CILONGESA 30
Bupolofweto Bwakulibanga Buje Bunatukundama
‘Njikaka cizindo hakati kobe na munakazi.’—KUSHA 3:15.
MWASO 15 Shangazaleni Muna Yehova wa Ntwatwa!
BILI MUNO MU CILONGESA *
1. Yehova walingile bika, Adama na Eva mubalingile bubi? (Kushangumuka 3:15)
ADAMA na Eva mubalingile bubi, Yehova wendekeleko bupolofweto bumo bwa kulitila buje bwalingisile bana babo bakale na lilabelelo. Obu bupolofweto buli ku mukanda wa Kushangumuka 3:15.—Tandeni.
2. Mwafwa bika obu bupolofweto bwapwa bwa seho?
2 Obu bupolofweto buli ku mukanda wa Kushangumuka. Oloni biñanda bili ku mikanda ikwabo yamu Mbimbiliya bilitombola nobu bupolofweto. Twonzi tutukakutisa mukuta wa bikuni, tukalingisa bikuni bikale hamo lika. Mu ngila imo lika, majwi ali ku mukanda wa Kushangumuka 3:15, anapu ngwe konzi kaje kanakutila hamo biñanda byoshe bya mu Mbimbiliya. Amwesa ngwawo Njambi akanyongesa Liyabolo hamo lika na banu bendi. * Oku ikapwa kubezika kwakama manene kuli baje bazema Yehova.
3. Bika bitusimutwiya muno mu cilongesa?
3 Muno mu cilongesa, tukumbulula bihula binatako bije binakundama bupolofweto buli ku mukanda wa Kushangumuka 3:15. Beya babanendeka omu mu bupolofweto? Obu bupolofweto buli na kulishulisilila bati? Co obu bupolofweto buli na kutukwasa bati?
BEYA BABANENDEKA OMU MU BUPOLOFWETO?
4. Linyoka iya, co tuzibuka bati ngoco?
4 Ku mukanda wa Kushangumuka 3:14, 15 banendekako bya “linyoka” na “mbuto” ya linyoka, bya “munakazi” na “mbuto” ya munakazi. Mbimbiliya itukwasa kuzibuka bicimanenena cuma na cuma. * Tushangumukeni kusimutwiya bya “linyoka.” Ou linyoka napu wa cifwisa mwafwa ngwe linyoka mpundu ngwe kasele kuzibisisa byendekele Yehova mu citungu ca Edeni. Ngeci, Yehova wakele na kusimutwiya na cuma cimo ca kutanga cije casa kutolilila na kuzibisisa. Cuma muka bene oco? Mukanda wa Kujombolola 12:9 utuleka cikumbululo. Ou mukanda umwesa ngwawo Satana Liyabolo ikeye “linyoka wa ku sañulu.” Oloni mbuto ya linyoka imanena beya?
LINYOKA
Satana Liyabolo uje ibanendeka ku mukanda wa Kujombolola 12:9 ngwabo “linyoka wa ku sañulu” (Taleni palagilafu 4)
5. Beya bapwa mbuto ya linyoka?
5 Mbimbiliya muikendeka bya mbuto ya cifwisa, ikalumbununa banu baje batembwinina munu umo. Co uje munu ibatembwinina, napu ishabo wa cifwisa. Ngeci, tungelo ba kujeneka kulongwa na banu baje bakatembwinina Satana mu kulwisa Yehova na banu bendi, bakebo mbuto ya linyoka. Banambateselela na tungelo baje basezele bipangi byabo mwilu mu matangwa a Nowa, na banu bababi baje bakatembwinina ishabo Liyabolo.—Kusha 6:1, 2; Yowa 8:44; 1 Yowa 5:19; Yunda 6.
MBUTO YA LINYOKA
Tungelo bababi na banu baje bakabyana Yehova Njambi na kulwisa banu bendi (Taleni palagilafu 5)
6. Mwafwa bika twendeka ngwetu ou “munakazi” kapwile Eva?
6 Tusimutwiyeni oni bya “munakazi.” Ou munakazi, keti Eva. Bika twendekela ngoco? Tusimutwiyeniko cuma cimo. Bupolofweto bumwesa ngwabo mbuto ya munakazi “ikasanyozola” mbuto ya linyoka. Ngwe mutunendekela, linyoka emanena Satana, co kukwesi muna Eva asa kumusanyozola. Co Satana bakamunyongesa bati?
