1. Bamo bakalizibi bati ha kwendeka na banu baje kubazibuka? (Taleni na cikupulo.)

 HA KUPWA banu ba Yehova, tukambulula mwafwa twazema Tate yetu wa mwilu, co tushaka kukwasa bakwetu mangana nabo bazibuke byendi. Baka-kwambulula babangi bakalikuu cipangi ca kwambulula. Oloni bamo kubesi kulikuwaco. Mwafwa bika? Bamo bakala na shwamwa, co lalo bakalizibi ngwabo keti balongesi bababwa. Bamoco kubesi kuliziba kushubuluka kuya ha binjibo bya banu kwa kujeneka kubalanya. Bakwaboco bakalishoshomwena ngwabo hamo banu babayalumukila. Bekaco kubesi kushaka kulubalesa banu. Nameme aba bandolome na bandokazi bazema Yehova, kukabakaluwila kusimutwiya bya muzimbu waubwa na banu baje kubazibuka. Oloni bazibuka seho yeci cipangi. Co bakacilingi simbu yoshe. Ngeci, bakazibisa Yehova kubwaha!

2. Mwafwa bika kumwapandele kuzeya nga kumwesi na kulikuwa cipangi ca kwambulula?

² Kuma neni simbu imo kukamikaluwila kupwa ba kubwahelela mu cipangi ca kwambulula mwafwa ya byuma bitunendeka helu ndi? Nga mukemwo, co keti muzeye. Kuliziba ngweni kumwasa kupanga mwamubwa eci cipangi kumwesa ngwabo mu ba kulikehesa, co lalo kumushaka ngweni banu bake manene mana kuli yeni. Kumwesa lalo ngwabo kumushaka kulipyakana na banu. Kutundaho, kukwesi munu washaka ngwendi banu bamulubalele, maneneni nga ali na kulingila banu byuma byabibwa. Anukeni ngweni Yehova azibuka bukalu bwoshe bumuli na  kuliwana nabwo, co ashaka kumikwasa. (Isaya 41:13) Muno mu cilongesa tusimutwiya byuma bitanu bitukwasa kuhyana bukalu butunasa kuliwana nabwo na kumona mutwasa kupwila ba kubwahelela mu cipangi ca kwambulula.

TABESENI LIJWI LYA NJAMBI LIMIKANYAMESE

3. Bika byakwasele kapolofweto Jelemiya kwambulwila bakwabo muzimbu?

³ Kusañulu, muzimbu wa kutunda kuli Njambi wakanyamesele bangamba bendi ha simbu ibakele na cipangi cacikalu. Co na matangwa ano ukabakanyamesa. Tusimutwiyeniko ha cakumwenako ca kapolofweto Jelemiya. Walishoshomwenene omwo Yehova wamwanene cipangi ca kwambulula. Jelemiya wendekele ngwendi: “Kunjizibukamo kwendeka, nji mwanike wamundondo.” (Njele 1:6, MBB) Bika byamukwasele apwe wa kusimpa na kwambulula? Byuma byamulekele Yehova bikebyo byamukwasele. Co Jelemiya wendekele ngwendi: ‘Mu mbunge mwalingile ngwe mwashwamene tuhya tuje twakele mu bitsiya byange, co njesekele kulikela, oloni kunjasele.’ (Njele 20:8, 9) Nameme Jelemiya wapandele kwambulwila mu citingitingi ca banu ba kukaluwa, muzimbu wamulekele Yehova ngwendi ambulule wamwanene nzili ya kulinga eci cipangi.

4. Byuma muka byasa kulingiwa nga tutanda Lijwi lya Njambi na kusinganyekesesa ha byuma bitutanda? (Kolose 1:9, 10)

⁴ Muzimbu wa Njambi uje uli mu Lijwi lyendi ukakanyamesa Baka-Kristu. Mwasonekelele cikungulukilo cakele mu Kolose mukanda, kapositolo Paulu wendekele ngwendi kulilongesa busunga kukwasa bandolome bendi ‘bende ngwe muje mwashaka Yehova omwo batwaleleleleho kwima bushuka mu bipangi byoshe.’ (Tandeni Kolose 1:9, 10.) Ebi bipangi byabibwa binambateselela na kwambulula muzimbu waubwa. Nga tutanda Lijwi lya Njambi na kusinganyekesesa ha byuma bitutanda, likulahelo lyetu kuli ikeye likanyama, co lalo tumona seho ya kulekako bakwetu bya Bumwene bwendi.

