CILONGESA 29
Tupangeleni Hamo na Yesu Ntwama Yetu
“Moko yoshe ya mwilu nei ya hano hasi bananjanayo.” —MATEO 28:18.
MWASO 13 Kilistu Ikeye Mwanja Wetu
BILI MUNO MU CILONGESA *
1. Yehova ashaka ngwendi tulinge bika?
NJAMBI ashaka ngwendi muzimbu waubwa wa Bumwene bawambulule mu kaye koshe. (Mako 13:10; 1 Tima 2:3, 4) Yehova wamona eci cipangi kupwa ca seho manene, ngeci nangula Munendi yazema mangana acitwamenene. Twakulahela ngwetu Yesu atwamenena mwamubwa cipangi ca kwambulula kweta na kumamaneselelo mu kulitombola na cizango ca Yehova.—Mateo 24:14.
2. Bika bitusimutwiya muno mu cilongesa?
2 Muno mu cilongesa, tumona omwo Yesu ali na kutwamenena “ndungo wa kulongwa na kunyanyama” mu kubwahesa byakulya bya ku sipilitu na kukwasa baka-kumukabangeya bapange mwamubwa cipangi cakama ca kwambulula. (Mateo 24:45) Tumona lalo byanasa kulinga umo na umo wetu mangana akundwiye cipangi cali na kutwamenena Yesu na ndungo wa kulongwa.
YESU ALI NA KUTWAMENENA CIPANGI CA KWAMBULULA
3. Yehova nana Yesu moko ya kulinga bika?
3 Yesu ali na kutwamenena cipangi ca kwambulula. Tuzibuka bati ngoco? Simbu kanda aye mwilu, Yesu walikungulwile na baka-kumukabangeya bamo ha munkinda mu Ngalileya. Wabalekele ngwendi: “Moko yoshe ya mwilu nei ya hano hasi bananjanayo.” Wabalekele lalo ngwendi: “Ngeci bene, yeni oni, ku miyati yoshe na kubapwisa bandongesi bange.” (Mateo 28:18, 19) Ngeci, Yesu bamwana moko ya kutwamenena cipangi ca kwambulula.
4. Bika bitulingisa tukulahele ngwetu Yesu acili na kutwamenena cipangi ca kwambulula?
4 Yesu wendekele ngwendi cipangi ca kwambulula na kupwisa banu bandongesi bakacilinga ku “miyati yoshe.” Wendekele lalo ngwendi akakala na baka-kumukabangeya “matangwa oshe noho ha kukotoka kwa kaye.” (Mateo 28:20) Awa majwi amwesa ngwawo Yesu natwalelelaho kutwamenena cipangi ca kwambulula kwa kweta na simbu ino.
5. Tuli na kushulisilila bati bupolofweto buli ku Myaso 110:3?
5 Yesu kalishoshomwenene ngwendi mu matangwa a kukotoka kumukakala baka-kwambulula babangi. Wazibukile ngwendi majwi apolofwetele muka-kwimba akalishulisilila. Ou muka-kwimba wapolofwetele ngwendi: “Banu bobe bakalyana na bimbunge byabo byoshe ha litangwa liukatwamenena maswalale bobe mu nzita.” (Myaso 110:3, NWT) Nga neni muli na kupangako cipangi ca kwambulula, co muli na kukundwiya cipangi cali na kutwamenena Yesu na ndungo wa kulongwa, co lalo muli na kushulisilila obu bupolofweto. Cipangi cili na kwenda, oloni kuli bukalu butuli na kuliwana nabwo.