7. Kwesekesa na Kujombolola 12:1, 2, 5 na 10, iya munakazi ibanendeka ku mukanda wa Kushangumuka 3:15?
7 Mukanda wa mamaneselelo mu Mbimbiliya utukwasa kuzibuka munakazi ibanendeka ku mukanda wa Kushangumuka 3:15. (Tandeni Kujombolola 12:1, 2, 5, 10.) Ou munakazi keti wa hano hasi. Ali na ngonde ku mendi endi, co nazala cilongo cili na bingongonosi 12 ku mutwe wendi. Nakiti mwana wa kulitila uje emanena Bumwene bwa Njambi. Obu Bumwene buli mwilu, ngeci ou munakazi nendi napande kukala mwilu. Ou munakazi emanena Munga ya Yehova ya mwilu ya tungelo ba kulongwa.—Ngala 4:26.
MUNAKAZI
Munga ya Yehova ya mwilu ya tungelo ba kulongwa (Taleni palagilafu 7)
8. Iya washangumukile kupwa mbuto ya munakazi, co washangumukile tangwa lika? (Kushangumuka 22:15-18)
8 Lijwi lya Njambi litukwasa tuzibuke mbuto ya munakazi. Wapandele kupwa mutekwilila wa Abilahama. (Tandeni Kushangumuka 22:15-18.) Ngwe mubunamwesela bupolofweto, Yesu ikeye mutekulwila wa Abilahama. (Luka 3:23, 34) Oloni munu wemanenene mbuto ya munakazi kapandele kupwa munu wa kujeneka kulumbunuka mwafwa ikeye napande kusanyozola Satana Liyabolo. Ngeci, Yesu mwakele na myaka ya kupwa 30, Njambi wa mubwabesele na sipilitu ya kujela. Mubamubwabesele, Yesu ikeye waputukile kupwa mbuto ya munakazi. (Ngala 3:16) Yesu watsile, co mwasangukile, Njambi ‘wamuzikile cilongo ca bumpau na kasingimiko’ co lalo wamwanene na “Moko yoshe ya mwilu neyi ya hano hasi” ya “kunyongesa bije byalingile Liyabolo.”—Heve 2:7; Mateo 28:18; 1 Yowa 3:8.
MBUTO YA MUNAKAZI
Yesu Kilistu na baka-Kilistu ba kubwabesa baje bakayula hamo nendi (Taleni palagilafu 8-9)
9-10. (a) Beya bakwabo bapwa mbuto ya munakazi, co simbu muka bakapu mbuto ya munakazi? (b) Bika bitusimutwiya?
9 Oloni kuli bakwabo banapu mbuto ya munakazi. Majwi endekele kapositolo Paulu kuli baka-Kilistu bakubwabesa ba Bayunda na baje kubapwile Bayunda, atukwasa kuzibuka bakwabo baje bapwa mbutu ya munakazi. Wendekele ngwendi: “Co nga munakundama kuli Kilistu, ngeci bene, yeni munapu batekulwila ba Avilahama, co mukatambula bije byakulahesele Njambi.” (Ngala 3:28, 29) Nga Yehova abwabesa muka-Kilistu na sipilitu ya kujela, co ou munu apwa mbuto ya munakazi. Ngeci, Yesu Kilistu hamo lika na baka-Kilistu ba kupwa 144,000 baje bakayula nabo, bakebo bapwa mbuto ya munakazi. (Kujo 14:1) Boshe aba bakatembwinina Yehova Njambi uje wapwa Ishabo.
10 Twazibuka oni bicimanena cuma na cuma cibanendeka ku mukanda wa Kushangumuka 3:15. Tusimutwiyeni oni ha byuma byanalingi Yehova mangana ashulisilile obu bupolofweto nomu mubutukwasela.
YEHOVA NALINGI BIKA MANGANA OBU BUPOLOFWETO BULISHULISILILE?
11. Bika bibwalumbwinine bupolofweto omwo bwamwesele ngwabwo mbuto ya munakazi bakaishuma kuli “linsinsinye”?
11 Bupolofweto buli ku mukanda wa Kushangumuka 3:15, bumwesa ngwabwo linyoka akashuma ku “linsinsinye” lya mbuto ya munakazi. Obu bupolofweto bwalishulisilile omwo Satana walingisile Bayunda na Baloma batsiye Muna Njambi. (Luka 23:13, 20-24) Nga munu nabulumuka ku linsinsinye, co kasa kwenda mwamubwa. Mu ngila imo lika Yesu mubamutsiile kasele kulinga cuma coshe-coshe ha matangwa atatu.—Mateo 16:21.
