CILONGESA 2
Tembwinineni Ndolome ya Yesu
“Yange Yakomba, ngamba ya Njambi na Mwene Yesu Kilistu.”—YAKO 1:1.
MWASO 88 Njileke Bingila Byobe
BILI MUNO MU CILONGESA *
1. Naanga ya Yakomba yafwile bati?
YAKOMBA ndolome ya Yesu wakolelele mu naanga ya banu baje bapwile ba kulongwa kuli Yehova. * Bisemi bendi ba Yosefa na Maliya bazemene manene Yehova, co bamupangelele mubaselele mwoshe. Yakomba wabezikile lalo mwafwa yayendi ikeye wakupwile Mesiya. Cili bene, Yakomba wabezikile manene kukala muje mu naanga.
Yakomba wazibukile mwamubwa yayendi Yesu mwafwa bakolelele hamo (Taleni palagilafu 2)
2. Bika twendekela ngwetu Yakomba walilongesele byabingi kuli yayendi?
2 Yakomba walilongesele byabingi kuli yayendi. (Mateo 13:55) Cakumwenako, Yesu wazibukile mwamubwa Bisoneka, mukemwo mwakele na myaka 12 wakomokesele manene baka-kulongesa mashiko ba mu Yelusalema. (Luka 2:46, 47) Hamo Yakomba wapangele cipangi ca kushonga na Yesu. Nga mukemwo, co wazibukile mwamubwa Yesu. Kakangi Nathan H. Knorr wakele na kwendeka ngwendi: “Nga upanga na munu, co umuzibuka mwamubwa.” * Ngeci, Yakomba nendi wanangukile omwo ‘Yesu wakolelele ku mubila na mu mana, co wawanene kutetela kuli Njambi na kuli banu.’ (Luka 2:52) Ngeci, tunasa kusinganyeka ngwetu hamo Yakomba wapwile umo wa bandongesi ba Yesu ba kulibanga. Oloni ebi keti bikebyo byalingiwile.
3. Yakomba walingile bati Yesu mwashangumukile cipangi ca kwambulula?
3 Yesu mwakele na kulinga cipangi ca kwambulula hano hasi, Yakomba kapwile ndongesi yendi. (Yowa 7:3-5) Hamo Yakomba wapwile umo wa babushoko ba Yesu baje basinganyekele ngwabo “Yesu nazaluka.” (Mako 3:21) Co lalo kukwesi bukaleho bumwesa ngwabwo Yakomba wakele hamo na ina Maliya ha litangwa libatsiilile Yesu ha citi ca kuyandesela.—Yowa 19:25-27.
4. Bika bitusimutwiya muno mu cilongesa?
4 Mu kwita kwa simbu Yakomba wakulahelele Yesu, co wakupwile mukulunu wamubwa mu cikungulukilo. Muno mu cilongesa tusimutwiya ha byuma bibali bitwasa kulilongesa kuli Yakomba (1) bikwapwila kwa seho kupwa ba kulikehesa (2) mutwasa kupwila balongesi bababwa.
PWENI BA KULIKEHESA NGWE YAKOMBA
Yakomba walikehesele omwo Yesu washolokele kuli ikeye, co kutunda haje bene wapwile ndongesi yendi wa kulongwa (Taleni palagilafu 5-7)
