CILONGESA 26
MWASO 8 Yehova Ikeye Butewelo Bwetu
Pwiseni Yehova Limanya Lyeni
‘Kukwesi limanya lya kulifwa ngwe Njambi yetu.’—1 SAMWE 2:2.
BILI MUNO MU CILONGESA
Tusimutwiya ha bifwa binalingisa Yehova apwe ngwe limanya, co tulilongesa mutwasa kumutembwinina.
1. Ngwe muumwesela mukanda wa Samu 18:46, Devidi nesekesa Yehova ku cuma muka?
TULI mu kaye muje mutwasa kuliwana na bukalu buje kutwasinganyekele buje bunasa kutengulula buyoye bwetu. Oloni twakandelelako manene mwafwa tuli na Yehova Njambi uje asa kutukwasa. Mu cilongesa cinahu, twalilongesele ngwetu Yehova wapwa Njambi wa kuyoya, co simbu yoshe nalibwaheseka kutukwasa. Bukwasi bwakatwana butulingisa tukulahele manene ngwetu “Yehova ali na kuyoya!” (Tandeni Samu 18:46.) Oloni munima ya kwendeka ngwendi Njambi ali na kuyoya, Devidi wesekesele Njambi ku cuma cije kucesi na kuyoya wendekele ngwendi “Limanya lyange.” Bika byalumbunwine?
2. Bika bitulilongesa ku majwi endekele Devidi mwendekele ngwendi Yehova wapwile ngwe ‘Limanya lyendi’?
2 Muno mu cilongesa, tusimutwiya binalingisa Yehova bamwesekese ku limanya na byuma bitulilongesa ku endekesi ya cifweci. Tulilongesa lalo bitunapande kulinga mangana tumone Yehova kupwa limanya lyetu. Kutundaho, tumusimutwiya mutwasa kutembwinina bifwa bya Yehova bije bibanesekesa ku limanya.
YEHOVA NAPU BATI NGWE LIMANYA?
3. Kakangi Mbimbiliya ikapangesa bati lijwi lya “limanya”? (Taleni cikupulo cili ha .)
3 Mbimbiliya ikapangesa lijwi lya “limanya” mangana itukwase kuzibisisa bifwa bimo byakala nabyo Yehova. Kakangi mu Mbimbiliya, bangamba ba Yehova mubakele na kumushangazala mwafwa ya bifwa byendi, bakele na kumwesekesa ku limanya. Yehova banamwendeka kupwa “limanya” lwakulibanga ku mukanda wa Kwituluka mu Mashiko 32:4. Mu lilombelo lyendi, Hana wendekele ngwendi ‘Kukwesi limanya lya kulifwa ngwe Njambi yetu.’ (1 Samwe 2:2) Hambakuke watumbwile Yehova ngwendi “Limanya lyange.” (Hamba 1:12, MBB) Muka-kusoneka uje wasonekele Samu 73 watumbwile Njambi ngwendi “limanya lya mbunge yange.” (Samu 73:26) Njambi nendi walyesekesele ikeye babenya ku limanya. (Isaya 44:8) Tusimutwiyeni ha bifwa bitatu byakala nabyo Yehova bije byapwa ngwe limanya, co tulilongesa mutwasa kumupwisila ‘Limanya lyetu.’—Kwitu 32:31.
Banu ba Njambi bamona Yehova kupwa ngwe limanya Lyabo lije libanyungilila (Taleni paragirafu 3)
4. Yehova wapwa bati butewelo bwetu? (Samu 94:22)
4 Yehova wapwa butewelo bwetu. Nga kuli na kunyoka nyozi yakama munu asa kubanda mu limanya mangana alinyungilile. Mu ngila imolika, Yehova nendi akatunyungilila ha simbu ya bukalu. (Tandeni Samu 94:22.) Akatukwasa tukanyamese busamba bwetu nendi, co lalo akatukwasa tukulahele ngwetu bukalu butuli na kuliwana nabwo kubwasa kutunyongesa ku myaka yoshe. Kutundaho, nakulahesa ngwendi kulutwe akamanesa bukalu bwoshe buje buli na kutunenela bishoti na tuyando.—Ezeki 34:25, 26.
5. Yehova asa kupwa bati Limanya lyetu kuje kutwasa kutewela?
5 Ngila imo mutwasa kupwisila Yehova Butewelo bwetu inapu, kulombela kuli ikeye. Nga tulombela, Yehova atwana “kwoloka kwa Njambi” kuje kunyungilila bimbunge byetu na bisinganyeka byetu. (Filp 4:6, 7) Tucisimutwiyeni ha byuma byaliwanene nabyo Artem, ndolome uje ibakutile mwafwa ya likulahelo lyendi. Mwakele mu kamenga muka-kwihozola bihula wamwihozwole bihula byabingi, wamuyandesele na kumujujwisa. Artem wendekele ngwendi, “Njazibile manene lyoba hoshe hakele na kunjihozwela bihula. Simbu yoshe njakele na kulombela kuli Yehova. Njamulombele anjikwase kukala mu kwoloka na kukala na mana. Nameme bakele na kunjipakesa, njatwaleleleho kuwa mbunge. Yehova wanjikwasele njilizibe ngwe njemanene kunima ya cibumbe ca mamanya cije cakele na kunjinyungilila.”