12. Mutwe wa linyoka bakausanyozola bati, co simbu muka ibakalinga ngoco?
12 Bupolofweto buli ku mukanda wa Kushangumuka 3:15 bwamwesele ngwabwo Yesu kakakalelela mu mbumbo. Mwafwa bika? Mwafwa obu bupolofweto bwamwesele lalo ngwabwo mbuto ya munakazi ikasanyozola mbuto ya linyoka. Oku kulumbununa ngwabo Yesu wapandele kusanguka. Co mukemwo mukwafwililile. Ha litangwa lyamucitatu kutunda hatsililile, wasangukile oku ali na mubila wa sipilitu. Yesu akanyongesa Satana ha simbu yanabwahesa Njambi. (Heve 2:14) Kilistu hamo lika na baje bakayula nabo lifuti-libu, bakanyongesa bitozi ba Njambi boshe baje banapu mbuto ya linyoka.—Kujo 17:14; 20:4, 10. *
OBU BUPOLOFWETO BUTUKWASA BATI?
13. Kulishulisilila kwobu bupolofweto kutukwasa bati?
13 Nga mwapwa ngamba wa Njambi, co kulishulisilila kwobu bupolofweto kuli na kumikwasa. Yesu mwezile hano hasi, watembwininine bifwa bya Ishe mu kulumbunuka. (Yowa 14:9) Ngeci, natulingisa tuzibuke mwamubwa Yehova Njambi na kumuzema. Co lalo bilongesa bya Yesu nomu mwali na kutwamenenamo baka-Kilisitu, bili na kutukwasa manene. Natulongesa mwakuyoyela mu ngila ije izibisa Yehova kubwaha. Kutsa kwa Yesu nambe ngwetu kumushuma ku linsinsinye kunatukwasa manene tubaboshe. Mu ngila muka? Yesu mwasangukile, Yehova watambwile mulambu wendi wa kulumbunuka mangana ‘atujelese ku bubi bwoshe.’—1 Yowa 1:7.
14. Tuzibuka bati ngwetu bupolofweto bwendekele Yehova mu lihya lya Edeni kubwalishulisilile haje bene? Lumbununeni.
14 Majwi endekele Yehova mu citungu ca Edeni, amwesa ngwawo byuma bimo bibanendeka omu mu bupolofweto bikalishulisilila kulutwe. Kwapandele kwita simbu mangana munakazi akite mbuto yendi na Liyabolo akungulule baka-kukabangeya, co lalo kwapandele kwita simbu mangana kukale cizindo mukati ka mbuto ya munakazi na mbuto ya Liyabolo. Kuzibisisa obu bupolofweto kutukwasa mwafwa kutwanukisa byendekele laja Njambi ngwendi banu ba muno mu kaye kali na kuyula Satana, bakazinda bangamba ba Yehova. Mukwetile simbu, Yesu nendi wanangwile bandongesi bendi mu ngila ya kulifwa. (Mako 13:13; Yowa 17:14) Twalimwena bupolofweto bumo buli ku mukanda wa Kushangumuka 3:15 mubunalishulisilila, maneneni mu myaka 100 ineti. Mu ngila muka?
15. Mwafwa bika kutwapandele kutewa Satana nameme banu babangi batuzinda?
15 Yesu mwashangumukile kuyula mu 1914, washekele Satana mwilu. Bamumbilile hano hasi, co ololo bamunyongesa. (Kujo 12:9, 12) Kushwa habamushekelele mwilu, Satana nazezama. Satana na lubala manene, co ali na kulwisa banu ba Njambi. (Kujo 12:13, 17) Ebi bikebyo binalingisa Kaye ka Satana kazinde manene bangamba ba Njambi. Nameme ngoco, kutwapandele kutewa Satana na banu bendi. Oloni tunapande kukulahela Njambi na bimbunge byetu byoshe ngwe mwalingilile kapositolo Paulu uje wasonekele ngwendi: “Nga Njambi napu wetu, co iyajo asa kutulwisa?” (Loma 8:31) Ngwe mutunamwena muno mu cilongesa, bupolofweto bwabwingi buli ku mukanda wa Kushangumuka 3:15 bunalishulisilila, co bunatulingisa tukulahele manene Yehova.
