1. Banu ba Yehova balikwatasanene bati mu simbu ya tupositolo?

 YEHOVA mwakana banu bendi cipangi cimo, akatondo ngwendi bacilinge mu ngila inapande. (1 Kori 14:33) Cakumwenako, Njambi atonda ngwendi muzimbu waubwa bawambulule mu kaye koshe. (Mate 24:14) Yehova nana Yesu nzili ya kutwamenena eci cipangi. Co Yesu napanga na nzili mangana eci cipangi cilingiwe mu ngila inapande. Mu simbu ya tupositolo, mubashimbikile bikungulukilo mu mitambela ya kuliseza-seza, bangwile bakulunu mangana batwamenene. (Bili 14:23) Mu Jelusalema, cibunga ca bakulunu cije cambateselele na tupositolo cayongwele byuma bimo bije bibapandele kukabangeya mu bikungulukilo byoshe. (Bili 15:2; 16:4) Baje bakele omu mu bikungulukilo mubononokele bibabalekele, “bikungulukilo byatwaleleleleho kukanyama mu likulahelo na kulibwezelela.”—Bili 16:5.

2. Kushwa lika mu 1919, Yehova natwamenena bati banu bendi na kubana byakulya bya ku sipilitu?

² Yehova natwalelelaho kutwamenena banu bendi kweta na matangwa ano. Kushwa mu 1919, Yesu napangesa cibunga cacindondo ca baka-Krisu bamo ba kubwabesa mangana bamone mucendela cipangi ca kwambulula na kubwahesela baka-kumukabangeya byakulya bya ku sipilitu. a (Luka 12:42) Yehova ali na kubezikisa cipangi cicili na kulinga eci cibunga.—Isaya 60:22; 65:13, 14.

3-4. (a) Aneni cakumwenako cimwesa bubwa bwa kulikwatasana. (b) Bika bitusimutwiya muno mu cilongesa?

³ Kunesi kutukaluwila kulinga mwamubwa cipangi canatwana Yesu ngwe kutwalikwatasanene. (Mate 28:19, 20) Cakumwenako,  ngwe bandolome kubabwahesele ngwabo twambulwile mu myela ili mu citingitingi ca cikungulukilo cetu, ngwe munu na munu akambulwila kwoshe kwashaka. Co ngwe tukambulwila mu myela ya kulifwa simbu yoshe na kujeneka kwambulwila mu myela ikwabo. Kuma kuli bubwa bukwabo butuwana nga tulikwatasana ndi?

⁴ Byuma byalingile Yesu mwakele hano hasi, bimwesa byuma byali na kulinga ha simbu ino mu kukwasa baka-kumukabangeya batwaleleleho kulikwatasana. Muno mu cilongesa, tusimutwiya ha byuma byalingile Yesu nomu muili na kulingila ngoco munga yetu mu kumutembwinina. Tusimutwiya lalo byuma bitwasa kulinga bije bimwesa ngwabyo twakulahela munga ya Yehova.

MUNGA YETU ILI NA KUKABANGEYA MWANJA WA YESU

5. Ngila muka imo itwasa kutembwininamo Yesu? (Iwano 8:28)

⁵ Yesu walilongesele kuli Ishe wa mwilu byakwendeka na byakulinga. Munga ya Yehova nayo ikatembwinina mwanja wa Yesu omwo ikakabangeya bilyendeka Lijwi lya Njambi mu kutukwasa kuzibuka byuma byabibwa nebi byabibi na kututwamenena. (Tandeni Iwano 8:28; 2 Timo 3:16, 17) Simbu yoshe bakatwanukisa kutanda Lijwi lya Njambi na kupangesa bitutanda. Bukwasi muka butuwana nga tukabangeya eci cinangulo?

6. Kutanda Mbimbiliya kutukwasa bati?

⁶ Kuli bukwasi bwakama butuwana nga tulilongesa Mbimbiliya kupangesa mabulu etu. Cakumwenako, twasa kwesekesa biyendeka Mbimbiliya na binangulo bituli na kutambula mu munga. Nga tumona mubinalitombwela byuma bibali na kutuleka mu munga nebi biyendeka Mbimbiliya, tukulahela manene munga ya Yehova.—Loma 12:2.

