1-2. (a) Tunasa kuliziba bati nga tusinganyekesesa ha byuma byaliwanene nabyo Yesu mu buyoye bwendi na cipangi cendi ca kwambulula? (b) Bika tusimutwiya muno mu cilongesa?

 NGA twatsisa munu itwazema tukalizibi manene busiwa. Ha kulibanga, tukalizibi manene kubabala ku mbunge mutukasinganyeka ha matangwa atwakele na uje munu simbu kanda atse. Maneneni nga owo munu wababalele ha simbu yailaha simbu kanda atse. Mu kwita kwa simbu tushangumuka kuliziba kubwahelela omwo tusinganyeka ha byuma byatulongesele na byuma byalingile bije byatutakamesele na kutuzibisa kubwaha.

² Mu ngila imolika tukalizibi manene kubabala ku mbunge mutuka tanda bya tuyando twa Yesu na kutsa kwendi. Byalumingo simbu kanda litangwa lya canukiso lyete na munima, tukapangesa simbu yetu mu kusinganyekesesa ha seho ya ndando ya kupatula yanene Yesu. (1 Kori 11:24, 25) Nameme ngoco tukabwahelela manene mutukasinganyekesesa ha byuma byendekele Yesu nebi byalingile mwakele hano hasi. Co lalo kututakamesa kusinganyekesesa ha byuma byali na kulinga ha simbu ino nebi byakatulingila kulutwe. Ngwe mutumwena muno mu cilongesa, kusinganyekesesa hali ebi byuma na cizemo catumwesele Yesu kutushongangeya mangana tumwese kukandelela kwetu mu bingila byabingi.

3. Bika bitulingisa tukandelele ku ndando ya kupatula?

³ Tukakandelela manene mutukasinganyekesesa ha kuyoya kwa Yesu na kutsa kwendi. Yesu mwakele hano hasi walekele banu bibezikiso byabingi bibukanena Bumwene bwa Njambi. Twazema manene bilongesa bya mu Mbimbiliya bije byendeka ha ndando ya kupatula nomwo muitukwasela. Tukakandelela  manene ku ndando ya kupatula ije itwasiwisa kulikuta busamba bwa kukanyama na Yehova na Yesu. Baje bamwesa likulahelo muli Yesu bali na lilabelelo lya kukayoya myaka yoshe na kukalimona lalo na banu babazema baje banatsi. (Iwano 5:28, 29; Loma 6:23) Byuma bya natulingila Yehova na Yesu binapu byakama manene, co kukwesi bitwasa kufweta bije bimwesa kukandelela kwetu. (Loma 5:8, 20, 21) Oloni twasa kumwesa ngwetu twakandelela ku byuma bibanatulingila. Mungila muka?

4. Maliya Magadalena wamwesele bati kukandelela kwendi ku byuma byamulingilile Yesu? (Taleni cikupulo.)

⁴ Tucisimutwiyeniko ha cakumwenako cimo ca munakazi wa Kajuda wa lizina lya Maliya Magadalena. Wakele mu bukalu bwakama manene mwafwa badimona 7, bakele na kumuyandesa. Wasele kuliziba ngwendi wahi asa kumukwasa. Acisinganyekeni mwalizibililile Yesu mwafumisile baje badimona bakele na kumuyandesa. Wamwesele kukandelela kwendi omwo wakabangeyeye Yesu na kupangesa simbu yendi, nzili yendi na byuma byakele nabyo mu kukundwiya cipangi ca kwambulula. (Luka 8:1-3) Nameme Maliya wakandelelele manene ku byuma byamulingilile Yesu ha simbu ije, oloni hamo kazibukile byuma byakamulingila kulutwe. Wanene mwonyo wendi na kutsila banu mangana “woshe amukulahela,” akawane mwonyo wa myaka yoshe. (Iwano 3:16) Nameme ngoco Maliya wamwesele kukandelela kuli Yesu ha kupwa wa kulongwa. Yesu mwakele ha citi ca kuyandesela, Maliya wakele muyehi mwafwa wazemene manene Yesu, co washakele kuzembeleka baje bakeleko. (Iwano 19:25) Munima ya kutsa kwendi, Maliya hamolika na banakazi babali banenele byuma bya lwengo lwalubwa ku mbumbo ya Yesu mangana bakumukwite. (Maki 16:1, 2) Yehova wabezikisile manene Maliya, mwafwa ya kulongwa kwendi kuli Yesu. Maliya wabwahelelele manene mwaliwanene na Yesu uje wasangukile na kusimutwiya nendi. Oku kwapwile kubezika kwakama manene, mwafwa bandongesi ba Yesu bamo kubabezikile mu ngila ei.—Iwano 20:11-18.

