1. Buyoye bwetu bwapwa bati bwa seho kuli Yehova?

 ACISINGANYEKENI ngweni kabusamba keni amyana njibo. Njibo yaco ili na kunyokowa, co lalo yakwakunyuka. Nameme ngoco ei njibo baitungile na bimbongo byabingi manene. Ngeci, twakulahela ngwetu mukandelela manene ha kumyana ei njibo, co muinyungilila mwamubwa. Mu ngila imo lika, Yehova natwana kuyoya kuje kunapu bwana bwa seho. Yehova namwesa ngwendi kuyoya kwetu kwapwa kwa seho manene ha kutwana munendi kupwa ndando ya kutupatula ku bubi.—Iwano 3:16.

2. Mukanda wa 2 Korinte 7:1 umwesa ngwawo Yehova atonda tulinge bika?

² Yehova ikeye muka-kwana kuyoya. (Myaso 36:9) Kapositolo Paulu nendi wakulahelele ngoco mukemwo wendekele ngwendi: “Mwafwa ya ikeye, tuli na kuyoya, tuli na kwenda, co kutuli.” (Bili 17:25, 28) Ngeci, kunapande kwendeka ngwetu kuyoya kwetu kwapwa bwana bwa kutunda kuli Njambi. Akatwana byuma byabibwa bitutonda bije bitukwasa tutwaleleho kuyoya. (Bili 14:15-17) Yehova kesi kupangesa bikomokeso mu kutunyungilila ha simbu ino. Oloni ashaka ngwendi tweseke mutwasela mwoshe kutwalelelaho kunyungilila bukangule bwetu na kumupangela. (Tandeni 2 Korinte 7:1.) Mwafwa bika tunapande kunyungilila bukangule bwetu na kuyoya kwetu, co twasa kulinga bati ngoco?

3. Mwafwa bika tupande kweseka mutwasela mwoshe kupwa ba kulikangula ku mubila?

³ Tunapande kweseka mutwasela mwoshe kupwa ba kulikangula, mwafwa kulinga ngoco kutukwasa tupangele Yehova na nzili yetu yoshe. (Maki 12:30) Twashaka ngwetu ‘mibila yetu ipwe mulambu wa kuyoya, wa kujela, uje watambula Njambi’ mukemwo tukeseka mutwasela mwoshe kujeneka kulinga byuma bije bitubabalesa.  (Loma 12:1) Nameme tweseka mutwasela mwoshe kulinga byuma bije bitukwasa tulikangule, kukulumbununa ngwabo kutubinji. Oloni tukeseka mutwasela mwoshe kunyungilila bukangule bwetu, mwafwa tushaka kumwesa kukandelela kuli Tate yetu wa mwilu uje natwana kuyoya.

4. Bika byashakele kulinga Mwene Devidi?

⁴ Mwene Devidi wamwesele byamulingisile amone kuyoya kupwa bwana bwa seho bwa kutunda kuli Njambi, mwasonekele ngwendi: “Bikajo uwanaho ha kutsa kwange? Seho mukajo ukawanaho nga njitsa? Kuma batsi basa kukushangazala ndi?” (Myaso 30:9) Hamo Devidi wasonekele awa majwi te ali muyeni na kutsa. Washakele kutwalelelaho kuyoya na kupwa wa kulikangula mangana atwalelelaho kupangela Yehova. Omu mukemwo mutukalizibila tubaboshe.

5. Byuma muka bitwasa kulinga nameme twakulubala nambe tuli na kubinja manene?

⁵ Kubinja na kukulubala kunasa kutwonowesa kulinga byuma ngwe mutwakele na kubilingila kunima? Ngeci twasa kulubala na kuziba busiwa. Oloni kutwapandele kuzeya na kwecelela kunyungilila mwamubwa mibila yetu. Mwafwa bika? Nameme tukulubale nambe kubinja, twasa kutwalelelaho kupangela Yehova ngwe mwalingile Mwene Devidi. Kuzibuka ngwetu Yehova watwaka mbunge nameme kutwalumbunukile kukatuzembeleka. (Mate 10:29-31) Nameme tunatsi akashungwiya kutusangula. (Yombi 14:14, 15) Ngeci ha simbu ituli na kuyoya tunapande kweseka mutwasela mwoshe kunyungilila bukangule bwetu na kuyoya kwetu.