6. Bukalu muka bubali na kuliwana nabwo baka-kwambulula Bumwene ano matangwa?
6 Bukalu bumo bubakaliwana nabwo baka-kwambulula Bumwene, bukapu kubalwisa. Baka-kutengulukila na bantwama ba bulombelo na baka-bupolitiki, banalingisa banu babangi bamone cipangi cetu mu ngila ya kuhenga. Nga babushoko bwetu na banu batulizibuka nabo na batukapanga nabo bataba awa makuli, banasa kutusindiya tulikele kupangela Yehova na kwecela cipangi ca kwambulula. Mu mafuti amo, bitozi betu bakajujwisa bandolome na bandokazi betu na kubayandesa na kubaka mu tumenga. Oloni kutukomoka mwafwa Yesu wapolofwetele ngwendi: “Miyati yoshe bakamizinda omwo lizina lyange.” (Mateo 24:9) Kutulwisa kumwesa ngwabo cipangi cituli na kulinga cikazibisa Yehova kubwaha. (Mateo 5:11, 12) Liyabolo ikeye ali na kulingisa banu batulwise. Oloni Yesu ali na nzili kumutubakana. Muzimbu waubwa uli na kweta ku mafuti oshe mwafwa Yesu ali na kutukwasa. Tusimutwiyeniko ha bukaleho bumo bumwesa ngwabo Yesu ali na kutukwasa.
7. Byuma muka bimwesa ngwabo bupolofweto buli ku mukanda wa Kujombolola 14:6, 7 buli na kulishulisilila?
7 Bukalu bukwabo butukaliwana nabwo mu cipangi ca kwambulula, bukapu kwambulwila banu baje bendeka ndaka yeka. Mu cimona camwesele kapolofweto Yowano, Yesu wapolofwetele ngwendi obu bukalu kubukonowesa muzimbu waubwa kweta ku banu. (Tandeni Kujombolola 14:6, 7.) Mu ngila muka? Tuli na kukwasa banu ba Njambi bazibe muzimbu wa Bumwene. Ano matangwa, banu mu kaye koshe bali na kulikuwa byakulya bya ku sipilitu bili ha keyala ya ha webusaiti yetu ya jw.org mu bindaka bya kutubakana 1,000. Cibunga ca kutwamenena catabesele kunungulula libulu lya Likuweni Kuyoya Myaka Yoshe! lije lituli na kupangesa mu kulongesa banu Mbimbiliya mu bindaka bya kutubakana 700. Co lalo hali na mavidio a tubebebe na mabulu a tupuputwa. Tuli na kulimwena bupolofweto bwabwingi mubuli na kulishulisilila. Banu “ba ku bindaka bya ku mafuti oshe” bali na kulilongesa “ndaka ya kujela” nambe ngwetu busunga bwa mu Mbimbiliya. (Zaka 8:23; Zefa 3:9) Yesu Kilistu ikeye ali na kutukwasa tulinge ebi byuma byoshe.
8. Bubwa muka bunatundu mu cipangi cetu ca kwambulula?
8 Ano matangwa, banu ba kutubakana 8,000,000 mu mafuti akutubakana 240 bali mu munga ya Yehova, co mwaka na mwaka banu babangi bakabambwitika. Cuma ca seho cili na kutuzibisa kubwaha, keti bwingi bwa banu bali na kwija mu munga, oloni aba bandolome na bandokazi bakeseka mubasela mwoshe kutengulula bifwa byabo na kuzala “bunu bwabuha.” (Kolo 3:8-10) Banu babangi banecela bupangala, lwozi, kaangu na kuzema manene lifuti lyabo. Bali na kushulisilila bupolofweto buli ku mukanda wa Isaya 2:4 mwafwa ‘kubesi na kulilongesa lalo kulwa nzita.’ Nga tweseka mutwasela mwoshe kuzala bunu bwabuha, tukwasa banu baije mu munga ya Njambi. Co lalo tumwesa ngwetu tuli na kukabangeya Yesu Kilistu uje wapwa ntwama yetu. (Yowa 13:35; 1 Petu 2:12) Tuli na kwasa kulinga ngoco mwafwa Yesu ali na kutukwasa.
YESU NANGULA NDUNGO
9. Kwesekesa na Mateo 24:45-47, Yesu wendekele ngwendi bika bikalingiwa mu matangwa a kukotoka?
9 Tandeni Mateo 24:45-47. Yesu wendekele ngwendi mu matangwa a kukotoka akangula “ndungo wa kulongwa na kunyanyama” uje akabwahesa byakulya bya ku sipilitu. Ngeci twakulahela ngwetu ha simbu ino ou ndungo nazezama. Yesu ali na kupangesa ka cibunga kakandondo ka bandolome ba kubwabesa mu kubwahesela banu ba Njambi “byakulya ha simbu inapande.” Aba bandolome kubesi kuliziba ngwabo bapwa bantwama ba bandolome na bandokazi bakwabo. (2 Koli 1:24) Oloni bakanuka ngwabo Yesu Kilistu ikeye “ntwama na muka-kushika” banu bendi.—Isaya 55:4.
