1. Tunapande kuliziba bati ha bwana bwanatwana Yehova bwa kulombela kuli ikeye?

 ISHAMATANGA wa lilu na kaye natwana bwana bwa kulitila bwa kulombela kuli ikeye. Acisinganyekeni, twasa kulombela kuli Yehova simbu yoshe-yoshe mu ndaka yoshe-yoshe kwa kujeneka kulomba lisesa. Twasa kulombela kuli ikeye nameme tuli mu cipatela nambe mu kamenga na kukulahela ngwetu Tate yetu wa cizemo atutolilila. Tukakandelela manene ha kutwana obu bwana.

2. Mwene Ndabiti wamwesele bati ngwendi wamwene lilombelo kupwa lya seho?

² Mwene Ndabiti wamwene lilombelo kupwa lya seho. Wendekele kuli Yehova ngwendi: “Lilombelo lyange lipwe ngwe insense ku mesho obe.” (Myaso 141:1, 2) Mu simbu yayoyele Ndabiti, bakele na kupangesa insense mu kwana milambu mu ngila inapande. (Kutu 30:34, 35) Awa majwi amwesa ngwawo Ndabiti washakele kusinganyekesesa ha byuma byendeka kuli Yehova ngwe mubakele na kulingila baje bakele na kubwahesa insense. Netu bikebyo bitushaka. Tushaka ngwetu malombelo etu azibise Yehova kubwaha.

3. Tunapande kulombela kuli Yehova mu ngila muka, co mwafwa bika?

³ Omwo tulombela kuli Yehova, tunapande kulinga ngoco mu kasingimiko. Isaya, Ndanyele, na Yowano, bamwene bimona bya kuliseza-seza. Ebi bimona byalifwileko mu ngila imo. Byoshe bimwesa ngwabyo Yehova wapwa Mwene wamubwa. Isaya wamwene Yehova “natumbama ha litanda lyendi lyalilaha lya hakamwa.” (Isaya 6:1-3) Ezekiyele wamwene Yehova  natumbama ha litanda lyendi oku ceke cije ‘cabyazimine ngwe ceke ca nkongolo’ cinamuzengeleka. (Ezeki 1:26-28) Ndanyele wamwene uje “wakala ku myaka yoshe” oku nazala buzalo bwa kutoka, co milangi ya tuhya yakele na kutundilila ku litanda lyendi. (Ndanye 7:9, 10) Co Yowano wamwene Yehova natumbama ha litanda lyendi, co cuma cakufwa ngwe nkongolo ya kufwa ngwe limanya lya emalinde cinamuzengeleka. (Kujo 4:2-4) Kusinganyekesesa ha bubwa na bukama bwa Yehova kutulingisa tumukandelele manene ha bwana bwanatwana bwa kulombela kuli ikeye. Oloni bika bitwasa kwendeka mu malombelo etu?

4. Bika bitulilongesa ku majwi abangele kwendeka Yesu mu lilombelo lyendi lya kutalelako lije lili ku Mateo 6:9, 10?

⁴ Tandeni Mateo 6:9, 10. Mu Ñanda yendi ya ha Munkinda, Yesu walongesele bandongesi bendi mwakulombelela mu ngila ije izibisa Njambi kubwaha. Munima ya kubaleka ngwendi “omu mukemwo mumunapande kulomba,” Yesu wabangele kwendeka byuma bya seho mu lilombelo lyendi. Wendekele bya kujelesa lizina lya Njambi, bya kwija kwa Bumwene buje bukanyongesa bitozi ba Njambi na byuma byabibwa byakalingila banu kulutwe. Nga twendeka ebi byuma mu malombelo etu, co tumwesa ngwetu cizango ca Njambi capwa ca seho manene kuli yetu.