5. Twasa kulikuwa bati kutanda Mbimbiliya na kulilongesayo?

⁵ Nga tushaka kuwana bukwasi mu Lijwi lya Njambi, kutwapandele kushatozoka omwo tulitanda nambe kulilongesalyo, nambe omwo tusinganyekesesa. Tunapande kulibandeka. Nga mwatanda cisoneka cimo, oloni kumwacizibisisile, co keti muciseze lika ngoco. Mwasa kupangesa Watch Tower Publications Index nambe Buka ya Lipatisiso ya Lipaki za Jehova mangana muwane mubanacilumbunwina. Nga mulibandeka omwo mulilongesa Mbimbiliya,  mulimwena ngweni biñanda bilimo bya busunga. (1 Tesa 5:21) Kukulahela manene Lijwi lya Njambi kumilingisa mulikuwe kulekako bakweni bimunalilongesamo.

LIBWAHESELENI MWAMUBWA KWAMBULULA

6. Mwafwa bika tunapande kulibwahesela mwamubwa cipangi ca kwambulula?

⁶ Nga mulibwahesela mwamubwa, kumulishoshomwena manene nga muli na kwambulwila banu. Yesu wakwasele bandongesi bendi kulibwahesela simbu kanda abatume mu cipangi ca kwambulula. (Luka 10:1-11) Co kupangesa byuma byabalekele kwabalingisile balinge byuma byabingi byabibwa na kupwa ba kubwahelela.—Luka 10:17.

7. Twasa kulibwahesela bati cipangi ca kwambulula? (Taleni na cikupulo.)

⁷ Twasa kulibwahesela bati kwambulula? Tunapande kwaka mbunge ku byuma bitukendeka na kubyendeka mwamubwa mu majwi etu. Kunapu kwa seho lalo kusinganyekesesa mubanasa kukumbulwila banu na kulibwahesela cimweja mutwasa kubakumbulwila. Co nga tuli na kusimutwiya na banu, tunapande kuwa mbunge, kupwa bababotsi na kumwesula nga citaba.

8. Kwesekesa na cakumwenako ca Paulu, baka-Kristu banapu bati ngwe binjaba bya buma?

⁸ Kapositolo Paulu wendekele ngwendi baka-Kristu ‘bali na bufuko mu binjaba bya buma.’ (2 Kori 4:7) Bufuko muka obu? Cipangi ca kwambulula bya Bumwene bwa Njambi cije cobola banu. (2 Kori 4:1) Binjaba bya buma bimanena bika? Bimanena bangamba ba Njambi baje bakambulwila bakwabo muzimbu waubwa. Mu simbu ya Paulu, baka-mingoso bakele na kwambatela byuma bimo bya seho bya kufwa ngwe byakulya, binyu na bimbongo mu binjaba bya buma. Mu ngila imolika, Yehova natwana muzimbu waubwa wa seho uje utunapande kwambulula. Co asa kutwana nzili mangana tutwaleleleho kwambulula ou muzimbu.

LOMBENI YEHOVA AMIKWASE KUPWA BA KUSIMPA

9. Twasa kuhyana bati lyoba lya kutewa banu? (Taleni na cikupulo.)

⁹ Simbu imo tunasa kuzibila banu lyoba nambe kulishoshomwena ngwetu hamo kubatambula muzimbu utubambulwila. Twasa kuhyana bati obu bukalu? Tusimutwiyeniko ha lilombelo libalombelele tupositolo mubabashikile ngwabo kubapandele kwambulula. Kutubakana  kuzibila banu lyoba, balombele Yehova abakwase ‘kutwalelelaho kwendeka lijwi lyendi mu kusimpa.’ Yehova wakumbulwile lilombelo lyabo oho bene. (Bili 4:18, 29, 31) Nga tuziba lyoba kwambulula, tunapande kulomba bukwasi kuli Yehova. Lombeni Yehova amikwase kuhyana lyoba lya kutewa banu na kubamwesa cizemo kwitila mu kubambulwila.

