1-2. Bika bilingisa Yehova atambule kulemesa kwetu?

 LIJWI lya ‘kulemesa’ likamyanukisa byuma muka? Hamo likamyanukisa ndolome wa kulikehesa uje natsikama ku mwela wendi oku alombela kuli Yehova na mbunge yendi yoshe. Indi hamo likamyanukisa naanga ya kubwahelela ije ili na kulikuwa kulilongesela Mbimbiliya hamo lika.

² Aba banu batunendeka boshe bali na kulemesa Yehova. Kuma Yehova atambula kulemesa kwabo ndi? Alinga ngoco nga bamulemesa mu kulitombola na cizango cendi na kumwesa ngwabo bamuzema na kumusingimika. Twazema manene Yehova. Tuzibuka ngwetu Yehova ashaka ngwendi tumulemese, co tushaka kumulemesa mu ngila ije imuzibisa kubwaha ku mbunge.

3. Bika bitusimutwiya muno mu cilongesa?

³ Muno mu cilongesa tusimutwiya ha kulemesa kuje kwazibisile Yehova kubwaha kusañulu. Kutundaho, tusimutwiya byuma ha 8 bitunapande kulinga mangana Yehova atambule kulemesa kwetu. Omwo tusimutwiya ebi byuma, tunapande kulilula, tumone hatunapande kupangela mangana tulemese Yehova mu ngila inapande. Tumona lalo omwo kulemesa Yehova mu ngila inapande kutukwasela tupwe ba kubwahelela.

4. Bangamba ba Yehova ba kusañulu bamwesele bati ngwabo bazemene Yehova na kumusingimika?

⁴ Kusañulu kwakele banalume ba kulongwa ba kufwa ngwe Avele, Nowa, Abilahama na Yombi baje bamwesele ngwabo bazemene Yehova na kumusingimika. Bamwesele bati ngoco? Bononokele Yehova, kumukulahela na kumwana milambu.  Mbimbiliya kuyatulekele byuma byose bibalingile mu kulemesa Yehova. Oloni besekele mubaselele mwoshe kusingimika Yehova, co watambwile kulemesa kwabo. Mu kwita kwa simbu, Yehova wanene Baisalele mashiko kwitila muli Mosesa. Awa mashiko amwesele byuma byabingi bibapandele kulinga mangana balemese Yehova mu ngila inapande.

5. Yesu mwasangukile Yehova washakele ngwendi baka-Kilistu bamulemese bati?

⁵ Munima ya kusanguka kwa Yesu, Yehova katabesele bangamba bendi bamulemese mu kukabangeya mashiko a Mosesa. (Loma 10:4) Baka-Kilistu bapandele kukabangeya “lishiko lya Kilistu.” (Ngala 6:2) Baka-Kilistu bononokele eli “lishiko” mubatembwininine Yesu na kwononoka bilongesa byendi. Eli lishiko kulyamwesele byuma byoshe bibapandele kulinga baka-Kilistu na bije kubapandele kulinga. Na matangwa ano, baka-Kilistu bali na kweseka mubasela mwoshe kukabangeya Kilistu mangana bazibise Yehova kubwaha na kuwana ‘kuhwima.’—Mateo 11:29.

6. Tunapande kulinga bika mangana cino cilongesa citukwase manene?

⁶ Omwo tusimutwiya ha cuma na cuma cinakundama ku kulemesa Njambi, lihuleni ngweni: ‘Njili na kulinga mwamubwa eci cuma ndi?’ Munasa kulihula lalo ngweni: ‘Njinapande kulinga bika mangana njilemese mwamubwa Njambi?’ Nameme muliziba ngweni muli na kulinga mwamubwa ha simbu ino, oloni lombeni Yehova amikwase kunanguka hamunapande kupangela mangana mubwezelele ku byuma byabibwa bimuli na kulinga.

7. Yehova akamono bati malombelo etu a kutundilila kwisi ya mbunge?

⁷ Tukalemesa Yehova mutukalombela kuli ikeye. Mbimbiliya inesekesa malombelo etu ku insense ibakele na kwana ku mbalaka na ku tembele. (Myaso 141:2) Ije insense yakele na lwengo lwalubwa luje lwakele na kuzibisa Njambi kubwaha. Mu ngila imo lika, malombelo etu a kutundilila kwisi ya mbunge akazibisa Njambi ‘kubwaha’ nameme tupangesa majwi amasi. (Visi 15:8; Kwitu 33:10) Twakulahela ngwetu Yehova akalizibi kubwaha ku mbunge mutukamuleke mutwamuzemena na kukandelela ku byuma byali na kutulingila. Ashaka ngwendi tumuleke bishoti byetu, byuma bitunabandamena na kumulomba byuma bitutonda. Simbu kanda mulombele kuli Yehova munapande kulibwahesela cimweja byuma bimusimutwiya nendi. Nga mulinga ngoco, co mwana “insense” ya lwengo lwalubwa manene kuli Ishweni wa mwilu.