5. Kuma Yehova akatolilila ku malombelo etu nga tulomba byuma bya ku mubila ndi?

⁵ Kutundaho, Yesu wendekele byuma bije byamwesele ngwabyo kulomba byuma bya ku mubila kukwabihile. Twasa kulomba Yehova atwane byakulya bya ha litangwa na litangwa na kutukonekela ku bubi bwetu na kutunyungilila ku byeseko na kutwamena kuli muka-bubi. (Mateo 6:11-13) Nga tulomba Yehova ebi byuma, co tumwesa ngwetu twamukulahela, co lalo tushaka kumuzibisa kubwaha.

6. Nga tulombela kuma tunapande lika kwendeka majwi ali mu lilombelo lya kutalelako ndi? Lumbununeni.

⁶ Yesu kalekele bandongesi bendi ngwendi simbu yoshe banapande kutembwinina majwi ali mu lilombelo lya kutalela. Mu malombelo akwabo, Yesu wendekele byuma byeka bije byapwile bya seho kuli ikeye ha simbu oyo. (Mateo 26:39, 42; Yowa 17:1-26) Mu ngila imo lika, netu twasa kulomba bukwasi  bwoshe-bwoshe bututonda ha simbu oyo. Nga kuli byuma bitushaka kwangula kulinga, twasa kulomba Yehova atwane mana na kuzibisisa. (Myaso 119:33, 34) Nga banatwana cipangi cimo cacikalu, twasa kulomba Yehova atukwase kuzibuka mwakucilingila. (Visi 2:6) Bisemi basa kulombelelako bana babo, co bana nabo basa kulombelelako bisemi babo. Kutundaho, tubaboshe tunapande kulombelelako batukalilongesa nabo Mbimbiliya na aba batukambulwila. Oloni nga tulombela, kutwapandele lika kulomba Yehova ngwetu atukwase.

7. Mwafwa bika tunapande kushangala Yehova mu malombelo etu?

⁷ Tunapande kushangala Yehova mu malombelo etu. Ikeye itunapande kushangazala manene kutubakana banu boshe. Wapwa wamubwa na “muka-kusambesa.” Kutundaho, wapwa “muka-mema ku mbunge, wapwa njambi wa ngozi na cizemo, kesi kulubala bwasi, co washula na cizemo cije kucesi kutenguluka.” (Myaso 86:5, 15) Cili bene, tunapande kushangazala Yehova mwafwa ya bifwa byendi byabibwa na byuma byanalingi.

8. Byuma muka bitwasa kukandelela kuli Yehova? (Myaso 104:12-15, 24)

⁸ Kutwapandele lika kushangala Yehova mu malombelo etu, oloni tunapande lalo kumukandelela mwafwa ya byuma byabibwa byanatulingila. Cakumwenako, twasa kukandelela Yehova ha mibala yaibwa ya binemo na byakulya byabingi byabibwa byakatwana hamo lika na babusamba bababwa. Tate yetu wa cizemo akatwana ebi byuma byoshe na bikwabo mwafwa ashaka ngwendi tupwe ba kubwahelela. (Tandeni Myaso 104:12-15, 24.) Cuma cikwabo cikatulingisa tukandelele Yehova, cikapu byakulya bya ku sipilitu byakatwana bije bikatukwasa tukanyamese likulahelo lyetu na lilabelelo lituli nalyo.

9. Bika byasa kutukwasa tukandelele kuli Yehova? (1 Tesanika 5:17, 18)

⁹ Simbu imo tunasa kwibala kukandelela kuli Yehova ha byuma byanatulingila. Bika bimunapande kulinga mangana mwanuke? Mwasa kusoneka mukana wa byuma bimunalombele kuli Yehova na kwituluka itulukamo mangana mumone mwanamikumbulwila. Co kandeleleni ha byuma byanamilingila.  (Tandeni 1 Tesalonika 5:17, 18.) Tukabwahelela na kuliziba ngwetu bakwetu batuzema nga bakandelela ha byuma bitunabalingila. Mu ngila imo lika, Yehova akabwahelela nga tukandelela kuli ikeye ha kukumbulula malombelo etu. (Kolo 3:15) Oloni kuli Cuma cikwabo ca seho cinapande kutulingisa tukandelele kuli Yehova.