6. Yehova ashaka ngwendi tulinge bika kutalesa ku byuma bitulya nambe bitunwa?

⁶ Nameme Mbimbiliya kuyapwile libulu lije limwesa bitunapande kulya nambe mutunapande kunyungila mibila yetu, oloni imwesa mwakamwena ebi byuma Yehova. Cakumwenako, natunangula ngwendi ‘tulinyungilile ku byuma byabibi bije byasa kubiisa mibila yetu.’ (Kwambu 11:10) Mbimbiliya imwesa ngwayo kutwapandele kulya manene nambe kunwa manene bwala, mwafwa ebi byuma byasa kwaka bukangule bwetu mu bushonde nambe kututsiya. (Visi 23:20) Yehova ashaka ngwendi tukale na mbunge ya kulibindika omwo twangula cifwa na bwingi bwa byakulya na byuma bitunwa.—1 Kori 6:12; 9:25.

7. Cinangulo cili ku mukanda wa Visimo 2:11, citukwasa bati twangule mwamubwa bya kulinga kutalesa ku bukangule bwetu?

⁷ Nga tupangesa mwamubwa cashu cetu ca kusinganyeka omwo twangula bya kulinga, co tumwesa ngwetu twakandelela manene kuli Njambi uje natwana kuyoya. (Myaso 119:99, 100; tandeni Visimo 2:11.) Cakumwenako, twangula mwamubwa byuma bitulya. Nga twazema cakulya cimo oloni tuzibuka ngwetu nga tucilya citubinjisa, co tunapande kwecela kulya cije cakulya. Co lalo tumwesa ngwetu tuli na kupangesa mwamubwa cashu cetu ca kusinganyeka nga tukala na simbu yaingi ya kulala, kukala na simbu ya kulinga bweho bwa kukanyamesa mubila ha litangwa na litangwa, kujwela simbu yoshe na kujelesa ha binjibo byetu.

8. Mbimbiliya yamwesa bati ngwayo Yehova ashaka ngwendi twake manene mbunge ku kulinyungilila?

⁸ Yehova wanene Baisalele mashiko aje abakwasele balinyungilile ku bimonde mubakele ku na kupanga nambe ha njibo. (Kutu 21:28, 29; Kwitu 22:8) Munu uje watsiile mukwabo kwa kujeneka kuzibuka, waliwanene na bukalu bwakama. (Kwitu 19:4, 5) Mashiko amwesele ngwawo munu uje watsiile mbututu uje kanda asemuke kwa kujeneka kuzibuka bakele na kumwana kashitiko. (Kutu 21:22, 23) Bisoneka bimwesa  mwamubwa ngwabyo Yehova ashaka ngwendi twake manene mbunge ku kulinyungilila.

9. Byuma muka bitunapande kulinga mangana twase kulinyungilila ku bimonde? (Taleni na bikupulo.)

⁹ Tumwesa ngwetu twakandelela kuli Njambi ha kutwana kuyoya nga tulinyungilila ha simbu ituli ha binjibo byetu nambe ku bipangi. Cakumwenako, tunapande kumbila byuma bije kutwesi na kupangesa bya kufwa ngwe byuma bije bibulumuna nambe bumbanda buje butsiya. Tunapande kulinga ngoco mu ngila ije kuyasa kukobelesa bakwetu mu bukalu, co lalo kutwapandele kubyaka kuje kubasa kweta banike. Nga twabweke tuhya nambe tuli na kutupwisa mema nambe nga twashwameka bikwata bya malaiti bije byasa kunena tuhya, co kutwapandele kubiseza kwa kujeneka munu abitala. Kutwapandele kwendesa munyau oku tunanu bumbanda buje bwasa kutwonowesa kwendesa mwamubwa nambe nga tunanu manene bwala nambe nga tunajuka manene. Co lalo, kutwapandele kukwata foni oku tuli na kwendesa munyau.

