1. Simbu muka ibakakala bakubwabesa boshe mwilu?

 MYAKA imo kunima, banu ba Yehova kubazibukile simbu ibakaya mwilu baka-Kristu ba kubwabesa ba mamaneselelo. Twasinganyekele ngwetu hamo baka-Kristu bamo ba kubwabesa bakasala hano hasi ha simbu yaindondo munima ya nzita ya Amagidoni. Oloni mu Kaposhi ka Kukengela ka July 15, 2013, twalilongesele ngwetu bakubwabesa boshe bacili hano hasi bakaya mwilu simbu kanda Amagidoni ishangumuke.—Mate 24:31.

2. Bihula muka bitwasa kulihula, co bika bitusimutwiya muno mu cilongesa?

² Yetu bamo hamo tunasa kulihula ngwetu: ‘Bika bikalingiwa ku “bimanga beka” ba Kristu baje bakapangela Yehova mu kulongwa hano hasi ha simbu ya “kayando kakama”?’ (Iwano 10:16; Mate 24:21) Bamo banasa kulishoshomwena ngwabo hamo kubakazibuka byakulinga nambe hamo ngwabo bahi bakabakwasa nambe kubatwamenena omwo bandolome na bandokazi babo ba kubwabesa bakaya mwilu. Tusimutwiyeniko ha byakumwenako bibali bya mu Mbimbiliya bije binasa kubalingisa basinganyeke ngoco. Kutundaho, tusimutwiya ha byuma binapande kutulingisa tujeneke kulishoshomwena.

BYUMA MUKA BIJE KUBIKALINGIWA?

3-4. Byuma muka bibanasa kulishoshomwena bamo, co mwafwa bika?

³ Bamo banasa kulishoshomwena ngwabo hamo bimanga beka bamo bakecela kupangela Yehova omwo kukukakala bandolome ba kubwabesa ba mu Cibunga ca Kutwamenena baje bakabatwamenena. Hamo banasa kuliziba ngoco mwafwa ya mizimbu imo ili mu Mbimbiliya. Tusimutwiyeniko ha byakumwenako bibali. Cakumwenako cakulibanga ca Kapilistu Wahakamwa Yehoyanda. Wapwile munalume wa kulongwa kuli Njambi. Yehoyanda na munakazi wendi Njehoshemba banyungililile Yowashe te acili mwanike na kumukwasa apwe mwene wamubwa, wa kulongwa. Co Yowashe walemesele Yehova na kulinga byuma byabibwa mu simbu yayoyele Yehoyanda. Oloni munima ya kutsa kwa Yehoyanda,  Yowashe washangumukile kulinga byuma byabibi. Watolililile bimyata bababi na kwecela kupangela Yehova.—2 Mizi 24:2, 15-19.

⁴ Cakumwenako camucibali cinapu cakumwenako ca baka-Kristu bayoyele munima ya kutsa kwa tupositolo. Kapositolo Iwano uje wapwile wa mamaneselelo ku tupositolo boshe wamwesele baka-Kristu babangi mwanja waubwa, co wabakwasele bakolese na kutwalelelaho kupangela Yehova mu kulongwa. (3 Iwa 4) Ngwe mubalingilile tupositolo ba Yesu bakwabo ba kulongwa, Iwano wapangele na nzili mu kunyungilila bikungulukilo ku banu baje bakele na kulongesa bilongesa na bilinga bya kuhenga. (1 Iwa 2:18; 2 Tesa 2:7) Oloni Iwano mwatsile, bwingi bwa baje bakele mu cikungulukilo bongumukile nebi bilongesa na bilinga bya kuhenga. Co munima ya myaka yaindondo lika, byajalakanene mu bikungulukilo byoshe.

