1. Yesu walekele bika bandongesi bendi kutalesa ku kukotoka kwa kaye, co wabanangwile ngwendi balinge bika?

 SIMBU kanda Yesu atse, bandongesi bendi bawana bamwihwile ngwabo: “Cizibukiso muka cikamwesa . . . mamaneselelo a katumameno ka myaka ino?” (Mate 24:3) Hamo bandongesi ba Yesu bashakele kuzibuka simbu ibakanyongesa Julusalema na tempele. Yesu mwabakumbulwile kendekele lika bya kunyonga kwa Jelusalema na tempele, oloni wendekele na “mamaneselelo a katumameno ka myaka” ino. Kutalesa ku kukotoka kwa kaye Yesu wendekele ngwendi: “Naumo wahi azibuka lije litangwa nambe simbu, ipwe tungelo mwilu nambe Mwana, kubanga Tate lika.” Kutundaho, Yesu wanangwile bandongesi bendi ngwendi, ‘batwaleleleho kutala’ na ‘kutwalelelaho kutona.’—Maki 13:32-37.

2. Mwafwa bika baka-Kristu ba kulibanga bapandele kutwalelelaho kupwa ba kutona?

² Baka-Kristu ba kulibanga ba Bajuda nabo batwaleleleho kupwa ba kutona, mwafwa bazibukile ngwabo kulinga ngoco kwobola myonyo yabo. Yesu walekele baka-kumukabangeya byuma bikabakwasa kunanguka simbu ibakanyongesa Jelusalema na tempele. Wendekele ngwendi: “Mumukamona Jelusalema banaizengeleka maswalale, co muzibuke ngweni kunyonga kwayo kuli muyehi.” Ha simbu ije baka-Kristu bapandele kwononoka majwi a Yesu na kushangumuka “kutewela ku minkinda.” (Luka 21:20, 21) Baje bononokele majwi a Yesu, bobokele omwo Baloma banyongesele Jelusalema.

3. Bika bitusimutwiya muno mu cilongesa?

 ³ Netu tuli na kuyoya mu simbu ya ku kukotoka. Ngeci, tunapande kutwalelelaho kukala na bisinganyeka byabibwa na kutwalelaho kupwa ba kutona. Muno mu cilongesa tusimutwiya mutwasa kukela na bisinganyeka byabibwa omwo tukenga mizimbu imwesa byuma bili na kulingiwa mu kaye, nomwo mutunapande kupwila bakunyanyama na kupangesa mwamubwa simbu itunasala nayo.

4. Mwafwa bika tunapande kuzibuka omwo byuma bili na kulingiwa mu kaye bishulisililamo bupolofweto bwa mu Mbimbiliya?

⁴ Kuli byuma bitulingisa tushake manene kuzibuka byuma bili na kulingiwa mu kaye mubishulisililamo bupolofweto. Cakumwenako, Yesu wendekele byuma bije bitukwasa tuzibuke ngwetu kukotoka kwa kaye ka Satana kuli muyehi. (Mate 24:3-14) Kapositolo Pita watushongangeyeye ngwendi tunanguke mubuli na kulishusilila bupolofweto, mangana tutwaleleho kukanyamesa likulahelo lyetu. (2 Pita 1:19-21) Mukanda wa mamaneselelo wa mu Mbimbiliya ushangumuka na majwi a kwendeka ngwawo: “Kujombolola kuje kwajombolwele Yesu Kristu, kuje kwamwanene Njambi mangana amwese bindungo bendi byuma bilingiwa ololo.” (Kujo 1:1) Twashaka kumona byuma bili na kulingiwa mu kaye na kumona mubili na kulishulisililamo bupolofweto bwa mu Mbimbiliya. Co tunasa kushungwiya kulekako bakwetu byuma bili na kulingiwa.

5. Bika kutwapandele kulinga, Oloni bika bitunapande kulinga? (Taleni na bikupulo.)

⁵ Mutusimutwiya ha bupolofweto bwa mu Mbimbiliya kutwapandele kuzambwila kwendeka ngwetu, byuma binalingiwa binashulisilila bupolofweto bumo. Mwafwa bika? Mwafwa kutushaka kwendeka byuma bije binasa kumanesa likwatasano mu cikungulukilo. Cakumwenako, tunasa kuziba bantwama ba mafuti bendeka mubanayongwela kumanesela bukalu bumo mangana banene kwoloka na kumanesa bushonde mu lifuti limo. Kutwapandele kuzambwila kwendeka ngwetu majwi abanendeka ashulisilila bupolofweto buli ku mukanda wa 1 Tesalonika 5:3, nga biñanda byabiha bili mu mabulu etu kubyendeka ngoco. Nga twendeka byuma bibanendeka mu mabulu etu, co tukwasa cikungulukilo cilikwatasane na kukala na “bisinganyeka bimo.” —1 Kori 1:10; 4:6.

