CILONGESA 24
Tumbileni Kuti Bisinganyeka Byoshe Bije Bilwisa Mana a Njambi
‘Tuli na kutundisa kulyalesa kwoshe kuje kuli na kulwisa mana a Njambi.’—2 KOLI 10:5.
MWASO 124 Kusepahala Nako Kaufela
BILI MUNO MU CILONGESA *
1. Kapositolo Paulu wanangwile bika baka-Kilistu ba kubwabesa?
KAPOSITOLO PAULU wasonekelele baka-Kilistu ba kulibanga ngwendi: “Kesi mulipwise ngwe banu ba muno mu kaye.” (Loma 12:2) Bika byabanangwililile ngoco okuni bapwile banalume na banakazi ba kubwabesa na sipilitu ya kujela?—Loma 1:7.
2-3. Satana asa kututundisa bati kuli Yehova? Co twasa kutundisa bati bisinganyeka bije binakolo manene mu bimbunge byetu?
2 Paulu wanangukile ngwendi baka-Kilistu bamo bakele na kungumuka na mana a muno mu kaye ka Satana. (Efeso 4:17-19) Netu twasa kungumuka na mana a kano kaye. Satana ikeye njambi wa kano kaye, co asa kupangesa milali ya kulisezaseza mangana atungumune. Cakumwenako, nga tushaka kutsimana nambe kutusingimika, co bikebyo byapangesa Satana mu kutungumuna. Nasa kupangesa bitunalilongesa kuli baka-naanga yetu, ku sikola na kuli bakwetu mangana tumone byuma ngwe mwabimwena ikeye.
3 Kuma twasa kutundisa bisinganyeka byabibi bije binakolo manene mu bimbunge byetu ndi? (2 Koli 10:4) Nangukeni cikumbululo ca Paulu. Wasonekele ngwendi: ‘Tuli na kutundisa bisinganyeka byabibi bije bili na kulwisa mana a Njambi, co tuli na kwaka biyongola byoshe mu bundungo mangana byononoke Kilistu.’ (2 Koli 10:5) Mu nzili ya Yehova, twasa kutundisa bisinganyeka byabibi. Bumbanda bwakala na nzili ya kulwisa mushongo. Mu ngila imo lika, Mbimbiliya nayo ili na nzili ya kulwisa bisinganyeka byabibi bya Satana.
‘TENGULULENI BIYONGOLA BYENI’
4. Bwingi bwetu twalingile bika mutwalilongesele busunga?
4 Mumwalilongesele busunga, mwatengulwilile yoyesi yeni mangana mupangele Yehova. Bwingi bwetu twalikelele kulinga byuma byabibi. (1 Koli 6:9-11) Twakandelela manene kuli Yehova mwanatukwasa tulikele kulinga byuma byabibi.
5. Byuma muka bibali bitunapande kulinga bibanatuleke ku Loma 12:2?
5 Nameme tunalikele kulinga bubi bwakama buje butwakele na kulinga simbu kanda batumbwitike, kutwapandele kusinganyeka ngwetu kukwesi hakwabo hatunapande kupangela. Tunapande kujenjuka ku byuma byoshe byoshe bije byasa kutulingisa twilukile buje bubi. Twasa kulinga bati ngoco? Paulu wakumbulwile ngwendi: ‘Likeleni kulipwisa ngwe banu ba muno mu kaye, oloni tengululeni biyongola bya mu bimbunge byeni.’ (Loma 12:2) Tunapande kulinga byuma bibali. Ca kulibanga, kutwapandele ‘kupwa ngwe banu ba muno mu kaye.’ Ca mu cibali, tunapande ‘kutengulula biyongola na bimbunge byetu.’
6. Bika bitulilongesa ku majwi a Yesu ali ku Mateo 12:43-45?
6 Kutenguluka kwendekele Paulu keti kwa sholwesi ya hanja lika embwe. Oloni kunambateselela kutengulula buyoye bwetu bwoshe. (Kengeni cipalo ca “ Twatengulukile Indi Twamwesele Lika Ngwe Twatenguluka?”) Tunapande kutengulula bisinganyeka byetu, mashungu etu na tulingolingo twetu. Tubaboshe tunapande kulihula ngwetu: ‘Kutenguluka kwetu mangana tupwe baka-Kilistu kunapu kwa busunga indi kunapu kwa helu lika? Ku Mateo 12:43-45, Yesu wamwesele bitunapande kulinga. (Tandeni.) Awa majwi atulongesa ngwawo kutwapwandele lika kutundisa bisinganyeka byabibi, oloni tunapande kubingisa na bisinganyeka byabibwa bije byatonda Njambi.
