Bihula Bya Baka-Kutanda
‘Munakazi’ muka ibanendeka ku mukanda wa Isaya 60:1, co ‘enduka’ na ‘kubyazima’ mu ngila muka?
Mukanda wa Isaya 60:1 ngwawo: ‘Induka, obe munakazi, byazima ngwe litangwa, omwo ceke cobe cinaija. Bumpau bwa Yehova buli na kubyazima hali yobe.’ Byuma bibanendeka omu mu capita bimwesa ngwabyo ou ‘munakazi’ wapwile Siyone nambe Jelusalema ije yapwile nganda ya Juda ha simbu ije. a (Isaya 60:14; 62:1, 2) Nganda ya Jelusalema imanena lifuti lyoshe lya Isalele. Majwi asonekele Isaya oku ku mukanda atulingisa twihule bihula bibali: Cakulibanga, Jelusalema ‘yendukile’ mwaka uka na kutwa ceke ca cifwisa, co yalingile bati ngoco? Camucibali, kuma majwi asonekele Isaya ali na kulishulisilila na mu simbu yetu ndi?
Jelusalema ‘yendukile’ mwaka uka na kutwa ceke ca cifwisa, co yalingile bati ngoco? Jelusalema yapwile ngundu ha simbu ibakele ba Juda mu bufunge mu Babiloni ha myaka 70. Oloni Babiloni mubainyongesele kuli Bamede na Bapelesia, baIsalele baje bayoyele mu mitambela ya kuliseza-seza mu Babiloni basele kwiluka kwimbo lyabo na kukelwisa lalo kulemesa kwa busunga. (Ezela 1:1-4) Kushangumuka mu mwaka wa 537 B.C.E, ba Juda ba kulongwa ba ku miyati 12 belukile kwimbo lyabo ku Jelusalema. (Isaya 60:4) Bashangumukile kwana milambu kuli Yehova, kumulingila bilika na kutungulula tempele. (Ezela 3:1-4, 7-11; 6:16-22) Ngeci, bumpau bwa Yehova bwashangumukile lalo kusholoka ha nganda ya Jelusalema, kulumbununa banu bendi. Co kwapwile lika ngwe ba Juda bakele na kutwa ceke mukati ka banu baje bakele mu lisusulungu ku sipilitu.
Nameme ngoco, bupolofweto bwendekele Isaya kubwalishulisilile mu kushula ha simbu ije. Bwingi bwa baIsalele kubatwaleleleho kwononoka Njambi. (Nehe 13:27; Mala 1:6-8; 2:13, 14; Mate 15:7-9) Mu kwita kwa simbu, babyanene na Yesu Kristu uje wapwile Mesiya. (Mate 27:1, 2) Co mu 70 C.E., Jelusalema na tempele babinyongesele lalo.
Yehova wapolofwetele cimweja byuma byoshe byalingiwile. (Ndanye 9:24-27) Yehova kayongwele ngwendi bupolofweto bwoshe buli ku mukanda wa Isaya capita 60, bulishulisilile kuli Jelusalema wa hano hasi.
Kuma majwi asonekele Isaya ali na kulishulisilila mu kushula mu simbu yetu ndi? Eyo, oloni ali na kulishulisilila kutalesa ku munakazi weka wa cifwisa “Jelusalema ya mwilu.” Kapositolo Paulu wasonekele hali ou munakazi ngwendi: ‘Wapwa nanetu.’ (Gala 4:26) Jelusalema ya mwilu wapwa mutamba wa munga ya Yehova ya mwilu wa tungelo ba kulongwa. Bana bendi banambateselela Yesu na Baka-Kristu ba kubwabesa ba kupwa 144,000 baje bali na lilabelelo lya ku kayoya mwilu ngwe mwa Paulu. Boshe kubaka hamo banapu “muyati wa kujela,” “Isalele ya Njambi.”—1 Pita 2:9; Gala 6:16.
Ou Jelusalema ituli na kwendeka ‘wendukile’ na ‘kubyazima’ mu ngila muka? Wendukile na kubyazima kwitila mu bana bendi ba kubwabesa ba hano hasi. Tucimoneni byuma bibaliwanene nabyo mubinalifwila nebi bibapolofwetele ku mukanda wa Isaya capita 60.
