Paulu wasonekele ngwendi “Njatsile ku mashiko kwitila mu mashiko mangana njiyoye kuli Njambi.”—Ngala 2:19, NWT.

Awa majwi asonekele Paulu analitombola na simpi yakama yashakele ngwendi baka-Kilistu ba mu bikungulukilo bya mu pulovinsi ya Ngalatiya mu lifuti lya Loma bazibisise. Baka-Kilistu bamo bashangumukile kungumuka na bilongesa bya makuli. Banu bamo bakele na kulongesa ngwabo munu wapandele kwononoka Mashiko a Mosesa, maneneni lishiko lya kutuhuka asinoni akoboke. Oloni Paulu wazibukile ngwendi Njambi wasele kwobola nameme baka-kukulahela baje kubatuhukile. Paulu wakwasele bandolome na bandokazi bazibisise ngwabo ebi bilongesa byapwile bya makuli na kubakwasa bakulahele manene ndando ya kupatula ya Yesu Kilistu.—Ngala 2:4; 5:2.

Mbimbiliya imwesa ngwayo nga munu natsi, byahi byazibuka, co byuma bilingiwa mu kaye kubimukundama. (Kwambu 9:5) Ngeci, omwo Paulu wendekele ngwendi: “Njatsile ku mashiko,” walumbunwine ngwendi kakele mwisi ya Lishiko lya Mosesa. Oloni Paulu wazibukile ngwendi wakele na ‘kuyoya kuli Njambi’ mwafwa wakele na likulahelo mu ndando ya kupatula.

Mashiko a Mosesa akewo alingisile Paulu akulahele ndando ya kupatula. Mu ngila muka? Paulu wendekele ngwendi: ‘Munu apwa muka-busunga ku mesho a Njambi ha kukulahela kuli Yesu Kilistu, kesi mu kwononoka lika Mashiko.’ (Ngala 2:16) Nameme ngoco, mashiko akwasele manene banu. Paulu walekele baka-Kilistu ba mu Ngalatiya ngwendi: ‘Bawabwezeleleleko mangana bubi busholoke, kweta noho hakezila mutekulwila wa Abilahama, co ikeye ibalingilile cikulaheso.’ (Ngala 3:19) Cili bene, Mashiko amwesele ngwawo banu kubalumbunukile, co kubasele kukabangeya Mashiko mu kulumbunuka. Ngeci, kwatondekele mulambu wa kulumbunuka uje ubapatula ku bubi. Mashiko atwamenenene banu kuli Kilistu uje wapwa “mutekulwila wa Abilahama.” Co nga munu akulahela Yesu Kilistu apwa muka-busunga ku mesho a Njambi. (Ngala 3:24) Paulu wapwile muka-busunga ku mesho a Njambi mwafwa Mashiko amukwasele akulahele Yesu. Co, Paulu ‘watsile ku mashiko’ na ‘kuyoya kuli Njambi’ mwafwa Mashiko kuakele na nzili hali ikeye, oloni Njambi ikeye wakele na nzili hali Paulu.

Paulu wendekele simpi ya kulifwa omwo wasonekelele baka-Loma mukanda. Wendekele ngwendi: ‘Neni lalo cifwa cimo bakwetu. Munatsi omwo munapu bilyo bya mubila wa Kilistu. Tunapatuka ku Lishiko, omwo twatsile ku cije catupwisile binzinda.’ (Loma 7:4, 6) Majwi a Paulu ali oku ku mukanda na ku mukanda wa Ngalatiya 2:19, kualumbununa munu uje watsile mwafwa ya kupokola Mashiko, oloni wendekele bya kupatuka. Ikeye na bakwabo baka-Kilistu baje bakulahelele ndando ya kupatula ya Kilistu bapatukile ku Mashiko.