CILONGESA 25
MWASO 7 Yehova Ikeye Nzili Yetu
Anukeni Ngweni Yehova Wapwa ‘Njambi wa Kuyoya’
“Yehova ali na kuyoya!”—SAMU 18:46.
BILI MUNO MU CILONGESA
Tubezika manene nga twanuka ngwetu Njambi ituli na kulemesa wapwa “Njambi wa kuyoya.”
1. Bika bili na kukwasa bangamba ba Yehova batwaleleleho kumulemesa nameme bali na kuliwana na bukalu?
MBIMBILIYA inendeka ngwayo tuli na kuyoya “mu matangwa a mamaneselelo.” (2 Timo 3:1) Tuli na kuliwana na tuyando tubali na kuliwana natwo banu boshe, co lalo banu bakatushendumuna na kutuyandesa mwafwa ya kulemesa Yehova. Bika bikatukwasa tutwaleleleho kulemesa Yehova nameme tuli na kuliwana na tuyando? Cuma cimo cikatukwasa inapu kuzibuka ngwetu tuli na kupangela Yehova uje wapwa ‘Njambi wa kuyoya.’—Njele 10:10; 2 Timo 1:12.
2. Yehova wapwa bati Njambi wa kuyoya?
2 Yehova watwaka mbunge, akamono bukalu bwetu bwoshe, co ashaka kutukwasa. (2 Mizi 16:9; Samu 23:4) Kwanuka ngwetu Yehova wapwa Njambi wa kuyoya, co nalibwahesela kutukwasa kutulingisa tukolese nga twaliwana na bukalu. Tumoneni muwalishulisilile awa majwi kuli Mwene Devidi.
3. Devidi walumbunwine bika mwendekele ngwendi “Yehova ali na kuyoya”?
3 Devidi wazibukile Yehova, co wamukulahelele. Bitozi bendi kwambateselela na Mwene Saulu mubashakele kumutsiya, Devidi walombele Yehova bukwasi. (Samu 18:6) Njambi mwakumbulwile malombelo endi na kumwobola, Devidi wendekele ngwendi: “Yehova ali na kuyoya.” (Samu 18:46) Devidi walumbunwine bika? Biñanda bimo bimwesa ngwabyo, Devidi mwendekele awa majwi wakulahelele manene Yehova. Wamumwene kupwa “njambi wa kuyoya, uje akakwasa bangamba bendi simbu yoshe.” Devidi wakulahelele ngwendi Njambi azibuka byuma byoshe byakele na kuliwana nabyo, co walibwaheselele kumukwasa. Kuzibuka ngoco kwamutakamesele na kumukwasa atwaleleleho kupangela Yehova.—Samu 18:28, 29, 49.
4. Bubwa muka butundamo nga tumona Yehova kupwa Njambi wa kuyoya?
4 Kukulahela ngwetu Yehova wapwa Njambi wa kuyoya kutukwasa tumupangele na ntwima. Kutukwasa lalo tutwaleleleho kukolesa mutuliwana na byeseko na kutwalelelaho kupwa ba kulongwa mu cipangi cendi. Kutundaho, tulinga mwoshe mutwasela kushwena kuyehi nendi.
NJAMBI WA KUYOYA AMIKOLESA
5. Bika byasa kutukwasa tukolese nga twaliwana na byeseko? (Filipu 4:13)
5 Tukolesa mu byeseko byoshe byabindondo nambe byakama nga twanuka ngwetu Yehova wapwa wa kuyoya, co ashaka kutukwasa. Kukwakele bukalu bwakama manene kuli Njambi. Wapwa Muka-nzili Yoshe, co asa kutwana nzili mangana tukolese. (Tandeni Filipu 4:13.) Kuzibuka ngoco kutukwasa nga tuliwana na byeseko. Kulimwena mwali na kutukwasela Yehova kuhyana bukalu bwabundondo, kutulingisa tukulahele ngwetu atukwasa nameme ha simbu ituliwana na bukalu bwakama.
6. Bika byaliwanene nabyo Devidi mwapwile mwanike bije byamukwasele akulahele manene Yehova?
6 Tusimutwiyeni ha byuma bibali byaliwanene nabyo Devidi bije byamulingisile akulahele manene Yehova. Mwapwile kanyungi wa mwanike, simbu imo mbeya na ndumba byambatele manga ya ishe. Ha bisimbu byoshe ebi bibali Devidi washekele baje tusitu, co wobwele baje bimanga. Oloni kasinganyekele ngwendi walingile ebi byuma mu nzili yendi. Wazibukile ngwendi Yehova ikeye wamwanene nzili. (1 Samwe 17:34-37) Devidi kebalele byuma byaliwanene nabyo. Kusinganyekesesa ha byuma byaliwanene nabyo kwamulingisile akulahele ngwendi, Njambi wa kuyoya akamukwasa kulutwe.