10. Yehova akatukwasa bati tushulisilile cipangi cetu ha kupwa Bakaleho bendi? (Isaya 43:10-12)

¹⁰ Yehova natwangula kupwa Bakaleho bendi, co natukulahesa ngwendi atukwasa kupwa ba kusimpa. (Tandeni Isaya 43:10-12.) Tusimutwiyeniko ha bingila biwana mwakalingilamo ngoco. Yakulibanga, Yesu ali hamo netu simbu yoshe itwambulula muzimbu waubwa. (Mate 28:18-20) Yamucibali, Yehova nana tungelo cipangi ca kutukwasa. (Kujo 14:6) Yamucitatu, Yehova natwana sipilitu yendi ya kujela mangana itukwase kwanuka byuma bitunalilongesa. (Iwano 14:25, 26) Yamuciwana, Yehova natwana bandolome na bandokazi baje basa kutukwasa. Yehova hamolika na bandolome na bandokazi betu batukwasa kupwa ba kusimpa na kutwalelelaho na cipangi ca kwambulula.

AMBULWILENI BANU KWESEKESA NA BUJENE BWABO NA KUKALA NA BIYONGOLA BYABIBWA

11. Twasa kuwana bati banu babangi nga tuli na kwambulula? (Taleni na cikupulo.)

¹¹ Kuma mukalizibi kuzeya nga kumwawanene banu ha njibo imo nambe ha binjibo byabingi ndi? Nga mukemwo, lihuleni ngweni: ‘Bakai kuli?’ (Bili 16:13) ‘Kuma bali ku bipangi ndi? Indi hamo banai na kulandako bimo?’ Nga mumona ngweni kumwasa kubawana ha njibo, co mwasa kweseka kwambulwila mu ngila nambe kuje kukendela banu babangi. Ndolome wa lizina lya Joshua ngwendi: “Njikambulula munjikai ku maketi na kuje kubakemikila bimota.” Ikeye na munakazi wendi Bridget bakawana banu babangi ha binjibo mangwezi na Lyacalumingo mutanya.—Efeso 5:15, 16.

12. Twasa kuzibuka bati bibakulahela banu nambe byuma bibaka mbunge?

¹² Nga banu bamoneka ngwabo kubatambula mwamubwa muzimbu, tondeseseni bibakulahela nambe bishoti bibali nabyo. Joshua na Bridget kakangi bakapangesa matrakiti mubakashangumuka kusimutwiya na banu,  co bakehula cihula cili ha liputa lyakulibanga lya trakiti. Cakumwenako, nga trakiti ya Mbimbiliya Mwaimona Bati? co bashangumuka ngwabo: “Bamo bamona Mbimbiliya kupwa libulu lya Njambi, bamoco bali na biyongola byeka. Yeni mumona bati?” Kulinga ngoco kukabalingisa batwaleleleho kusimutwiya mwamubwa nobo babanawana.

13. Mwafwa bika tunapande kupwa ba kubwahelela nameme banu kubatolilila ku muzimbu utubambulwila? (Provebia 27:11)

¹³ Nameme banu bamo kubatolilila ku muzimbu waubwa, twashulisilila cilengo cetu ca kubambulwila. Bika twendekela ngoco? Mwafwa tunalingi byuma byatonda Yehova na Munendi ngwendi tulinge. Tunabambulwila. (Bili 10:42) Nameme kutuwana banu nambe nga muzimbu utwambulula kubautambula, twasa kupwa ba kubwahelela mwafwa tuzibuka ngwetu tuli na kuzibisa Tate yetu wa mwilu kubwaha.—Tandeni Provebia 27:11.