5. Ei mizimbu ibali, kuyapandele kutulingisa tusinganyeke bika?

⁵ Kuma byuma bitunasimutwiya bimwesa ngwabyo byuma bya kulifwa bikebyo bikalingiwa ku bimanga beka ba Kristu omwo bakubwabesa boshe bakabatwala mwilu ndi? Kuma baka-Kristu ba kulongwa ha simbu oyo bakecela kukabangeya bibanalilongesa ngwe mwalingilile Yowashe nambe kupwa baka-kutengulukila ngwe mubalingilile baka-Kristu babangi munima ya kutsa kwa tupositolo boshe ndi? Embwe! Twakulahela ngwetu nameme bakubwabesa mubakaya mwilu, bimanga beka bakatwalelelaho kulemesa Yehova mu ngila inapande, co Yehova akatwalelelaho kubanyunga. Bika bitulingisa tukulahele ngoco?

KULEMESA KWA BUSUNGA KUKATWALELELAHO

6. Bisimbu muka bitatu bitusimutwiya?

⁶ Bika bitulingisa tukulahele ngwetu kulemesa kwa busunga kukatwalelelaho nameme kuli byuma byabikalu bija kulutwe? Twakulahela ngoco mwafwa ya byuma bitunalilongesa mu Mbimbiliya bije bilingiwa mu matangwa atuli na kuyoya. Simbu ituli na kuyoya inaliseze manene na simbu ibakele na kuyoya Baisalele kusañulu na simbu yateleko munima ya kutsa kwa tupositolo. Tucisimutwiyeniko bikwabo ha bisimbu ebi bitatu: (1) Simbu ibayoyele Baisalele kusañulu, (2) simbu yateleko munima ya kutsa kwa tupositolo, na (3) bisimbu byetu, bije binapu “bisimbu bya kwilwisa byuma byoshe ngwe mubyakelelele hakulibanga.”—Bili 3:21.

7. Mwafwa bika Baisalele ba kulongwa batwaleleleleho kulemesa Yehova mu ngila inapande nameme bimyene na banu babangi balingile byuma byabibi?

⁷ Simbu ibayoyele Baisalele kusañulu. Simbu kanda atse, Mosesa walekele Baisalele ngwendi: ‘Njizibuka ngwange omwo njitsa, mukongumuka na kuseza binjinamilongesa.’ (Kwitu 31:29) Mosesa wanangwile lalo Baisalele ngwendi, nga bapwa baka-kutengulukila, bakabatwala mu bunzinda. (Kwitu 28:35, 36) Kuma awa majwi alishulisilile ndi? Eyo. Ha myaka yaingi, bwingi bwa bimyene bakele na kulinga byuma byabibi, co banu ba Yehova balikwatasanene nabo mu kukundwiya kulemesa kwa makuli. Oku kwalingisile Yehova ane kashitiko Baisalele baje kubapwile ba kulongwa, co katabesele bimyene mu Isalele kuyula lalo. (Ezeki 21:25-27) Oloni Baisalele ba kulongwa basimpile mubamwene ngwabo majwi endekele Yehova alishulisilile.—Isaya 55:10, 11.

8. Mwafwa bika kutwapandele kukomoka kumona ngwetu munima ya kutsa kwa tupositolo kwakele baka-kutengulukila? Lumbununeni.

⁸ Simbu yateleko munima ya kutsa kwa tupositolo. Kuma tunapande kukomoka kumona ngwetu mu cikungulukilo mwakele baka-kutengulukila munima ya kutsa kwa tupositolo ndi? Embwe. Yesu wapolofwetele ngwendi kukakala baka-kutengulukila babangi. (Mate 7:21-23; 13:24-30, 36-43) Kapositolo Paulu, Pita na Iwano boshe balimwenenene ngwabo byuma byapolofwetele Yesu byashangumukile  kulishulisilila mu simbu ibayoyele. (2 Tesa 2:3, 7; 2 Pita 2:1; 1 Iwa 2:18) Munima ya kutsa kwa tupositolo boshe, baka-kutengulukila balibwezelelele mu cikungulukilo. Aba baka-kutengulukila balikwatasanene na Babiloni wakama uje emanena bulombelo bwoshe bwa makuli. Byuma byendekele Yesu byalishulisilile.

9. Simbu ituli na kuyoya yaliseze bati na simbu ibayoyele Baisalele kusañulu na simbu yateleko munima ya kutsa kwa tupositolo?