5. Yakomba walingile bika omwo Yesu washolokele kuli ikeye mwasangukile?
5 Yakomba washangumukile tangwa lika kupwa ndongesi ya Yesu? Yesu mwasangukile ku batsi ‘washolokele kuli Yakomba, co munima ku tupositolo boshe.’ (1 Koli 15:7) Yakomba mwaliwanene na Yesu, watengulukile, co wapwile ndongesi yendi. Wakele hamo na tupositolo baje babandamenene kutambula sipilitu ya kujela mu mulili wa helu ku Yelusalema. (Vili 1:13, 14) Mu kwita kwa simbu, Yakomba wapwile umo wa bandolome bakele mu cibunga ca kutwamenena ca mu simbu ya tupositolo. (Vili 15:6, 13-22; Ngala 2:9) Co simbu kanda mwaka wa 62 C.E wete, bamuhwimininine asonekele baka-Kilistu ba kubwabesa mukanda. Mukanda wasonekele utukwasa tubaboshe nameme tuli na lilabelelo lya kukayoya mwilu nambe hasi. (Yako 1:1) Muka-kulilongesa byuma bya kusañulu wa lizina lya Josephus, wasonekele ngwendi, Ananiyasi muna Anase uje wapwile kapilistu wakama ikeye washikile ngwendi Yakomba bamutsiye. Yakomba watwaleleleho kupwa wa kulongwa kuli Yehova kweta noho hamaneselele cipangi cendi ca hano hasi.
6. Yakomba walisezele bati na bantwama ba bulombelo ba mu simbu yayoyele?
6 Yakomba Wapwile wa Kulikehesa. Bika twendekela ngoco? Yakomba mwamwenenenemo Yesu kwalisezele nomwo mubamumwenenene bakulunu ba bulombelo babangi. Omwo Yakomba walimwenenene bukaleho buje bwamwesele ngwabo Yesu wapwa Muna Njambi, wabukulahelele. Oloni tupilisitu bakama ba mu Yelusalema kubalingile ngoco. Cakumwenako, balimwenenene Yesu mwasangwile Lazalu. Nameme ngoco kubakulahelele ngwabo Yehova ikeye watumine Yesu. Oloni bashakele kutsiya Yesu na Lazalu. (Yowa 11:53; 12:9-11) Kutundaho, Yesu mwasangukile bashakele kushwekela banu eyi ñanda. (Mateo 28: 11-15) Baje bakulunu ba bulombelo bapwile ba kulyalesa mukemwo babyanene Mesiya.
7. Mwafwa bika kutwapandele kulyalesa?
7 Twasa kutembwinina bati Yakomba? Keti mulyalese, oloni tabeseni Yehova amilongese. Mishongo imo inasa kwonowesa mbunge ya munu kupanga mwamubwa. Mu ngila imo lika kulyalesa, kwasa kutwonowesa kwononoka binangulo bya Yehova. Bafaliseo bapwile ba kulyalesa, co babyanene bukaleho buje bwamwesele ngwabwo sipilitu ya kujela yakele na kutwamenena Yesu, co lalo wapwa Muna Njambi. (Yowa 12:37-40) Kulyalesa kwabo kwabakobelesele mu bukalu, mwafwa kunabonowesa kuwana mwonyo wa myaka yoshe. (Mateo 23:13, 33) Kunapu kwa seho manene kutabesa Lijwi lya Njambi na sipilitu yendi bitengulule cifwa cetu na bisinganyeka byetu na kututwamenena omwo twangula bya kulinga. (Yako 3:17) Yakomba wapwile wa kulikehesa mukemwo watabesele Yehova amulongese. Co lalo ngwe mutulilongesela, kulikehesa kwamukwasele apwe mulongesi wamubwa.
PWENI BALONGESI BABABWA NGWE YAKOMBA
8. Bika byasa kutukwasa tupwe balongesi bababwa?
8 Yakomba kalilongesele manene. Hamo bantwama ba bulombelo bamumwene ngwe mubamwenene kapositolo Petulu na Yowano. Babamwene ngwabo bapwile “banu bangoco ba kujeneka kulilongesa.” (Vili 4:13) Oloni Yakomba wapwile mulongesi wamubwa ngwe mubimwesela biñanda bili ku mukanda wasonekele. Ngwe mwa Yakomba, netu hamo kutwalilongesele manene. Nameme ngoco sipilitu ya Yehova na byuma bituli na kulilongesa mu munga yendi, byasa kutukwasa tupwe balongesi bababwa. Tusimutwiyeni ha mwanja wa Yakomba na kumona bitwasa kulilongesa ku ngila yalongeselelemo.