Baka-Kristu ba kubwabesa bapandele ‘kwinduka’ mwafwa bakele mu lisusulungu lya cifwisa omwo baka-kutengulukila balisalele, munima ya kutsa kwa tupositolo. (Mate 13:37-43) Aba Baka-Kilistu ba kubwabesa bakele mu bundungo bwa Babiloni Wakama, bulombelo bwa makuli mu kaye koshe. Co batwaleleleho kukala mu bundungo kweta na mu matangwa a “mamaneselelo a katumameno ka myaka ino,” aje ashangumukile mu mwaka wa 1914. (Mate 13:39, 40) Munima ya simbu yaindondo, mu mwaka wa 1919, aba baka-Kristu bapatukile mu bundungo na kushangumuka kutwa ceke ca ku sipilitu ha kupanga cipangi ca kwambulula na ntwima. b Ngeci, ha myaka yaingi ineti, banu ba kutunda ku miyati ya kuliseza-seza banaija mu ceke kwambateselela na baje bapwa Isalele ya Njambi baje bacili hano hasi, kulumbununa “bimyene” ngwe mubanabendekela ku mukanda wa Isaya 60:3.—Kujo 5:9, 10.
Kulutwe, Baka-Kilistu ba kubwabesa bakatwa manene ceke ca kutunda kuli Yehova. Mu ngila muka? Mu batsa bapwa mutamba wa “Jelusalema Yaiha,” nambe shombolwa wa Kristu wa baka-Kristu bakubwabesa ba kupwa 144,000 baje banapu bimyene na tupilistu.—Kujo 14:1; 21:1, 2, 24; 22:3-5.
Jelusalema Yaiha ishulisilila byuma byabingi bibanendeka ku mukanda wa Isaya 60:1. (Esekeseni Isaya 60:1, 3, 5, 11, 19, 20 na Kujombolola 21:2, 9-11, 22-26) Jelusalema yapwile nganda yakama mu Isalele ya kunima, mu ngila imolika Jelusalema Yaiha hamolika na Kristu bakapwa fulumende ya kaye kakaha. Jelusalema yaiha ili na kutunda bati “mwilu kuli Njambi”? Ha kulinga byuma bije bikwasa kaye. Banu ba kutunda ku miyati yoshe baje bazibila Njambi lyoba “bakenda mu ceke cei nganda.” Kubakalingi lalo bubi nambe kutsa. (Kujo 21:3, 4, 24) Bubwa muka bukatundamo? Kukakala “bisimbu bya kwilwisa byuma byoshe ngwe mubyakelelele hakulibanga” ngwe mwapolofwetele Isaya na tupolofweto bakwabo. (Bili 3:21) Oku kwilwisa byuma byoshe ngwe mubyakelele hakulibanga kwashangumukile omwo Kristu wapwile Mwene, co kukahwa munima ya Ciyulo cendi ca Myaka 1,000.
a Ku mukanda wa Isaya 60:1, Mbimbiliya ya Kaye Kakaha inapangesa lijwi lya “munakazi” kutubakana kupangesa “Siyone” nambe “Jelusalema,” mwafwa lijwi lya Cihebelu lya “induka” na lya “byazima” banalipangesa manene ku banakazi ngwe mubanapangesela lijwi lya “yobe.”
b Ku mukanda wa Ezekiele 37:1-14 na Kujombolola 11:7-12, banendekako lalo bya kwilwisa kulemesa kwa busunga kuje kwakeleko mu 1919. Ezekiyele wapolofwetele bya kupatuka kwa ku sipilitu kwa baka-Kristu bakubwabesa boshe munima ya myaka yaingi ya kukala mu bundungo. Bupolofweto buli ku mukanda wa Kujombolola bunatalesa ku kusemuka kwa cifwisa kwa cibunga cacindondo ca baka-Kristu bakubwabesa ca bandolome baje bakele na kutwamenena munima ya kubonowesa kupangela Yehova ha simbu yaindondo ibabakutile. Mu 1919, babangwile kupwa “ndungo wa kulongwa na kunyanyama.”—Mate 24:45; Taleni libulu lya Jehova Ulapelwa Hape ka Nzila Yelukile! Lipu. 117.
