CILONGESA 26
“Ilukeni Kuli Yange”
“Ilukeni kuli yange, co yange njikamitambula.”—MALA. 3:7.
MWASO 102 ‘Mutuse Babafokola’
BILI MUNO MU CILONGESA *
1. Yehova akazibi bati nga amona manga yendi ashangumuka kumupangela lalo?
NGWE mutunasimutwiiye mu cilongesa cinahu, Yehova napu ngwe kanyungi wamubwa uje azibuka kunyunga mwamubwa bimanga bendi. Co ali na kushakezeka bimanga bendi baje banazimbala. Yehova walekele Baisalele baje bazeyele ku sipilitu ngwendi: “Ilukeni kuli yange, co yange njikamitambula.” Tuzibuka ngwetu Yehova anga acitonda ngwendi banu bendi baje banazeye ku sipilitu beluke kuli ikeye, mwafwa nendeka ngwendi: “Kunjesi kutenguluka.” (Mala 3:6, 7) Yesu wendekele ngwendi Yehova na tungelo bakabwahelela nga bamona munu eluka kuli Yehova.—Luka 15:10, 32.
2. Bika bitusimutwiya muno cilongesa?
2 Muno mu cilongesa, tusimutwiya ha bisimo bitatu bya Yesu bije bitukwasa tuzibuke mutunapande kukwasela baje banazeye ku sipilitu. Tusimutwiya lalo ha bifwa bitatu bitunapande kukala nabyo mangana tubakwase beluke kuli Yehova. Co lalo tusimutwiya ha bubwa butundamo nga tulinga mwoshe mutwasela mangana tukwase baje banazeye ku sipilitu.
SHAKEZEKENI MBONGO IJE INAZIMBALA
3-4. Mwafwa bika uje munakazi ibanendeka ku Luka 15:8-10, walifwitile kushakezeka mbongo yendi ya siliba?
3 Tunapande kulifwita asina tuwana baje bashaka kwiluka kuli Yehova. Ku mukanda wa Luka, kuli cisimo catele Yesu. Watele cisimo ca munakazi uje wakele na kushakezeka mbongo yendi ya siliba ije yazimbalele. Eci cisimo cimwesa ngwaco uje munakazi walifwitile kushakezeka ije mbongo.—Tandeni Luka 15:8-10.
4 Uje munakazi wasinganyekele ngwendi mbongo yendi yawililile hasi. Ngeci, washwamekele ndeya yendi na kushangumuka kuitonda-tonda, oloni kaiwanene. Hamo ije ndeya kuyakele na kushukuma manene, mukemwo kawanene ije mbongo ya siliba. Ngeci, wakombele mu njubo mwoshe, co waiwanene ha mazilo akombele. Yesu wendekele mwalizibilile uje munakazi mwawanene mbongo yendi ya seho ije yazimbalele. Wendekele ngwendi uje munakazi wabwahelelele manene, co wasanene babusamba bendi na baje batungile nabo mangana bakubwahelele hamo nendi. Mu simbu ya Yesu, banakazi bamo mu Isalele bakele na kwana bana babo ba banakazi bimbongo 10 bya siliba ha litangwa lya bulo bwabo. Hamo uje munakazi bamwanene ije mbongo ha litangwa lya bulo bwendi, mukemwo yapwile ya seho manene kuli ikeye.
5. Mwafwa bika kwasa kupwa kwakukalu kuwana baje banecela kulikwatasana na cikungulukilo?
5 Bika bitulilongesa ku cisimo ca Yesu? Tulilongesa ngwetu munu napande kulifwita asina awana cuma cinazimbala. Mu ngila imolika, netu tunapande kulifwita asina tuwana baje banecela kulikwatasana na cikungulukilo. Bamo kuneti myaka yaingi kutunda habecelelele kulikwatasana na cikungulukilo. Bakwabo hamo banajalukila kweka, co bandolome ba kuje kubanai kubabazibuka. Oloni twakulahela ngwetu bamo bashaka kwiluka kuli Yehova. Bashaka bashangumuke lalo kulikwatasana na bandolome na bandokazi mangana bapangele Yehova, oloni kubanga mubakwase.