7. Kukala na biyongola byabibwa kwakwasele bati Devidi alwe na Goliati?
7 Mu kwita kwa simbu, Devidi mwapwile mwanike te kanda ete ha myaka 20 waile ku cilombo ca maswalale ba baIsalele. Wakawanene maswalele ba baIsalele banalijujukila mwafwa Kafilisitiya wa lizina lya Goliati wakele na ‘kusana mbunga ya maswalale ba baIsalele ku nzita.’ (1 Samwe 17:10, 11) Maswalale ba baIsalele balijujukilile mwafwa ya bukama bwa Goliati na byuma byakele na kubaleka. (1 Samwe 17:24, 25) Oloni Devidi ikeye wakele na kumona byuma mu ngila yeka. Devidi wazibukile ngwendi Goliati kakele na kashaula maswalele ba baIsalele, oloni wakele na kushaula “mbunga ya maswalale ba Njambi wa kuyoya.” (1 Samwe 17:26, MBB) Devidi wakele mbunge kuli Yehova. Wakulahelele ngwendi, Njambi yendi uje wamukwasele mwapwile kanyungi amukwasa lalo mu bukalu bwaliwanene nabo. Ngeci, Devidi walwisile Goliati na kumuhyana, mwafwa Yehova wamukwasele!—1 Samwe 17:45-51.
8. Bika bitulingisa tukulahele ngwetu Yehova atukwasa nga tuliwana na bukalu? (Taleni na cikupulo.)
8 Netu twasa kukolesa mu byeseko nga twanuka ngwetu Yehova Njambi wa kuyoya nalibwahesela kutukwasa. (Samu 118:6) Nga tusinganyekesesa ha byuma byanatulingila Njambi kunima, co likulahelo lyetu likanyama. Tandeni biñanda bya mu Mbimbiliya bije bimikwasa kumona mobwelelemo Yehova bangamba bendi kunima. (Isaya 37:17, 33-37) Tandeni na kuyongola lalo biñanda ha webusaiti yetu ya jw.org bije bimwesa omwo Yehova ali na kukwaselamo bandolome na bandokazi. Kutundaho, singanyekeseseni ha simbu yamikwasele Yehova. Hamo Yehova kamilingilile byuma bya kukomokesa bya kufwa ngwe kumyobola ku mbeya nambe ndumba. Nameme ngoco, Yehova namilingila byuma byabingi mu kuyoya kweni. Namilanya kupwa kabusamba kendi. (Iwano 6:44) Nameme ha simbu ino, mucili mu busunga mwafwa ikeye ali na kumikwasa. Ngeci, lombeni Yehova amikwase kwanuka simbu yakumbulwile malombelo eni, kumyana byuma mpundu bimwatondele ha simbu inapande nambe kuminyungilila mu mwakele mu bukalu. Kwanuka byuma bya cifweci kumikwasa mukulahele ngweni Yehova atwalelelaho kumikwsa.
Byuma bitulinga nga twaliwana mu byeseko binakundama mwakalizibila Yehova (Taleni palagirafu 8-9)
9. Bika bitunapande kwanuka nga twaliwana na byeseko? (Provebia 27:11)
9 Kumona Yehova ngwetu wapwa wa kuyoya kutukwasa tumone byeseko bituliwana nabyo mu ngila inapande. Mu ngila muka? Mwafwa kulinga ngoco kutukwasa tushangumuke kumona byeseko byetu mubinakundamena ñanda yakama ili mukati ka Yehova na Satana. Liyabolo ali na kwendeka ngwendi nga tuliwana na bukalu tulikela kupangela Yehova. (Yombi 1:10, 11; tandeni Provebia 27:11.) Oloni nga tupwa ba kulongwa kuli Yehova nameme tuli na kuliwana na byeseko tumwesa ngwetu twazema Yehova, co Liyabolo wapwa muka makuli. Kuma baka-fulumende bali na kumilwisa ndi? Kuma kumwesi na bimbongo ndi? Indi hamo banu bamukambulwila kubesi na kutambula muzimbu waubwa? Nambe hamo muli na kuliwana na byeseko byeka? Nga mukemwo, co anukeni ngweni nga mukolesa mu byeseko bimuli na kuliwana nabyo muzibisa Yehova kubwaha ku mbunge. Anukeni lalo ngweni, Yehova kasa kumyecelela muliwane na ceseko cije kumwasa kukolesela. (1 Kori 10:13) Amyana nzili mangana mukolese.