6. Mwafwa bika tunapande kukulahela Yehova simbu yoshe? (Isaya 26:3, 4)
6 Yehova wapwa wa kulongwa, co kakatuseze. Ngeci lika mwa limanya lyakama lije kulyasa kushwena, Yehova atwalelelaho kukala hamo netu. Twasa kumukulahela, mwafwa wapwa ‘limanya lyetu simbu yoshe.’ (Tandeni Isaya 26:3, 4.) Atwalelelaho kukalako, mangana ashulisilile bikulaheso byendi na kukumbulula malombelo etu na kutwalelelaho kutukwasa. Twasa kumukulahela simbu yoshe, mwafwa wapwa wa kulongwa kuli baje bamukulahela. (2 Samwe 22:26) Kebala bipangi byetu, co atubezikisa simbu yoshe.—Hebe 6:10; 11:6.
7. Bubwa muka butuwana nga tukulahela Yehova? (Taleni na cikupulo.)
7 Tumwesa ngwetu Yehova napu limanya lyetu nga tumukulahela na mbunge yetu yoshe. Twakulahela ngwetu nga tutwalelelaho kumwononoka nameme mu simbu yaikalu atubezikisa manene. (Isaya 48:17, 18) Kumona mwali na kutukwaselamo Yehova kutulingisa tumukulahele manene. Co tukulahela ngwetu ikeye lika asa kutukwasa tukolese mu byeseko bije bimoneka ngwe byabikalu. Ngeci, nga kusholoka bukalu buje banu kubasa kutukwasa, twasa kukulahela ngwetu Yehova atukwasa simbu yoshe. Vladimir ngwendi: “Simbu injakele mu kamenga ikeyo simbu injalizibile kushwena manene kuyehi na Yehova, njamukulahelele manene mwafwa njazibukile ngwange ikeye lika wasele kunjikwasa mu bukalu bunjaliwanene nabwo.”
Tupwisa Yehova Limanya lyetu nga tumukulahela na mbunge yetu yoshe (Taleni paragirafu 7)
8. (a) Mwafwa bika twendekela ngwetu Yehova kesi kutenguluka? (b) Bubwa muka butuwana nga tupwisa Yehova limanya lyetu? (Samu 62:6, 7)
8 Yehova kesi kutenguluka. Yehova kesi kutenguluka ngeci lika mwa limanya lyakama lije kulyesi kushwena. Mwakalingilamo byuma na cizango cendi kubyesi kutenguluka. (Mala 3:6) Adama na Eva mubamutengulukilile, Yehova katengulwile byuma byashakele kulingila banu. Mukemwo kapositolo Paulu wasonekele ngwendi Yehova, “kasa kulibyana ikeye babenya.” (2 Timo 2:13) Oku kulumbununa ngwabo nameme byuma bifwe bati, Yehova kasa kutengulula bifwa byendi, cizango cendi nambe mashiko endi. Kuzibuka ngwetu Yehova kesi kutenguluka kutukwasa tumukulahele nga twaliwana na bukalu na kukulahela ngwetu akashulisilila bikulaheso byendi.—Tandeni Samu 62:6, 7.
9. Bika bitulilongesa ku byuma byaliwanene nabyo Tatyana?
9 Nga tusinganyekesesa ha bifwa bya Yehova na byuma byanayongola kukatulingila hano hasi, co tumukulahela na kumupwisa limanya lyetu. Kupwisa Yehova limanya lyetu, kutukwasa mangana tutwaleleleho kukolesa na kuwa mbunge nameme tuliwana na byeseko. (Samu 16:8) Ebi bikebyo byakwasele ndokazi Tatyana uje ibakutilile mu njibo mwafwa ya likulahelo lyendi. Wendekele ngwendi: “Njakele likalyange. Kwanjikaluwilile manene kukala likalyange hakulibanga. Kakangi njakele na kuliziba kuzeya.” Nameme ngoco, washangumukile kusinganyekesesa hali Yehova na byuma byanayongola kukalingila banu kulutwe, kulinga ngoco kwamukwasele ananguke seho ya kutwalelelaho kukolesa. Co lalo kwamukwasele mangana awe mbunge na kutwalelelaho kupwa wa kulongwa kuli Yehova. Wendekele lalo ngwendi: “Kuzibuka ngwange banjikutile mwafwa ya likulahelo lyange kwanjilingisile njijeneke kwaka manene mbunge ku bukalu bwange.”