10. Bika bitunapande kulinga simbu kanda tuliwane na bukalu bwakama nambe nga twaliwana nabwo?

¹⁰ Bisimbu bimo kutwasa kwonowesa byuma bimo kulingiwa. Cakumwenako, kutwasa kwonowesa  bukalu bwa kulizila, mishongo ya kulitambwisa nambe bukenya. Oloni nga bukalu bwa cifwa eci bulingiwa tunasa kwoboka nga twononoka mubatuleka ngwabo tutewe kuje kuli na kwija obu bukalu nambe kwononoka mashiko eka abatuleka baka-fulumende. (Loma 13:1, 5-7) Bukalu bumo tunasa kulibwaheselabwo cimweja simbu kanda busholoke. Ngeci kunapu kwa seho kutolilila ku byuma bibatuleka baka-fulumende bije bitukwasa tulibwahesele mwamubwa bukalu. Cakumwenako, tunasa kutulika mema atwasa kupangesa nga kunasholoka bukalu na byakulya bije kubyesi kubihya bwasi na bumbanda bumo.

11. Nga kutwakala kusholoka mushongo wa kulitambwisa, tunapande kulinga bika?

¹¹ Bika bitunapande kulinga nga mushongo wa kulitambwisa uli na kujalakana ku mutambela kutwakala? Nga baka-fulumende batwana mashiko a kufwa ngwe kutana ku maboko, kujeneka kulishwenya manene na bakwetu, kuzala ma masiki na kukala kwa likalyetu, co tunapande kwononoka awa mashiko. Nga tulinga ngoco, co tumwesa ngwetu twakandelela manene kuli Njambi ha kutwana kuyoya.

12. Cinangulo cili ku mukanda wa Visimo 14:15, citukwasa bati twangule mwamubwa biñanda bitunapande kukulahela nga kwasholoka bukalu?

¹² Ha simbu ya bukalu tunasa kuziba mizimbu ya makuli kutundilila ku babusamba betu, banu batwatunga nabo, nambe ha intaneti. Kutwapandele kutolilila ku ‘cuma coshe-coshe cituziba’ oloni tunapande kutolilila ku byuma bibatuleka baka-fulumende nambe baka-cipatela. (Tandeni Visimo 14:15.) Bandolome ba mu Cibunga ca Kutwamenena na maofisi a munango bakatondesesa mwamubwa biñanda simbu kanda batuleke mutunapande kulingila biwano bya cikungulukilo na cipangi ca kwambulula. (Hebe 13:17) Nga twononoka bibatuleka, co tunyungilila bakwetu na kulinyungilila yetu babenya. Co lalo tulingisa banu bakale na biyongola byabibwa ha Bakaleho ba Yehova.—1 Pita 2:12.

13. Twasa kumwesa bati ngwetu twakandelela ku kuyoya kwanatwana Njambi nga bashaka kutwaka maninga?

¹³ Banu babangi bazibuka ngwabo Bakaleho ba Yehova bamona maninga kupwa a seho manene. Tumwesa ngwetu tuli na kukabangeya lishiko lya Yehova lije lyendeka ha maninga nga tubyana kutwaka maninga nameme nga kwasholoka bukalu buje butondeka kutwaka maninga. (Bili 15:28, 29) Nameme ngoco, kubyana kutwaka maninga kukulumbununa ngwabo twashaka kutsa. Oloni kumwesa ngwabo twakandelela ku kuyoya kwanatwana Njambi. Ngeci, tukashakazeka bingila byeka bya kutusakelamo kwa kujeneka kutwaka maninga.

14. Twasa kutepulula bati ku mishongo ije ya kulinga kuisaka kubanga batutabule?

¹⁴ Nga tunyungilila mwamubwa bukangule bwetu mu kulinga byuma bitunasimutwiya muno mu cilongesa, co tunasa kutepulula ku kubinja mishongo yakama ije yakulinga kutusaka kubanga kututabula nambe kupangesa bingila byeka bya kulitila. Co lalo nga tunyungilila bukangule bwetu, nameme tubinja mushongo uje utonda kututabula tanasa kwola bwasi. Tunasa lalo kutepulela ku mishongo ije yakulinga kuisaka kubanga batutabule nga tutulika mwamubwa byuma bije binasa kutubulumuna ipwe ku binjibo byetu nambe ku bipangi nambe nga twononoka mashiko a ha tapalo.

