1. Bika bikatulingisa tupwe ba kubwahelela?

 YEHOVA ashaka ngwendi tupwe ba kubwahelela. Tuzibuka ngoco mwafwa kubwahelela bwapwa bushuka bwa Sipilitu yendi ya kujela. (Ngala 5:22) Tuzibuka ngwetu muli kubwahelela kwakama manene mu kwana kutubakana mu kutambula. Ngeci, tukapu ba kubwahelela mutukapanga na nzili cipangi ca kwambulula na kukwasa bandolome na bandokazi betu mu bipangi byakuliseza-seza.—Vili 20:35.

2-3. (a) Byuma muka bibali bibanendeka ku mukanda wa Ngalatiya 6:4 bije byasa kutukwasa tutwaleleleho kupangela Yehova mu kubwahelela? (b) Bika bitusimutwiya muno mu cilongesa?

² Ku Ngalatiya 6:4, kapositolo Paulu nendeka byuma bibali bije bitukwasa tutwaleleleho kupwa ba kubwahelela. (Tandeni.) Cakulibanga, cilengo cetu cinapande kupwa ca kupangela Yehova na nzili yetu yoshe. Nga tupangela Yehova na nzili yetu yoshe, co tupwa ba kubwahelela. (Mateo 22:36-38) Camucibali, kutwapandele kulyesekesa ku bakwetu. Nameme kuli byuma bimo bitunasa kulinga mwafwa ya bukangule bwetu nambe kulilongesa kwetu, tunapande kukandelela Yehova. Byuma byoshe bituli nabyo, ikeye natwanabyo. Co lalo, nga bakwetu bali na kupanga byabingi mu cipangi ca Njambi kututubakana, tunapande kubwahelela mwafwa bali na kupangesa cashu cabo mu kushangazala Yehova kesi mu kushakezeka lutsimo embwe. Ngeci, keti tulihyane nabo, oloni tulilongeseniko bimo kuli bakebo.

³ Muno mu cilongesa, tusimutwiya byuma byasa kutukanyamesa nga tuliziba ngwetu kutwesi na kupanga byabingi mu cipangi ca Njambi. Tusimutwiya lalo mutwasa kupangesela cashu ca natwana Njambi na byuma bitulilongesa ku bakwetu.

4. Byuma muka byasa kutuzeyesa? Endekeni cakumwenako.

⁴ Yetu bamo hamo kutwasa kupanga byabingi mu cipangi ca Njambi mwafwa ya bukulukazi indi hamo tuli na kubinja, co tunasa kuzeya. Bikebyo byaliwanene nabyo ndokazi Carol. Simbu imo wakapangelele ku mutambela umo kuje kwakele bujene bwa baka-kwambulula. Ha simbu oyo, wakatwamenenene bilongesa bya Mbimbiliya bya kupwa 35 na kukwasa babangi balikundike kuli Njambi na kubambwitika. Ndokazi Carol walikuwile cipangi ca kwambulula. Mu kwita kwa simbu ndokazi Carol wabinjile, co wakele lika ha njibo. Ndokazi Carol wendekele ngwendi: “Njizibuka ngwange ha simbu ino kunjesi na kulinga byuma bibali na kulinga bakwetu mwafwa ya kubinja, co njikalizibi ngwange keti nji wa seho. Njikalizibi kuzeya munjikonowa kulinga byuma binjikashaka kulinga.” Carol ashaka kulinga byabingi mu cipangi ca Yehova. Tukandelela manene ku sipilitu yendi ya kulyana. Yehova Njambi akakandelela ku bipangi byoshe byali na kulinga ndokazi Carol nameme ha simbu ino kasa kulinga byabingi mu cipangi ca kwambulula.

5. (a) Tunapande kwanuka bika nga tuliziba ngwetu kutwesi na kupanga byabingi mu cipangi ca Yehova? (b) Ngwe mutumwena mu cikupulo, ou ndolome na twalelelaho bati kupanga na nzili mu bipangi bya Yehova?

