BISHOTI byasa kupwa ngwe citele ca kulema. (Visi 12:25) Kuma simbu imo mwazeyele manene mwafwa ya kulishoshomwena ndi? Kuma mukazeye manene na kusinganyeka ngweni bukalu bweni bwakama manene, co kumwasa kukolesa ndi? Nga mukemwo, co keti likalyeni. Bwingi bwetu hamo twazeyele mwafwa ya kunyunga kabushoko ketu uje wabinja, nambe kutsisa kabushoko ketu nambe mwafwa ya bukalu bwa kulizila butwaliwanene nabwo. Bika byasa kutukwasa tukolese nga tuli mu bishoti? *

Kusimutwiya ha mwanja wa Mwene Ndabiti kutukwasa tuzibuke bitunapande kulinga nga tuli mu bishoti. Ndabiti waliwanene na bukalu bwabwingi, co ha simbu imo bashakele kumutsiya. (1 Samwe 17:34, 35; 18:10, 11) Bika byakwasele Ndabiti akolese mwakele mu bishoti? Twasa kumutembwinina bati?

Ndabiti waliwanene na bukalu bwa kuliseza-seza ha simbu imo lika. Acisinganyekeni byalingiwile Ndabiti mwatewele Mwene Saulu uje washakele kumutsiya. Ndabiti na banu bendi mubelukile kwimbo lyabo ku Zikelange, bakuwanene ngwabo bitozi babo banebi byuma byabo, banenyeka binjibo byabo, na kutwala binaanga byabo mu bundungo. Ndabiti walingile bati? “Ndaviti na banu bendi bashangumukile kulila noho bajukile.” Banu ba Ndaviti nabo bamuzeyesele manene mwafwa bashakele “kumwasha mamanya.” (1 Samwe 30:1-6) Ha simbu ei, Ndabiti waliwanene na bukalu butatu bwakama ha simbu imo lika. Naanga yendi yakele mu bushonde, banu bendi bashakele kumutsiya, co lalo na Mwene Saulu washakele kumutsiya. Acisinganyekeni mwalizibilile Ndabiti.

Bika byalingile? Bwasi-bwasi Ndabiti “walitakamesele muli Shukulu Kalunga Njambi yendi.” Wasele bati kulinga ngoco? Ndabiti wapandele kulombela kuli Yehova amukwase na kusinganyekesesa mwamukwaselele kunima. (1 Samwe 17:37; Myaso 18:2, 6) Ndabiti wazibukile ngwendi wapandele kulomba Yehova mangana amuleke bya kulinga. Ngeci, wehwile Yehova amuleke byanapande kulinga. Yehova mwalekele Ndabiti bya kulinga, Ndabiti wabilingile bwasi-bwasi. Kutundaho, Yehova wabezikisile Ndabiti na banu bendi, co bawanene byuma byabo bibabanyekele hamo lika na binaanga byabo. (1 Samwe 30:7-9, 18, 19) Kuma munananguka byuma bitatu byalingile Ndabiti ndi? Walombelele kuli Yehova mangana amukwase, kutundaho, wasinganyekesesele mwamukwaselele Yehova kunima, co walingile byuma byamulekele. Twasa kumutembwinina bati? Twasa kulinga ngoco mu bingila bitatu.

1. Lombeleni. Simbu yoshe-yoshe ituliziba ngwetu tuli mu bishoti, tunapande kulomba Yehova atukwase na kutwana mana. Nga muleka Yehova bishoti byeni byoshe, co muliziba hehu ku mbunge. Twasa kulomba mu bwihi mu mbunge yetu nga byuma binakaluwa manene. Simbu yoshe itulomba ngwetu Yehova atukwase, tumwesa ngwetu tunakulahela Yehova ngwe mwalingile Ndabiti uje wendekele ngwendi: “Shukulu Kalunga ikeye muka-kunjinyunga, ikeye wapwa cimpaka cange ca kukola. Njambi yange ikeye wapwa cishwamo cange, muli ikeye mukemwo munjitewela.” (Myaso 18:2) Kuma lilombelo lyasa kutukwasa ndi? Ndokazi Kahlia, uje wapwa painiya wendekele ngwendi: “Munima ya kulombela, njikazibi ku mbunge hehu. Kulombela kukanjikwasa  njikulahele manene Yehova na kusinganyeka ngwe mwakasinganyekela.” Cili bene, lilombelo lyapwa bwana bwa kutunda kuli Yehova mwafwa likatukwasa tukolese nga tuli mu bishoti.

2. Singanyekeseseni. Omwo musinganyekesesa ha byuma byalingiwile mu buyoye bweni kunima, kuma mucanuka mwamikwaselele Yehova mukolese mu bukalu bumwakele nabwo ndi? Nga tusinganyekesesa mwanatukwasela Yehova hamolika na bangamba bendi ba kusañulu, co tukanyama na kumukulahela manene. (Myaso 18:17-19) Joshua uje wapwa mukulunu wendekele ngwendi: “Njili na mukana wa bikumbululo ku malombelo ange. Ou mukana unanjikwasa njanuke byuma bimo binjalombele Yehova, bije byanjanene.” Ngeci, nga tusinganyekesesa mwanatukwasela Yehova, co bishoti kubituzeyesa.

3. Lingeni. Simbu kanda mwangule bya kulinga, tondeseseni mu Lijwi lya Njambi mangana limikwase kwangula mwamubwa bya kulinga. (Myaso 19:7, 11) Babangi banananguka ngwabo kutondesesa biñanda bije byendeka ha vesi imo kunabakwasa bazibuke mwakupangesela oyo vesi mu buyoye bwabo. Ndolome Jarrod uje wapwa mukulunu wendekele ngwendi: “Kutondesesa kwanjikwasa njililongese byabingi ha vesi imo na kunanguka byanjileka Yehova. Oku kukanjikwasa njimone seho ya byuma binjitanda na kubipangesa.” Nga tutondesesa mu Bisoneka na kukabangeya byatuleka Yehova, co tupwa ba kubwahelela na kutepulula ku bishoti.

Ndabiti wanangukile ngwendi wapandele kukulahela Yehova mangana amukwase mu bishoti byakele nabyo. Wakandelelele manene ku bukwasi bwamwanene Yehova mukemwo wendekele ngwendi: ‘Njambi anjana nzili ya kufungulula bimpaka. Ikeye Njambi muka-kunjana nzili.’ (Myaso 18:29, 32) Tunasa kuliziba ngwetu bukalu bwetu bunapu bwakama manene, co kubwasa kuhwa. Oloni Yehova atukwasa tukolese mu bukalu bwoshe-bwoshe butuliwana nabwo. Nga tulomba bukwasi kuli Yehova na kusinganyekesesa ha byuma byoshe byanatulingila na kupangesa byatuleka, co atwana nzili na mana bije bitukwasa nga tuli mu bishoti.