⁹ “Bisimbu bya kwilwisa byuma byoshe ngwe mubyakelelele hakulibanga.” Simbu yetu yaliseze na simbu ibayoyele Baisalele kunima, na simbu ikwakele baka-kutengulukila babangi munima ya kutsa kwa tupositolo. Twasa kutumbula bati simbu ituli na kuyoya? Tuli na kuyoya mu “matangwa a mamaneselelo” a kano kaye kakabi. (2 Timo 3:1) Oloni Mbimbiliya inamwesa ngwayo hawashangumukilile matangwa a mamaneselelo hakeho hayashangumukilile simbu ya kulitila, ije ipwa yailaha. Co itwalelelaho kukalako kweta noho Bumwene bwa Bumesiya bukalingisa banu boshe kupwa ba kulumbunuka na kutengulula kaye koshe kukapwisa paradaisi. Ei simbu banaitumbula ngwabo “bisimbu bya kwilwisa byuma byoshe.” (Bili 3:21) Co yashangumukile mu 1914. Byuma mukoni byelukile? Yesu bamupwisile Mwene mwilu. Ngeci, Yehova wakele lalo na muka-kuyula uje wamwimanenene ha kupwa swana wa mwene wa kulongwa, Devidi. Nameme ngoco, obu bumwene keti bikebyo lika byuma byanelwisa Yehova. Munima ya simbu yaindondo lika kutunda helwisilile Yehova obu bumwene, wakwasele bangamba bendi hano hasi kumulemesa lalo mu ngila inapande. (Isaya 2:2-4; Ezeki 11:17-20) Kuma kukakala banu bakonowesa kulemesa kwa busunga ndi?

10. (a) Bika biyendekele Mbimbiliya ha kulemesa kwa busunga mu simbu yetu? (Isaya 54:17) (b) Mwafwa bika obu bupolofweto butakamesa?

¹⁰ Tandeni Isaya 54:17. Acisinganyekeseseni ha bupolofweto obu: ‘Kukwesi citwa cibanamilingila cikasa kumibulumuna’! Awa majwi ali na kulishulisilila ano matangwa. Majwi anatako atuzembeleka mwafwa anga acipanga na mu simbu yetu: ‘Bana bobe bakabalongesa kuli Yehova na kubabezikisa na kwoloka. Busunga bukakukolesa. . . . Ukakala mwamubwa, kubakakuyandesa nambe kukuzibisa lyoba.’ (Isaya 54:13, 14) Nameme Satana “njambi wa katumameno ka myaka ino,” kasa kwonowesa cipangi ca kulongesa cibali na kulinga banu ba Yehova. (2 Kori 4:4) Yehova nelwisa kulemesa kwa busunga. Ngeci, kukwesi munu asa kwimika lalo kulemesa kwa busunga. Banu batwalelelaho kulemesa Yehova mu ngila inapande myaka yoshe. Kukwesi citwa cibanatulingila cikasa kutubulumuna!

 BIKA BIKALINGIWA?

11. Bika bitulingisa tukulahele ngwetu bimanga beka kubakabombila kuti omwo bakubwabesa bakaya mwilu?

¹¹ Bika bikalingiwa omwo bakubwabesa bakabatwala mwilu? Anukeni ngweni Yesu napu Kanyungi ketu. Ikeye mutwe wa cikungulukilo ca baka-Kristu. Yesu wendekele ngwendi: “Ntwama yeni umolika, Kristu.” (Mate 23:10) Yesu uje napu Mwene mwilu atwalelelaho kukwasa baka-kumukabangeya mu busunga. Ngeci, baje bakasala hano hasi kubapandele kulishoshomwena nambe kuziba lyoba mwafwa Kristu ikeye akabatwamenena. Oloni kutuzibuka mu kushula mwakatwamenenamo Kristu banu bendi ha simbu oyo. Tucisimutwiyeniko ha byakumwenako bya mu Mbimbiliya bitulingisa tukulahele ngwetu Kristu akatutwamenena mwamubwa.

12. Yehova watwamenenene bati banu bendi (a) munima ya kutsa kwa Mosesa? (b) Eliya mubamwanene cipangi ceka? (Taleni na cikupulo.)