6. Twasa kushakezeka bati baje banecela kulikwatasana na cikungulukilo?
6 Beya banapande kushakezeka baje banecela kulikwatasana na cikungulukilo? Tubaboshe. Babushoko bwabo, bakulunu ba cikungulukilo, bapainiya, na baka-kwambulula boshe banapande kukwata eci cipangi. Kuma kuli kabushoko keni nambe kabusamba keni uje necela kulikwatasana na cikungulukilo ndi? Kuma mwawanaho laja munu uje necela kulikwatasana na cikungulukilo ndi? Nga munu uje necela kulikwatasana na cikungulukilo amileka kwakala nambe amyana nambala ya foni yendi, co lekeni bakulunu.
7. Bika bitulilongesa kuli mukulunu umo wa lizina lya Thomas?
7 Bika bibanapande kulinga bakulunu mangana bawane baje bashaka kwiluka kuli Yehova? Tusimutwiyeni hali mukulunu umo wa ku Spain wa lizina lya Thomas. * Ou ndolome nakwasa banu ba kutubakana 40 beluke kuli Yehova. Wendekele ngwendi: “Njikehula bandolome na bandokazi indi bazibuka kubakala baje banecela kulikwatasana na cikungulukilo. Co lalo njikehula baka-kwambulula nga kuli munu ibazibuka uje necela kulikwatasana na cikungulukilo. Bwingi bwa bandolome na bandokazi bakabwahelela kunjileka binjikabehula, mwafwa bakalizibi ngwabo nabo bali na kupanga eci cipangi. Co, nga njinendela ndolome nambe ndokazi uje nazeye ku sipilitu, njikamwihula anjileke indi bana bendi nambe babushoko bwendi bacili na kupangela Yehova indi banalikele. Bisemi bamo bakele na kwija na bana babo ku biwano simbu kanda bazeye ku sipilitu. Hamo aba bana babo bapwile baka-kwambulula. Ngeci nabo tunapande kubakwasa beluke kuli Yehova.”
KWASENI BANA BA YEHOVA BAJE BANAZIMBALA BELUKE
8. Mu cisimo ca Yesu cije cili ku Luka 15:17-24, bika byalingile cisemi kuli munendi uje watengulukile?
8 Bifwa muka bitunapande kukala nabyo mangana tukwase baje bashaka kwiluka kuli Yehova? Tusimutwiyeni bitulilongesa ku cisimo catele Yesu ca mwana uje wazimbalele. (Tandeni Luka 15:17-24.) Yesu wendekele ngwendi uje mwana walilwile, co welukile kwimbo. Ishe mwamwene munendi eluka, wamusheshele, co wakamubumbateyeye. Mwalingile ngoco, wamwesele ngwendi wamuzema. Citakutaku ca uje mwana cakele na kumupaya, co walizibile ngwendi ishe kapandele kumutumbula ngwendi munange. Oloni ishe wamuzibilile mema ku mbunge omwo wakele na kumuleka mwakele na kulizibila. Co walingileko byuma bimo bije byalingisile munendi alizibe ngwendi banamutambula lalo mu naanga. Wabwahesele ciwano na kwana munendi bizalo byabibwa.
9. Bifwa muka bitunapande kukala nabyo mangana tukwase baje banazeye ku sipilitu beluke kuli Yehova? (Taleni cipalo ca “ Twasa Kukwasa Bati Baje Bashaka Kwiluka Kuli Yehova?”)
9 Yehova napu ngwe uje cisemi wa mu cisimo ca Yesu. Wazema bandolome na bandokazi betu baje banazeye ku sipilitu, co atonda ngwendi beluke kuli ikeye. Nga tutembwinina Yehova, co tubakwasa beluke kuli ikeye. Tunapande kukala na mbunge ya kubandamena na mema ku mbunge na cizemo. Mwafwa bika tunapande kukala nebi bifwa, co twasa kukala nabyo bati?