8. Cipangi muka cikatukwasa tushangazale Njambi?

⁸ Tukalemesa Yehova mutukamushangazala. (Myaso 34:1) Tukashangazala Yehova mutukalekeko bakwetu bifwa byendi byabibwa na byuma byanatanga. Nga tukala na mbunge ya kukandelela, co tushangazala Yehova. Mwafwa nga tusinganyekesesa ha byuma byoshe byanatulingila, co tumushangazala. Cipangi ca kwambulula cikatukwasa manene ‘twane mulambu wa kushangazala Njambi kupangesa tunwa twetu.’ (Heve 13:15) Tunendeka ngwetu tunapande kulibwahesela simbu kanda tulombele kuli Yehova. Mu ngila imo lika, tunapande kulibwahesela mangana tuzibuke mwa kukendekela mwamubwa na banu mu lihya. Tushaka ngwetu mulambu wetu wa kushangazala Yehova upwe waubwa manene. Mukemwo tukendeka kutundilila kwisi ya bimbunge byetu omwo twambulwila banu.

9. Biwano bikatukwasa bati ngwe mubyakwaselele Baisalele? Endekeni mubinamikwasela biwano.

⁹ Tukalemesa Yehova mutukai na kukunguluka. Baisalele babalekele ngwabo: “Banalume boshe ba ku muyati weni bakalikungulwile  ku mesho a Shukulu Kalunga Njambi yeni bisimbu bitatu ha mwaka ku mwela uje waakangula Shukulu Kalunga wa kumulemesela.” (Kwitu 16:16) Basezele membo abo na bimbuto bibalimine kwa kujeneka munu wa kubinyungilila. Oloni Yehova wabakulahesele ngwendi: “Naumo wahi akamifungulula mu lifuti lyeni ha bisimbu bya biwano.” (Kutu 34:24) Baisalele bakele na kuya ku ciwano ha mwaka na mwaka mwafwa bakulahelele manene Yehova. Ebi biwano byabakwasele manene mwafwa byabakwasele bazibisise mashiko a Njambi na kusinganyekesesa ha byuma byabibwa byabalingilile. Co lalo byabakwasele balitakamese umo na mukwabo. (Kwitu 16:15) Netu tuwana bukwasi bwa kulifwa nga tweseka mutwasela mwoshe kuya ku biwano. Co lalo Yehova akazibi manene kubwaha ku mbunge nga twija ku biwano oku twalibwahesela na kukumbulula bikumbululo byabihi bije byeta banu ku bimbunge.

10. Bika twendekela ngwetu kwimba kwapwa kwa seho mu kulemesa Yehova?

¹⁰ Tukalemesa Yehova mutukembi myaso na bandolome na bandokazi. (Myaso 28:7) Baisalele bamwene kwimba kupwa kwa seho mwafwa bazibukile ngwabo kwapwa kulemesa Yehova. Mwene Ndabiti wangwile Balebi ba kupwa 288 mangana bapwe baka-kwimba ku tembele. (1 Mizi 25:1, 6-8) Ano matangwa tukamwesa ngwetu twazema Njambi mutukamwimbila myaso ya kumushangazala. Tubaboshe twasa kwimba myaso ya kumushangazala nameme twakala na malungi. Cakumwenako, Mbimbiliya inendeka ngwayo: ‘Tubaboshe bisimbu byabingi tukasebuka mu kwendeka.’ Oloni kutwesi kulikela kusimutwiya nga tuli ku cikungulukilo nambe mu lihya. (Yako 3:2) Mu ngila imo lika, tunapande kushangazala Yehova nameme tuliziba ngwetu kutwasa kwimba mu butongwe.

