BAJE babapangesele mu kusoneka Mbimbiliya bakele na kwilukila majwi amo ha bisimbu bimo. Tusimutwiyeniko ha byuma bitatu bije byasele kubalingisa balinge ngoco.

Simbu ibaisonekele. Mu Isalele kusañulu, banu babangi kubakele na libulu lya mashiko. Co kakangi bakele lika na kuziba awa mashiko mubakele na kuwatanda omwo bakele na kulikungulwila ku tabanakele. (Kwitu 31:10-12) Kwakele byuma byabingi bije byasele kubatanganesa omwo bakele na kutolilila, co lalo bakele na kwimana ha maola amangi mu mbunga yakama. (Nehe 8:2, 3, 7) Ha bisimbu ebi, kwilukila majwi amo a seho kwasele kukwasa banu kwanuka bwasi bisoneka na kubipangesa. Kwilukila majwi amo kwasele kubakwasa kwanuka biñanda bimo bya kuloba bije byakele mu mashiko abanene Yehova.—Levi 18:4-22; Kwitu 5:1.

Sonekesi ibapangesele. Biñanda bya kukokela ku 10 pesenti bili mu Mbimbiliya binapu myaso. Cakumwenako, myaso imo ili ku mukanda wa Bisamu, wa Myaso ya Solomoni na wa Mbimbi. Bisimbu bimo ei myaso yakele na majwi amo abakele na kwilukila aje amwesa ñanda yakama ibali na kwendekamo, co akele na kukwasa baka-kutolilila kukwata bwasi majwi a mwaso. Cakumwenako, nangukeni majwi ali ku mukanda wa Samu 115:9-11: ‘Eni Baisalele, kulaheleni Yehova. Ikeye mukwasi weni na ntelo yeni. Eni bakunjibo ya Aloni, kulaheleni Yehova. Ikeye mukwasi weni na ntelo yeni. Yeni mukazibila Yehova lyoba, kulaheleni Yehova. Ikeye mukwasi weni na ntelo yeni.’ Kuma munamono omwo kwilukila awa majwi kwasele kukwaselamo baje bakele na kwimba base kukwata bwasi biñanda bya seho bilimo ndi?

Kumwesa mwamubwa biñanda bya seho. Bisimbu bimo baje basonekele Mbimbiliya belukilile majwi amo a seho. Cakumwenako, Yehova mwanene Baisalele lishiko lya kujeneka kulya maninga, walekele Mosesa ngwendi elukile-elukile kusoneka byuma kubapandele kulingila ngoco. Njambi washakele ngwendi bazibuke ngwabo kuyoya kwa byuma bije bili na situ kwakala mu maninga. Kulumbununa ngwabo maninga emanena kuyoya. (Levi 17:11, 14) Mu kwita kwa simbu, omwo tupositolo na bakulunu mu Jelusalema bendekele byuma bibanapande kulinga baka-Kristu nga bashaka kuzibisa Njambi kubwaha, bendekele lalo seho ya kujenjuka ku maninga.—Bili 15:20, 29.

Nameme mu Mbimbiliya banelukila-elukila kwendeka majwi amo, oku kukumwesa ngwabo Yehova ashaka ngwendi tukale na kalingolingo ka kwilukila-ilukila majwi amo a mu Mbimbiliya. Cakumwenako, Yesu wendekele ngwendi: “Nga mulombela, keti mwilukile-ilukile kwendeka byuma bya kulifwa.” (Mate 6:7) Kutundaho, wendekele byuma bitwasa kwendeka mu malombelo etu. (Mate 6:9-13) Oloni nameme kutwapandele kwilukila-ilukila majwi a kulifwa mu malombelo etu, twasa kwilukila-ilukila kulombela ha biñanda bya kulifwa.—Mate 7:7-11.

Ngeci, kuli byuma bya seho byalingisa majwi nambe endekesi imo bailukile mu Mbimbiliya. Ei inapu imo ya bingila byali na kupangesa Mulongesi Wakama Manene Yehova mu kutulongesa byuma bitukwasa.—Isaya 48:17, 18.