10. Libulu muka lili ha cikupulo linamikwasa mushangumuke kupangela Yehova?
10 Kushwa mu 1919, ndungo wa kulongwa nabwahesa mabulu a kuliseza-seza aje anakwasa banu babangi balilongese busunga. Mu 1921, ndungo wabwahesele libulu lya The Harp of God, mangana akwase banu balilongese busunga. Mu kwita kwa simbu wabwahesele mabulu eka. Libulu muka lyamikwasele muzibuke Tate yetu wa mwilu na kumuzema? Kuma libulu lya “Let God Be True,” indi libulu lya Niti ye isa kwa Bupilo Bwa Kamita, indi libulu lya Wa Kona Ku Pila Ku Ya Ku Ile mwa Paradaisi fa Lifasi-mubu, indi Zibo Ye Isa kwa Bupilo bo Bu Sa Feli, indi libulu lya Bibele I Lutañi Luli? Indi libulu lya Bika Biitulongesa Mbimbiliya? Indi hamo libulu lyaliha lya Likuweni Kuyoya Myaka Yoshe! Awa mabulu anakwasa manene mu cipangi ca kupwisa banu bandongesi ha simbu ibawasonekele.
11. Mwafwa bika tubaboshe tunapande kutwalelelaho kulilongesa byabingi hali Yehova?
11 Baje banalilongesa ololo busunga keti bakebo lika banapande kulilongesa byabingi hali Yehova. Tubaboshe tunapande kutwalelelaho kulilongesa bya Yehova. Kapositolo Paulu wendekele ngwendi: “Byakulya bya kukola byapwa bya bakulunu.” Watwaleleleho kwendeka ngwendi kupangesa byuma bitulilongesa mu Mbimbiliya kutukwasa ‘twangunune bubwa na bubi.’ (Heve 5:14) Ano matangwa kukwapwile kwakwasi kukabangeya mashiko a mu Mbimbiliya mwafwa bilinga byabibi binatumu manene. Oloni Yesu akatukwasa tulilongese byuma bije bikanyamesa likulahelo lyetu. Ebi byuma tukabiwana mu Mbimbiliya. Yesu akatwamenena ndungo wa kulongwa mangana abwahese ebi byakulya bya ku sipilitu.
12. Tunamwesa bati ngwetu twasingimika lizina lya Njambi ngwe mwalingilile Yesu?
12 Tunamwesa ngwetu twasingimika lizina lya Njambi ngwe mwalingilile Yesu. (Yowa 17:6, 26) Cakumwenako mu 1931, twalilukile lizina lya mu Mbimbiliya lya Bakaleho ba Yehova. Kulinga ngoco kunamwesa ngwabo twasingimika lizina lya Njambi. (Isaya 43:10-12) Co kushwa mu October 1931, lizina lya Yehova tukalisoneka ha liputa lya helu lya magazini ya Kaposhi ka Kukengela. Kutundaho, mu Mbimbiliya ya New World Translation of the Holy Scriptures, tunelwisa lizina lya Njambi ha mitambela hoshe halinapande kukala. Oku kunamwesa ngwabo twaliseze na ba mu ma ceci a bulombelo bwa makuli baje banatundisa lizina lya Njambi mu bimbimbiliya bibananungulula.
YESU NAKUNGULULA BAKA-KUMUKABANGEYA
13. Bika byamilingisa mukulahele ngweni Yesu ali na kupangesa “ndungo wa kulongwa na kunyanyama” ano matangwa? (Yowa 6:68)
13 Yesu nakwasa “ndungo wa kulongwa na kunyanyama” atwamenene munga ya banu baje bali na kulemesa Yehova mu busunga hano hasi. Muli na kuliziba bati kukala omu mu munga? Hamo mukalizibi mwalizibilile kapositolo Petulu uje wakumbulwile Yesu ngwendi: “Mwene, tuya kuli iyajo lalo? Yobe uli na majwi aje ana mwonyo wa myaka yoshe.” (Yowa 6:68) Ngwe kukala mu munga ya Yehova kwai, ngwe tuli kuli ha simbu ino? Ei munga ikeyo yakapangesa Kilistu mu kutubwahesela byakulya bya ku sipilitu bije bikatukwasa tutwaleleleho kupwa ba kulongwa kuli Yehova. Kutundaho, akatulongesa mwakupangela mwamubwa cipangi ca kwambulula. Co lalo akatukwasa tuzale “bunu bwabuha” mangana tuzibise Njambi kubwaha.—Efeso 4:24.