9. Yakomba wakele na kulongesa bati?
9 Yakomba kapangesele majwi a kuziminina. Mukemwo banu baje bamutolililile bazibukile bya kulinga na mwakubilingila. Cakumwenako, Yakomba wakwasele baka-Kilistu bazibuke ngwabo banu babalinga mwamubi, oloni kubapandele kubazinda. Wasonekele ngwendi: ‘Tuli na kubatumbula baka-kubwahelela, omwo bakebo bakele na lukakateya, mwaziba laja kukolesa kwa Yombi, co mwazibuka bika Yehova wanene kuli Yombi ha kukotoka. Omwo Yehova wapwa muka-kutetela na mema ku mbunge.’ (Yako 5:11) Nangukeni ngweni Yakomba wakele na kupangesa Bisoneka mwakele na kulongesa. Wapangesele Lijwi lya Njambi mangana akwase baje bakele na kumutolilila bazibuke ngwabo Yehova simbu yoshe akabezikisa banu baje bapwa ba kulongwa kuli ikeye ngwe mwalingile Yombi. Yakomba wakele na kulumbununa byuma mu ngila yayasi, co wakwasele banu bazibisise byakele na kulongesa. Oku kwalingisile banu bane Yehova bumpau keti ikeye.
10. Twasa kutembwinina bati Yakomba omwo tulongesa?
10 Twasa kutembwinina bati Yakomba? Longeseni mu ngila yayasi na kupangesa Lijwi lya Njambi. Cilengo cetu keti ca kumwesa banu ngwetu tuzibuka byabingi, oloni tunapande kubakwasa bananguke ngwabo Yehova ikeye azibuka byabingi, co lalo wabaka mbunge. (Loma 11:33) Twasa kulinga ngoco nga tupangesa Mbimbiliya. Cakumwenako, kutwapandele kuleka munu itukalilongesa nendi Mbimbiliya ngwetu ngwe yange ngwe njalingi mungandi, oloni tunapande kumukwasa asinganyekesese ha myanja ya mu Mbimbiliya na kunanguka mwakamwenamo Yehova obyo byuma. Nga tulinga ngoco, co tumushongangeya azibise Yehova kubwaha keti yetu.
11. Bukalu muka bubaliwanene nabwo baka-Kilistu ba mu simbu ya Yakomba, co binangulo muka byabanene? (Yakomba 5:13-15)
11 Yakomba wazibisisile bakwabo. Mukanda wasonekele umwesa ngwawo Yakomba wazibukile bukalu bubakele na kuliwana nabwo bandolome na bandokazi bendi, co wabakwasele mangana bazibuke mwamubwa bibapandele kulinga. Cakumwenako, baka-Kilistu bamo kwabambatelele simbu kupangesa byuma bibabanangwile. (Yako 1:22) Bamoco bakele na kulikwatasana manene na banu ba kufuka na kuyengula tuhutu. (Yako 2:1-3) Bakwaboco kwabakaluwilile kwangula majwi a kwendeka. (Yako 3:8-10) Futisi yabo yapwile yaibi, oloni Yakomba wakulahelele ngwendi basa kutenguluka. Wabanangwile mu ngila yaibwa oloni wabakwasele bananguke habapandele kupangela, co lalo washongangeyeye baje kubakele na kulinga mwamubwa ku sipilitu balombe bukwasi ku bakulunu.—Tandeni Yakomba 5:13-15.
12. Twasa kukwasa bati banu batukalilongesa nabo mu ngila yaibwa?
12 Twasa kutembwinina bati Yakomba? Zibisiseni bakweni na kubamona mu ngila inapande. Banu babangi batukalilongesa nabo Mbimbiliya kunasa kubakaluwila kupangesa binangulo bilimo. (Yako 4:1-4) Kunasa kubakaluwila kwecela tulingolingo twatubi na kukala na bifwa byabibwa. Twasa kutembwinina Yakomba nga tuleka banu batukalilongesa nabo habanapande kupangela. Co lalo tunapande kutwalelelaho kukulahela ngwetu Yehova akokela banu ba kulikehesa kuli ikeye na kubana nzili mangana batengulule futisi yabo.—Yako 4:10.