⁵ Nga bisimbu bimo mukalizibi ngweni kumwasa kulinga byabingi mu munga ya Njambi, co lihuleni ngweni, ‘Yehova ashaka ngwendi njimupangele bati?’ Yehova ashaka ngwendi tweseke mutwasela mwoshe kulingako bitwasa ha simbu ino. Tusimutwiyeni ha cakumwenako eci. Ndokazi uje ali na myaka ya kupwa 80 akalizibi kuzeya mwafwa kesi na kupanga byabingi mu cipangi ca kwambulula ngwe mwakele na kulingila te ali na myaka 40. Co akalizibi ngwendi nameme ali na kulifwita kupangela Yehova, oloni bipangi byendi kesi bya seho kuli Yehova. Kuma na Yehova mukemwo mwali na kumwena bipangi byou ndokazi ndi? Anukeni ngweni ou ndokazi wapangele na nzili mwakele na myaka 40, co anga acili na kupangela Yehova nameme ali na myaka 80. Ngeci, Yehova acili na kumona bipangi byendi kupwa bya seho. Nga tushangumuka kuliziba ngwetu bipangi byetu kubyesi na kuzibisa Yehova kubwaha, co twanukeni ngwetu Yehova ikeye lika akamono bipangi bitukalingi bije bikamuzibisa kubwaha. Nga tupangela Yehova na nzili yetu yoshe, co Yehova atushangala ngwendi: “Unalingi mwamubwa manene.”—Esekeseni Mateo 25:20-23.

6. Bika bitulilongesa ku byuma byaliwanene nabyo ndokazi Maria?

⁶ Tupwa ba kubwahelela nga tusinganyekesesa ha byuma bitwasa kulinga kutubakana kusinganyekesesa ha byuma bije kutwasa kulinga. Tucisimutwiyeni hali ndokazi Maria uje wabinja mushongo uje ukamwonowesa kupanga byabingi mu cipangi ca kwambulula. Ha kulibanga wazeyele, co walizibile ngwe wangoco. Mu kwita kwa simbu wanangukile ndokazi umo mu cikungulukilo cabo uje kasele kwenda, co ndokazi Maria wayongwele kumukwasa. Ndokazi Maria ngwendi: “Njabwahesele bya kupanga nou ndokazi wabinja kupangesa mafoni na mikanda. Simbu yoshe mutwakele na kwambulwila hamo, njapwile wa kubwahelela mwafwa njazibukile ngwange njakele na kukwasa ndokazi yange.” Mu ngila imo lika, netu tupwa ba kubwahelela nga twaka mbunge ku byuma bije bitwasa kulinga, kutubakana kwaka mbunge ku byuma bije kutwasa kulinga. Oloni bati nga twasa kupanga byabingi nambe kulinga mwamubwa bipangi bimo bya mu munga ya Yehova?

7. Kapositolo Petulu wanangwile bati baka-Kilistu?

⁷ Mu mukanda wendi wa kulibanga, kapositolo Petulu washongangeyeye bandolome na bandokazi bendi balikwasese bwana na cashu cabo mu kukwasa bakwabo baka-kukulahela. Wendekele ngwendi: “Umo na umo, ngwe muka-kupangesa  mwamubwa bwana bwa Njambi bwa kuliseza-seza, napande kupangesa bwana bwendi bwanatambula kuli Njambi mu kukwasa bakwabo beka.” (1 Petu 4:10) Kutwapandele kulikela kupangesa bwana bwetu mu kushula mwafwa ya kutewa ngwetu bakwetu batuzibila cipilulu nambe kubazeyesa. Nga tulinga ngoco, co kutupangesa cashu cetu mu kushula.

