Cikungulukilo Cabamwesele Cizemo
NDOKAZI Yomara na bishongo bendi ba banalume ba Marcelo na Hiver bakala mu limbo limo lyalindondo, mu lifuti lya Guatemala. Yomara washangumukile kulilongesa Mbimbiliya na Bakaleho. Co mu kwita kwa simbu, bishongo bendi ba banalume nabo bashangumukile kulilongesa Mbimbiliya. Oloni kwakele bukalu. Yomara na bishongo bendi bapwa tupuputwa, co lalo kubasele kutanda bisona bya tupuputwa. Ngeci, ndolome uje wakele na kubalongesa Mbimbiliya wakele na kubatandela maparagilafu a mu libulu libakele na kulilongesa na mavesi a mu Mbimbiliya.
Co lalo, bakele na kuliwana na bukalu bukwabo ku biwano bya cikungulukilo. Kubasele kwenda bungenzi bwa minutu 40 likalyabo, bwa kuya ku Njibo ya Bumwene ije yakele mu muyehi. Bandolome babwahesele ngwabo babambate-ambate na kubatwala ku biwano byoshe. Mubashangumukile kwendeka biñanda mu sikola bandolome na bandokazi bakele na kubakwasa kulibwahesela mangana bakwate bije biñanda mu mutwe na kukabyendeka.
Mu May 2019, bashangumukile kulingila biwano bya cikungulukilo mu limbo lyabo. Co lalo ha simbu oyo ndolome umo na munakazi wendi baje bapwa ba painiya ba simbu yoshe bajalukilile mwimbo lyabo. Nameme kubazibukile kutanda nambe kusoneka bisona bya tupuputwa, oloni bashakele kulongesa Yomara na bishongo bendi kutanda na kusoneka bisona bya tupuputwa.
Marcelo ali na kukumbulula ku biwano bya cikungulukilo
Munima ya bingonde byabindondo lika, ou ndokazi na bishongo bendi babali bashangumukile kutanda mwamubwa bisona bya tupuputwa, co oku kwabakwasele bakole ku sipilitu. a Ha simbu ino Yomara, Marcelo na Hiver banapu bapainiya ba simbu yoshe. Marcelo co napu muka-kupangela. Banazezama na bipangi bya ku sipilitu mu calumingo coshe. Ntwima yabo mu bipangi bya kusipilitu ili na kulingisa bakwabo babatembwinine.
Yomara na bishongo bendi bali na kukandelelako manene ku bukwasi bwa bandolome na bandokazi mu cikungulukilo. Yomara ngwendi: “Kushwa bene hatwaliwanene na Bakaleho lwakulibanga, banatwalelelaho kutumwesa cizemo ca busunga ca baka-Kristu.” Marcelo co ngwendi: “Tuli na babusamba bababwa mu cikungulukilo, co lalo twabwahelela mwafwa tuli mu naanga ya bandolome na bandokazi baje balizema umo na mukwabo mu kaye koshe.” Yomara na bishongo bendi banabandamena kukalimwena Yehova mwakatengulula kano kaye kukapwisa paradaisi.—Myaso 37:10, 11; Isaya 35:5.
a Broshuwa ya mutwe wa Learn to Read Braille banaibwahesela kukwasa tupuputwa nambe baje kubamono mwamubwa balilongese kutanda na kusoneka mu ndaka ya tupuputwa.