13. Mukanda wa Yakomba 3:2, umwesa ngwawo Yakomba wazibukile bika?
13 Yakomba kalyalesele. Yakomba kalimwene ngwendi wapwile wa seho manene kutubakana bakwabo baka-Kilistu mwafwa ya kupwa ndolome ya Yesu na kukala na bipangi byabingi mu cikungulukilo. Watumbwile bakwabo baka-kukulahela ngwendi “bandolome bange banjazema.” (Yako 1:16, 19; 2:5) Kalimwesele ngwe wapwile wa kulumbunuka. Wamwesele ngwendi nendi kalumbunukile omwo wendekele ngwendi: “Omwo yetu boshe bisimbu byabingi tukabiisa.”—Tandeni Yakomba 3:2.
14. Mwafwa bika kutwapandele kumwesa munu itukalilongesa nendi Mbimbiliya ngwetu kutwesi kusebuka?
14 Twasa kutembwinina bati Yakomba? Tunapande kwanuka ngwetu tubaboshe kutwalumbunukile. Kutwapandele kuliziba ngwetu twapwa tubaseho kutubakana banu batukalongesa. Mwafwa bika? Nga tumwesa munu itukalilongesa nendi Mbimbiliya ngwetu kutwesi kusebuka, co asinganyeka ngwendi kasa kukabangeya binangulo bya mu Mbimbiliya. Oloni nga tumuleka ngwetu netu kwatukaluwilile kukabangeya binangulo bya mu Mbimbiliya na kumulumbunwina mwamubwa mwatukwaselele Yehova mangana tuhyane byeseko, co twasa kukwasa munu itukalilongesa nendi Mbimbiliya, amone ngwendi nendi asa kupangela Yehova.
Byakumwenako bya Yakomba byapwile byabyasi kubizibisisa, co byetele banu ku bimbunge (Taleni palagilafu 15-16) *
15. Yakomba wapangesele byakumwenako bya kufwa bati? (Yakomba 3:2-6, 10-12)
15 Yakomba wapangesele byakumwenako bije byetele banu ku bimbunge. Sipilitu ya kujela na mwanja waubwa wa yayendi Yesu byamukwasele kwangula mwamubwa byakumwenako byakele na kupangesa. Byakumwenako byapangesele Yakomba byapwile byabyasi kubizibisisa, co kwakwasi kupangesa bilongesa bilimo.—Tandeni Yakomba 3:2-6, 10-12.
16. Mwafwa bika tunapande kupangesa byakumwenako byabibwa?
16 Twasa kutembwinina bati Yakomba? Pangeseni byakumwenako bije byeta banu ku bimbunge. Nga mupangesa byakumwenako binapande, mukwasa banu balizibe ngwe bali na kumona byuma bimuli na kubalongesa. Kulinga ngoco kulingisa banu banuke byuma bibalilongesa mu Mbimbiliya. Yesu wakele na kupangesa byakumwenako byabibwa, co ndolome yendi Yakomba wamutembwininine. Tusimutwiyeni ha cakumwenako cimo capangesele Yakomba na kumona bitwendekela ngwetu capwile cakumwenako cacibwa.
