“Mutwakele na kulicokota na mushoniange, njamukwatele ha milibu ngwange njimutsiye.”—Paul.

“Njakele na kulubala bwasi nameme ha byuma byabindondo. Co njakele na kutsiyanga byuma bya mu njubo nambe cuma coshe-coshe cinjakele na kuwana hayehi.”—Marco.

Hamo yetu kutwasa kulinga ngoco. Oloni tubaboshe kukatukaluwila kukwata mbunge ha bisimbu bimo. Tukalingi ngoco, mwafwa twatambula bubi kuli Adama. (Loma 5:12) Bamo bakalubala bwasi ngwe Paul na Marco. Bakwabo bakonowa kulikela kusinganyeka byuma byabibi. Bakasinganyeka manene byuma bije binabazibisa lyoba nambe bije binabazeyesa. Beka bakonowa kubyana kulinga bukwizi, kunwa manene bwala nambe kupangesa bumbanda mwamubi.

Baje bonowa kukwata mbunge, baliwana na bukalu bwakama. Oloni twasa kulinyungilila oku ku bukalu. Twasa kulinyungililako bati? Twasa kulinga ngoco nga tukwata mbunge. Tusimutwiya ha bihula bino bitatu. (1) Kukwata mbunge kwapwa kulinga bati? (2) Bika kwapwila kwa seho? (3) Twasa kukala bati neci cifwa cije capwa ‘bushuka bwa sipilitu’? (Ngala 5:22, 23) Tusimutwiya lalo bitunapande kulinga nga twonowa kukwata mbunge ha bisimbu bimo.

Munu uje akakwata mbunge kesi kulinga byuma byoshe biimuleka mbunge yendi. Oloni akakwata mbunge mangana keti endeke nambe kulinga byuma bije kashakele Njambi.

Yesu wakele na kukwata mbunge. Mbimbiliya ngwayo: “Omwo bamushawile, kelwisile lalo bituka, omwo wayandele, ikeye kalishungwiiye, oloni wakele [likulahelo lyendi] muli Njambi lyako wa busunga.” (1 Petu 2:23) Yesu wakwatele mbunge omwo bitozi bendi bakele na kumushaula mwakele ha citi ca kuyandesela. (Mateo 27:39-44) Co lalo wakwatele mbunge omwo bantwama ba bulombelo bakele na kumupakesa na bihula mangana bamuwane na mulonga. (Mateo 22:15-22) Kutundaho, wakwatele lalo mbunge omwo Bayunda bamo bakele na kumwashanga mamanya. Kabalingile mwamubi oloni walishwekele, co watundile mu tembele.—Yowa 8:57-59.

Kuma twasa kutembwinina Yesu ndi? Eyo. Kapositolo Petulu wendekele ngwendi: “Kilistu babenya wamiyandelele, co namisezela cimweso, ngeci mukabangeye mu myanja yendi.” (1 Petu 2:21) Nameme kutwalumbunukile, oloni twasa kutembwinina Yesu uje wakwatele mbunge. Bika kwapwila kwa seho kukwata mbunge?

Tunapande kukwata mbunge asina tuzibisa Yehova kubwaha. Nameme tunapangela Yehova ha simbu yailaha, twasa kutsiya busamba bwetu na Yehova nga kutukwata mbunge mu byuma bitwendeka nebi bitulinga.

Tusimutwiyeni hali Mosesa uje “wapwile munu wa kulikehesa kutubakana banu boshe hano hasi” ha simbu ije. (Kula 12:3) Mosesa wakwatele mbunge ha simbu yailaha omwo Baisalele bakele na kumutatokesa. Oloni litangwa limo wonowele kukwata mbunge. Walubalele omwo Baisalele bamutatokelele ngwabo batonda mema. Co wabatenukilile ngwendi: “Tolilileni, yeni baka-kutengulukila Shukulu Kalunga. Kuma tunapande tumituhwisile mema mu limanya eli ndi?”—Kula 20:2-11.

Mosesa wonowele kukwata mbunge. Kasingimikile Yehova uje walingile cikomokeso ca kutuhula mema mu limanya. (Myaso 106:32, 33) Ngeci, Yehova kamutabesele akobele mu Lifuti lya Cikulaheso. (Kula 20:12) Hamo Mosesa walibeyele kweta na ha kutsa kwendi ngwendi ngwe kalubalele.—Kwitu 3:23-27.

