Tunapande kukala na likulahelo mangana tuzibise Yehova kubwaha. Oloni Mbimbiliya inendeka ngwayo “keti banu boshe bali na likulahelo.” (2 Tesa 3:2) Kapositolo Paulu mwakele na kwendeka awa majwi wakele na kulumbununa “bikelemi, baje banapu banu bababi” banu baje bakele na kumuyandesa. Oloni byuma byendekele kutalesa ku likulahelo binakundama banu babangi. Banu bamo kubashaka kukulahela ngwabo kwakala Ishamatanga. (Loma 1:20) Bamoco bakulahela ngwabo kwakala munu umo uje ali na nzili kubatubakana. Oloni kukala na likulahelo lya cifweci kukwapwilemo nga tushaka kuzibisa Yehova kubwaha.

Tunapande kukulahela ngwetu Yehova kwali, co ikeye muka-kwana cikandelela baje bali na likulahelo lya busunga. (Hebe 11:6) Likulahelo lyapwa cifwa ca bushaka bwa sipilitu ya kujela. Ngeci, tunapande kulomba Yehova mangana atwane sipilitu ya kujela. (Luka 11:9, 10, 13) Ngila yakama itwasa kutambwilamo sipilitu ya kujela inapu kutanda Mbimbiliya ije ibasonekele kwitila mu sipilitu ya Njambi. Kutundaho, tunapande kusinganyekesesa ha byuma bitutanda na kubipangesa. Nga tulinga ngoco, tutabesa sipilitu ya Yehova itukwase kuyoya mu ngila ije imwesa ngwayo tuli na likulahelo lya kukanyama.