Tubaboshe tuzibuka ngwetu Yehova ikeye ali na kututwamenena na kutwana byakulya bya ku sipilitu muno mu “matangwa a kukotoka.” (2 Tima 3:1) Oloni munu na munu napande kulyangwila kwononoka Yehova. Tunapu ngwe Baisalele ha simbu ibakele mu mambo. Baisalele bapandele kulingako byuma bimo mubakele na kuziba cilumo ca lupembo.

Yehova walekele Mosesa ngwendi afule mapembo abali a siliba “akusanesa mbunga hamolika na kujalwisa cilombo.” (Kula 10:2) Tupilistu bakele na kutengulula-tengulula ku ohyesi ya lupembo. Co ohyesi na ohyesi yakwasele banu bazibuke bibapandele kulinga. (Kula 10:3-8) Ano matangwa, banu ba Njambi bali na kubanangula mu bingila bya kuliseza-seza. Muno mu cilongesa, tusimutwiya bingila bitatu byali na kupangesa Yehova mu kutunangula, co tubyesekesa ku kwohya kwa mapembo a mu simbu ya Baisalele. Ebi bingila binapu biwano byakama, masikola a bakulunu na kutenguluka kwa byuma bya mu munga.

Tupilistu bakele na kwohyesa mapembo oshe abali nga Yehova atonda ngwendi “mbunga yoshe” ikaliwane ku cikolo ca ku ngangela ca tenti ya kukungulukila. (Kula 10:3) Tenti ya kukungulukila yakele hakati ka bilombo biwana bya Baisalele. Co aje mapembo muwakele na kwohya, boshe bakele na kuwaziba. Baje bakele hayehi na tenti ya kukungulukila, hamo bakele na kweta bwasi. Oloni baje bakele kulako bakele na kwenda nunda yailaha asina bete ha tenti ya kukungulukila. Nameme bakele kuyehi nambe kulako, Yehova watondele ngwendi boshe bakakunguluke mangana bakawane bukwasi.

Ano matangwa, kutwesi kuya ku tenti ya kukungulukila, oloni bakatuleke ngwabo tuye ku biwano bya mutambela na biwano bikwabo. Oku ku biwano kukekwo kutuli na kutambwila mashiko na binangulo. Bangamba ba Yehova mu kaye koshe bakalikuwu biwano bya kulifwa. Ngeci, boshe baje bakai oku ku biwano, bakalikwatasana, co bakabwahelela. Bamo bakatundu kulako, bakwabo hayehi, oloni boshe bakawana bukwasi bwakama.

Kuma bandolome na bandokazi baje bakala ku makolokolo nabo basa kuwana bukwasi ku biwano byakama ndi? Eyo, mwafwa ano matangwa kuli makina aje ali na kukwasa baje bali ku makolokolo batolilile ku biwano byakama, co bakalizibi ngwe bali ku ciwano. Cakumwenako, muka-kwimanena cikota ca Bakaleho ba Yehova wendelele munango wa Benin. Baka-munango bapangesele makina mangana bakwase bandolome ba ku Arlit batolilile ku ciwano ca mungenzi. Mbongi ya Arlit yakala mu mambo ya Sahara mu lifuti lya Niger. Baje bandolome na bandokazi na baka-bimbunge byabibwa  bapwile 21. Nameme bakele kulako, oloni balizibile ngwe bakele hamo na banu ba kupwa 44,131, baje bakungulukile kuje ku ciwano. Ndolome umo wasonekele ngwendi: “Twakandelela manene, mwafwa mwatukwasa kutolilila ku ciwano coshe. Twalimwena ngwetu mwatuzema manene.”

Kapilistu mwakele na kwohyesa lupembo lumo, “bantwama na bakulunu ba bikota bya Baisalele,” bakebo lika bakele na kukunguluka. (Kula 10:4) Co Mosesa wakele na kubalongesa na kubana mashiko. Oku kwabakwasele batwamenene mwamubwa miyati yabo. Ngwe mwapwile umo wa baje bantwama, kuma ngwe kumwakele na kulinga mwoshe mumwaselele mangana mukawane bukwasi ku ciwano ndi?