6. Bika bitulilongesa ku mukanda wa 2 Pita 3:11-13?

⁶ Tandeni 2 Pita 3:11-13. Kapositolo Pita natuleke bitunapande kusimutwiya ha bupolofweto bwa mu Mbimbiliya. Natushongangeya ngwendi tunapande, “kwanuka kukalako kwa litangwa lya Yehova.” Mwafwa bika? Keti ngwabo mwafwa tushaka kuzibuka “litangwa nambe simbu” yakanena nzita ya Alamagidoni. Oloni tushaka kupangesa mwamubwa simbu itunasala nayo mu kukala na “futisi ya kujela na mu bilinga bya kulyana kupangela Njambi.” (Mate 24:36; Luka 12:40) Mu ngila ikwabo, twasa kwendeka ngwetu, tushaka kukala na futisi yaibwa na kupangela Yehova mwafwa twamuzema. Oloni tunapande kupwa ba kunyanyama mangana tulinge ngoco.

7. Twasa kumwesa bati ngwetu twapwa tubakunyanyama? (Luka 21:34)

⁷ Yesu kalekele bandongesi bendi ngwendi bake lika mbunge ku byuma bije bishulisilila bupolofweto, oloni wabalekele ngwendi banapande kupwa ba kunyanyama. Yesu wamwesele mwamubwa ei simpi ku mukanda wa  Luka 21:34. (Tandeni.) Wendekele ngwendi: “Nyanyameni.” Munu wa kunyanyama akananguka byuma bije byasa kutsiya busamba bwendi na Yehova na kubijenjuka. Kulinga ngoco kumukwasa atwaleleho kuzema Njambi.—Visi 22:3; Juda 20, 21.

8. Kapositolo Paulu wanangwile baka-Kristu balinge bati?

⁸ Kaposito Paulu wanangwile baka-Kristu ngwendi bapwe ba kunyanyama. Cakumwenako, walekele baka-Kristu ba ku Efeso ngwendi: “Nyanyameni mumwendela mangana keti mwende ngwe banu ba kujeneka mana, oloni mwende ngwe banu bali na mana.” (Efeso 5:15, 16) Satana ashaka kumanesa busamba bwetu na Yehova, mukemwo Mbimbiliya yatunangula ngwayo ‘tutwaleleleho kunanguka cizango ca Yehova,’ mangana twase kulinyungilila ku miheto ya Satana.—Efeso 5:17.

9. Bika bitukwasa tunanguke cizango ca Yehova?

⁹ Mbimbiliya kuyatulekele byuma byoshe bije byasa kumanesa busamba bwetu na Yehova. Tunapande kwangula mwamubwa byakulinga nameme kukwesi lishiko mpundu lya mu Bisoneka lije lituleka bitunapande kulinga. Tunapande kunanguka “cizango ca Yehova” mangana twangule mwamubwa bya kulinga. Twasa kulinga ngoco nga tutanda Mbimbiliya kushwa kumo na kusinganyekesesa ha byuma bitutanda. Kuzibuka cizango ca Yehova kutukwasa ‘tusinganyeke ngwe Kristu’ na kwenda ngwe ‘banu baje bali na mana’ nameme kukwesi lishiko mpundu lituleka byuma bitunapande kulinga. (1 Kori 2:14-16) Bisimbu bimo kukapu kwakwasi kuzibuka bitunapande kulinga, oloni bisimbu bimo kukatukaluwila kulinga ngoco.

10. Bifwa muka kutwapandele kukala nabyo?

¹⁰ Kuli byuma bimo kutwapandele kulinga. Ebi byuma binapu kulipasula, kunwa manene bwala, kulya manene, kupangesa majwi amabi, kukenga mafilimu a bukenya, kukenga bilinga bya bukwizi na byuma bikwabo bwa kulifwa nebi. (Myaso 101:3) Liyabolo uje wapwa citozi cetu ali na kushakazeka bingila bya kupangesa mu kumanesa busamba bwetu na Yehova. (1 Pita 5:8) Nga kutupu ba kutona Satana asa kukuna bisinganyeka byabibi mu bimbunge byetu bya kufwa ngwe cipululu, kujeneka kupwa ba kulongwa, nuna, cizindo, kulishasha na kukala na nkulundundu. (Gala 5:19-21) Ha kulibanga tunasa kuliziba ngwetu kukala nebi bifwa kukutukobelesa mu bukalu. Oloni nga kutubitundisa bwasi co bikola na kutukobelesa mu bukalu.—Jems 1:14, 15.