17. Bika twendekela ngwetu cakumwenako ca Yakomba cili ku Yakomba 1:22-25 capwa cacibwa?
17 Tandeni Yakomba 1:22-25. Kuli byuma byabingi bitulingisa twendeke ngwetu cakumwenako ca ciponi capangesele Yakomba capwa cacibwa. Washakele kukwasa banu bananguke ngwabo nga bashaka ngwabo Lijwi lya Njambi libakwase, kubapandele kulitanda lika, oloni banapande kupangesa byuma bibatanda. Yakomba wapangesele cakumwenako cije cibazibukile mwamubwa banu baje bakele na kumutolilila. Wendekele bya munu uje alitala mu ciponi. Washakele kubalongesa bika? Nga munu alitala mu ciponi na kumona hanapande kubwahesa, oloni kabwahesaho, co napu cilema. Mu ngila imo lika, bunapu bulema nga tutanda Lijwi lya Njambi na kumona haje hatunapande kupangela, oloni kutupangelaho.
18. Byuma muka bitatu bitunapande kulinga omwo tupangesa cakumwenako?
18 Omwo tupangesa cakumwenako twasa kutembwinina mwanja wa Yakomba nga tulinga byuma bitatu binatako: (1) Pangeseni cakumwenako cije cikwasa banu bananguke simpi imushaka kulongesa. (2) Pangeseni cakumwenako cacasi. (3) Mweseni mucinalikwatasanena cakumwenako cimunapangesa na simpi imushaka kulumbununa. Nga kukamikaluwila kuwana byakumwenako binapande, co mwasa kuwana byakumwenako mu Buka ya Lipatisiso ya Lipaki za Jehova. Yeni ha mutamba wa “Liswanisezo,” co muwanaho byakumwenako byabingi bimwasa kupangesa. Anukeni ngweni byakumwenako binapu ngwe maikrofoni mwafwa byamesa simpi imushaka kulumbununa. Ngeci, pangeseni byakumwenako bije byamesa bisimpi byakama. Nameme ngoco, kutwesi kubwezelela ku butongwe bwetu bwa kulongesa mangana banu batushangale embwe. Oloni tukalingi ngoco mangana tukwase banu babangi baije mu naanga ya Yehova ya kubwahelela.
19. Tumwesa bati ngwetu twazema bandolome na bandokazi betu?
19 Nameme kutwesi na ndolome wa kulumbunuka ngwe yakele nendi Yakomba, oloni tuli na kupangela hamo na bandolome na bandokazi betu babangi. Tumwesa ngwetu twabazema nga tulikwatasana nabo, kulilongesa kuli bakebo na kupangela hamo nabo mu kulongwa cipangi ca kwambulula na kulongesa. Nga tweseka mwoshe mutwasela kutembwinina Yakomba, mu bilinga byetu, mutumwenamo byuma na ngila itulongeselamo, co twana bumpau kuli Yehova na kukwasa banu ba bimbunge byabibwa bashwenye kuli Tate yetu wa mwilu uje watuzema.
MWASO 114 ‘Pweni ba Kusimpa’
^ Yakomba na Yesu bakolelele mu naanga imo. Yakomba wazibukile mwamubwa Muna Njambi wa kulumbunuka kutubakana mubamuzibukilile banu babangi ha simbu ije. Muno mu cilongesa tumona bitulilongesa ku buyoye bwa Yakomba na ngila yalongeselelemo ou ndolome ya Yesu uje wakupwile umo wa bandolome batwamenenene baka-Kilistu ba mu simbu ya tupositolo.
^ Muno mu cilongesa, Yakomba tumutumbula ngwetu wapwile ndolome ya Yesu. Yakomba wapwile ndolome ya Yesu mwafwa baliwanenene kuli baina, co lalo hamo ikeye wasonekele mukanda wa Yakomba.
^ Nathan H. Knorr wakele mu Cibunga ca Kutwamenena, co wamanesele cipangi cendi ca hasi mu mwaka wa 1977.
^ KULUMBUNUNA CIKUPULO: Yakomba wapangesele cakumwenako ca mulangi wa tuhya mangana amwese bukalu bukatundu mu kupangesa ndaka mwamubi. Eci capwile cakumwenako cacibwa mwafwa banu boshe bazibukile mulangi wa tuhya.