10. Bika bitwendekela ngwetu tunapande kukala na mbunge ya kubandamena asina tukwasa munu eluke kuli Yehova?
10 Tunapande kukala na mbunge ya kubandamena, mwafwa kuketi simbu yailaha asina munu eluka kuli Yehova. Bwingi bwa baje bazeyele ku sipilitu bali na kwendeka ngwabo bakulunu na baka-kwambulula bakele na kwilukila-ilukila kuli bakebo mukemwo baneluka kuli Yehova. Ndokazi Nancy wa ku Asia wendekele ngwendi: “Njakele na kabusamba wa ha mbunge mu cikungulukilo, co wanjikwasele manene. Wanjizemene ngwe njiyayendi. Wanjanukisile byuma bitwakele na kulikuwa kunima. Wakele na kunjitolilila mwamubwa munjakele na kumuleka byuma byakele ku mbunge yange, co lalo wakele na kunjinangula. Wapwile kabusamba wa busunga, co wakele na kunjikwasa simbu yoshe.”
11. Mwafwa bika tunapande kukala na mema ku mbunge nga tushaka kuzembeleka munu uje nalubala?
11 Kuzibila munu mema ku mbunge kunapu ngwe kumwaka bumbanda ha mbandu mangana azibeko bwino. Banu bamo banazeye ku sipilitu, mwafwa babalubalesele kuli ndolome nambe ndokazi. Nameme kuneti myaka yaingi kutunda hababalubaleselele, oloni anga bacinalubala. Kulubala kuli na kubonowesa kwiluka kuli Yehova. Bakwabo bali na kuliziba ngwabo babalingile mwamubi. Ngeci, kutondeka munu uje abatolilila na kubazibisisa. (Yako 1:19) María uje wazeyele ku sipilitu wendekele ngwendi: “Njalizibile ngwange kutondeka munu uje anjitolilila mwamubwa, anjizembeleka, anjinangula na kunjikwasa.”
12. Endekeni cakumwenako cije cimwesa ngwaco Yehova akakoko baje banazeye ku sipilitu na cizemo cendi.
12 Mbimbiliya imwesa ngwayo Yehova akatukokela kuli ikeye na cizemo cendi. Akalingi bati ngoco? Cakumwenako, lingeni ngwe munawila mubwina bwa kuloba manene. Co muli na kwonowa kutundamo. Mwasa kutundamo bati? Kubanga kukale munu amyana mukole na kumikokamo. Yehova walekele Baisalele baje balikelele kumupangela ngwendi: “Njabashwenyesele kuli yange na cizemo cange.” (Hozi 11:4) Njambi katengulukile. Wazema baje banalikele kumupangela baje bali na kulifwita na bukalu na bishoti. Banapu ngwe baje bali mu bwina bwa kuloba manene. Atonda ngwendi bamone ngwabo wabazema mangana abelwise kuli ikeye. Yehova asa kumipangesa mangana bamone ngwabo cili bene wabazema.
13. Endekeni cakumwenako cije cimwesa ngwaco cizemo casa kukwasa munu eluke kuli Yehova.
13 Tunapande kukwasa baje banazeye ku sipilitu bamone ngwabo Yehova wabazema, co lalo netu twabazema. Pablo itunasimutwiya mu cilongesa cinahu wazeyele ku sipilitu ha myaka 30. Wendekele ngwendi: “Litangwa limo mutondo, munjakele na kutunda ha njubo, njaliwanene na ndokazi wa kakulukazi uje wakele na ngozi, co wendekele nange mu cizemo. Njashangumukile kulila ngwe mwanike. Njamulekele ngwange casholoka ngwe Yehova ikeye nakutumu ngwendi wakwendeke nange. Co kutunda haje bene, njelukile kuli Yehova.”
KWASENI BAJE BANAZEYE
14. Kwesekesa na Luka 15:4, 5, bika byalingile kanyungi mwawanene uje manga wazimbalele?
14 Tunapande kutwalelelaho kukwasa baje banazeye ku sipilitu. Ngwe mwa uje mwana wa mu cisimo catele Yesu, nabo citakutaku cabo cinasa kubapaya. Co lalo hamo byuma bibanaliwana nabyo muno mu kaye ka Satana binabazeyesa ku sipilitu. Ngeci, tunapande kubakwasa bakanyamese likulahelo lyabo kuli Yehova. Yesu mwatele cisimo ca manga wa kuzimbala, wendekele ngwendi kanyungi wambatele uje manga ha citsili cendi na kumwilwisa ha butanga. Uje kanyungi wapangele na nzili asina awane uje manga. Nameme wajukile, oloni wamwene ngwendi napande kutwala uje manga ha butanga, mwafwa uje manga wazeyele, co kasele kwiluka likalyendi.—Tandeni Luka 15:4, 5.