“BIMBUNGE BYENI NA MANA ENI BINAPANDE KUPWA BYABIHA”
7. Twasa kutengulula bati mbunge yetu na bisinganyeka byetu?
7 Kuma twasa kutengulula bimbunge byetu na mana etu ndi? Lijwi lya Njambi lyakumbulula ngwalyo: “Bimbunge byeni na mana eni binapande kupwa byabiha, co munapande kuzala bunu bwabuha, buje bubanatanga mu cifwa ca Njambi, buje bunasholoka bukebwo babenya mu mwonyo wa busunga uje waubwa na kujela.” (Efeso 4:23, 24) Twasa kutengulula biyongola byetu, oloni kulinga ngoco keti kwakwasi. Tunapande kutundisa bisinganyeka byabibi na kulikela kulinga byuma byabibi. Oloni kuli bikwabo lalo bitunapande kulinga. Tunapande kutengulula ‘bimbunge byetu na mana etu.’ Oku kunambateselela kutengulula mashungu etu, tulingolingo twetu, nebi bikatushongangeya tulinge byuma bimo. Ngeci, tunapande kulifwita simbu yoshe.
8-9. Byaliwanene nabyo ndolome umo bimwesa bati seho ya kutengulula bunu bwetu bwa mukati?
8 Tusimutwiyeni hali munalume umo uje wapwile muka-lwozi. Ou munalume walikelele lwozi na kunwa bwala. Ngeci bamumbwitikile, co wamwesele mwanja waubwa mu citingitingi mwakele. Kumwetile simbu yailaha kutunda habamumbwitikilile, uje ndolome waliwanene na ceseko cije camukasumwine. Litangwa limo ku mangwezi munu umo wa kupenda waile ha njubo ya uje ndolome, co watondele kulipupa nendi. Ha kulibanga ndolome yetu wabyanene kulipupa nendi. Oloni uje munu washawile Yehova, co uje ndolome walubalele manene. Ngeci, wakatukile na kumupupa. Bukalu muka bwakele nabwo uje ndolome? Nameme Mbimbiliya yamukwasele alikele lwozi, oloni katengulwile mbunge yendi na bisinganyeka byendi. Mu ngila ikwabo, katengulwile bunu bwendi bwa mukati.
9 Nameme ngoco, uje ndolome kazeyele. (Visi 24:16) Bakulunu bamukwasele, co watwaleleleleho kulinga mwamubwa. Mu kwita kwa simbu, wapwile mukulunu mu cikungulukilo. Kutundaho, litangwa limo ku mangwezi mwakele ku Njubo ya Bumwene na bakulunu bakwabo, waliwanene na ceseko ca kulifwa na cije caliwanene naco myaka ya kunima. Co munalume umo wa kupenda washakele kupupaho mukulunu umo. Bika byalingile ndolome yetu? Wazembelekele uje munalume wa kupenda na kusimutwiya nendi mwamubwa, co wamusindikiiye ku njubo yendi. Bika byakwasele ndolome yetu alinge ngoco? Watengulwile mbunge yendi na bisinganyeka byendi. Ngeci, wapwile wa kwoloka na kulikehesa. Co wanene bumpau kuli Yehova.
10. Bika bitunapande kulinga mangana tutengulule bunu bwetu bwa mukati?
10 Munu kasa kutenguluka mu litangwa limo nambe kutenguluka kwa kujeneka kulingako bimo. Co lalo munu kasa kutenguluka mwafwa lika ya kupangela Yehova ha simbu yailaha. (2 Petu 1:5) Oloni simbu yoshe tunapande kulifwita. Tunapande kulinga mwoshe mutwasela mangana tutengulule bunu bwetu bwa mukati. Kuli byuma bya seho byasa kutukwasa tulinge ngoco. Tusimutwiyeniko ha byuma bimo.
BIKA BITUKWASA TUTENGULULE BIMBUNGE BYETU NA BISINGANYEKA BYETU?
11. Kulombela kutukwasa bati tutengulule bimbunge byetu na bisinganyeka byetu?
11 Cuma ca kulibanga cinapu kulombela. Tunapande kulomba ngwe mwalombele muka-kwimba ngwendi: “Yobe Njambi tanga mbunge ya kujela muli yange, co aka cizemo caciha cije kucesi kutenguluka muli yange.” (Myaso 51:10) Tunapande kumona seho ya kutenguluka, co tulombeni Yehova atukwase. Tuzibuka bati ngwetu Yehova atukwasa tutengulule bunu bwetu bwa mukati? Tuzibuka ngoco mwafwa ya majwi endekele Yehova kuli Baisalele ba bimbunge bya kuminina ba mu simbu ya Ezekiyele. Yehova wendekele ngwendi: “Njikabana bimbunge byabiha na mana amaha . . . co njikabana bimbunge bya kwononoka.” (Ezeki 11:19) Yehova wakwasele Baisalele, co netu atukwasa.
12-13. (a) Kwesekesa na Myaso 119:59, bika bitunapande kusinganyekesesa? (b) Bihula muka bimunapande kulihula?
12 Cuma ca mu cibali cinapu kusinganyekesesa. Omwo tutanda Lijwi lya Njambi ha litangwa na litangwa, tunapande kusinganyekesesa mangana tumone bisinganyeka na bifwa bitunapande kutundisa. (Tandeni Myaso 119:59; Heve 4:12; Yako 1:25) Tunapande kulilula mangana tumone indi tuli na bisinganyeka na bifwa bya muno mu kaye ka Satana. Tuzibukeni buzeye bwetu mangana tupangeleho.
