Pweni ba Kubwahelela Omwo Mubandamena Byanamikulahesa Yehova
KUMA mwashungwiya kumona simbu yakamanesa Yehova byuma byoshe byabibi na kulingisa byuma byoshe bipwe byabiha ndi? (Kujo 21:1-5) Twakulahela ngwetu bikebyo bimunashungwiya. Oloni simbu imo keti kwakwasi kutwalelelaho kukala na mbunge ya kubandamena, maneneni nga twaliwana na byeseko. Kulabelela byuma bije bishwala kwasa kubabalesa mbunge.—Prov 13:12.
Nameme ngoco, Yehova ashaka ngwendi tukale na mbunge ya kubandamena omwo tubandamena simbu yanaka ya kubwahesa byuma. Mwafwa bika? Bika bitukwasa tupwe ba kubwahelela omwo tubandamena?
MWAFWA BIKA YEHOVA ATONDA NGWENDI TUBANDAMENE?
Mbimbiliya ngwayo: ‘Yehova nabandamena ngeci amizibileko mema ku mbunge. Ikeye ali na kumizibila ngozi omwo simbu yoshe akalingi bya busunga. Banabezika baje bakulahela ikeye.’ (Isaya 30:18) Hakulibanga, awa majwi atalesele ku Bajuda baje kubononokele Njambi. (Isaya 30:1) Oloni Bajuda bamo bapwile ba kulongwa, co awa majwi abakwasele bakale na lilabelelo. Awa majwi akwasa bangamba ba Yehova ba kulongwa ano matangwa kukala na lilabelelo.
Ngeci, tunapande kukala na mbunge ya kubandamena ngwe Yehova. Kuli simbu yanabwahesa yakanyongesa kano kaye kakabi, co nabandamena eli litangwa na ola. (Mate 24:36) Ha simbu oyo, banu boshe hamolika na tungelo bakalimwena ngwabo Liyabolo wakutiiye Yehova hamolika na bangamba bendi byuma bya makuli. Kutundaho, Yehova akatundisako Satana na boshe baje banalikwatasana nendi, co ‘akatuzibila mema ku mbunge.’
Ha simbu ino Yehova hamo kamanesa byeseko byetu. Nameme ngoco, natukulahesa ngwendi twasa kupwa ba kubwahelela omwo tubandamena byoshe byanatukulahesa. Ngwe mwendekelele Isaya, twasa kupwa ba kubwahelela ha simbu itucili na kubandamena ngwetu cuma cimo cacibwa cilingiwe. (Isaya 30:18) a Twasa kupwa bati ba kubwahelela? Byuma biwana binatako byasa kutukwasa.
BYUMA BIMIKWASA KUPWA BA KUBWAHELELA OMWO MUBANDAMENA
Akeni mbunge ku byuma byabibwa. Mwene Devidi wamwene byuma byabibi byabingi byalingiwile mu kuyoya kwendi. (Samu 37:35) Nameme ngoco, wasonekele ngwendi: ‘Twalelelaho kwoloka kulu ku mesho a Yehova. Bandamena kuli ikeye na mbunge imolika. Keti ulubale mwafwa ya munu uje matumbe endi amabi ali na kubwaha.’ (Samu 37:7) Devidi wapangesele eci cinangulo omwo wakele mbunge ku bikulaheso bya Yehova bya kumwobola. Co lalo wakandelelele kuli Yehova ha byuma byoshe byabibwa byamulingilile. (Samu 40:5) Netu nga twaka mbunge ku byuma byabibwa bitunamono mu kuyoya kwetu kutubakana kwaka mbunge ku bukalu butuli na kuliwana nabwo, kutupwila kwakwasi kubandamena byuma byanatukulahesa Yehova.
Akeni mbunge ku kushangazala Yehova. Cisholoka ngwe Devidi ikeye wasonekele mukanda wa Samu 71. Co oku ku mukanda, Devidi wendekele ngwendi: ‘Njitwalelelaho kubandamena. Njikushangazala manene.’ (Samu 71:14) Wasele kushangazala bati Yehova? Wasele kulekako bakwabo byendi na kumwimbila myaso. (Samu 71:16, 23) Ngwe mwa Devidi, twasa kupwa ba kubwahelela ha simbu ino itucili na kubandamena bikulaheso bya Yehova. Tukamushangazala kwitila mu kupanga cipangi ca kwambulula, mu byuma bitusimutwiya, na mu kwimba myaso yetu ya Bumwene. Ha simbu imwimbako umo wa myaso yetu, singanyekeseseni ha majwi awo nomu muwasa kumilingisila mupwe ba kubwahelela.
Sikameni na bandolome na bandokazi beni mwafwa basa kumitakamesa. Devidi mwaliwanene na bukalu walekele Yehova ngwendi: ‘Njikulahela lizina lyobe ku mesho a bakulongwa bobe.’ (Samu 52:9) Netu bandolome na bandokazi betu basa kututakamesa ku biwano, mu lihya nambe kwoshe-kwoshe kutunasa kuliwanena nabo.—Loma 1:11, 12.
Kanyameseni lilabelelo lyeni. Mukanda wa Samu 62:5 ngwawo: ‘Njibandamena Njambi na mbunge imolika. Mwafwa lilabelelo lyange litunda kuli ikeye.’ Kunapu kwa seho kukala na lilabelelo lya kukanyama, maneneni nga mamaneselelo a kano kaye kuweja ha simbu itwasinganyekele. Tunapande kukulahela ngwetu Yehova ashulisilila byanakulahesa nameme kwite simbu ya kupwa hali oku tubandamena. Kutanda Lijwi lya Njambi na kumona mubinalitombwela biñanda bilimo nomu mubunalishulisilila bupolofweto bumo, kukanyamesa likulahelo lyetu. (Samu 1:2, 3) Co lalo tunapande kutwalelelaho ‘kulombela mu kulitombola na sipilitu ya kujela’ mangana tukale na busamba bwabubwa na Yehova omwo tubandamena kuyoya kwa myaka yoshe kuje kwanatukulahesa.—Juda 20, 21.
Ngwe mwa Mwene Devidi, netu tukulaheleni ngwetu Yehova waka mbunge baje babandamena kuli ikeye, co akabamwesa cizemo cije kucesi kutenguluka. (Samu 33:18, 22) Twaleleleniho kubandamena kuli Yehova ha kwaka mbunge ku byuma byabibwa bimuli na kulimwena mu kuyoya kweni, kumushangazala, kulitakamesa na bakweni Bakaleho na kutwalelelaho kukanyamesa lilabelelo lyeni.
a Lijwi libananungulula ngwabo ‘kutwalelelaho kubandamena’ linasa kulumbununa ‘kushungwiya nambe kulabelela cuma cimo mangana cilingiwe.’ Kulumbununa ngwabo kukwabihile kutonda ngwetu Yehova amanese kayando katuli na kuliwana nako.