Ano matangwa, bakulunu ba mu cikungulukilo, kubapwile “bantwama,” co lalo kubesi na kuswana butanga bwa Njambi buje bubali na kunyunga. (1 Petu 5:1-3) Oloni bashaka kunyunga mwamubwa butanga bwa Njambi. Ngeci, bakai ku Sikola ya Cipangi ca Bumwene na ku masikola akwabo kuje kubakabasana ngwabo bakabalongese. Bakabalongesa mwakupangela mwamubwa bipangi bya mu cikungulukilo. Ebi bilongesa bili na kukwasa bakulunu na baka-kwambulula bakanyamese busamba bwabo na Yehova. Nameme kumwaile oku masikola, oloni neni muwana bukwasi mwafwa baje banaileko bali na kupangesa bibanalilongesa mu kukwasa cikungulukilo.

Bisimbu bimo, tupilistu bakele na kutengulula-tengulula ku cilumo ca mapembo. Ije ohyesi yakwasele banu bazibuke ngwabo Yehova nabaleke ngwendi bajaluke. (Kula 10:5, 6) Mubakele na kujaluka bakele na kwenda mu bibunga. Oloni kujaluka kukwapwile kwakwasi. Bisimbu bimo, bamo kubashakele kujaluka. Mwafwa bika?

Hamo bakele na kuliziba ngwabo kujalozoka cinahyanamo, co lalo ngwabo bakele na kubakasumuna. “Bisimbu bimo lishelwa lyakeleho kutunda ku cingwezi na kweta ku mutondo.” Co ha bisimbu bikwabo ‘lyakeleho matangwa abali nambe ngonde nambe kutubakana.’ (Kula 9:21, 22) Baisalele bajalozokele lungahi? Mukanda wa Kulava capita 33, unatumbula mitambela ya kupwa 40 haje habatulilile Baisalele.

Bisimbu bimo, bakele na kutulila ha mutamba haje hakele minzinze. Bakele na kuziba kubwaha kuwana munzinze mu “mambo yakama ya kutewesa.” (Kwitu 1:19) Co mubakele na kuziba ngwabo bajaluka, hamo bakele na kusinganyeka ngwabo kubakawana lalo munzinze.

Baisalele kubakele na kukatuka boshe ha simbu imolika, oloni bakele na kukatuka mu bibunga. Ngeci, bamo kwabakaluwilile kubandamena simbu yabo ya kukatuka. Boshe bakele na kuzibila hamo cilumo ca lupembo, oloni kubakele na kukatuka ha simbu imolika. Cilumo ca mapembo ca kulibanga, camwesele ngwaco muyati wa Yunda, Isakale na Zembuloni baje batulilile ku ngangela bapandele kukatuka. (Kula 2:3-7; 10:5, 6) Nga cije cibunga cinai, co tupilistu bohyesa lalo mapembo, kumwesa ngwabo miyati itatu ije yatulilile ku mbwela inapande kukatuka. Tupilistu batwaleleleho kulinga ngoco kweta noho banu boshe banajaluka.

Hamo kuli na kumikaluwila kuzibisisa mubili na kutengulukila byuma mu munga ya Njambi. Indi hamo muli na kuliziba ngweni kutenguluka kwa byuma mu munga ya Njambi kunahyanesamo. Co lalo hamo kuli byuma bimo bimwazemene, co kumwashakele ngweni bitenguluke. Co hamo kwamikaluwilile kwononoka omwo byuma byatengulukile. Oloni nga twononoka omwo byuma bitenguluka, co tulimwena bibezikiso bya Yehova.

Mu simbu ya Mosesa, Yehova watwamenene banu babangi mu mambo. Hakati ka baje banu, hakele banalume na banakazi na banike. Ngwe Yehova kabatwamenenene na kubanyungilila, ngwe kubasele kwita muje mu mambo. Ano matangwa, Yehova ali na kututwamenena mukemwo tunapu babusamba bendi. Ngeci, tubaboshe twononokeni omwo tuziba cilumo ca lupembo ngwe mubalingile Baisalele ba kulongwa.