10. Kwesekesa na 1 Petulu 2:21 mwafwa bika tunapande kukandelela kuli Yehova ha kututumina Munendi yazema?

¹⁰ Tandeni 1 Petulu 2:21. Tunapande kukandelela kuli Yehova ha kututumina Munendi yazema mangana akutulongese. Kulilongesa hali Yesu kutulingisa tuzibuke mwamubwa Yehova na byuma bitunapande kulinga mangana tumuzibise kubwaha. Nga tukulahela ndando ya kupatula ya Kilistu, co tukanyamesa busamba bwetu na Yehova Njambi.—Loma 5:1.

11. Mwafwa bika tukalombela mu lizina lya Yesu?

¹¹ Twakandelela kuli Yehova mwafwa natutabesa kulombela kuli ikeye kwitila muli Munendi. Yehova akapangesa Yesu mu kukumbulula malombelo etu. Yehova atolilila ku malombelo etu na kutukumbulula nga tulomba kwitila mu lizina lya Yesu. Yesu wendekele ngwendi: “Njikalinga cuma coshe-coshe cimukalomba mu lizina lyange, mangana Tate bakamushangazale kwitila muli Mwana.”—Yowa 14:13, 14, NWT.

12. Cuma muka cikwabo citulingisa tukandelele kuli Yehova ha kututumina Munendi?

¹² Yehova akakonekela bubi bwetu mwafwa ya ndando ya kupatula ya Yesu. Mbimbiliya imwesa ngwayo Yesu wapwa “kapilisitu wakama uje natumbama ku liboko lya cilyo ku litanda lya Shukulu wa hakamwa ya byoshe mwilu.” (Heve 8:1) Yesu ikeye “muka-kutwimanena kuli Tate.” (1 Yowa 2:1) Twakandelela manene kuli Yehova ha kutwana Kapilisitu Wakama uje akazibisisa buzeye bwetu na ‘kutulambelelako kuli Njambi.’ (Loma 8:34; Heve 4:15) Kutwalumbunukile, ngeci kwa kujeneka mulambu wa Yesu, kutwasa kulombela kuli Yehova. Ngeci tunapande kukandelela manene kuli Yehova ha kutwana Munendi yazema manene.

13. Ha butsiki bwa kwinduka litangwa libamutsiile, Yesu wamwesele bati ngwendi wazema bandongesi bendi?

¹³ Ha butsiki bwa kwinduka litangwa libamutsiile, Yesu walombelele bandongesi bendi kuli Ishe ngwendi ‘abanyunge kuli citozi.’ (Yowa 17:15) Yesu mwalingile ngoco, wamwesele ngwendi wabazemene. Nameme wazibukile ngwendi aliwana na bukalu bwakama, oloni wakele mbunge ku tupostolo bendi.

14. Twasa kumwesa bati ngwetu twazema bandolome na bandokazi betu?

¹⁴ Kutwapandele kwaka lika mbunge ku byuma bitutonda. Oloni tunapande kukundikako na bandolome na bandokazi mu malombelo etu ngwe mwalingilile Yesu. Nga tulinga ngoco, co twononoka lishiko lya Yesu lya kulizema umo na mukwabo, co lalo tumwesa Yehova ngwetu twazema bandolome na bandokazi betu. (Yowa 13:34) Kulombelelako bandolome na bandokazi betu kubakwasa. Lijwi lya Njambi ngwalyo “lilombelo lya munu muka-busunga lili na nzili manene.”—Yako 5:16.

15. Mwafwa bika tunapande kukundika bandolome na bandokazi mu malombelo etu?

¹⁵ Tunapande kulombelelako bandolome na bandokazi mwafwa bali na kuliwana na byeseko byabingi. Twasa kulomba Yehova abakwase kukolesa nga baliwana mu bukalu bwa kufwa ngwe kubinja, bukalu bwa  kulizila, binzita, mapakeso, na bukalu bukwabo. Twasa kulombelelako lalo bandolome na bandokazi baje bakalyana kukwasa bakwabo banaliwana na bukalu. Hamo muzibukako bamo banaliwana nobu bukalu. Mwasa kubakundika mu malombelo eni na kubatumbula ha mazina. Nga tulomba Yehova ngwetu akwase bandolome na bandokazi betu kukolesa, co tumwesa ngwetu twabazema.

