Munu alisinga, ‘akulahesa ku mesho a mbunga ngwendi alinga cuma cimo, co kakangi akatumbula Njambi ngwendi ikeye mukaleho wendi.’ Nasa kwendeka nambe kusoneka cikulaheso cendi.

Banu bamo banasa kusinganyeka ngwabo kulisinga wapwa mulonga mwafwa Yesu wendekele ngwendi: “Kesi mukalisinge . . . Kwendeka kweni kupwe ‘Eyo’ nambe ‘Embwe’ omwo byoshe byeka mubwezelelako bitunda kuli Liyabolo.” (Mateo 5:33-37) Yesu wazibukile ngwendi Lishiko lya Mosesa lyatabesele Baisalele kulisinga mu byuma bimo, co wazibukile lalo ngwendi bangamba ba Njambi ba kulongwa nabo balisingile. (Kusha 14:22, 23; Kutu 22:10, 11) Kutundaho, Yesu wazibukile ngwendi Yehova nendi walisingile. (Heve 6:13-17) Ngeci, Yesu kalumbunwine ngwendi kutwapandele kulisinga. Oloni wanangwile ngwendi banu kubapandele kulisinga ha byuma bya kujeneka seho. Ngeci, tunapande kwanuka ngwetu kushulisilila byuma bitukulahesa kwapwa kwa seho ku mesho a Njambi. Co tunapande kulinga bitunakulahesa.

Bika bimunapande kulinga nga bamileka ngwabo mulisinge? Ca kulibanga acisinganyekeseseni, mumone indi mwasa kulinga bimushaka kukulahesa. Nga kumuzibuka mwamubwa indi mwasa kulinga obyo byuma, co keti mulisinge. Lijwi lya Njambi ngwalyo: “Mwamubwa keti ulisinge, kutubakana kulisinga, co kuucilingi.” (Kwambu 5:5) Kutundaho, singanyekeseseni ha binangulo bya mu Mbimbiliya bije byendeka ha cuma cimushaka kukulahesa, co lingeni mu kulitombola na citakutaku ceni. Binangulo muka bimo bya mu Mbimbiliya bije byasa kumikwasa?

Bisingo bimo bilitombola na cizango ca Njambi. Cakumwenako, Bakaleho ba Yehova bakalikumiiya mubakalyambata. Bikumiiyo bya cifwa eci binapu lika ngwe kulisinga. Cambato na shombolwa bakalikumiiya ku mesho a Njambi na banu ngwabo bakalizema na kulisingimika, co bakalinga ngoco mu buyoye bwabo bwoshe. (Baka-kulyambata bamo kubesi kwendeka mpundu awa majwi mubakalyambata, oloni bakalikumiiya ku mesho a Njambi.) Co bakapu munalume na munakazi ba kulyambata, co lalo banapande kutwalelelaho kukala mu bulo bwabo mu kuyoya kwabo kwoshe. (Kusha 2:24; 1 Koli 7:39) Kulikumiiya kwa mukati ka munalume na munakazi kunapande, co kulitombola na cizango ca Njambi.

Bisingo bimo kubilitombola na cizango ca Njambi. Muka-Kilistu wa busunga kapandele kulisinga ngwendi apangesa bitwa mu kunyungilila lifuti lyendi nambe kulisinga ngwendi kakapangela Njambi. Kulinga ngoco kunapu kulwisa mashiko a Njambi. Baka-Kilistu kubapwile “baka-kaye,” ngeci kubapandele kulikobelesa mu bimata na binzita  bya muno mu kaye.—Yowa 15:19; Isaya 2:4; Yako 1:27.

Simbu imo muka-Kilistu nasa kulisinga nambe kujeneka kulinga ngoco kwesekesa na citakutaku cendi. Bisimbu bimo tunapande kusinganyekesesa tahi ha cinangulo ca Yesu ca kwendeka ngwaco: “Aneni kuli Sezale bije binakundama kuli Sezale, co aneni kuli Njambi bije binakundama kuli Njambi.”—Luka 20:25.

Cakumwenako, twendeke ngwetu muka-Kilistu alomba mukanda umutabesa kukala mu lifuti lyeka nambe kwendela mafuti eka, oloni ananguka ngwendi napande kulisinga asinoni bamwana oyo mikanda. Nga omwo mu lifuti bakalisingi mu ngila ije kuilitombola na mashiko a Njambi, co citakutaku cendi canalongesa na Mbimbiliya kucapandele kumutabesa kulinga ngoco. Oloni baka-fulumende basa kumutabesa kutengululako majwi amo mangana citakutaku cendi keti cimupaye ha simbu yalisinga.

Hamo kupangesako majwi eka kunasa kumulingisa ononoke cinangulo cili ku mukanda wa Loma 13:1 uje wendeka ngwawo: “Munu woshe napande kwononoka kuli baka-kuswana.” Muka-Kilistu napande kumona ngwendi kukwabihile kulisinga omwo alinga cuma cije canatabesa Njambi.

Mulinga mwamubwa kusingimika citakutaku ceni nga ha simbu imulisinga bamileka ngwabo munapande kukwata cuma cimo nambe kulingako cimweso cimo. Baloma ba kusañulu na Basintiya (banu babamwene ngwabo ba kusalela) bakele na kulisinga oku banakwata mikwale na kulombela kuli njambi yabo wa nzita mangana abakwase. Bagriki bakele na kwimika maboko abo mwilu mubakele na kulisinga. Banangukile ngwabo kuli munu umo wakala na nzili ya kulitila uje akamono byuma bibakalingi banu na kutolilila ku byuma bibendeka. Co banu bakalitabela kuli ikeye.

Ngamba ya Yehova kapandele kulisinga kupangesa cuma coshe-coshe ca lifuti cije cinakundama ku bulombelo bwa makuli. Oloni mulinga bati nga baka-nkuta bamileka ngwabo mukwate Mbimbiliya na kulisinga simbu kanda mwendeke bukaleho? Munasa kulinga ngoco mwafwa Bisoneka bimwesa ngwabyo bangamba ba Yehova bamo balingileko byuma bimo ha simbu ibalisingile mangana bamwese ngwabo bendekele busunga. (Kusha 24:2, 3, 9; 47:29-31) Munapande kwanuka ngweni nga mulisinga, muli na kulikumiiya ku mesho a Njambi ngweni mwendeka busunga. Munapande kulibwahelesela kukumbulula mu busunga bihula byoshe bibamihula.

Busamba bwetu na Yehova bwapwa bwa seho manene. Ngeci, simbu kanda tulisinge tunapande kulombela na kusinganyekesesa mangana tulisinge na citakutaku ca kujela na kusingimika binangulo bya mu Mbimbiliya. Nga mulisinga ngweni mulinga byuma bimo, co munapande kubilinga.—1 Petu 2:12.