14. Mwafwa bika tunapande kubwahelela nga mukwetu muka-kwambulula nawana munu ashaka kulilongesa mu citingitingi cetu?

¹⁴ Twasa lalo kubwahelela nga mukwetu muka-kwambulula nawana munu uje natambula mwamubwa muzimbu mu citingitingi cetu. Kaposhi ka Kukengela kamo kesekesele cipangi cetu ca kwambulula, ku cipangi ca kutonda mwanike uje nazimbala. Banu babangi banasa kutonda ou mwanike mu myela ya kuliseza-seza. Co nga nawaniwa, banu boshe babwahelela, keti owo lika namuwana. Mu ngila imolika, boshe mu cikungulukilo bakapangela hamo mu cipangi ca kupwisa banu bandongesi. Tubaboshe tunapande kulinga ngoco mangana twambulwile mu citingitingi cetu coshe. Co tukabwahelela nga kuli umo nashangumuka kukunguluka netu.

AKENI MBUNGE KU CIZEMO CENI KULI YEHOVA NA BAKWENI

15. Kupangesa mukanda wa Mateu 22:37-39 kutukwasa bati tupwe ba kubwahelela mu cipangi ca kwambulula? (Taleni na cikupulo cili ha )

¹⁵ Twasa kubwezelela ku ntwima yetu ya kwambulula nga twaka mbunge ku cizemo cetu kuli Yehova na bakwetu. (Tandeni Mateu 22:37-39.) Acisinganyekeni lika mwakalizibila Yehova mwakatumono tulinga cipangi ca kwambulula nomu banu basa kupwila ba kubwahelela nga banashangumuka kulilongesa Mbimbiliya! Anukeni lalo ngweni baje batambula muzimbu waubwa na kulyangwila kupangela Yehova basa kukayoya myaka yoshe.—Iwano 6:40; 1 Timo 4:16.

16. Twasa kupwa bati ba kubwahelela mu cipangi ca kwambulula nameme tuli lika ha njibo? Aneni byakumwenako.

 ¹⁶ Kuma kuli bimo bili na kumyonowesa kutunda ha njibo ndi? Nga mukemwo, akeni mbunge ku byuma bimwasa kulinga bije bimwesa ngwabyo mwazema Yehova na bakweni. Ha simbu ya mushongo wa COVID-19, ndolome Samuel na ndokazi Dania kubasele kutunda ha njibo. Ha simbu ei yaikalu, bambulwile kupangesa telefoni na mikanda, co batwamenenene bilongesa bya Mbimbiliya ha Zoom. Samuel wambulwilile banu baliwanene nabo ku cipatela ha simbu ibakele na kumusaka mushongo wa kansa. Wendekele ngwendi: “Nga twaliwana na bukalu, twasa kukala manene na bishoti, co likulahelo lyetu lyasa kuzeya. Tunapande kupwa ba kubwahelela omwo tupangela Yehova. Ha simbu ibakele na kuliwana nebi byuma, Dania wawile, co wabulumukile manene. Ngeci, bamukwatele mu cipatela ha bingonde bitatu. Co wapandele kwendela mu citwamo ca kusindumuna ha bingonde 6. Dania wendekele ngwendi: “Njesekele kulinga binjasele, kwesekesa nomu mubyafwililile byuma. Njambulwilile nesi uje wakele na kunjendela na kusimutwiya lalo na baje bakele na kunjinenela byuma ku njibo. Kutundaho, njasimutwiiye mwamubwa ha foni na munakazi uje wakele na kwimanena munga imo ya baka-kusaka.” Samuel na Dania kubasele kulinga byabingi mu cipangi ca kwambulula. Nameme ngoco, balingile bibasele na kupwa ba kubwahelela.

17. Kukabangeya byuma bitunasimutwiya muno mu cilongesa kutukwasa bati?

¹⁷ Esekeni kupangesa byuma byoshe bitanu bitunasimutwiya muno mu cilongesa. Cuma na cuma cinapu ngwe byuma bibakapangesa mu kuteleka byakulya. Nga byuma byoshe bibakapangesa mu kuteleka obyo byakulya babikumbasana mwamubwa, co byakulya bitobala. Kukabangeya byuma bitunasimutwiya kutukwasa nga tuliziba kuzeya, co tupwa ba kubwahelela mu cipangi ca kwambulula.