5. Twasa kumwesa bati kukandelela ku byuma byanatulingila Yehova na Yesu?

 ⁵ Netu twasa kumwesa kukandelela ku byuma byanatulingila Yehova na Yesu omwo tupangesa simbu yetu, nzili yetu na byuma bituli nabyo mu cipangi ca Bumwene. Cakumwenako, twasa kulyana mu bipangi bya kutunga na kutwalelelaho kunyunga myela ya kulemesela.

6. Bika twendekela ngwetu ndando ya kupatula inapu bwana bubanana kuli umo na umo wetu?

⁶ Kusinganyekesesa ha byuma byanatulingila Yehova na Yesu, kutulingisa tubazeme manene. (1 Iwa 4:10, 19) Kunanguka ngwetu Yesu watsililile umo na umo wetu, kutulingisa tubazeme manene. Kapositolo Paulu wanangukile ngwendi Yesu watsililile ikeye, co wamwesele ngoco mu majwi asonekelele baka-Ngalatiya. Wendekele ngwendi: “Muna Njambi . . . wanjizemene, co walyanene ikeye babenya mwafwa yange.” (Gala 2:20) Ndando ya kupatula inalingisa Yehova atushwenyese kuli ikeye mangana twase kupwa babusamba bendi. (Iwano 6:44) Kuma kumubwahelela kuzibuka ngweni Yehova namono bifwa byabibwa muli yeni, ngeci nana ndando yakama manene mangana mwase kupwa kabusamba kendi ndi? Kuma oku kukumilingisa muzeme manene Yehova na Yesu ndi? Ngeci tunapande kulihula ngwetu, ‘Kuzema Yehova na Yesu kunjishongangeya njilinge bika?’

7. Kwesekesa na cikupulo, byuma muka bitwasa kulinga mangana tumwese ngwetu twazema Yehova na Yesu? (2 Korinte 5:14, 15; 6:1, 2)

⁷ Kuzema Yehova na Yesu kukatulingisa tuzeme manene bakwetu. (Tandeni 2 Korinte 5:14, 15; 6:1, 2.) Ngila imo itunasa kumweselamo cizemo inapu kupanga na nzili cipangi ca kwambulula. Tunapande kwambulwila munu woshe ituwana. Tukambulwila banu boshe ipwe bakutunda ku muyati weka, cisemwa ceka, tuhutu na baka-kufuka, baka-kulilongesa nameme  bakujeneka kulilongesa. Nga tulinga ngoco, co tumwesa ngwetu tuli na kushulisilila biyongola bya Yehova uje ashaka ngwendi, “banu ba miyati yoshe boboke na kweta ha kukala na mangana a busunga a kuzibuka busunga.”—1 Timo 2:4.

8. Twasa kumwesa bati cizemo kuli bandolome na bandokazi betu?

⁸ Tumwesa lalo ngwetu twazema Njambi na Kristu nga tuzema bandolome na bandokazi betu. (1 Iwa 4:21) Twabaka mbunge co lalo tukabakwasa nga baliwana na byeseko. Tukabazembeleka nga banatsisa munu ibazema, tukabendela nga bali na kubinja, co lalo tukalingi mutwasela mwoshe kubatakamesa nga banazeye. (2 Kori 1:3-7; 1 Tesa 5:11, 14) Tukabakundika mu malombelo etu mwafwa tuzibuka ngwetu, “kulambelela kwa munu wa kusungama kuli na nzili.”—Jems 5:16.

9. Ngila muka ikwabo itwasa kumweselamo cizemo kuli bandolome na bandokazi betu?

⁹ Tumwesa cizemo kuli bandolome na bandokazi betu, nga tulinga mwoshe mutwasela kukala nabo mu kwoloka. Tukeseka mutwasela mwoshe kutembwinina Yehova uje wapwa muka-kukonekela. Yehova watwanene Munendi kutundilila kwisi ya mbunge mangana akututsile. Ngeci netu tunapande kukonekela bandolome na bandokazi betu kutundilila kwisi ya mbunge nga banatubiisila. Kutushaka kupwa ngwe uje ndungo wamubi yendekele Yesu mu cisimo. Nameme shukulu yendi wamukonekelele mukuli wakama wakongwele, oloni ikeye wonowele kukonekela ndungo mukwabo uje wakongwele bimbongo byabindondo kuli ikeye. (Mate 18:23-35) Nga mwalisebuka na ndolome nambe ndokazi mu cikukungulukilo, co lingeniko bimo mangana mukale mu kwoloka simbu kanda litangwa lya Canukiso lyete. (Mate 5:23, 24) Nga mulinga ngoco, co mumwesa ngweni mwazema manene Yehova na Yesu.