11. Kwesekesa na mukanda wa Myaso 48:13 mwafwa bika tunapande kunoneka simbu ya kulilongesa Mbimbiliya na naanga yetu?

¹¹ Tukalemesa Yehova mutukalilongesa Lijwi lyendi na kukwasa bana betu bamuzibuke. Ha litangwa lya Sabata Baisalele kubakele na kupanga, oloni bapangesele eli litangwa ku kukanyamesa busamba bwabo na Yehova. (Kutu 31:16, 17) Bisemi ba kulongwa bakele na kulongesa bana babo bya Yehova na byuma byabibwa byabalingilile. Netu tunapande kukala na cinoneko ca kutanda na kulilongesa Lijwi lya Njambi. Ei inapu ngila itukalemeselamo Yehova, co ikatukwasa tushwenye kuyehi nendi. (Myaso 73:28) Co lalo nga tulilongesa Mbimbiliya hamo lika na naanga yetu, co tukwasa bana betu balikute busamba na Tete yetu wa mwilu uje watuzema manene.—Tandeni Myaso 48:13.

12. Yehova wamwene bati cipangi ca kutunga mbalaka na kubwahesa byuma byamwo, co tulilongesako bika?

¹² Tukalemesa Yehova mutukatungu na kubwahesa myela ya kumulemesela. Mbimbiliya imwesa ngwayo Yehova wamwene cipangi ca kutunga mbalaka na kubwahesa byuma byamwo kupwa ca ‘kujela.’ (Kutu 36:1, 4) Na matangwa ano, Yehova wamona cipangi ca kutunga Binjibo bya Bumwene na mitungo yeka ya mu munga yetu kupwa ca kujela. Bandolome na bandokazi betu babangi bakakala na simbu yaingi ya kulyana kutunga ei mitungo. Tukakandelela manene ku bipangi bya seho bibakapanga aba bandolome na bandokazi mu kukundwiya Bumwene. Oloni nabo bakawana simbu ya kwambulula. Bamo bakapu bapainiya. Bakulunu mu bikungulukilo bamwesa ngwabo bali na kukundwiya bipangi bya kutunga omwo bangula aba bandolome na bandokazi bali na kupanga na nzili kupwa bapainiya  nga banapwisamo bitondeka. Nameme kutwesi na ceke ca kutunga tubaboshe twasa kukwasa mu cipangi ca kujelesa na kunyungilila ei mitungo.

13. Tunapande kumona bati milambu itukana mu kukwasa bipangi bya Bumwene?

¹³ Tukalemesa Yehova mutukana milambu ije ikwasa mu bipangi bya Bumwene. Baisalele kubapandele kuya maboko-boko ku biwano. (Kwitu 16:16) Bapandele kwambatako mulambu umo kwesekesa na byuma bibakele nabyo. Mubalingile ngoco bamwesele kukandelela ku byuma byoshe byakele na kubalingila Yehova. Twasa kumwesa bati ngwetu twazema Yehova, co lalo tuli na kukandelela ku byuma bya ku sipilitu byali na kutwana. Ngila imo itunasa kulingilamo ngoco inapu kwana milambu ije ikwasa mu cikungulukilo cetu na mu bipangi bya mu kaye koshe kwesekesa nomu mutunakwatelamo. Kapositolo Paulu wendekele ngwendi: ‘Omwo nga yeni muli na cizango ca kwana, co Njambi akatambula bwana bweni nga mumwana bije muli nabyo keti bije kumwesi nabyo.’ (2 Koli 8:4, 12) Yehova akakandelela ku bwana bwoshe-bwoshe butumwana kutundilila kwisi ya mbunge yetu.—Mako 12:42-44; 2 Koli 9:7.

14. Kwesekesa na mukanda wa Visimo 19:17 Yehova akamono bati byuma bitukalingila bandolome betu baje bali mu bujene?

¹⁴ Tukalemesa Yehova mutukakwasa bakwetu baka-Kilistu baje bali mu bujene. Yehova wakulahesele Baisalele ngwendi nga bazibila ngozi tuhutu, co ababezikisa. (Kwitu 15:7, 10) Simbu yoshe itukwasa mukwetu muka-kukulahela uje ali mu bujene, kunapu lika ngwe tuli na kwana bwana kuli Yehova. (Tandeni Visimo 19:17.) Cakumwenako, baka-Kilisitu ba ku Filipu mubatumine bwana kuli Paulu ha simbu ibamukutile, Paulu wendekele ngwendi buje bwana bwapwile ‘mulambu waubwa uje uzibisa Njambi kubwaha.’ (Fili 4:18) Singanyekeni ha banu bali mu cikungulukilo ceni, co lihuleni ngweni: ‘Kuli ndolome nambe ndokazi injasa kukwasa ndi?’ Yehova abwahelela manene nga tupangesa simbu yetu, nzili yetu, cashu cetu na byuma bituli nabyo mu kukwasa bakwetu baje bali mu bujene. Yehova akamono ebi bipangi byoshe kupwa ngila itukamulemeselamo.—Yako 1:27.