8. Kwesekesa na mukanda wa 1 Kolinte 4:6, 7, mwafwa bika kutwapandele kulyalesela bwana butulinabwo?

⁸ Tunapande kupangesa cashu cetu mu kushula, oloni tunapande kunyanyama mangana keti tulyalese. (Tandeni 1 Kolinte 4:6, 7.) Cakumwenako, hamo munasa kukala na cashu ca kushangumuka bilongesa bya Mbimbiliya. Nga mukemwo, co twaleleleniho kupangesa mwamubwa cashu ceni. Oloni kutwapandele kulyalesa mwafwa ya cashu cituli naco. Cakumwenako, twendeke ngwetu mumunaile mu lihya munakalingileko byuma bimo bije binalingisa munu umo ashangumuke kulilongesa Mbimbiliya. Co mushaka kulekako bandolome na bandokazi ba mu cibunga ceni ca kuya mu lihya byuma bimunaliwana nabyo. Co mumukakala kuje ku cibunga muziba ndokazi umo endeka byuma byabibwa byanaliwana nabyo mwanakala na kwana banu magazini. Ou ndokazi nana lika magazini, oloni yeni munashangumukile cilongesa ca Mbimbiliya. Mulinga bati? Nameme mushaka kulekako bandolome na bandokazi ba mu cibunga ceni byuma bimunaliwana nabyo, oloni mubandamenako tahi na kuwanako simbu yeka ya kubaleka. Mulinga ngoco mwafwa kumushaka ngweni uje ndokazi nana lika magazini alizibe ngwendi byuma bimunalingi yeni bikebyo bya seho kutubakana bije byanalingi ikeye. Nga mulinga ngoco, co mumwesa ngweni mwamwaka mbunge. Oloni kumwapandele kuzeya. Twaleleleniho kushangumuka bilongesa bya Mbimbiliya. Yehova na myana bwana, ngeci bupangeseni.

9. Twasa kupangesa bati cashu canatwana Yehova?

⁹ Tunapande kwanuka ngwetu cashu coshe-coshe citunasa kukala naco cinapu bwana bwa kutunda kuli Njambi. Tunapande kulikwasesa cashu cituli naco mu kukanyamesa cikungulukilo, keti mu kushaka mangana tutsimane. (Fili 2:3) Nga tulikwasesa cashu cetu mu kulinga cizango ca Njambi, co tupwa ba kubwahelela mwafwa kutukala na sipilitu ya kulihyana na bakwetu nambe kulimona kupwa tu ba seho kubatubakana, oloni tumwesa ngwetu tuli na kupangesa cashu canatwana Yehova mu kumushangazala.

10. Mwafwa bika kutwapandele kulyesekesa ku bakwetu?

¹⁰ Nga kutunyanyama twasa kuwila mu ceseko ca kumona bipangi byetu kupwa bya seho kutubakana bya bakwetu. Cakumwenako, hamo ndolome wapwa citongwe mu kwendeka biñanda bya mbunga. Yehova ikeye namwana eci cashu.  Ngeci, mu mbunge yendi, ou ndolome nasa kwombwanesa ndolome uje kesi kwendeka mwamubwa biñanda byendi mu butongwe. Co lalo hamo ou ndolome kesi kwendeka mwamubwa biñanda, akatambula bangenzi, kulongesa mwamubwa bana bendi, co lalo wakala na ntwima mu cipangi ca kwambulula. Twabezika kukala na bandolome na bandokazi babengi baje bali na kulikwasesa cashu cabo mu kukwasa bandolome na bandokazi babo na mu kupangela Yehova.

11. Mwafwa bika tunapande kulinga mwoshe mutwasela kukabangeya mwanja wa Yesu?

¹¹ Nameme kutwapandele kulyesekesa ku bakwetu, kuli byuma byabingi bitwasa kulilongesako ku myanja yabo yaibwa. Cakumwenako, twasa kulilongesa byabingi kuli Yesu. Nameme wapwile wa kulumbunuka, oloni twasa kulilongesako bimo ku bifwa byendi byabibwa na ku byuma byalingile. (1 Petu 2:21) Nga tulilongesako bimo ku mwanja wendi, co tuzibisa Yehova kubwaha ku mbunge na kulinga byabingi mu cipangi ca kwambulula.

12-13. Bika bitulilongesa kuli Mwene Ndabiti?

¹² Mu Mbimbiliya muli myanja yaingi ya banalume na banakazi baje batwasa kutembwinina nameme kubapwile ba kulumbunuka. (Heve 6:12) Acisinganyekeni ha mwanja wa Mwene Ndabiti uje yendekele Yehova ngwendi: “Njinawana Ndabiti muna Njesi ikeye munalume injazema.” (Vili 13:22) Nameme ngoco, Ndabiti kapwile wa kulumbunuka. Bisimbu bimo wasebukile, co walingile bubi bwakama. Oloni, twasa kulilongesa byabingi kuli ikeye. Mwafwa bika? Mwafwa mubamunangwile, kalyamenene. Oloni watabele kumunangula, co walombele Yehova amukonekele ha bubi bwalingile. Co Yehova wamukonekelele.—Myaso 51:3, 4, 10-12.