10. Yehova asa kupwa bati limanya lyetu ano matangwa?
10 Ololo tuliwana na bukalu bwakama manene kulutwe, ngeci tunapande kukakulahela manene Yehova kutubakana mutunamukulahelela ha simbu ino. Ino ikeyo simbu itunapande kukanyamesa manene likulahelo lyetu na kukulahela ngwetu, Yehova atukwasa mangana tukolese. Twasa kulinga bati ngoco? Tandeni mizimbu ya mu Mbimbiliya na byakuliwana nabyo bya bangamba ba Yehova ba mu simbu yetu. Co nangukeni omwo Yehova nakwaselamo bangamba bendi. Singanyekeseseni manene hali ei mizimbu. Kulinga ngoco, kumikwasa mupwise Yehova limanya lyeni.
TEMBWININENI BIFWA BYA YEHOVA BIJE KUBYESI KUTENGULUKA
11. Mwafwa bika tutonda kutembwinina bifwa bya Yehova bije kubyesi kutenguluka? (Taleni lalo cipalo ca “ Cilengo Cibanapande Kulyakela Bandolome ba Bakwenje.”)
11 Twasimutwiya ha bifwa bya Yehova bije bilingisa tumumone kupwa limanya lyetu. Tusimutwiyenioni mutwasa kutembwinina bifwa byendi bije kubyesi kutenguluka. Nga tulinga mutwasela mwoshe kutembwinina bifwa bya Yehova, co tukanyamesa bandolome na bandokazi betu. Cakumwenako, Yesu wanene Simoni lizina lya Kefasi (lije libananungula ngwabo, “Pita”) lije lilumbununa “Mbazubwila ya Limanya.” (Iwano 1:42) Yesu wakele na kulumbununa ngwendi Pita ashongangeya bakwabo mu cikungulukilo na kukanyamesa likulahelo lyabo. Bakulunu mu cikungulukilo banabesekesa ku “limanya lyakama lije lyana munzinze.” Oku kulumbununa ngwabo bakanyungilila baje bali mu cikungulukilo. (Isaya 32:2, MBB) Oloni tubaboshe twasa kulishongangeya umo na mukwabo nga tutembwinina bifwa bya Yehova bije kubyesi kutenguluka.—Efeso 5:1.
12. Twasa kukwasa bati bakwetu mu simbu ya bukalu?
12 Kwaseni bandolome na bandokazi beni mu simbu ya bukalu. Nga bandolome na bandokazi betu baseza binjibo byabo mwafwa ya bukalu bwakulizila nambe binzita, twasa kubatambula mu binjibo byetu. Omwo byuma bitwalelelaho kukaluwa muno mu “matangwa a kukotoka” tuwana bingila byabingi bya mwakukwasela bandolome na bandokazi betu. (2 Timo 3:1) Twasa lalo kumwesa bandolome na bandokazi betu cizemo na kubazembeleka. Ngila imo itwasa kulingilamo ngoco, inapu kubatambula mwamubwa nga baneja ku Njibo ya Bumwene. Tushaka ngwetu balizibe kushubuluka nga bali ku biwano. Tuli mu kaye muje munashulu banu baje bakalingi bakwabo mwamubi, ngeci bandolome na bandokazi betu banasa kukala na bishoti na kuliziba ngwe kubapwile ba seho. Nga bandolome na bandokazi betu baija ku biwano, tunapande kubashongangeya na kubamwesa cizemo.
13. Bakulunu mu cikungulukilo basa kukwasa bati baje bali mu bukalu? (Taleni na cikupulo.)
13 Bakulunu basa kukwasa bandolome na bandokazi mu cikungulukilo baje bali na kuliwana na bukalu bwa kuliseza-seza. Nga kunasholoka bukalu bwa kulizila nambe mushongo wa cishitukila, bakulunu bakabwahesa bwasi byuma mangana bakwase bandolome na bandokazi babo. Bakatakamesa lalo bandolome na bandokazi babo kupangesa bisoneka. Bandolome na bandokazi kubapwila kwakwasi kusimutwiya na mukulunu uje wakala na ngozi, uje akatolila mwamubwa bakwabo na kweseka kuzibisisa mubakalizibila. Kulinga ngoco, kukwasa bandolome na bandokazi balizibe ngwabo babazema, co kubapwila kwakwasi kukabangeya binangulo binemana ha Mbimbiliya bibabana bakulunu.—1 Tesa 2:7, 8, 11.