16-18. Kuzibisisa bupolofweto buli ku mukanda wa Kushangumuka 3:15 kunakwasa bati Curtis, Ursula, na Jessica?
16 Cikulaheso cili ku mukanda wa Kushangumuka 3:15, citulingisa tukulahele ngwetu Yehova atukwasa mu bukalu bwoshe-bwoshe butuliwana nabwo. Curtis uje wapwa kamishinali mu Guam ngwendi: “Simbu imo njikaliwana na byeseko bije bikatondo kunjonowesa kutwalelelaho kupwa wa kulongwa kuli Yehova. Oloni kusinganyekesesa ha bupolofweto buli ku Kushangumuka 3:15 kunanjikwasa njitwaleleleho kukulahela Tate wa mwilu.” Curtis nabandamena kukalimwena omwo Yehova akamanesa byeseko byoshe bituli na kuliwana nabyo.
17 Ndokazi Ursula wa ku Bavaria ngwendi kuzibisisa bupolofweto buli ku mukanda wa Kushangumuka 3:15 kunamukwasa akulahele ngwendi Mbimbiliya banaihwiminina kuli Njambi. Wabwahelelele manene mwalimwenene ngwendi obu bupolofweto bunalitombola na bupolofweto bwoshe bwa mu Mbimbiliya. Wendekele lalo ngwendi: “Kuzibuka ngwange Yehova nalingiko bimo bwasi-bwasi mangana atukwase kukala na lilabelelo, kwanjilingisa njimuzeme manene.”
18 Ndokazi Jessica wa ku Micronesia wendekele ngwendi: “Njicanuka munjalizibilile lwakulibanga munjanangukile ngwange njinawana busunga. Njalizibile ngwange bupolofweto buli ku Kushangumuka 3:15 bwalishulisilile. Bwanjikwasele njanuke ngwange Yehova kabwahesele ngwendi tuliwane na bukalu butuli na kuliwana nabwo. Obu bupolofweto bwanjikwasa lalo njikulahele ngwange kupangela Yehova kukekwo kwasa kunjilingisa njipwe wa kubwahelela ha simbu ino na kulutwe.”
19. Mwafwa bika twakulahela ngwetu bupolofweto buli ku mukanda wa Kushangumuka 3:15 buje kanda bucilishulisilile bukalishulisilila?
19 Ngwe mutunamwena, bupolofweto buli ku mukanda wa Kushangumuka 3:15 buli na kulishulisilila. Bunatukwasa tuzibuke biimanena mbuto ya munakazi na mbuto ya linyoka. Yesu uje napu mbuto yakulibanga ya munakazi nasanguka, co napu Mwene wa nzili. Co ololo Yehova amanesa kwangula banu boshe baje bakayula na Yesu mwilu. Twakulahela ngwetu bupolofweto buje bwendeka ngwabwo mutwe wa linyoka bakausanyozola, bukalishulisilila, mwafwa majwi a kulinga a mu bupolofweto bwa ku mukanda wa Kushangumuka 3:15 bunalishulisilila. Bangamba ba Njambi bakabwahelela manene Satana mu bakamunyongesa. Ngeci, keti muzeye mwafwa Njambi kesi kukwisa. Akapangesa mbuto ya munakazi kunena bibezikiso ku “miyati yoshe ya hasi.”—Kushangumuka 22:18.
MWASO 23 Yehova Nashangumuka Kuyula
^ Kutwasa kuzibisisa mwamubwa Mbimbiliya nga kutuzibisisa mwamubwa bupolofweto buli ku mukanda wa Kushangumuka 3:15. Kulilongesa obu bupolofweto, kukanyamesa likulahelo lyetu, co lalo kutulingisa tukulahele ngwetu Yehova akashulisilila byuma byoshe byanakulahesa.
^ Taleni Litaba Zeekelizwe B1, “Taba ya Butokwa Yefumaneha Mwa Bibele” mu Mbimbiliya ya Silozi ya Toloko ya Lifasi Lelinca.
^ Taleni cipalo ca “Beya Babanendeka Omu mu Bupolofweto Buli ku Mukanda wa Kushangumuka 3:14, 15?”