¹² Simbu kanda Baisalele bakobele mu Lifuti lya Cikulaheso, Mosesa watsile. Byuma muka byalingiwile ku banu ba Njambi? Kuma Yehova wecelele kukwasa banu bendi munima ya kutsa kwa Mosesa uje wapwile munalume wa kulongwa ndi? Embwe. Mubapwile ba kulongwa, Yehova wabakwasele. Simbu kanda Mosesa atse, Yehova wamulekele ngwendi ane Joshua cipangi ca kutwamenena banu bendi. Mosesa walongesele Joshua ha myaka yaingi. (Ekizo 33:11; Kwitu 34:9) Kutundaho, kwakele lalo banalume bapwisilemo bitondeka baje bakele na kutwamenena banu 1,000, bamo 100, bamoco makumi atanu, bakwaboco likumi lika. (Kwitu 1:15) Banu ba Njambi babatwamenenene mwamubwa. Cakumwenako cikwabo ca Eliya. Wapangele na nzili ha myaka yaingi mu kukwasa Baisalele balemese Yehova mu ngila inapande. Oloni mu kwita kwa simbu, Yehova wamwanene cipangi ceka mu mbwela mu Juda. (2 Vimye 2:1; 2 Mizi 21:12) Kuma banu ba kulongwa baje bakele mu bumwene bwa Baisalele bwa miyati likumi babayengwile ndi? Embwe. Eliya walongesele Elisha ha myaka yaingi. Co lalo kwakele ‘bana ba tupolofweto’ baje balilongesele cipangi. (2 Vimye 2:7) Ngeci, kwakele banalume babangi ba kulongwa baje basele kukwasa mu kutwamenena banu ba Njambi. Cizango ca Yehova catwaleleleleho kulingiwa, co wakwasele bangamba bendi ba kulongwa.

13. Yehova natukulahesa byuma muka ku mukanda wa Bahebelu 13:5b? (Taleni na cikupulo.)

¹³ Kwesekesa nebi byakumwenako, mumona ngweni bika bikalingiwa omwo bakubwabesa bamamaneselelo bakaya mwilu? Kutwapandele kulishoshomwena. Mbimbiliya inendeka awa majwi atakamesa ngwayo: Yehova kakombila kuti banu bendi bali hano hasi. (Tandeni  Bahebelu 13:5b). Ngwe mwa Mosesa na Eliya, cibunga cacindondo ca bakubwabesa baje bali na kutwamenena ano matangwa bamona kulongesa bakwabo bipangi kupwa kwa seho. Ha myaka yaingi, bandolome ba mu Cibunga ca Kutwamenena banatwalelelaho kulongesa banalume bamo hakati ka bimanga beka cipangi ca kutwamenena. Cakumwenako banabwahesa masikola a kulongesa bakulunu, tunyungi ba kuzenguluka, baje bali mu Komiti ya Munango, tunyungi ba ha Betheu, na bakwabo. Cibunga ca Kutwamenena cinatwalelelaho kulongesa bakwasi mu makomiti a kuliseza-seza a Cibunga ca Kutwamenena. Co aba bakwasi bali na kupanga mu kulongwa bipangi byabingi bibanabana. Banalibwahesela kutwalelelaho kupanga cipangi ca kukwasa bimanga ba Kristu.

14. Simpi muka yakama itulilongesa?

¹⁴ Simpi yakama ei: Bakubwabesa bamamaneselelo mubakabatwala mwilu ku mamaneselelo a simbu ya kayando kakama, kulemesa kwa busunga kukatwalelelaho kukalako hano hasi. Ha kuwana ngwe Yehova nangula Yesu kupwa Ntwama, bangamba ba Njambi batwalelelaho kulemesa Njambi mu ngila inapande nameme byuma bifwe bati. Tuzibuka ngwetu ha simbu oyo, cibunga cacibi ca mafuti cibanatumbula mu Mbimbiliya ngwabo Gogi wa Magogi cikalwisa banu ba Njambi. (Ezeki 38:18-20) Oloni eci cibunga kucikahyana, co kucikonowesa banu ba Njambi kumulemesa mu ngila inapande. Yehova akobola banu bendi. Mu cimona, kapositolo Iwano wamwene “mbunga yakama” ya bimanga beka ba Kristu. Iwano bamulekele ngwabo ei “mbunga yakama” yatundile “mu kayando kakama.” (Kujo 7:9, 14) Cili bene, twakulahela ngwetu Yehova akobola banu bendi.

