bazema bali na kuyanda. Yehova wapwa Njambi wa mema ku mbunge. Kesi kuliziba mwamubwa mubakatuyandesa, mutukabinji nambe mutukaliwana na bukalu bwoshe-bwoshe buje bukaija mwafwa ya kujeneka kulumbunuka. (Tandeni Myaso 22:23, 24.) Yehova azibuka bukalu butuli na kuliwana nabwo, ashaka kubumanesa, co akabumanesa bene. (Esekeseni Kutuuka 3:7, 8; Isaya 63:9.) Simbu iketa omwo Yehova “akasikumuna misozi yoshe ku mesho [etu]. Co kukukakala kutsa nambe busiwa nambe kulila nambe kukemanga.”—Kujo 21:4.

11. Yehova akalizibi bati mwakanuka bangamba bendi ba kulongwa baje batsa?

¹¹ Nashungwiya kumona babusamba bendi baje batsa. Yehova akalizibi bati mwakanuka bangamba bendi ba kulongwa baje batsa? Akashungwiya kubamona lalo. (Yombi 14:15) Yehova nashungwiya manene kumona kabusamba kendi Abilahama. (Yako 2:23) Co  nashungwiya kumona Mosesa uje yakele na kusimutwiya nendi “mesho na mesho.” (Kutu 33:11) Co lalo, nashungwiya kuziba Ndabiti na bakwabo baka-kwimba oku baimba myaso ya kumushangazala. (Myaso 104:33) Nameme aba babusamba bendi banatsi, Yehova kabebalele. (Isaya 49:15) Ali na kwanuka mwoshe mubafwile. Mu ngila imo twasa kwendeka ngwetu “kuli ikeye boshe bali na kuyoya.” (Luka 20:38, NWT.) Litangwa limo akabasangula, co bakalombela lalo kuli ikeye na kumulemesa mu ngila inapande. Nga mwatsisa kabusamba nambe kabushoko keni, twakulahela ngwetu awa majwi anamizembeleka na kumitakamesa.

12. Byuma muka bili na kuzibisa manene Yehova kubabala ku mbunge ano matangwa?

¹² Banu bababi bali na kuyandesa bakwabo. Banu mubatengulukilile Yehova mu lihya lya Edeni, wazibukile ngwendi byuma bibihya manene. Oloni wazibukile lalo ngwendi bikakala mwamubwa kulutwe. Yehova wazinda manene byuma byabibi bili na kulingiwa muno mu kaye kwambateselela na bukenya. Natwalelelaho kuzibila ngozi baje kubesi nowu wa kubamena ba kufwa ngwe bifwile na bisiwa. (Zaka 7:9, 10) Yehova akazibi manene kubabala ku mbunge mwakamono bangamba bendi babayandesa na kubaka mu tumenga. Zibukeni ngweni wamizema manene mwafwa muli na kutwalelelaho kukolesa.

13. Byuma muka bibali na kulinga banu bije bili na kuzibisa Njambi kubihya ku mbunge, co akalinga bika?

¹³ Bilinga bya bukwizi binalisala manene ano matangwa. Njambi watangele banu mu cifwa cendi, oloni Satana ashaka ngwendi balinge byuma byabibi manene. Mu matangwa a Nowa, Njambi “wamwene ngeci banu boshe hano hasi banabihya.” Ngeci ‘walinyengele omwo watangele banu na kubaka hano hasi. Co wazibile manene kubabala ku mbunge.’ (Kusha 6:5, 6, 11) Kuma byuma binatenguluka ano matangwa ndi? Embwe. Liyabolo nabwahelela manene mwafwa bilinga bya bukwizi binatumu manene muno mu kaye bya kufwa ngwe bupangala na bundei. (Efeso 4:18, 19) Satana akabwahelela manene mwakamono bangamba bamo ba Yehova balinga bubi bwakama. Yehova mwakalubala, akanyongesa banu boshe baje bali na kutwalelelaho kulinga byuma byabibi.

14. Banu bali na kulinga bika ku byuma bya kutanga?

¹⁴ Banu bali na kubiisa kaye. ‘Banu bali na nzili ya kuyandesa bakwabo,’ co lalo kubesi na kunyunga mwamubwa kaye na tusitu ngwe mwashikile Yehova. (Kwambu 8:9; Kusha 1:28) Baka-sayansi bamo ngwabo byuma bibali na kulinga banu bikalingisa tusitu bamo na bimena bimo biziluke mu myaka ili na kwija kulutwe. Mukemwo banu babangi banalishoshomwena ngwabo byuma bya kutanga bibihya manene. Oloni Yehova nakulahesa ‘kunyongesa baje babiisa kaye’ na kutengulula kaye koshe kupwa Paradaisi.—Kujo 11:18; Isaya 35:1.