11. Bukalu muka buje kutwasa kunanguka bwasi butunapande kujenjuka, co mwafwa bika?

¹¹ Bukalu buje kutwasa kunanguka bwasi, butunapande kujenjuka inapu kulikwatasana na banu bababi. Tusimutwiyeni ha ñanda ei. Twendeke ngwetu mukapanga na munu uje kapwile Mukaleho wa Yehova. Mumumwesa ngozi na kumukwasa, mwafwa mushaka ngweni amone Bakaleho mu ngila yaibwa. Co simbu imo munasa kulila hamo nendi byakulya bya mutanya. Mukwita kwa simbu mushangumuka kulinga ngoco kushwakumo. Kukapwa muje, uje munu imukapanga nendi ashangumuka kupangesa endekesi yaibi, oloni ha kulibanga kumushaka byendeka. Litangwa limo amilanya mukanwine hamo nendi tubinyu tumo, co neni mwataba. Kukapwa muje, mushangumuka kumona byuma ngwe mwakabimwena uje mukweni imukapanga nendi. Munima ya simbu yaindondo, neni mushangumuka kulinga byuma byakalingi. Nameme tunapande kumwesa ngozi na kusingimika banu, oloni tunapande kwanuka ngwetu banu batukalikwatasana nabo basa kutushongangeya kulinga byuma byabibwa  nambe byabibi. (1 Kori 15:33) Yesu watunangwile ngwendi tupwe ba kunyanyama, kulinga ngoco kutukwasa tujeneke kulikwatasana na banu baje kubesi kukabangeya mashiko a Yehova. (2 Kori 6:15) Co lalo kutukwasa tunanguke bukalu na kubujenjuka.

12. Bandongesi ba Yesu bapandele kulinga bika mubakele na kubandamena kukotoka kwa kaye?

¹² Yesu kashakele ngwendi bandongesi bendi batumame lika, oloni washakele ngwendi bazezameko na bipangi bimo omwo babandamena kukotoka kwa kaye. Ngeci wabanene cipangi cibapandele kulinga. Wabashikile ngwendi bambulule muzimbu waubwa “mu Jelusalema na mu Judeya mwoshe na mu Samaliya na ku mitambela ya kulako ya lifuti-libu.” (Bili 1:6-8) Eci capwile cipangi cakama manene. Bapangesele mwamubwa simbu yabo mubapangele eci cipangi cabanene Yesu.

13. Mwafwa bika tunapande kupangesa mwamubwa simbu yetu? (Kolose 4:5)

¹³ Tandeni Kolose 4:5. Tupwa ba kunyanyama nga tusinganyekesesa mwamubwa mutuli na kupangesela simbu yetu. “Lubinda” lukaija ku munu woshe-woshe. (Kwambu 9:11) Ngeci twasa kutsa ha simbu yoshe-yoshe.

14-15. Twasa kupangesa bati mwamubwa simbu yetu? (Bahebelu 6:11, 12) (Taleni na cikupulo.)

¹⁴ Twasa kupangesa mwamubwa simbu yetu nga tuipangesa mu kulinga cizango ca Yehova na kukanyamesa busamba bwetu nendi. (Iwano 14:21) Tunapande ‘kwimana mbe keti tushwene simbu yoshe tukale na byabingi bya kulinga mu cipangi ca Mwata.’ (1 Kori 15:58) Nga tulinga ngoco, co kutulibeye omwo kukotoka kwa kaye kukaija nambe nga tutsa ha simbu ino.—Mate 24:13; Loma 14:8.

¹⁵ Yesu ali na kutwalelelaho kutwamenena bandongesi bendi mu cipangi ca kwambulula bya Bumwene bwa Njambi mu kaye koshe. Nashulisilila byuma byakulahesele. Yesu akatulongesa mwakulingila cipangi ca kwambulula kupangesa mabulu etu na biwano bya kucikungulukilo, co lalo natwana byuma byoshe bitutonda bije bitukwasa kulinga mwamubwa eci cipangi. (Mate 28:18-20) Tunapande kupanga na nzili eci cipangi cetu ca kwambulula na kulongesa banu na kutwalelelaho kupwa ba kutona omwo tubandamena kukotoka kwa kaye. Nga tupangesa cinangulo cili ku mukanda wa Bahebelu 6:11, 12, co tukala na lilabelelo na “kweta na kushongo.”—Tandeni.

16. Twalyangwila kulinga bika?

¹⁶ Yehova nanoneka laja simbu na litangwa lyakanyongesa kano kaye ka Satana. Olyo litangwa muliketa, likalingisa Yehova akashulisilile byuma byabibwa byanayongola kukatulingila mu kaye kakaha. Simbu imo tunasa kuliziba ngwetu Yehova ali na kwishwala kumanesa kano kaye kakabi. Oloni litangwa lya Yehova ‘kulikeshwala embwe.’ (Hamba 2:3) Ngeci tutwaleleniho ‘kukengelela kuli Shukulu Kalunga’ na ‘kubandamena na kukulahela kuli Njambi uje akatwamena.’—Mika 7:7.