15-16. Kwesekesa na mukanda wa Kujombolola 17:14, byuma muka bibakalinga bakubwabesa ha simbu ya nzita ya Amagidoni, co kuzibuka ebi byuma kututakamesa bati?

¹⁵ Oloni bamo banasa kulihula ngwabo: ‘Bika bibakalinga bakubwabesa mubakaya mwilu? Mbimbiliya inakumbulula mwamubwa eci cihula. Inamwesa ngwayo bifulumende bya kano kaye ‘bikalwa na Muna Manga.’ Ebi bifulumende bakabihyana. Mbimbiliya ngwayo: “Muna Manga akabafungulula.” Co beya bakamukwasa? Baje “banasana,” “banangula,” na “bakulongwa.” (Tandeni Kujombolola 17:14.) Beya  bene aba? Banapu bakubwabesa baje banasanguka. Bakubwabesa bamamaneselelo mubakaya mwilu ku mamaneselelo a simbu ya kayando kakama, cimo ca bipangi byakulibanga bibakalinga cikapwa kulwa. Eci cinapu cipangi ca kulitila. Baka-kristu bamo bakubwabesa bakele na kulwisa bakwabo simbu kanda bapwe Bakaleho ba Yehova. Bamo bapwile maswalale ba kano kaye. Oloni mubalilongesele busunga batengulukile na kupwa baka-Kristu ba busunga mwafwa balilongesele mwakuyoyela mu kwoloka na bakwabo. (Gala 5:22; 2 Tesa 3:16) Becelele kukundwiya binzita nambe kulwa. Munima ya kuya mwilu, bakalikwatasana na Kristu hamolika na tungelo mu kulwa nzita ya mamaneselelo na bitozi ba Njambi.

¹⁶ Baka-Kristu ba kubwabesa bamo banakulubala, co banazeye ku mubila. Oloni mubakaya mwilu, bakakala na nzili na mibila ya sipilitu, co kubakatsi. Bakapangela hamo na Yesu Kristu, Mwene wa Nzili. Munima ya kulwa mu nzita ya Amagidoni, bakapangela hamo na Yesu mu kukwasa banu bapwe ba kulumbunuka. Mubakakala mwilu bakasa kukwasa mwamubwa bandolome na bandokazi babo kutubakana mubakele na kulingila mubakele hasi ha simbu kubapwile ba kulumbunuka.

17. Tuzibuka bati ngwetu bangamba ba Njambi boshe kubakakala mu bushonde ha simbu ya nzita ya Amagidoni?

¹⁷ Kuma munapu umo wa bimanga beka ndi? Bika bimunapande kukalinga ha simbu iikashangumuka nzita ya Amagidoni ije inapu ya seho manene? Munapande kukakulahela Yehova na kukakabangeya mashiko na binangulo byendi. Kulinga ngoco kunasa kukambateselela byuma muka? Mbimbiliya ngwayo: ‘Kobeleni mu milili yeni ya mukati, co lishokelenimo. Bandeni kasimbu kakandondo lika, noho bukalu bwa Njambi bunahu.’ (Isaya 26:20) Bangamba ba Njambi ba kulongwa baje bakakala mwilu na baje bakakala hano hasi kubakakala mu bushonde ha simbu oyo. Ngwe mwa kapositolo Paulu, twakulahela ngwetu “bifulumende, nambe byuma biliko hano, nambe bikaija kulutwe . . . nacimo cahi casa kutwangununa ku cizemo ca Njambi.” (Loma 8:38, 39) Simbu yoshe anukeni ngweni Yehova wamizema, co kakamyumbila kuti!