NJAMBI WA KUYOYA AMIBEZIKISA
10. Njambi akalingila bika baje bali na kumulemesa?
10 Yehova akabezikisa baje bali na kumulemesa. (Hebe 11:6) Akatwana kwoloka na byuma byoshe bitutonda, co lalo kulutwe akatwana kuyoya kwa myaka yoshe. Twakulahela ngwetu Yehova atubezikisa mwafwa ali na nzili na lishungu lya kulinga ngoco. Co kuzibuka ngoco kutulingisa tutwaleleleho kumupangela ngwe mubalingilile bangamba bendi kunima. Ebi bikebyo byalingile Timothi.—Hebe. 6:10-12.
11. Bika byashongangeyeye Timothi apange na nzili mu cikungulukilo? (1 Timothi 4:10)
11 Tandeni 1 Timothi 4:10. Timothi wakulahelele ngwendi Njambi amubezikisa. Ebi bikebyo byamulingisile apangele Yehova na nzili na kupangela bakwabo. Byuma muka byalingile? Kapositolo Paulu wamushongangeyeye abwezelele ku butongwe bwendi bwa kulongesa na kwendeka ku mbunga. Wamulekele lalo ngwendi amwese bakwabo baka-Kristu mwanja waubwa, banike hamolika na bakulunu. Co lalo bamwanene cipangi cacikalu ca kunangula mu cizemo baje batondele bukwasi. (1 Timo 4:11-16; 2 Timo 4:1-5) Simbu imo banu kubakele na kumona nambe kukandelela ku bipangi byakele na kulinga Timothi, oloni wazibukile ngwendi Yehova wakele na kumona bipangi byendi, co amubezikisa.—Loma 2:6, 7.
12. Mwafwa bika bakulunu bakatwalelelaho kupanga na nzili mu cikungulukilo? (Taleni na cikupulo.)
12 Bakulunu ano matangwa nabo banapande kukulahela ngwabo Yehova ali na kumona bipangi byabo byabibwa, co wabimona kupwa bya seho. Bakulunu bakanyungu butanga, kulongesa na kwambulula. Nameme ngoco bwingi bwabo bakalingi bipangi bikwabo bya kufwa ngwe kukwasa mu cipangi ca kutunga mitungo ya kulemesela nambe kukwasa nga kunasholoka bukalu bwa kulizila. Bamo bakapanga mu Cibunga ca Baka-kumenekela Babezi nambe mu Komiti ya Kulizibasana na Baka-cipatela. Bakulunu bazibuka ngwabo cikungulukilo capwa ca Yehova keti ca munu. Ngeci bakapanga na nzili mu cikungulukilo na kukulahela ngwabo Yehova ababezikisa mwafwa ya kulifwita kwabo.—Kolo 3:23, 24.
Njambi amibezikisa manene nga mulifwita kumupangela mu cikungulukilo (Taleni palagirafu 12-13)
13. Yehova akalizibi bati mutukalifwiti kulinga bipangi byendi?
13 Keti munu woshe asa kupwa mukulunu mu cikungulukilo. Oloni tubaboshe kuli bimo bitwasa kwana Yehova. Njambi abwahelela manene nga tulinga mutwasela mwoshe kumupangela. Akamono bwana bwetu butukana bwa mu kaye koshe nameme bunapu bwabundondo. Akabwahelela mwakatumono twimika liboko lyetu ku biwano mangana tukumbulule nameme tuli na kuziba shwamwa, co lalo akabwahelela mutukakonekela bakwetu nga banatubiisila. Nameme muliziba ngweni kumwasa kulinga byabingi ngwe mumutondela mu cipangi ca Yehova, kulaheleni ngweni akamono bipangi byeni byabibwa kupwa bya seho. Wamizema mwafwa ya bipangi byeni byabibwa, co amibezikisa.—Luka 21:1-4.