¹³ Tulilongesa byabingi kuli Ndabiti omwo tulihula ngwetu: “Njikalingi bati nga banjinangula? Kuma njikalitabela bubi bwasi-bwasi indi njikalimanena? Kuma njikazambwila kupaya bakwetu ndi? Kuma njikeseka mwoshe munjasela mangana keti njilukile buzeye bunjinalingile kunima ndi?’’ Mwasa kulihula bihula bya kulifwa omwo mutanda bya banalume na banakazi babanendeka mu Mbimbiliya. Kuma baliwanene na bukalu bu muli na kuliwana nabwo ndi? Bifwa muka byabibwa bibamwesele? Omwo mulilongesa hali umo na umo wabo, lihuleni ngweni: ‘Bika binjililongesa kuli ou ngamba ya Yehova wa kulongwa?’

14. Bukwasi muka butwasa kuwana nga tusinganyekesesa ha myanja yaibwa ya bandolome na bandokazi betu?

¹⁴ Twasa kulilongesako bimo ku bakwetu baka-kukulahela, banike nambe bakulunu. Cakumwenako, kuma kuli ndolome nambe ndokazi mu cikungulukilo ceni uje ali na kutwalelelaho kupwa wa kulongwa nameme ali na kuliwana na byeseko ndi? Hamo ebi byeseko bili na kutunda kuli ba  busamba bendi, kumulwisa kuli baka-naanga nambe kubinja. Kuma mwanangukako bifwa bimo byabibwa byou muka-Kilistu bije bimwasa kutembwinina ndi? Kusinganyekesesa ha mwanja wou ndolome nambe ndokazi kumikwasa mutwaleleleho kupwa ba kulongwa mu muliwana na byeseko. Twakandelela manene kukala na bandolome na bandokazi baje bali na kutumwesa mwanja waubwa utunapande kukabangeya.—Heve 13:7; Yako 1:2, 3.

15. Cinangulo muka ca kapositolo Paulu cije citukwasa tutwaleleho kupangela Yehova mu kubwahelela?

¹⁵ Nga umo na umo wetu apangesa cashu cendi mu kushula, co kukala kwoloka na likwatasano mu cikungulukilo. Tusimutwiyeni hali baka-Kilistu ba kulibanga. Bakele na bwana na bipangi bya kuliseza-seza. (1 Koli 12:4, 7-11) Oloni ebi kubyabalingisile bakale na sipilitu ya kulihyana na kulyangununa. Oloni Paulu washongangeyeye umo na umo wabo apangese cashu na nzili yendi, “mu kutunga mubila wa Kilistu.” Paulu wasonekelele baka-Efeso ngwendi: “Ngeci bene, omwo cilyo cimo na cimo cipanga ngwe ku bipangi byaco, co mubila woshe wa mutunu uli na kukola, co uli na kulitunga ukewo babenya mu cizemo.” (Efeso 4:1-3, 11, 12, 16) Baje bakabangeyeye cinangulo ca Paulu banenele kwoloka na likwatasano, co ebi bikebyo bifwa bituli na kulimwena mu bikungulukilo ano matangwa.

16. Munalyangwila kulinga bika? (Vahevelu 6:10)

¹⁶ Kesi mulyesekese ku bakweni, oloni lilongeseni kuli Yesu, na kulinga mwoshe mumwasela kutembwinina bifwa byendi. Lilongeseni ku myanja ya banu babanendeka mu Mbimbiliya na banu ba matangwa ano baje bamwesele likulahelo. Omwo mutwalelelaho kupangela Yehova na nzili yeni yoshe kulaheleni ngweni, ‘Njambi kakele na kapenga, ngeci ebale bipangi byeni.’ (Tandeni Vahevelu 6:10.) Ngeci, twaleleleniho kupangela Yehova mu kubwahelela, co zibukeni ngweni akakandelela ku bipangi byoshe bitukamupangela na nzili yetu yoshe.