CILONGESA 4
Mwafwa Bika Tukai ku Canukiso?
“Lingeni eci mu kunjanuka.”—LUKA 22:19.
MWASO 20 Watwanene Munobe Iwazema Manene
BILI MUNO MU CILONGESA *
1-2. (a) Simbu muka itukasinganyeka manene munu itwazema uje natsi? (b) Cilika muka calingile Yesu ha butsiki bwa kwinduka litangwa libamutsiile?
TUKATWALELELAHO kwanuka banu batwazema baje banatsi nameme kuneti myaka yaingi kutunda habatsililile. Tukabasinganyeka manene nga lyeta litangwa libatokele.
2 Mwaka na mwaka, banu babangi bakalikungulula mangana banuke kutsa kwa Yesu Kilistu uje itwazema manene. (1 Petu 1:8) Tukalikungulula mangana twanuke munu uje wanene mwonyo wendi mangana atupatule ku bubi na ku kutsa. (Mateo 20:28) Yesu washakele ngwendi baka-kumukabangeya banuke kutsa kwendi. Ha butsiki bwa kwinduka litangwa libamutsiile, walingile cilika ca Kulya kwa Mwene kwa Mangwezi na tupositolo bendi, co wabashikile ngwendi: “Lingeni eci mu kunjanuka.”—Luka 22:19.
3. Bika bitusimutwiya muno mu cilongesa?
3 Banu babandondo baje bakakala ku cilika ca kwanuka kutsa kwa Yesu bali na lilabelelo lya kukayoya mwilu. Oloni banu babangi baje bali na lilabelelo lya kukayoya hano hasi nabo bakakalako. Muno mu cilongesa, tusimutwiya bikalingisa bakubwabesa na bimanga beka bakale ku Canukiso mwaka na mwaka. Tusimutwiya lalo ha bukwasi butukawana mutukakala ku Canukiso. Tusimutwiyeni tahi ha byuma bikalingisa bakubwabesa bakale ku Canukiso.
MWAFWA BIKA BAKUBWABESA BAKAKALA KU CANUKISO?
4. Mwafwa bika bakubwabesa bakali likende na kunwa binyu ha Canukiso?
4 Mwaka na mwaka, bakubwabesa baje bakakala ku Canukiso, bakali likende na kunwa binyu. Bika bakalila likende na kunwa binyu? Tusimutwiyeni ha byuma byalingiwile butsiki bwa kwinduka litangwa lyatsile Yesu mangana tuwane cikumbululo. Mubamanesele kulinga cilika ca Paseka, Yesu na tupositolo bendi balingile cilika ca Kulya kwa Mwene kwa Mangwezi. Wanene likende na binyu ku tupositolo bendi ba kulongwa ba kupwa 11, co wabalekele ngwendi balye na kunwa. Yesu wabalekele lalo bya bikumiiyo bibali, cikumiiyo caciha na cikumiiyo ca Bumwene. * (Luka 22:19, 20, 28-30) Ebi bikumiiyo bikalingisa baje tupositolo na bakwabo bakubwabesa bakapwe bimyene na tupilisitu mwilu. (Kujo 5:10; 14:1) Bakubwabesa baje bacili hano hasi bakebo lika banapande kulya likende na kunwa binyu ha Canukiso mwafwa bakebo banalikumiiya nabo Yesu.
5. Bakubwabesa bazibuka bika ha lilabelelo libali nalyo?
5 Bakubwabesa bakashungwiya kukala ku Canukiso mwafwa kulinga ngoco kukabakwasa basinganyekesese ha lilabelelo lyabo. Bakubwabesa bali na lilabelelo lyalibwa manene. Yehova nabakulahesa ngwendi bakayoya mwilu, co kubakatsi lalo. Co lalo, aba bakubwabesa ba kupwa 144,000 bakayula hamo na Yesu Kilistu. Kutundaho, bakakala hamo na Yehova Njambi. (1 Koli 15:51-53; 1 Yowa 3:2) Bakubwabesa bazibuka ngwabo Njambi nabalanya mangana bakalikuwe ebi bibezikiso mwilu. Oloni banapande kutwalelelaho kupwa ba kulongwa kweta na kukutsa kwabo asina bakatambula ebi bibezikiso mwilu. (2 Tima 4:7, 8) Bakubwabesa bakabwahelela manene mubakasinganyekesesa ha lilabelelo lyabo lya kukayoya mwilu. (Tito 2:13) Batico “bimanga beka”? (Yowa 10:16) Bika bikabalingisa bakale ku Canukiso?