Bakulunu mu cikungulukilo bakashongangeya bandolome na bandokazi babo ha simbu ya bukalu (Taleni paragirafu 13) a
14. Bika bitunapande kulinga mangana bakwetu batukulahele?
14 Lingeni byuma bije bilingisa bakweni bamikulahele. Tushaka ngwetu bandolome na bandokazi betu batukulahele maneneni mu simbu ibali mu bukalu. (Prov 17:17) Tunapande kulinga bika mangana bakwetu batukulahele? Tunapande kulinga mwoshe mutwasela kutembwinina Yehova ha litangwa na litangwa. Cakumwenako, tunapande kunyunga bikulaheso byetu na kunyunga simbu. (Mate 5:37) Nga tunangukako mukwetu uje atonda bukwasi, tunapande kumukwasa. Kutundaho, tunapande kwendeka biñanda bibatwana kwesekesa na mashiko amwesa mwakubyendekela.
15. Cikungulukilo ciwana bati bukwasi, nga bakulunu balinga byuma mwamubwa?
15 Bubwa muka butundamo nga bakulunu balinga byuma bije bilingisa bandolome na bandokazi babakulahele? Nga bandolome na bandokazi basa kutumina bakulunu ha simbu ibatonda bukwasi bwabo, co oku kulingisa bandolome na bandokazi balizibe kushubuluka. Bandolome na bandokazi baliziba ngwabo babazema nga bamona ngwabo bakulunu banalibwahesela kubakwasa. Nga bakulunu bapangesa Mbimbiliya na mabulu etu mu kunangula bandolome na bandokazi kutubakana kupangesa biyongola byabo, co bandolome na bandokazi babakulahela manene. Nga mukulunu alinga byuma byanakulahesa na kujeneka kujombolola mahungu, co bandolome na bandokazi bamukulahela manene.
16. Bubwa muka bitundamo nga tulinga byuma byamona Yehova ngwendi byabibwa?
16 Simbu yoshe lingeni byuma byamona Yehova ngwendi byabibwa. Nga twononoka Yehova mu byuma byoshe na kwangula byakulinga kupangesa Mbimbiliya, co tumwesa bakwetu mwanja waubwa. Nga tulilongesa Lijwi lyendi na kukanyamesa likulahelo lyetu, co tupwa ba kulongwa kuli ikeye na kukabangeya binangulo byendi. Nga tulinga ngoco, co tunanguka na kujenjuka ku bilongesa na biyongola bya makuli bya kano kaye bije kubyendelela na cizango ca Yehova. (Efeso 4:14; Jems 1:6-8) Kukulahela Yehova na bikulaheso byendi, kutukwasa tuwe mbunge nga twatambula mizimbu yaibi. (Samu 112:7, 8) Kukulahela lalo Yehova kutulingisa mangana tukwase bakwetu baje bali na kuliwana na bukalu.—1 Tesa 3:2, 3.
17. Bika bibanapande kulinga bakulunu mangana batakamese cikungulukilo?
17 Bakulunu banapande kulinga byuma mu kwesekela, kusinganyeka mwamubwa, kulinga byuma mubinapande na kupwa bababotsi. Aba bandolome bakakwasa bakwabo bawe mbunge na kukanyamesa likulahelo lyabo kwitila mu “kukakateya ku lijwi lya kulongwa.” (Tito 1:9; 1 Timo 3:1-3) Nga bakulunu bakela mwanja waubwa bandolome na bandokazi na kulinga cipangi ca bunyungi, co bakwasa baka-kwambulula bakunguluke simbu yoshe, kuya mu lihya na kulinga cilongesa ca munu endilika. Nga bandolome na bandokazi bali na kuliwana na bukalu buje bwasa kubanenela bishoti, bakulunu bakabanukisa ngwabo banapande kukulahela Yehova na bikulaheso byendi.
18. Mwafwa bika tushaka kushangazala Yehova na kushwena manene kuyehi nendi? (Taleni lalo cipalo ca “ Mutwasa Kushwenena Kuyehi na Yehova.”)
18 Munima ya kusimutwiya ha bifwa bya kulitila byakala nabyo Yehova, twasa kwendeka ngwe mwendekelele Mwene Devidi, ngwendi: “Yehova limanya lyange bamushangazale.” (Samu 144:1) Yehova kakatenguluka, ngeci twasa kumukulahela simbu yoshe, nameme nga twakulubala twasa kwendeka ngwetu Yehova “Ikeye Limanya lyange,” mwafwa twakulahela ngwetu simbu yoshe atukwasa ku sipilitu.—Samu 92:14, 15.
MWASO 150 Shakezekeni Njambi Mangana Mukoboke
a KULUMBUNUNA BIKUPULO: Ndokazi nashubuluka kusimutwiya na bakulunu babali ku Njibo ya Bumwene.
