Bihula Bya Baka-Kutanda
Majwi akwendeka ngwawo “Ubanyungilila” aje ali ku mukanda wa Samu 12:7, anatalesa kuli “baka-kuyanda” (vesi 5) indi ku “Majwi a Yehova” (vesi 6)?
Byuma bibanendeka oku ku mukanda bimwesa ngwabyo ei vesi ili na kwendeka ha banu.
Ku mukanda wa Samu 12:1-4 tutanda ngwetu, “banu ba kulongwa banahu.” Ku mukanda wa Samu 12:5-7 banendeka ngwabo:
“‘Mwafwa baka-kuyanda bali na kubalyatelela,
Tuhutu bali na kulinyenga,
Yehova ngwendi: “Njimana na kulingako bimo,
‘Njibobola kuli baje bali na kubashendumuna.’
Majwi a Yehova apwa a kujela;
Anafu ngwe siuva ibanabwahesa mwamubwa mu lutengo, ibanajelesa bisimbu 7.
Ubanyungilila, Obe Yehova,
Unyungilila umo na umo wabo kushwa ku cisemwa cino kutwala ku myaka yoshe.”
Vesi 5 inendeka byuma byakalingila Njambi “baka-kuyanda.” Inendeka ngwayo akabobola.
Vesi 6 inatwalelelaho kwendeka ngwayo “majwi a Yehova apwa a kujela,” “anafu ngwe siuva.” Oku kumwesa mutukalizibila ha lijwi lya Njambi.—Samu 18:30; 119:140.
Tucisimutwiyeni ha majwi ali ku Samu 12:7: “Ubanyungilila, Obe Yehova, Unyungilila umo na umo wabo kushwa ku cisemwa cino kutwala ku myaka yoshe.” Lijwi lya kwendeka ngwabo “ubanyungilila” linatalesa kuli beya?
Hakuwana ngwe majwi ali mu vesi 7 banawendeka hanima ya kwendeka majwi ali mu vesi 6 aje endeka ngwawo “majwi a Yehova,” bamo banasa kusinganyeka ngwabo lijwi lya “ubanyungilila” linatalesa ku majwi a Njambi. Co tuzibuka ngwetu Njambi nanyungilila Mbimbiliya nameme banu babangi bakele na kuilwisa na kushaka kuinyongesa.—Isaya 40:8; 1 Pita 1:25.
Oloni byuma bibanendeka mu vesi 5 nabyo bya busunga, Yehova akanyungilila banu. Yehova atwalelelaho kukwasa na kwobola baje ‘bali na kuyanda’ na baje ‘banazeye.’—Yombi 36:15; Samu 6:4; 31:1, 2; 54:7; 145:20.
Ngeci, lijwi lya “ubanyungilila” lije lili mu vesi 7 linatalesa kuli beya?
Nga tutanda mwamubwa byuma bili oku ku mukanda, tunanguka ngwetu lijwi lya “ubanyungilila” libanendekako linatalesa ku banu.
Ku mashangumukilo a Samu 12:1 Devidi nendeka bya “banu ba kulongwa” baje babanakwisi ku banu bababi. Kutundaho, tutanda ngwetu Yehova akalwisa baje bali na kwendeka byuma byabibi. Ou mukanda wa Samu utulingisa tukulahele ngwetu Njambi anyungilila banu bendi mwafwa majwi endi apwa a kujela.
Ngeci, vesi 7 yendeka ngwayo, Yehova ‘abanyungilila’ na kubatwamenena kulumbununa baje babali na kuyandesa kuli baka-bubi.
Lijwi lya “ubanyungilila” balipangesele na mu Bisoneka bya Cihebelu bije bibakulahelele. Mbimbiliya ya Greek Septuagint inapangesa Lijwi lya “yetu” lubali mu vesi 7 kulumbununa banu ba kulongwa baje babali na kuyandesa ku banu bababi. Kumamaneselelo, vesi 7 inendeka ngwayo “umo na umo” wa ba kulongwa bakamunyungilila kuli baka-bubi “kushwa ku cisemwa cino kutwala ku myaka yoshe.” (Samu 12:7, 8) Vesi 7 mu Bisoneka bya Cihebelu bije bibananungulula mu ndaka ya Cialamaiki banashangumuka na majwi akwendeka ngwawo; “bakebo,” ei vesi yendeka lalo ngwayo: “Obe MWATA, unyungilila baka-kusungama, ubanyungilila ku banu bababi ku myaka yoshe.” Obu bunapu bukaleho bukwabo buje bumwesa ngwabwo, Samu 12:7 kuyesi na kwendeka ha lijwi lya Njambi.
Ngeci, ei vesi ikwasa “banu ba kulongwa” bakulahele ngwabo Njambi abanyungilila.