7. Muzimbu muka wambulwile Yesu, co munga ya Yehova ili na kumutembwinina bati?

⁷ Yesu wambulwile “muzimbu waubwa wa Bumwene bwa Njambi.” (Luka 4:43, 44) Yesu washikile lalo bandongesi bendi ngwendi bambulule bya Bumwene bwa Njambi. (Luka 9:1, 2; 10:8, 9) Ano matangwa, boshe baje banalikwatasana na munga ya Yehova bakambulula muzimbu waubwa nameme bali mu mitambela ya kuliseza-seza, co lalo bali na bipangi bya kuliseza-seza mu munga.

8. Kubezika muka cituli naco?

⁸ Kulekako bakwetu bya Bumwene bwa Njambi kunapu kubezika kwakama! Keti banu boshe banabezika mu ngila ei. Cakumwenako, Yesu mwakele hano hasi katabesele badimona kwambulula byendi. (Luka 4:41) Ano matangwa, munu napande tahi kupwisamo bitondeka simbu kanda ashangumuke kwambulwila hamo na banu ba Yehova. Tumwesa ngwetu twamona kwambulula kupwa kubezika nga twambulula kwoshe-kwoshe kutunasa kukala, co lalo hoshe-hoshe hatwasela kulinga ngoco. Ngwe mwa Yesu, cilengo cetu cinapu kukuna na kushangelela bimbuto bya Bumwene mu bimbunge bya banu.—Mate 13:3, 23; 1 Kori 3:6.

9. Munga ya Njambi ili na kusholola bati lizina lyendi?

⁹ Yesu walekele banu bya lizina lya Njambi. Mu lilombelo lyalombelele kuli Ishe, Yesu wendekele ngwendi: “Njinabasholwela lizina lyobe.”(Iwano 17:26) Mu kukabangeya mwanja wa Yesu, munga ya Yehova inapangesa bingila bya kuliseza-seza mangana ikwase banu kuzibuka lizina lya Njambi. Ngila imo iinalingilamo ngoco inapu kwitila mu Mbimbiliya ya Bisoneka bya Kaye Kakaha. Omu mu Mbimbiliya banelwisa lizina lya Njambi hoshe haje habalisonekele mu bindaka byakulibanga mubasonekele Mbimbiliya. Ei Mbimbiliya banainungulula mu bindaka bya kutubakana 270, ipwe ya  mutunu nambe mutamba wayo. Nga mutala biñanda bya kushongo ha A4 na A5 mu Mbimbiliya ya Toloko ya Lifasi Lelinca, muwana biñanda byabingi byendeka ha kwilwisila lizina lya Njambi mu Mbimbiliya. Ha Majwi a mu Mbimbiliya Abanalumbununa mu Mbimbiliya ya Kaye Kakaha ya Bisoneka bya Cigriki bya Baka-Kristu, nga muya ha lizina lya Yehova muwana bukaleho bukwabo bumwesa ngwabwo lizina lya Njambi linapande kukala mu Bisoneka bya Cigriki bya Baka-Kristu lwa kupwa 237.

10. Bika bitulilongesa ku majwi endekele munakazi umo uje wakala mu lifuti lya Myanmar?

¹⁰ Ngwe mwa Yesu, tushaka kukwasa banu bazibuke lizina lya Njambi. Munakazi umo wa myaka 67 ku Myanmar walilile mwazibukile ngwendi Njambi wakala na lizina. Co wendekele ngwendi: “Olu lukelwo lwakulibanga mu kuyoya kwange kuziba ngwabo Njambi ikeye Yehova. . . . Mwanjilongesa byuma bya seho manene bije kanda njizibeho.” Byuma byaliwanene nabyo ou munakazi bimwesa ngwabyo kuzibuka lizina lya Njambi kwasa kutengulula buyoye bwa banu.