13 Lihuleni ngweni: ‘Njili na cipululu mu mbunge yange ndi?’ (1 Petu 2:1) ‘Njikalimono kupwa wa seho mwafwa ya kukala na bimbongo byabingi, kulilongesa manene, nambe mwafwa ya kutunda ku mwela waubwa ndi?’ (Visi 16:5) ‘Njikamono baje kubesi na byuma binjili nabyo nambe banu ba bisemwa byeka ngwange bangoco ndi?’ (Yako 2:2-4) ‘Njazema byuma bya muno mu kaye ka Satana ndi?’ (1 Yowa 2:15-17) ‘Njazema byuma byabibi bya kulizima nabyo buli na bweho bwa lwozi ndi?’ (Myaso 97:10; 101:3; Amo 5:15) Bikumbululo byeni bimikwasa muzibuke hamunapande kupangela. Nga tutundisa bisinganyeka bije binakolo manene mu mbunge yetu, co tuzibisa Yehova kubwaha.—Myaso 19:14.
14. Bika bikwapwila kwa seho kwangula babusamba bababwa?
14 Cuma ca mu citatu cinapu kwangula babusamba bababwa. Kwakwasi manene kutembwinina banu batulikwatasana nabo. (Visi 13:20) Banu batukakala nabo ku bipangi nambe ku sikola basa kutulingisa tukale na bisinganyeka byazinda Yehova. Oloni twasa kuwana babusamba bababwa ku biwano byetu. Oku ku biwano kukekwo kubatushongangeya tulinge byuma byabibwa na kukala na cizemo.—Heve 10:24, 25.
KALENI NA LIKULAHELO LYA KUKANYAMA
15-16. Satana ashaka kutengulula bati bisinganyeka byetu?
15 Keti twibale ngwetu Satana ashaka kutengulula bisinganyeka byetu. Ali na kupangesa bilongesa byoshe byoshe mangana atungumune tuseze busunga butunalilongesa.
16 Satana acili na kwihula cihula cije cehwile Eva mu citungu ca Edeni. Satana wehwile ngwendi: “Kuma mwa busunga bene Njambi namileka ngwendi . . . ?” (Kusha 3:1) Muno mu kaye ka Satana bakatwihula bihula bije byasa kutulingisa tuuwasane. Bakehula ngwabo: ‘Kuma mwa busunga bene Njambi nabindika bulo bwa banu ba bushwamwa bumo ndi? Kuma mwa busunga bene Njambi nabindika cilika ca Kilisimasi na ca litangwa lya kusemuka ndi? Kuma mwa busunga bene Njambi yeni namibindika kumyaka maninga ndi? Kuma mwa busunga bene Njambi wa cizemo atonda ngwendi keti mulikwatasane na munu imwazema uje natundu mu cikungulukilo ndi?’
17. Bika bitunapande kulinga nga munu atwihula bihula bije bitulingisa tuuwasane ha byuma bitwakulahela? Co kwesekesa na Kolose 2:6, 7, bika bitunda mu kulinga ngoco?
17 Tunapande kutaba byuma bitwakulahela. Nga kutuwana bikumbululo ku bihula bije bitulingisa tuuwasane, co twasa kumona ngwetu hamo bitwakulahela keti bya busunga. Co likulahelo lyetu lizeya kamandondo kamandondo. Bika bitunapande kulinga? Lijwi lya Njambi ngwalyo tunapande kutengulula biyongola byetu mangana tuzibuke ngwetu cizango ca Njambi capwa cacibwa, ca kusungama, co lalo ca kulumbunuka. (Loma 12:2) Nga tulilongesa Mbimbiliya simbu yoshe, co tulimwena ngwetu biinendeka byapwa bya busunga. Kulinga ngoco kutukwasa tumone ngwetu mashiko a Yehova apwa amabwa. Co likulahelo lyetu likanyama ngeci mwa muti uje unashimbika mizi yawo mu libu.—Tandeni Kolose 2:6, 7.
18. Bika bitukwasa tutundise mana a Satana mu bimbunge byetu na mu bisinganyeka byetu?
18 Yetu babenya tunapande kukanyamesa likulahelo lyetu. Ngeci, tutwaleleleniho kutengulula bisinganyeka byetu na bimbunge byetu. Simbu yoshe lombeni sipilitu ya Yehova imikwase. Singanyekeseseni bimulilongesa na kwilula biyongola byeni na bimbunge byeni. Anguleni babusamba bababwa baje bamikwasa mukale na bisinganyeka byabibwa. Nga mulinga ngoco, co mubyanena Satana na kutundisa biyongola byoshe bije bilwisa mana a Njambi.—2 Koli 10:5.
MWASO 50 Tapelo Yaka ya Buineelo
^ par. 5 Kakangi tukalingi byuma bimo mwafwa ya buyoye bwetu bwa kunima, cisemwa cetu, nambe kulilongesa kwetu. Hamo bisinganyeka byabibi binatukobela manene, co tuli na kwonwa kubitundisa. Cino cilongesa citukwasa tutundise bisinganyeka byabibi bitunasa kukala nabyo.