15. Twasa kukwasa bati baje banazeye ku sipilitu baje bashaka kwiluka kuli Yehova? (Taleni cipalo ca “ Cikwata Cije Cinakwasa Manene.”)
15 Tunapande kupanga na nzili mangana tukwase baje banazeye ku sipilitu bahyane bukalu buje buli na kubonowesa kupangela Yehova. Nga tulomba sipilitu ya Yehova na kupangesa Mbimbiliya na mabulu etu, co tubakwasa bakanyamese busamba bwabo na Yehova. (Loma 15:1) Twasa kubakwasa bati? Mukulunu umo wendekele ngwendi: “Bwingi bwa baje bashaka kupangela lalo Yehova, banapande kulilongesa lalo Mbimbiliya.” * Ngeci, nga bakulunu bamilomba ngwabo mulilongese na munu uje nazeye ku sipilitu, co tambuleni oco cipangi. Ou mukulunu wendekele lalo ngwendi: “Muka-kwambulula uje alilongesa na munu uje nazeye ku sipilitu, napande kupwa kabusamba wamubwa asina asa kumuleka byuma byoshe bili ku mbunge yendi.”
KULI KUBWAHELELA MWILU NA HASI
16. Tuzibuka bati ngwetu tungelo bali na kutukwasa?
16 Mizimbu yaingi itunatambula imwesa ngwayo cili bene tungelo bali na kutukwasa tuwane baje banazeye ku sipilitu. (Kujo 14:6) Cakumwenako, Silvio wa ku Ecuador walombelele kuli Yehova ngwendi eluke kuli ikeye. Mwakele na kulombela, bakulunu babali batotele ha cikolo cendi. Baje bakulunu bamulekele byuma byapandele kulinga.
17. Tuliziba bati nga tukwasa banu baje banazeye ku sipilitu beluke kuli Yehova?
17 Nga tukwasa baje banazeye ku sipilitu beluke kuli Yehova, co tubwahelela manene. Salvador uje wapwa painiya, akaka manene mbunge kuli baje banazeye ku sipilitu. Wendekele ngwendi: “Bisimbu bimo njikalili mwafwa ya kubwahelela. Njikabwahelela manene kupangela hamo na Yehova mu kukwasa bimanga bendi batunde mu kaye ka Satana na kwiluka kuli Yehova.”—Vili 20:35.
18. Bika bimunapande kuzibuka nga munazeye ku sipilitu?
18 Nga munazeye ku sipilitu, zibukeni ngweni Yehova anga wamizema. Ashaka ngwendi mwiluke kuli ikeye. Ngeci, munapande kulingako bimo asina mwiluka. Cisemi wa mu cisimo ca Yesu watambwile mwamubwa munendi. Yehova nendi nalibwaheselela kumitambula mwamubwa nga mwiluka kuli ikeye.
MWASO 103 Balisana—Limpo Zeli Batu
^ par. 5 Yehova atonda baje banecela kukunguluka na kwambulula beluke kuli ikeye. Kuli byuma byabingi bitunapande kulinga mangana tubakwase beluke kuli Yehova. Nabalanya ngwendi: “Ilukeni kuli yange.” Muno mu cilongesa, tusimutwiya byuma bitunapande kulinga mangana tubakwase beluke kuli Yehova.
^ par. 7 Mazina amo banawatengulula.
^ par. 15 Bamo bali na kulilongesa mitamba imo mu libulu lya Twaleleleniho Kuzema Njambi, bakwabo bali na kulilongesa macapita amo a mu libulu lya Mu Sutelele ku Jehova. Komiti ya Bipangi bya Cikungulukilo ikeyo yangula munu uje ibamona ngwabo asa kulilongesa mwamubwa na munu uje nazeye ku sipilitu.
^ par. 68 KULUMBUNUNA BIKUPULO: Bandolome batatu bali na kukwasa ndolome uje ashaka kwiluka kuli Yehova. Bali na kusimutwiya nendi simbu yoshe na kumuleka ngwabo bamuzema, co lalo bali na kumutolilila mwamubwa.