14. Kukala mu munga ya Yehova kunamikwasa bati ha simbu ya mushongo wa COVID-19?
14 Yesu akatutwamenena na mu simbu ya bukalu. Cakumwenako, mushongo wa COVID-19 muwashangumukile, banu babangi mu kaye kubazibukile bya kulinga. Oloni Yesu watukwasele tuzibuke bya kulinga mangana tulinyungilile. Batushongangeyeye kuzala tunanga twa kufwika ku kanwa na ku majulu nga tuli ku mbunga na kulishondoloka. Bakulunu babanukisile ngwabo banapande kusimutwiya na bandolome na bandokazi ba mu bikungulukilo byabo kushwa kumo, mangana bazibuke mubasa kubakwasela ku mubila na ku sipilitu. (Isaya 32:1, 2) Kutundaho, twakele na kutambula malipoti a Cibunga ca Kutwamenena, aje atukwasele tuzibuke bya kulinga.
15. Kutwamenena muka kutwatambwile kutalesa ku kukunguluka na kwambulula ha simbu ya mushongo wa COVID-19, co bubwa muka bwatundilemo?
15 Ha simbu ya mushongo wa COVID-19, batukwasele tuzibuke mwakupangela cipangi ca kwambulula na kukunguluka. Bwasi-bwasi, twashangumukile kukunguluka biwano bya cikungulukilo, biwano bya citingitingi, na biwano byakama kupangesa intaneti. Kutundaho, twashangumukile kwambulula kupangesa ma foni na mikanda. Yehova wabezikisile kulifwita kwetu. Nambala ya baka-kwambulula inalibwezelela mu mafuti amangi. Baka-kwambulula babangi banalimwena byuma byabibwa binatundu mu cipangi ca kwambulula ha simbu ya mushongo wa COVID-19.—Taleni cipalo ca “ Yehova Nabezikisa Cipangi Cetu ca Kwambulula.”
16. Bika bitwasa kukulahela?
16 Ha simbu ya mushongo wa COVID-19, bamo basinganyekele ngwabo munga yakaluwisile lika byuma. Oloni mu kwita kwa simbu, balimwenenene ngwabo byuma biyatulekele munga byatukwasele manene. (Mateo 11:19) Kusinganyekesesa omwo Yesu nakwasela banu bendi ha simbu ya mushongo wa COVID-19, kutulingisa tukulahele ngwetu nameme byuma bikakaluwe bati kulutwe, Yehova na Munendi yazema batwalelelaho kukala netu.—Tandeni Vahevelu 13:5, 6.
17. Muli na kuliziba bati ha kumyana Yesu kupwa ntwama yeni?
17 Twabezika manene ha kutwana Yesu kupwa ntwama yetu. Tuli mu munga ya kulikwatasana nameme muli banu ba bisemwa na miyati na bindaka bya kuliseza-seza. Mbimbiliya inatukwasa tuzibuke byuma byabingi bya ku sipilitu na mwakupangela cipangi ca kwambulula. Tunalilongesa bitunapande kulinga mangana tuzale bunu bwabuha na kulizema umo na mukwabo. Tunapande kulishasha ha kutwana Yesu kupwa ntwama yetu.
MWASO 16 Shangazaleni Jah Mwafwa ya Munendi Yanabwabesa
^ Banalume na banakazi na banike babangi-bangi bali na kwambulula muzimbu waubwa na ntwima. Neni muli na kulinga ngoco ndi? Nga ngoco, co zibukeni ngweni Yesu ikeye ali na kumitwamenena. Muno mu cilongesa, tusimutwiya ha bukaleho bumwesa ngwabwo Yesu ali na kutwamenena cipangi ca kwambulula ano matangwa. Kulinga ngoco kutukwasa tutwaleleleho kupangela Yehova oku tukabangeya Kilistu ntwama yetu.