10-11. Bakulunu basa kumwasa bati ngwabo bazema Yehova na Yesu? (1 Pita 5:1, 2)

¹⁰ Bakulunu basa kumwesa bati ngwabo bazema Yehova na Yesu? Ngila ya seho ibanasa kulingilamo ngoco inapu kunyungilila mwamubwa bimanga ba Yesu. (Tandeni 1 Pita 5:1, 2.) Yesu wakwasele kapositolo Pita azibisise mwamubwa ei simpi. Munima ya kubyana Yesu ha bisimbu bitatu, Pita washakele kuwana ngila ya kumweselamo ngwendi wazemene manene Yesu. Yesu mwasangukile wehwile Pita ngwendi: ‘Simoni muna Iwano, wanjizema ndi?’ Twakulahela ngwetu Pita walibwaheselele kulinga byuma byoshe-ibyoshe mu kushaka kumwesa ngwendi wazemene Shukulu yendi. Yesu walekele Pita ngwendi: “Lisa bimanga bange babandondo.” (Iwano 21:15-17) Mu kuyoya kwendi kwoshe Pita wanyungile mwamubwa bimanga ba Mwene yendi, mwafwa washakele kumwesa ngwendi wazemene Yesu.

¹¹ Bakulunu mwasa kumwesa bati ngweni majwi endekele Yesu kuli Pita anapu a seho kuli yeni ha byalumingo simbu kanda litangwa lya Canukiso lyete na munima? Mwasa kumwesa ngweni mwazema Yehova na Yesu nga mulinga mwamubwa cipangi ca kunyunga bimanga na kulinga mumwasela mwoshe kukwasa baje banazeye beluke kuli Yehova. (Ezeki 34:11, 12) Mwasa lalo kutukamesa baje bacililongesa Mbimbiliya na baje banaija ku canukiso lwakulibanga, tushaka tubakwase balizibe kushubuluka mwafwa nabo tangwa bakapwa bandongesi ba Yesu.

12. Bika twendekela ngwetu majwi endekele Yesu ha butsiki bwa kwinduka litangwa li bamutsiile atutakamesa? (Iwano 16:32, 33)

¹² Ha butsiki bwa kwinduka litangwa libamutsiile, Yesu walekele bandongesi bendi ngwendi: “Muliwana na kayando mu kaye,  oloni simpeni, njinafungulula kaye.” (Tandeni Iwano 16:32, 33.) Bika byakwasele Yesu ahyane bitozi bendi mu kusimpa na kupwa wa kulongwa kweta na ha kutsa kwendi? Wakulahelele Yehova. Wazibukile ngwendi bandongesi bendi nabo baliwana na byeseko byakulifwa mukemwo Yesu walombele Yehova mangana anyunge bandongesi bendi. (Iwano 17:11) Mwafwa bika kuzibuka ngoco kututakamesa? Mwafwa Yehova wakala manene na nzili kutubakana bitozi betu. (1 Iwa 4:4) Yehova akamono byuma byoshe. Twalimwena ngwetu nga tukulahela Yehova, co atukwasa tupwe ba kusimpa.

13. Jozefu wa ku Arimathiya wamwese bati kusimpa?

¹³ Tucisimutwiyeni hali Jozefu wa ku Arimathiya. Ou munalume, Bajuda bamusingimikile manene. Wapwile mwata mu kunta yakama ya Bajuda ya Sanihedrini. Oloni ha simbu yakele Yesu hano hasi, Jozefu kasimpile na kumwesa ku mbunga ngwendi wapwile ndongesi ya Yesu. Iwano wendekele ngwendi wapwile ndongesi ya Yesu oloni, “wa mu bushweke, mwafwa wakele na kutewa Bajuda.” (Iwano 19:38) Nameme Jozefu wazemene muzimbu wa Bumwene, oloni kashakele kulijombolola kuli bakwabo ngwendi wakulahelele muli Yesu. Hamo walishoshomwenene ngwendi nga banu bazibuka ngwabo wapwa ndongesi ya Yesu, co kubamusingimika. Nameme ngoco, Mbimbiliya imwesa ngwayo munima ya kutsa kwa Yesu, Jozefu “wasimpile, co waile kuli Pilato na kulomba mubila wa Yesu.” (Maki 15:42, 43) Ha simbu ei banu bazibukile oni ngwabo Jozefu wapwa ndongesi ya Yesu.