Bika bitulilongesako? Nameme tunapangela Yehova ha simbu yailaha, kutwapandele kwendeka mwamubi baje banatulubalesa nambe baje batushaka kunangula. (Efeso 4:32; Kolo 3:12) Kwasa kutupwila kwakukalu kukwata mbunge ha bisimbu bimo omwo tuya na kukulubala. Oloni tunapande kwanuka byuma byalingiwile kuli Mosesa. Kutushaka kutsiya busamba bwetu na Yehova mwafwa ya kujeneka kukwata mbunge. Twasa kukala bati neci cifwa ca seho?

Lombeni sipilitu ya kujela. Mwafwa bika? Mwafwa kukwata mbunge kwapwa bushuka bwa sipilitu, co Yehova akana sipilitu yendi ku banu boshe baje bamulombayo. (Luka 11:13) Eyi sipilitu ya Yehova itukwasa tukwate mbunge. (Fili 4:13) Co lalo yasa kutukwasa tukale na bifwa bikwabo bya bushuka bwa sipilitu byakufwa ngwe cizemo. Co cizemo citukwasa tukwate mbunge.—1 Koli 13:5.

Keti mulinge byuma bije bimyonowesa kukwata mbunge. Cakumwenako, keti muye ha mawebusaiti aje amwesa byuma byabibi nambe kulizima buli na byuma byabibi. (Efeso 5:3, 4) Co lalo tunapande kubyana byuma byoshe bije bitushongangeya kulinga byuma byabibi. (Visi 22:3; 1 Koli 6:12) Cakumwenako, munu uje ashaka kulikela bukwizi kapandele kutanda mabulu nambe kuyongola mafilimu aje akatula mashungu a kulilala.

 Kwasa kutukaluwila kupangesa eci cinangulo. Oloni nga tulinga mwoshe mutwasela kubyana byuma byabibi, co Yehova atwana nzili ya kukwata mbunge yetu. (2 Petu 1:5-8) Atukwasa tubyane bisinganyeka byabibi na kutukwasa tukwate mbunge mu byuma bitwendeka nebi bitulinga. Cakumwenako, Yehova nakwasa Paul na Marco batunabanga kwendeka, balilongesele kukwata mbunge. Tusimutwiyeni hali ndolome uje wakele na kulubala bwasi mwakele na kwendesa mota. Ou ndolome wakele na kulicokota na bakwabo baka-kwendesa bimota. Bika byamukwasele akwate mbunge? Wendekele ngwendi: “Njakele na kulombela manene ha litangwa na litangwa. Co lalo njakele na kutanda biñanda bije byendeka bya kukwata mbunge. Njakele na kukwata bisoneka bimo mu mutwe. Njinalingi ngoco ha myaka yaingi, oloni ha litangwa na litangwa njinalyakela cilengo ca kujeneka kulubala. Co lalo kunjesi kushaka kukotokela mangana keti njilinge byuma mu kushatozoka.”

Bisimbu bimo, twasa kwonowa kukwata mbunge, co twasa kuziba shwamwa kulombela kuli Yehova. Oloni oyo ikeyo simbu itunapande kulombela manene. Lombeleni kuli Yehova oho bene. Mulombeni amikonekele, co lalo amikwase mangana keti mwilukile kulinga byuma byakulifwa. (Myaso 51:9-11) Yehova kabyana kutolilila ku lilombelo lyeni nga mumulomba ngweni amikonekele. (Myaso 102:17) Kapositolo Yowano wasonekele ngwendi maninga a Muna Njambi “atujelesa ku bubi bwoshe.” (1 Yowa 1:7; 2:1; Myaso 86:5) Yehova naleke bangamba bendi ngwendi balisambese umo na mukwabo simbu yoshe. Ngeci, twakulahela ngwetu bije byanalekele bangamba bendi, nendi bikebyo byalinga.—Mateo 18:21, 22; Kolo 3:13.

Yehova wazibilie kubihya ku mbunge omwo Mosesa wonowele kukwata mbunge. Oloni wamukonekelele. Co lalo Mbimbiliya inendeka hali Mosesa ngwayo wakele na likulahelo lya kukanyama. (Kwitu 34:10; Heve 11:24-28) Yehova katabesele Mosesa akobele mu Lifuti lya Cikulaheso. Oloni akamusangula mangana akayoye myaka yoshe mu Paladaisi hano hasi. Netu twasa kukala mu Paladaisi nga tutwalelelaho kukwata mbunge.—1 Koli 9:25.