15-16. Bika bitushongangeya tutwaleleleho kukolesa? Endekeni cakumwenako.

¹⁵ Tate yetu wa mwilu natwalelelaho kukolesa mu byuma bya kuliseza-seza ha myaka yaingi. (Taleni cipalo ca “Yehova Ali na Kukolesa mu Byuma Muka?”) Yehova asa kunyongesa kano kaye simbu yoshe-yoshe. Oloni nakwata mbunge ha simbu yailaha, co kulinga ngoco kunatukwasa manene. Tucisimutwiyeniko ha cakumwenako eci: Acisinganyekeni ngweni munalume na munakazi wendi uje ali na cikute babaleka ngwabo munabo ali mwimo ali na mishongo yaingi manene, co mwasemuka ayanda manene. Ngeci, atsa oku acili mwanike. Oloni babwahelela manene omwo munabo asemuka nameme bazibuka ngwabo kubakaluwila kumunyunga. Aba bisemi bakolesa na kulinga mwoshe mubasela kunyunga mwamubwa munabo mwafwa bamuzema.

 ¹⁶ Mu ngila imo lika, bana ba Adama na Eva boshe kubalumbunukile. Nameme ngoco, Yehova wabazema, co ali na kubanyunga. (1 Yowa 4:19) Co lalo, Yehova naliseze na bisemi batunasimutwiya mwafwa ikeye asa kumanesa bukalu bubali na kuliwana nabwo bana bendi. Nangula laja simbu yakamanesa bukalu bwoshe bubali na kuliwana nabwo banu. (Mateo 24:36) Cizemo cali na kutumwesa Yehova citushongangeya tutwaleleleho kukolesa.

17. Biunendeka mukanda wa Vahevelu 12:2, 3 hali Yesu bitukwasa bati tutwaleleleho kukolesa?

¹⁷ Yehova natumwesa mwanja waubwa manene wa kukolesa. Yesu nendi wakolesele ngwe mwali na kulinga ishe. Yesu mwakele hano hasi, banu bamushawile, kumwendeka mwamubi na kumupameya ha citi ca kuyandesela mwafwa yetu. (Tandeni Vahevelu 12:2, 3.) Mwanja wa Yehova wa kukolesa wakwasele Yesu akolese, co netu wasa kutukwasa.

18. Kwesekesa na mukanda wa 2 Petulu 3:9, byuma muka byabibwa binalingiwa omwo Yehova natwalelelaho kukwata mbunge?

¹⁸ Tandeni 2 Petulu 3:9. Yehova azibuka simbu yaibwa yakanyongesa kano kaye kakabi. Oloni natwalelelaho kukwata mbunge, co banu babangi bali na kulilongesa Mbimbiliya. Ngeci ha simbu ino, mbunga yakama ya banu bali na kumulemesa. Co boshe banabwahelela mwafwa Yehova nabana simbu ya kusemuka, kulilongesa byendi na kulikundika kuli ikeye. Banu babangi baje bakolesa kuketa na kushongo bakalimwena ngwabo Yehova nalingile mwamubwa manene kukwata mbunge.

19. Bika bitunapande kulinga, co tukatambula cikandelela muka?

¹⁹ Mwanja wanatumwesa Yehova utukwasa tutwaleleleho kupwa ba kubwahelela nameme tuliwana na bukalu. Nameme Satana nalingi byuma byabibi manene bije bili na kuyandesa banu na kuzibisa Yehova kubabala ku mbunge, oloni Yehova natwalelelaho kupwa ‘Njambi wa kubwahelela.’ (1 Tima 1:11) Netu twasa kupwa ba kubwahelela omwo tubandamena ngwetu Yehova ajelese lizina lyendi, kumwesa ngwendi ikeye napande kuyula banu na kumanesa bubi na bukalu bwoshe butuli na kuliwana nabwo. Tutwaleleleniho kukolesa mu bukalu bwoshe-bwoshe butuliwana nabwo mwafwa tuzibuka ngwetu Tate yetu wa mwilu nendi ali na kukolesa. Nga tulinga ngoco, co tulimwena busunga bwa majwi akwendeka ngwawo: ‘Banabwahelela banu baje balongwa ha simbu ya byeseko, omwo nga bahyana na kukakateya, co bakatambula mwonyo kupwa cikandelela cabo uje wanakulahesa Njambi kuli baje bamuzema.’—Yako 1:12.