TWALELELENIHO KUKULAHELA MUNGA YA NJAMBI

11. Bakulunu basa kumwesa bati ngwabo banakulahela munga ya Yehova? (Taleni na cikupulo.)

¹¹ Bakulunu basa kumwesa bati ngwabo banakulahela munga ya Njambi? Nga banatambula mashiko, banapande kuwatanda mwamubwa na kulinga mwoshe mubasela kuwapangesa. Cakumwenako, kubesi kutambula lika mashiko aje amwesa mubanapande kwendesela biwano na mwakulombelela, oloni bakatambula lalo mashiko amwesa mwakunyungila bimanga ba Kristu. Nga bakulunu bapangesa mashiko oshe abakatambula mu munga ya Njambi, bandolome na bandokazi baliziba ngwabo Yehova wabazema, co lalo wabaka mbunge.

12. (a) Mwafwa bika tunapande kulikwatasana na baje bali na kututwamenena? (Bahebelu 13:7, 17) (b) Mwafwa bika tunapande kwaka manene mbunge ku bifwa byabibwa bya bandolome baje bali na kututwamenena?

¹² Omwo tutambula mashiko ku bakulunu, tunapande kuwakabangeya na mbunge imo. Nga tulinga ngoco, co kubapwila kwakwasi kulinga mwamubwa cipangi cabo. Mbimbiliya ikatushongangeya kwononoka baje bali na kututwamenena na kulyaka kwisi yabo. (Tandeni Bahebelu 13:7, 17.) Simbu imo kunasa kutukaluwila kwononoka. Mwafwa bika? Mwafwa bakulunu nabo kubapwile ba kulumbunuka. Nga twaka manene mbunge ku tupenga twabo kutubakana ku bifwa byabo byabibwa, tulikwatasana na bitozi betu. Mu ngila muka? Bitozi betu bashaka tusinganyeke ngwetu Njambi kesi na kupangesa munga yendi mu kututwamenena. Ngeci, nga tukala na biyongola bya kuhenga ha bakulunu, twasa kushangumuka kusinganyeka byuma bya kuhenga ha munga na kulikela kuikulahela. Bika bitunapande kulinga mangana tunanguke makuli a bitozi betu na kujeneka kungumuka nawo?

KETI MUTABESE BANU BAMYONOWESE KUKULAHELA MUNGA YA YEHOVA

13. Bitozi ba Njambi baneseka bati kumwesa ngwe munga yendi kuyesi bwino?

¹³ Bitozi ba Njambi bakashaka kumwesa ngwabo byuma byabibwa bili mu munga binapu byabibi. Cakumwenako, Yehova atonda ngwendi tupwe ba kujela ku mubila na mu bilinga na kumulemesa mu ngila yashaka. Nendeka ngwendi munu uje atwalelelaho kulinga byuma byabibi, co lalo katenguluka, kapandele kulikwatasana na cikungulukilo. (1 Kori 5:11-13; 6:9, 10) Tukononoka eli lishiko lya mu Mbimbiliya. Mutukononoka eli lishiko, baka-kutulwisa bakendeka ngwabo kutwashakele  banu, twashaka kusompa banu, co lalo kutwesi kulikwatasana na banu baje bakalingi byuma mu ngila yeka.

14. Kuli iya kukatundu makuli abakabangeya munga ya Njambi?

¹⁴ Nangukeni uje ali na kutulwisa. Satana ikeye ali na kulingisa banu bendeke biñanda bya makuli ha munga ya Yehova. Wapwa “ishe ya makuli.” (Iwano 8:44; Gene 3:1-5) Ngeci, Satana apangesa banu bendi mu kwendeka biñanda bya makuli ha munga ya Yehova. Walingile ngoco mu simbu ya baka-Kristu bakulibanga.