15. (a) Mwafwa bika kwapwa kwa seho kwambata kadi yetu ya kubyana kutwaka maninga haje hali biñanda bya ololo? (Taleni na cikupulo) (b) Ngwe mutunamwena mu vidio, twasa kwangula bati sakesi yaibwa kutalesa ku maninga?

¹⁵ Tukashulisilila kadi ya kubyana kutwaka maninga na kuyambata kwoshe kutuya, mwafwa twamona bwana bwa kuyoya kupwa bwa seho  manene. b Ei kadi ikamwesa biyongola byetu kutalesa ha kutwaka maninga na bingila byeka bya kutusakelamo. Kuma ha kadi yeni hali biñanda bya ololo ndi? Nga mushaka kushulisilila ei kadi nambe kutengululako biñanda bimo bili ha kadi imuli nayo, co keti mu kwate-kwate ku masinde. Kusonekela cimweja mutushakela ngwetu batusake kutukwasa batusake bwasi, mwafwa simbu kuibihila ku kulumbunwina bandotolo mubanapande kutusakela. Co lalo kulinga ngoco kukwasa bandotolo batwane bumbanda bunapande. c

16. Bika bitunapande kulinga nga kutuzibuka mwamubwa mwa kushulisilila kadi ije ibindika kutwaka maninga?

¹⁶ Ipwe tu banike nambe tu bakulunu tubaboshe twasa kuliwana mu monde nambe kubabala. (Kwambu 9:11) Ngeci, tumwesa ngwetu tubakunyanyama nga tushulisilila kadi ya kubyana kutwaka maninga simbu kanda tuliwane na bukalu. Nga kumuzibuka mwamubwa mwakushulisilila ei fomu, co ihuleni bakulunu mu cikungulukilo mangana bamikwase. Nameme bazibuka mwamubwa mwakushulisilila ei kadi, oloni yeni babenya munapande kulyangwila byakulinga. (Gala 6:4, 5) Oloni basa kumikwasa muzibisise mwamubwa biñanda biliho na kumikwasa omwo mushulisilila ei kadi.

17. Twasa kumwesa bati ngwetu twapwa baka-kuzibisisa omwo twangula bya kulinga kutalesa ku bukangule bwetu?

¹⁷ Citaku-taku cetu cibanalongesa mwamubwa kupangesa Mbimbiliya cikeco cikatukwasa kukala na bukangule bwabubwa na kwangula sakesi inapande. (Bili 24:16; 1 Timo 3:9) Omwo twangula byakulinga na kubisimutwiya na bakwetu, tunapande kwanuka cinangulo cili ku mukanda wa Filipu 4:5, uje wendeka ngwawo: “Kuzibisisa kwetu kusholoke ku banu boshe.” Nga tupwa baka-kuzibisisa, co kutulishoshomwena manene ha bukangule bwetu simbu yoshe, co lalo kutulingisa bakwetu bangule byuma bya kulifwa nebi bitunangula yetu kutalesa ku bukangule. Twazema na kusingimika bandolome na bandokazi betu nameme byuma bibanangula binaliseze nebi bitunangula yetu.—Loma 14:10-12.

18. Twasa kumwesa bati ngwetu twakandelela manene ha kutwana kuyoya?

¹⁸ Tumwesa ngwetu twakandelela kuli Yehova uje natwana kuyoya nga tulinyungilila mwamubwa na kutwalelelaho kulinga mutwasela mwoshe kumupangela. (Kujo 4:11) Nameme ha simbu ino tuliwana na bukalu na mishongo. Oloni keti mukemwo mwayongwelele Ishamatanga yetu. Ngeci, ololo atundisako kutsa na kubabala na kutwana kuyoya kwa myaka yoshe. (Kujo 21:4) Oloni ha simbu ino twabwahelela mwafwa tuli na kutwalelelaho kuyoya na ku pangela Tate yetu wa mwilu, Yehova!