14. Bika bimunapande kulinga nga muli na kutewa banu?

¹⁴ Kuma neni mwakala na lyoba ngwe Jozefu ndi? Kuma mukazibi lyoba kuleka bakweni bamukapanga nabo nambe bamwakobela nabo sikola ngweni mu Bakaleho ba Yehova ndi? Kuma muli na kwonwa kupwa muka-kwambulula wa kujeneka kumbwitika nambe kwonwa kumbwitikiwa mwafwa ya kutewa byuma bibanasa kwendeka bakweni hali yeni ndi? Keti mwecelele lyoba limyonowese kulinga byuma bimuzibuka ngweni byabibwa. Lombeni Yehova kutundilila kwisi ya mbunge. Mulombeni amikwase kupwa ba kusimpa mangana mulinge cizango cendi. Omwo mulimwena mwakumbwililamo Yehova malombelo eni, co mukolesa na kupwa ba kusimpa.—Isaya 41:10, 13.

15. Kubwahelela kubakele nakwo bandongesi ba Yesu mubamumwene kwabalingisile balinge bika? (Luka 24:52, 53)

¹⁵ Tupositolo basalele mu busiwa bwakama Yesu mwatsile. Acisinganyekeni lika mubalizibilile. Kubalizibile lika ngwe banatsisa  kabusamba kabo ibazema manene, oloni balizibile ngwe na lilabelelo lyabo bene linahu. (Luka 24:17-21) Oloni Yesu mwasholokele kuli bakebo wabakwasele bazibisise mwashulisilile bupolofweto bwa mu Mbimbiliya. Wabanene lalo cipangi ca seho manene. (Luka 24:26, 27, 45-48) Munima ya matangwa 40, kutunda ha kusanguka kwendi, bandongesi bendi kubalizibile lalo busiwa oloni babwahelelele manene, mwafwa bazibukile ngwabo Yesu ali na kuyoya, co abakwasa bapange mwamubwa cipangi cabanene. Kubwahelelela kwabo kwabalingisile batwaleleleho kuzumbangeya Yehova.—Tandeni Luka 24:52, 53; Bili 5:42.

16. Twasa kutembwinina bati bandongesi ba Yesu?

¹⁶ Twasa kutembwinina bati tupositolo ba Yesu? Twasa kupwa ba kubwahelela simbu yoshe omwo tulemesa Yehova, keti lika mu bingonde bya Canukiso. Oloni tupwa ba kubwahelela manene nga tutwameka bya Bumwene mu kuyoya kwetu kwoshe. Cakumwenako, babangi banatengululako cinoneko ca bipangi byabo mangana base kulinga cipangi ca kwambulula, kukunguluka na kulinga kulemesa kwa naanga kushwa kumo. Bamo banalyangwila kujeneka kukala na byuma bimo bya kumubila bije bibamona banu bamo kupwa bya seho. Banalingi ngoco mangana base kulinga byabingi mu cikungulukilo nambe kukapangela kuje kuli bujene bwa baka-kwambulula bya Bumwene. Nameme keti kwakwasi kutwalelelaho kupangela Yehova, oloni nakulahesa kutubezikisa manene nga tulinga mutwasela mwoshe kutwameka bya Bumwene kulutwe.—Visi 10:22; Mate 6:32, 33.

17. Bika bimunalibwahesela kulinga muno mu bingonde bya Canukiso? (Taleni cikupulo.)

¹⁷ Twabandemena kukalikuwa Canukiso Lyamucibali, April 4. Nameme ngoco ino ikeyo simbu yaibwa itunapande kusinganyekesesa ha buyoye na kutsa kwa Yesu na cizemo canatumwesa Yehova na Yesu, simbu kanda litangwa lya Canukiso lyete. Singanyekeseseni manene hali ebi byuma mu byalumingo bya Canukiso. Tunapande kuwanako simbu ya kutanda na kusinganyekesesa ha byuma bili mu cati ije ili mu mukanda wa biwano wa April 2019, liputa 4, ije yendeka bya calumingo ca mamaneselelo ca kuyoya kwa Yesu kwa hano hasi. Omwo mulinga ngoco tondeni biñanda bije bimikwasa mukale na mbunge ya kukandelelela, cizemo na kupwa ba kusimpa na kubwahelela. Co lalo waneni bingila mumwasa kumwesela kukandelela kweni kutundilila kwisi ya mbunge. Kulaheleni ngweni byuma byoshe bimulinga muno mu bingonde bya Canukiso ca uno mwaka binapu bya seho kuli Yesu.—Kujo 2:19.