15. Nameme kulemesa Yehova kutondeka twakeko manene mbunge na kulifwita, mwafwa bika kucapwile citele?

¹⁵ Kulemesa Yehova kutondeka kwakako manene mbunge na kulifwita. Oloni kucapwile citele. (1 Yowa 5:3) Bika twendekela ngoco? Kuzema Yehova kukekwo kukatushongangeya tumulemese. Acilingeni ngwe muli na kumona mwanike uje ashaka kwana baishe cuma cimo. Ou mwanike ali na kusona cikupulo mangana ane baishe. Kasinganyeka ngwendi simbu yanamanesela ku kusona cije cikupulo inapu ya kubiisa lika ngoco. Wazema baishe, co ashaka kubana cije cikupulo canasono. Mu ngila imo lika, netu tukapangesa simbu yetu na nzili yetu mu kulemesa Yehova mwafwa twamuzema.

16. Kwesekesa na mukanda wa Vahevelu 6:10, Yehova akalizibi bati ha byuma byanasa kulinga umo na umo wetu mangana amuzibise kubwaha?

¹⁶ Bisemi kubapandele kubandamena ngwabo bana babo boshe babana bwana bwa kulifwa. Bazibuka ngwabo mwana na mwana kuli byuma byanasa kulinga nebi kasa kulinga. Mu ngila imo lika, Tate yetu wa mwilu azibuka byuma byanasa kulinga umo na umo wetu nebi kasa kulinga. Hamo mwasa kulinga byabingi kutubakana banu bamo bamwazema. Nambe hamo kumwasa kulinga bipangi bimo bibali na kulinga bakweni mwafwa ya bukulukazi,  kubinja nambe bipangi bya mu naanga. Keti muzeye. (Ngala 6:4) Yehova kakebala bipangi bimuli na kupanga. Nga mumupangela kutundilila kwisi ya mbunge, co mumuzibisa kubwaha. (Tandeni Vahevelu 6:10.) Yehova akamono nameme biyongola bya mu mbunge yeni. Yehova ashaka ngwendi mubwahelele na kumulemesa mu bingila bimwasa.

17. (a) Nga kuli bingila bimo bya kulemeselamo Njambi bikamikaluwila, co munapande kulinga bika? (b) Ha bingila bibanendeka mu cipalo ca “ Bwezeleleni ku Byuma Bimilingisa Mupwe ba Kubwahelela,” ngila muka inamikwasa manene?

¹⁷ Tunapande kulinga bika nga kukatukaluwila kulingako byuma bimo bitwasa bya kufwa ngwe cilongesa ca munu endi lika nambe kwambulwila ku mbunga? Nga tulizilisa kulinga ebi byuma simbu yoshe, co bitukwasa manene, co lalo tubizema manene. Tunasa kwesekesa kulemesa kwetu ku bweho bumo bwa kukanyamesa mubila nambe kulilongesa kusika ngoma mu butongwe. Nga kutulingi ebi byuma simbu yoshe, co kutulikuubyo. Bubwa muka bwasa kutundamo nga tulinga ebi byuma ha litangwa na litangwa. Ha kulibanga tunasa kubilinga-linga ha kasimbu kakandondo ha litangwa na litangwa, oloni mu kwita kwa simbu twasa kubwezelela ku simbu itubilinga-linga. Omwo tulimwena bubwa butundamo, co tukala na lishungu lya kubilinga na kulikuwabyo ha simbu itubilinga. Cakumwenako citunendeka ca kundama kukulemesa kwetu.

18. Cuma muka ca seho citunapande kulinga, co bubwa muka butundamo?

¹⁸ Kulemesa Yehova na mbunge yetu yoshe cikeco cuma ca seho manene citunapande kutwalelelaho kulinga. Kunatukwasa tupwe ba kubwahelela na kukala na lilabelelo lya kukalemesa Yehova ku myaka yoshe. (Visi 10:22) Ha simbu ino tunapu ba kushubuluka mwafwa tuzibuka ngwetu Yehova akakwasa bangamba bendi mubakaliwana na bukalu. (Isaya 41:9, 10) Kuli byuma byabingi bitulingisa tupwe ba kubwahelela omwo tupangela Tate yetu wa cizemo, uje nafwila kutambula bumpau na kasingimiko ku byuma byoshe byanatanga.—Kujo 4:11.