15. Bika bibalingile bantwama ba bulombelo kuli Yesu na bandongesi bendi?

¹⁵ Nameme Muna Njambi Yesu wapwile wa kulumbunuka, co lalo walingile bikomokeso, Satana walikwasesele banu bamo bendeke biñanda bya makuli hali ikeye. Cakumwenako, bantwama ba bulombelo bakele na kuleka banu ngwabo “muka-kuyula badimona” ikeye wanene Yesu nzili yakele na kupangesa mu kutundisa badimona. (Maki 3:22) Yesu mubakele na kumusompesa, bantwama ba bulombelo bamubangeyeye ngwabo washawile Njambi, co lalo bakokweyeye mbunga ya banu mangana bamutsiye. (Mate 27:20) Mu kwita kwa simbu, bandongesi ba Yesu mubambulwile muzimbu waubwa, baka-kubalwisa “bashongangeyeye banu” mangana bayandese baje baka-Kristu. (Bili 14:2, 19) Kaposhi ka Kukengela ka December 1, 1998, kendekele ha mukanda wa Bilinga 14:2, ngwako: “Baje balikwatasanene na Satana kubabyanene lika muzimbu ubambulwile baka-Kristu, bendekele na byuma byabibi hali bakebo mangana banu babyane uje muzimbu na kubazinda.”

16. Tunapande kwanuka bika nga tuziba mizimbu ya makuli?

¹⁶ Satana kalikelele kukwisa banu. Na ano matangwa ali na kutwalelelaho “kungumuna  lifuti-libu lyoshe.” (Kujo 12:9) Nga muziba mizimbu yaibi yendeka ha munga yetu nambe ha bandolome baje bali na kututwamenena, anukeni byuma bibalingile bitozi ba Njambi kuli Yesu na bandongesi bendi. Yesu wendekele ngwendi baka-kulwisa bakayandesa baje bapangela Yehova na kubabangeya biñanda bya makuli. Ebi bikebyo bili na kulingiwa ano matangwa. (Mate 5:11, 12) Kutwasa kukulahela mizimbu ya makuli nga tuzibuka uje ali na kuinena na kulingako bimo mangana keti itungumune. Twasa kulinyungilila bati?

17. Twasa kujenjuka bati ku bukalu bwasa kutunda mu kutaba mizimbu ya makuli? (2 Timothi 1:13) (Taleni lalo cipalo ca “ Bimunapande Kulinga Nga Munatambula Mizimbu ya Makuli.”)

¹⁷ Byaneni mizimbu ya makuli. Kapositolo Paulu wendekele byuma bitunapande kulinga nga tuziba mizimbu ya makuli. Walekele Timothi ngwendi ‘akande banu bamo mangana . . . keti bake mbunge ku biñanda bya makuli’ na ‘kubyana biñanda bya makuli bya kujeneka seho.’ (1 Timo 1:3, 4; 4:7) Mwanike nasa kwambata cuma cili na mazilo na kucaka mu kanwa, oloni mukulunu kasa kulinga ngoco, mwafwa azibuka ngwendi casa kumubinjisa. Tukabyana mizimbu ya makuli mwafwa tuzibuka kuitundilila. Tukatolilila lika ku “majwi amabwa” a busunga.—Tandeni 2 Timothi 1:13.

18. Twasa kumwesa bati ngwetu twakulahela munga ya Yehova?

¹⁸ Tunasimutwiyako lika ha byuma bitatu biili na kulinga munga ya Njambi mu kutembwinina Yesu. Omwo mulilongesa Mbimbiliya, waneniko byuma bikwabo biili na kulinga munga yetu mu kutembwinina Yesu. Kwaseni bakweni mu cikungulukilo nabo bakulahele manene munga ya Yehova. Co twaleleleniho kupangela Yehova mu kulongwa na kutwalelelaho kulikwatasana na munga yendi yali na kupangesa mangana ashulisilile cizango cendi. (Samu 37:28) Tutwaleleleniho kukandelela kuli Yehova ha kubezika cituli naco ca kukala mu munga yendi muje muli banu ba kulongwa baje bakalimwesa cizemo.