Mbimbiliya inamwesa mwamubwa ngwayo Yehova asa kwendeka byuma bilingiwa kulutwe. (Isaya 45:21) Oloni kuyendekele mwakazibukila byuma bilingiwa kulutwe, simbu yakalingi ngoco nambe byuma byoshe byakazibuka ha ñanda imo. Ngeci, kutuzibuka byuma byoshe byalibungilamo. Oloni kuli byuma bimo bituzibuka.

Simbu imo Yehova akangula byuma byatonda kulinga nameme asa kulinga byuma byoshe byashaka. Yehova asa kupangesa mana endi aje kuwakele na hawalenga mu kwendeka byuma byoshe byashaka bije bilingiwa kulutwe. (Loma 11:33) Ha kuwana ngwe akakwata mbunge mu ngila ya kulumbunuka, asa kwangula kujeneka kuzibuka byuma bilingiwa. Esekeseni Isaya 42:14.

Yehova akalingisa cizango cendi cilingiwe. Ei ñanda inakundama bati cashu cakala naco ca kuzibukila cimweja byuma bilingiwa kulutwe? Mukanda wa Isaya 46:10 ngwawo: ‘Tunde ku mashangumukilo, njendekele cimweja byuma mubikafwa, co kusañulu njendekele ha byuma bije kanda bilingiwe. Njendekele ngwange, “Bisinganyeka byange kubikala, co njikalinga byoshe binjayongola kulinga.”’

Yehova asa kuzibukila cimweja byuma bikalingiwa kulutwe mwafwa ali na nzili ya kulingisa byuma bikaleko. Banu mubakatondo kuzibuka byuma bilingiwa kulutwe, bakalingi byuma bibakwasa kulinga ngoco. Cakumwekako, bakazambwisa filimu mangana bazibuke byuma bili ku shongo. Oloni Yehova keti ngwabo kubanga alinge ngoco. Yehova asa kwangula ngwendi cuma cimo cilingiwe ha simbu yanangula na kulingisa oco cuma cilingiwe nga oyo simbu inete.—Ekizo 9:5, 6; Mate 24:36; Bili 17:31.

Mukemwo mu Mbimbiliya muli majwi a kufwa ngwe ‘njabwahesa’ nambe ‘njayongwele laja’ kutalesa ku byuma byalinga Yehova kulutwe. (2 Vimye 19:25; Isaya 46:11) Awa majwi banawanungulula ha lijwi lije lishaka kulifwa na lijwi lije lilumbununa ‘muka-kumunga.’ (Njele 18:4) Ngecilika muka-kumunga wa citongwe mwasa kumungila cuma cacibwa ha buma, Yehova asa kumunga nambe kulinga byuma byoshe-byoshe mangana ashulisilile cizango cendi.—Efeso 1:11.

Yehova natwana nzili ya kulyangwila byakulinga. Kesi kubwahesela cimweja byuma byaliwana nabyo munu nambe kulingisa banu ba bimbunge byabibwa balinge byuma bije bibakobelesa mu bukalu. Natabesa banu kulyangwila mubashaka kuyoyela, co akashaka ngwendi bangule byuma byabibwa.

Tusimutwiyeni ha byakumwenako bibali. Cakumwenako cakulibanga ca baka-Ninive. Yehova wendekele ngwendi nganda ya Ninive bakainyongesa mwafwa ya bubi bwakelemo. Oloni banu bakele omu mu nganda mubatengulukile, Yehova “kabanyanyamesele ngwe muje mwashakele kulinga.” (Yona 3:1-10) Yehova watengulwile bisinganyeka byendi, co kanene baka-Ninive kashitiko mwafwa bapangesele nzili yabo ya kulyangwila byakulinga na kutenguluka mu busunga mubatolililile ku muzimbu wabalekele Yehova.

Cakumwenako camucibali ca bupolofweto bwa muka-kuhyana wa lizina lya Siluse, uje wapandele kukatundisa Bajuda mu bunzinda mangana bakatungulule tempele ya Yehova. (Isaya 44:26–45:4) Mwene Siluse wa Pelesha washulisilile obu bupolofweto. (Ezela 1:1-4) Oloni Siluse kakele na kulemesa Njambi wa busunga. Yehova wamupangesele kushulisilila obu bupolofweto, oloni kamusindiiye kumulemesa.—Prov 21:1.

Ebi keti bikebyo byuma byoshe bikalingisa Yehova azibuke byuma bilingiwa kulutwe. Kukwesi munu asa kuzibuka byuma byoshe byakasinganyeka Yehova na kulinga. (Isaya 55:8, 9) Oloni byuma bitunazibuka hali Yehova bikanyamesa likulahelo lyetu na kutulingisa tukulahele ngwetu akalingi byuma byabibwa simbu yoshe kwambateselela na byuma byanendeka ngwendi bilingiwa kulutwe.