16. Mwafwa bika tunapande kukundika baje bali na kutwamenena mu malombelo etu?

¹⁶ Tulinga mwamubwa lalo kukundika baje bali na kutwamenena mu bikungulukilo mu malombelo etu na kubatumbula ha mazina mwafwa kulinga ngoco kubakwasa manene. Kapositolo Paulu nendi wazibukile ngwendi bakwabo baka-Kilisitu bapandele kumukundika mu malombelo abo. Wendekele ngwendi: “Co nange lalo njilombeleleniko, ngeci Njambi anjane lijwi omwo njalibwahesela kwambulula, ngeci njambulule na kusimpa na kusholola cisiñiko ca muzimbu waubwa.” (Efeso 6:19) Na ano matangwa tuli na bandolome babangi baje bali na kupanga na nzili mu kutwamenena bikungulukilo. Nga tulomba Yehova ngwetu abezikise bipangi byabo, co tumwesa ngwetu twabazema.

17-18. Simbu muka ibanasa kutulomba ngwabo twimaneneko bakwetu mu lilombelo, co bika bitunapande kwaka mu bisinganyeka?

¹⁷ Simbu imo banasa kutulomba ngwabo twimaneneko bakwetu mu lilombelo. Cakumwenako, ndokazi uje atwamenena cilongesa ca Mbimbiliya nasa kulomba ndokazi yali nendi ngwendi alombele. Hamo ou ndokazi kazibuka mwamubwa munu ibali na kulilongesa nendi, ngeci nasa kulombela munima ya cilongesa. Kulinga ngoco kumukwasa azibuke mwamubwa bya kwendeka mu lilombelo.

¹⁸ Ndolome banasa kumulomba ngwabo alombele ha ciwano ca kuya mu lihya nambe ku biwano bya cikungulukilo. Bandolome baje balombela banapande kwangula mwamubwa bya kwendeka. Kubapandele kupangesa malombelo mu kulongesa bandolome na bandokazi nambe kwana mitambi. Ku biwano byabingi bya cikungulukilo bakabwahesa ngwabo mwaso na lilombelo bilingiwe lika  mu minutu 5, ngeci ndolome uje alombela kapandele kwendeka “majwi amangi” maneneni mu lilombelo lya kushokolola biwano.—Mateo 6:7.

19. Bika bitukwasa tulibwahesele litangwa lya Yehova?

¹⁹ Tunapande kumona lilombelo kupwa lya seho manene mwafwa litangwa lya Yehova lili muyehi. Mukemwo Yesu wendekele ngwendi: ‘Twaleleleniho kupwa ba kutona na kulombela simbu yoshe ngeci mukakale na nzili ya kuhyana byoshe bije bikalingiwa.’ (Luka 21:36) Kulombela simbu yoshe kutukwasa tutwaleleleho kupwa ba kutona mangana litangwa lya Njambi keti lyakutukasumune.

20. Majwi etu asa kupwa bati ngwe lwengo lwa insense?

²⁰ Bika bitunasimutwiya? Tunapande kumona lilombelo kupwa lya seho manene. Byuma bije bikundwiya biyongola bya Yehova bikebyo binapande kupwa bya seho manene mu malombelo etu. Kutundaho, mu malombelo etu, tunapande kukandelela kuli Njambi ha kutwana Munendi, co lalo tunapande kulombelelako na bandolome na bandokazi betu. Twasa lalo kulomba Yehova atwane byuma bitutonda na kumulomba atukwase kukanyamesa likulahelo lyetu. Nga tusinganyekesesa mwamubwa ha byuma bitwendeka mu malombelo etu, co tumwesa ngwetu twakandelela ku bwana bwa lilombelo. Yehova “abwahelela” manene mwafwa majwi etu apwa ngwe lwengo lwa insense kuli ikeye.—Visi 15:8.