MWAFWA BIKA BIMANGA BEKA BAKAKALA KU CANUKISO?
6. Mwafwa bika bimanga beka bakakala ku Canukiso mwaka na mwaka?
6 Bimanga beka nabo bakakala ku Canukiso, oloni kubesi kulya likende na kunwa binyu. Mu mwaka wa 1938, bimanga beka babalanyele lwa kulibanga mangana bakale ku Canukiso. Kaposhi ka Kukengela ka March 1, 1938 kendekele ngwako: “[Bimanga beka] nabo banapande kukala oku ku ciwano mangana bamone bikalingiwako. . . . Ha simbu eyi nabo banapande kupwa ba kubwahelela.” Bimanga beka bakabwahelela mubakakala ku Canukiso ngwe mubakabwahelela banu baje babakalanya ku cilika ca bulo.
7. Mwafwa bika bimanga beka bakashungwiya kutolilila ku ñanda ya Canukiso?
7 Bimanga beka nabo bakasinganyekesesa ha lilabelelo lyabo. Bakashungwiya manene kutolilila ku ñanda ya Canukiso mwafwa eyi ñanda ikendeka manene ha byuma byakalinga Yesu na bakubwabesa ba kupwa 144,000 mu Ciyulo ca Myaka 1000 ibakakwasa banu ba kulongwa. Mwene Yesu Kilistu na baje bakayula nabo, bakatengulula kaye kupwa Paradaisi na kukwasa banu ba kulongwa bapwe ba kulumbunuka. Bimanga beka bakabwahelela mubakakala ku Canukiso na kusinganyekesesa mubukalishulisilila bupolofweto bwa kufwa ngwe buje buli ku Isaya 35:5, 6; 65:21-23 na Kujombolola 21:3, 4. Kusinganyekesesa mubakayoyela na banu babazema mu kaye kakaha kukabakwasa bakulahele manene bikulaheso bya Njambi na kutwalelelaho kumupangela.—Mateo 24:13; Ngala 6:9.
8. Bika bikwabo bikalingisa bimanga beka bakele ku Canukiso?
8 Tusimutwiyeni ha cuma cikwabo cikalingisa bimanga beka bakele ku Canukiso. Bakaiko mwafwa bazema bakubwabesa, co bashaka kulikwatasana nabo. Lijwi lya Njambi lyapolofwetele ngwalyo bimanga beka na bakubwabesa bakapangela hamo. Mu ngila muka? Tusimutwiyeniko ha bupolofweto bumo.
9. Bupolofweto buli ku mukanda wa Zakaliya 8:23, bumwesa bati mubakalizibila bimanga beka hali bakubwabesa?
9 Tandeni Zakaliya 8:23, NWT. Bupolofweto buli oku ku mukanda bumwesa bimanga beka mubakamwena bandolome na bandokazi babo bakubwabesa. Oku ku mukanda, banapangesako lijwi lya “Kayunda” neli lya “nobe,” kutalesa ku bakubwabesa baje bacili hano hasi. (Loma 2:28, 29) Co “banalume likumi ba ku bindaka bya ku mafuti oshe” bemanena bimanga beka. Bimanga beka “banakwata ku cikobelo ca Kayunda” nambe ngwetu bali na kulikwatasana na bakubwabesa mu kukundwiya bulombelo bwa busunga. Ngeci, bimanga beka mubakakala ku Canukiso bakamwesa ngwabo banalikwatasana na bakubwabesa.
10. Yehova nashulisilila bati bupolofweto buli ku mukanda wa Ezekiyele 37:15-19, 24, 25?
10 Tandeni Ezekiyele 37:15-19, 24, 25. Yehova nashulisilila obu bupolofweto omwo nalingisa bakubwabesa na bimanga beka bapangele hamo. Obu bupolofweto bunendeka ha biti bibali. Citi ca “Yunda” (muyati kuje kubatundile bimyene ba Isalele) cimanena baje bali na lilabelelo lya kukayoya mwilu. Co citi ca Efalime cimanena baje bali na lilabelelo lya kuyoya hano hasi. * Yehova nakwasa bakubwabesa na bimanga beka balikwatasane na kupwa “citi cimo.” Ngeci, boshe bali na kupangela hamo mu kukundwiya Mwene yabo Kilistu Yesu. Mwaka na mwaka bakubwabesa na bimanga beka bakakala ku Canukiso ha kupwa “butanga bumo” co lalo bali na ‘kanyungi umo.’—Yowa 10:16.