TWALELENIHO KUSHWENA MANENE KUYEHI NA NJAMBI
14. Kushwena manene kuyehi na Yehova kumikwasa bati mutwaleleleho kupwa ba kulongwa? (Taleni na cikupulo.)
14 Nga tukala na busamba bwa kukanyama na Yehova, co tutwalelelaho kupwa ba kulongwa kuli ikeye. Bikebyo byalingiwile kuli Jozefu. Wabyanene kulinga bupangala, mwafwa wamwene Yehova kupwa kabusamba kendi, co kashakele kumuzibisa kubabala ku mbunge. (Gene 39:9) Nga tushaka kukanyamesa busamba bwetu na Yehova, co tunapande kuwanako simbu ya kulombela kuli ikeye na kutanda Lijwi lyendi. Nga tulinga ngoco, busamba bwetu nendi bukanyama manene. Nga tukanyamesa busamba bwetu na Yehova ngwe mwalingilile Jozefu, co kutwasa kulinga byuma bije bimuzibisa kubabala ku mbunge.—Jems 4:8.
Kushwena kuyehi na Njambi kutukwasa tutwaleleleho kukanyamesa likulahelo lyetu (Taleni palagirafu 14-15)
15. Bika bitulilongesa ku byuma byalingiwile kuli baIsalele mubakele mu mambo? (Bahebelu 3:12)
15 Baje balikela kukulahela Yehova, basa kushangumuka kujeneka kupwa ba kulongwa kuli ikeye. Tusimutwiyeni byalingiwile kuli baIsalele mubakele mu mambo. Bazibukile ngwabo Yehova kwali, oloni bashangumukile kuuwasana ngwabo abana byuma bibatonda. Behwile ngwabo: “Kuma Shukulu Kalunga ali netu ndi?” (Kutu 17:2, 7, MBB) Ngeci, batengulukilile Njambi. Kutushaka kutembwinina mwanja wabo waubi.—Tandeni Bahebelu 3:12.
16. Bika byasa kweseka likulahelo lyetu?
16 Kano kaye kali na byuma byabingi bije bili na kulingisa kutupwile kwakukalu kushwena kuyehi na Yehova. Banu babangi bakabyana kukulahela ngwabo Njambi kwakala. Kakangi, baje kubesi kukabangeya binangulo bya Njambi bakamoneka ngwe bali na kulikuwa buyoye. Byuma bya cifweci binasa kweseka likulahelo lyetu. Nameme tuzibuka ngwetu Njambi kwakala, tunasa kushangumuka kuuwasana ngwetu kasa kutukwasa. Mukemwo mwalizibilile muka-kusoneka uje wasonekele mukanda wa Bisamu 73. Wakele na kumona banu baje kubakele na kukabangeya mashiko a Njambi oku balikuwa buyoye. Ngeci washangumukile kulihula ndi kwa seho kupangela Njambi.—Samu 73:11-13.
17. Bika byasa kutukwasa tutwaleleho kushwena kuyehi na Yehova?
17 Bika byakwasele muka-kwimba amone byuma mu ngila inapande? Wasinganyekesesele ha byuma binasa kulingiwa ku banu baje balikela kukulahela Yehova. (Samu 73:18, 19, 27) Wasinganyekesesele lalo ha bibezikiso byawana mwafwa ya kupangela Njambi. (Samu 73:24) Netu tunapande kusinganyekesesa mwanatubezikisila Yehova. Acisinganyekeni mubunesi kupwila buyoye bweni ngwe kumwesi na kupangela Yehova. Kusinganyekesesa ha bubwa bwa kupangela Yehova, kutukwasa tukale na likulahelo lya kukanyama. Co twasa kwendeka ngwe muka-kwimba uje wandekele ngwendi: “Oloni yange, kushwena kuyehi na Njambi cikeco cuma cacibwa kuli yange.”—Samu 73:28.
18. Mwafwa bika kutwapandele kulishoshomwena ha byuma bilingiwa kulutwe?
18 Twasa kukolesa mu byeseko byoshe bituliwana nabya mwafwa tuli na “kupangela Njambi wa kuyoya wa busunga.” (1 Tesa 1:9) Njambi watwaka mbunge, co atukwasa simbu yoshe. Wakwasele bangamba bendi kunima, ngeci netu atukwasa. Ololo tuliwana na kayando kakama kaje kanda tumoneho. Oloni kutwesi likalyetu, mwafwa Yehova ali netu. (Isaya 41:10) Ngeci “tupweni ba kusimpa na kwendeka ngwetu: ‘Yehova ikeye mukwasi wange, kunjizibi lyoba.’”—Hebe 13:5, 6.
MWASO 3 Watwana Nzili na Lilabelelo, Co Yobe Itwakulahela