11. “Bimanga” babanendeka ku mukanda wa Mateo 25:31-36, 40 bali na kukwasa bati bandolome ba Kilistu?
11 Tandeni Mateo 25:31-36, 40. “Bimanga” babanendeka oku ku mukanda bemanena baka-busunga baje bali na lilabelelo lya kukayoya hano hasi. Bali na kutwalelelaho kukwasa bandolome ba Kilistu bakubwabesa baje bacili hano hasi omwo bali na kulinga cipangi cakama manene ca kwambulula na kulongesa banu mu kaye koshe.—Mateo 24:14; 28:19, 20.
12-13. Mu bingila muka bikwabo mubali na kumwesela bimanga beka ngwabo bali na kupangela hamo na bandolome ba Kilistu?
12 Mwaka na mwaka mu byalumingo bya kukokela ku Canukiso, bimanga beka bakakwasa bandolome ba Kilistu mubakapanga na nzili cipangi ca kulanya banu baije ku Canukiso. (Taleni cipalo ca “ Kuma Muli na Kulibwahesela Bingonde bya Canukiso Ndi?”) Co lalo bakalingi mwoshe mubasela kulibwahesela mangana balinge Canukiso mu bikungulukilo byoshe, nameme mu bikungulukilo byabingi kumwesi bakubwabesa. Bimanga beka bakabwahelela kupangela hamo na bandolome ba Kilistu mu byuma bitunendeka. Bazibuka ngwabo Yesu akalizibi ngwendi byuma bibali na kulingila bandolome bendi bakubwabesa bali na kubilingila ikeye.—Mateo 25:37-40.
13 Byuma muka bikwabo bikalingisa bimanga beka na bakubwabesa bawaniwe ku Canukiso?
MWAFWA BIKA TUBABOSHE TUKAWANIWA KU CANUKISO?
14. Yehova na Yesu banamwesa bati ngwabo batuzema manene?
14 Tukaiko mangana tumwese kukandelela ku cizemo canatumwesa Yehova na Yesu. Yehova natumwesa cizemo mu bingila byabingi. Oloni kuli ngila imo ya kulitila yanatumweselamo cizemo. Njambi wamwesele ngwendi watuzema manene omwo watumine Munendi yazema mangana akuyande na kututsila. (Yowa 3:16) Yesu nendi wamwesele ngwendi watuzema manene omwo walyanene kututsila. (Yowa 15:13) Kutwasa kufweta Yehova na Yesu ha cizemo cibanatumwesa. Oloni nga tupwa ba kulongwa ha litangwa na litangwa, co tumwesa ngwetu twakandelela ku byuma byanatulingila Yehova na Yesu. (Kolo 3:15) Co tukai ku Canukiso mangana twanuke cizemo canatumwesa Yehova na Yesu na kumwesa ngwetu twabazema.
15. Mwafwa bika bakubwabesa na bimanga beka bamona ndando ya kupatula kupwa ya seho manene?
15 Twamona ndando ya kupatula kupwa ya seho manene. (Mateo 20:28) Ndando ya kupatula yapwa ya seho manene ku bakubwabesa mwafwa hakeho hanemana lilabelelo lyabo. Yehova wabamona kupwa baka-busunga, co nabangula kupwa bana bendi mwafwa banakulahela ndando ya kupatula ya Kilistu. (Loma 5:1; 8:15-17, 23) Bimanga beka nabo bamona ndando ya kupatula kupwa ya seho. Banakulahela ndando ya kupatula ya Kilistu. Ngeci, bapwa ba kujela ku mesho a Yehova, bali na kupanga bipangi bya kujela, co bali na lilabelelo lya kukoboka “ñababa yakama.” (Kujo 7:13-15) Ngila imo ibasa kumweselamo bakubwabesa na bimanga beka ngwabo banakandelela ku ndando ya kupatula inapu kukala ku Canukiso mwaka na mwaka.
16. Cuma muka cikwabo cikatulingisa tuye ku Canukiso?
16 Co lalo tukawaniwa ku Canukiso mwafwa tushaka kwononoka Yesu. Nameme tuli na lilabelelo lya kuyoya mwilu indi hano hasi, tushaka kwononoka lishiko lya Yesu. Ha litangwa lyalingile cilika ca Kulya kwa Mwene kwa Mangwezi na bandongesi bendi, Yesu wendekele ngwendi: “Lingeni eci mu kunjanuka.”—1 Koli 11:23, 24.
KUKALA KU CANUKISO KUKATUKWASA BATI TUBABOSHE?
17. Kukala ku Canukiso kutukwasa bati tushwenye kuyehi na Yehova?
17 Kukatulingisa tushwenye kuyehi na Yehova. (Yako 4:8) Ngwe mutunalilongesela, kukala ku Canukiso kukatulingisa tusinganyekesese ha lilabelelo lyanatwana Yehova na kusinganyekesesa ha cizemo cakama canatumwesa. (Njele 29:11; 1 Yowa 4:8-10) Nga tusinganyekesesa ha lilabelelo lituli nalyo na cizemo ca Yehova cije kucesi kutenguluka canatumwesa, co tumuzema manene na kukanyamesa busamba bwetu nendi.—Loma 8:38, 39.
18. Kusinganyekesesa ha mwanja wa Yesu kutushongangeya tulinge bika?
18 Kukatushongangeya tutembwinine Yesu. (1 Petu 2:21) Ha matangwa a kukokela ku Canukiso, tukatanda biñanda bya mu Mbimbiliya bije byendeka ha byuma byalingiwile mu calumingo catsile Yesu, ha litangwa libamutsiile nebi byalingiwile ha kusanguka kwendi. Co ha litangwa lya Canukiso, tukatolilila ku ñanda ije ikatwanukisa cizemo catumwesele Yesu. (Efeso 5:2; 1 Yowa 3:16) Kutanda na kusinganyekesesa ha mwanja wa Yesu kukatushongangeya tutwaleleleho “kuyoya ngwe mwalingile” ikeye.—1 Yowa 2:6.
19. Twasa kutwalelelaho bati kukanyamesa busamba bwetu na Yehova?
19 Kutukwasa tutwaleleho kukanyamesa busamba bwetu na Yehova. (Yunda 20, 21) Tutwalelelaho kukanyamesa busamba bwetu na Njambi nga tulinga mwoshe mutwasela kumwononoka, kujelesa lizina lyendi na kumuzibisa kubwaha ku mbunge. (Visi 27:11; Mateo 6:9; 1 Yowa 5:3) Kuwaniwa-waniwa ku Canukiso kutushongangeya tutwaleleleho kukanyamesa busamba bwetu na Yehova ha litangwa na litangwa.
20. Byuma muka bya seho bikatushongangeya tuye ku Canukiso?
20 Nameme tuli na lilabelelo lya kukayoya mwilu indi hano hasi, kuli byuma bya seho bikatulingisa tukale ku Canukiso. Mwaka na mwaka ha litangwa lya Canukiso, tukanuka kutsa kwa Yesu Kilistu uje itwazema manene. Kutundaho, tukanuka cizemo cakama canatumwesa Yehova ha kutwana Munendi mangana atutsile. Uno mwaka, Canukiso cikalako lya mu Citanu mangwezi ha April 15, 2022. Twazema Yehova na Munendi. Ngeci, nacimo cahi cinapande kutwonowesa kuwaniwa ku Canukiso.
MWASO 16 Shangazaleni Jah Mwafwa ya Munendi
^ Tubaboshe tukashungwiya kukala ku Canukiso mwaka na mwaka nameme tuli na lilabelelo lya kukayoya mwilu nambe hano hasi. Muno mu cilongesa, tusimutwiya ha byuma biinendeka Mbimbiliya bije bikatulingisa tuye ku Canukiso na bukwasi butukawana mutukalingi ngoco.
^ Nga mushaka kuzibuka byabingi ha cikumiiyo caciha na cikumiiyo ca Bumwene, tandeni cilongesa ca, “Mu ka ba Mubuso wa Baprisita” mu Kaposhi ka Kukengela ka Silozi ka October 15, 2014, liputa 15-17.
^ Nga mushaka kuzibuka byabingi ha bupolofweto bwa biti bibali buje buli ku mukanda wa Ezekiyele capita 37, tandeni libulu lya Jehova Ulapelwa Hape ka Nzila Yelukile! lipu 130-135, pala. 3-17.
